[1] Wo kɔ, Isa ka sana dɔ la aa kɔbiladennu yɛ k'a jiya ko ai ka kan ka Ala dali waate bɛ. Ai do jei kà tɛɛ ka wo boloka,
[2] a vɛɛ: «A ka kɛ kititɛɛba dɔ le le, min tɛɛ so dɔ la. A tɛɛ tɛ siyanna Ala ɲa, a do tɛɛ tɛ mɔɔ suu suu jatela.
[3] Kɛsamoso dɔ gbazan tɛɛ so kelen wo la, min tɛɛ kɛla nala a fɛlɔ k'a fɔ a yɛ, a vɛɛ: ‹I yi ǹa jo di m̀ ma ǹ juu ɲakɔlɔ.›
[4] A ka mɛn ne, kititɛɛba tɛɛ tɛ a fɛ ka moso madɛmɛn. Kɛɛ lon dɔ ka kɛ, a vɛɛ a jɛlɛ yɛ: ‹Ǹ tɛ siyanna Ala ɲa, ǹe do tɛ mɔɔ suu suu jatela.
[5] Wo bɛ n'a kɛ, moso min yi ǹ ɲagbala waate bɛ. Wo lɔ, fɔ ǹ aa jo di a ma, a kana to nala ka ǹ sɛɛ waate bɛ.›»
[6] Wo kɛ, Fanma Isa vɛɛ: «Kititɛɛba telenbali na min fɔla, ài y'ài tolo malɔ wo ma kosɛvɛ.
[7] Ni Ala ya mɔɔlu ka to ai makasila a yɛ su ni tele, a tɛ jo di ai ma? A mɛntɔle jani a ai madɛmɛn? Wo tɛ kɛla!
[8] Ǹ a fɔ ài yɛ, ǹ ko Ala yi jo dile ai ma falafala! Wo bɛ n'a kɛ, ǹe Mɔɔnivin Tanin vɛ nala lon min na, jalasa ǹ'i limandeya sɔlɔnne duukolo kan?»
[9] A dɔlu tɛɛ je, minnu tɛɛ ai jɛlɛ jatela mɔɔ telenninnu le k'ai jɛlɛ lafisa a dɔlu ma. Wo lɔ, Isa ka sana dɔ la ai yɛ,
[10] a vɛɛ: «A ka kɛ kɛ́ fila le le, minnu ka taa Aladaliya lɔ lɔhɔlɔmabonba la. Kelen tɛɛ Falisi le le, a tɔ kelen tɛɛ nisɔɔnminaba le ke.
[11] Falisi kɛ́ k'i lɔ ka Ala madali a jɛlɛ ma, a vɛɛ: ‹Ala, ǹ'i balika bɔla i yɛ k'a masɔlɔn ǹe tɛ iwo mɔɔ dɔlu, minnu yi gbananyalu kɛla ani ka bɛnbaliyakolu kɛ ani ka jalɔnyalu kɛ, hali ǹe kɛnin tɛ iwo nisɔɔnminaba min ve.
[12] Ǹ'i sun donna tele fila le le lɔɔtɛ kelen kɔlɔ ani ǹ'i jaa bɔla ǹa ɲininnifen bɛ lɔ.›
[13] Kɛɛ nisɔɔnminaba ka to poon. A ma diɲa ka hali a ɲa lajɛlɛ sanma, fɔ ka kɛ a sisi magbasile josomakasi bolo, a vɛɛ: ‹Ala, hina ǹ na, ǹe min yi julumbutɔ le.›»
[14] Isa vɛɛ: «Ǹ a fɔ ài yɛ, ǹ ko nisɔɔnminaba ka kɛ mɔɔ telennin ne le Ala ɲakɔlɔ ka taa aa lu ma, kɛɛ dɔ wo ma kɛ a le. K'a masɔlɔn, mɔɔ mɔɔ vɛ a jɛlɛ lajɛlɛla, Ala yi wo tii lajiile. Kɛɛ ni mɔɔ mɔɔ do vɛ a fanmajiila, Ala yi wo tii lajɛlɛle.»
[15] Mɔɔ dɔlu tɛɛ nala hali denkulanilu le Isa fɛ, sa a a bolo la ai kan ka duwawu kɛ ai yɛ. Aa kɔbiladennu ka wo ye mingɛ, ai vɛ wolu makumala.
[16] Kɛɛ Isa ka dennilu kili ko ai yi na a ma. A do vɛɛ aa kɔbiladennu yɛ: «Ài y'a to dennilu yi na m̀ ma. Ài kà ai dansii k'a masɔlɔn mɔɔ minnu kɛnin iwo denni, wolu le yi Ala ya masaya le kɔlɔ.»
[17] Ǹ'i tuɲa fɔ ài yɛ, ni mɔɔ min ma a fanmajii Ala ya masaya kɔlɔ iwo denni, wo tii tɛnala donna a kɔlɔ tuun.»
[18] Jahudiyalu ya ɲamɔɔ dɔ ka na Isa maɲininga, a vɛɛ: «Kalanmɔɔ ɲuma, ǹ ka kan ka mindɛ kɛ sa ǹ'i nimaya banbali sɔlɔn?»
[19] Isa k'a javi, a vɛɛ: «Mindɛ kɛnin i n'a fɔla m̀ ma ko ‹kalanmɔɔ ɲuma›? Mɔɔ suu suu ɲumayanin tɛ fɔ Ala kelenpesa.
[20] I ka Ala aa seliyalu lɔn, ko: ‹I kà mɔɔ faa, i kà jalɔnya kɛ, i kà suɲali kɛ, i do kà kɛ faɲafɔsele le, ani i i fa ni i ba buɲa.»
[21] A ka Isa javi, a vɛɛ: «Kalanmɔɔ, m̀'ɛ seliya wo bɛ labato k'a ta ǹ denniya waate ma.»
[22] Isa ka wo mɛn k'a fɔ kɛ́ yɛ, a vɛɛ: «I dɛsɛnin ko kelen na bene. Taa i i bolofen bɛ fele k'a wɔli lɔtala bolokolonnu wotɛ. Wo vɛ kɛla, nafolo ba le kɛtɔ i bolo haijɛnɛ. Wo kɔ, i yi na i yi bila ǹ kɔ.»
[23] Kɛ́ ka wo mɛn mingɛ, a ninna ka fin k'a masɔlɔn nafolobatii le tɛɛ.
[24] Isa ka kɛ́ wo ninnafinin ye mingɛ, a vɛɛ: «A gbeleyanin ne k'a fɔ nafolotii yi don Ala ya masaya kɔlɔ!
[25] Ɲɔɔmɛ don sɛɛlan woo la, wo nɔɔyanin ne danin nafolotii yi don Ala ya masaya kɔlɔ.»
[26] Wo lɔ, a lamɛnbalu vɛɛ: «Jene yi se kisila wo lɔ?»
[27] Isa k'ai javi, a vɛɛ: «Mɔɔ tɛ se ko minnu kɛla, Ala yi sene wolu kɛla.»
[28] Wo fɔnin, Piɛl vɛɛ: «Ǹu do? Mɔ vɛ mɔ bolofen bɛ to je ka bila i kɔ.»
[29] Isa vɛɛ ai yɛ: «Ǹ'i tuɲa fɔ ài yɛ, mɔɔ mɔɔ vɛ diɲala ka aa bon to a kɔ, ni wo tɛ a moso, ni wo tɛ a badenmalu, ni wo tɛ a sɔlɔnbalu, ni wo tɛ a dennu, ka bɛn Ala ya masaya ma,
[30] wo tii kɛtɔ fen wo ɲɔɔzii siyama le sɔlɔnna ka timin wo bɛ la dunuɲa min nɔ, ani ka nimaya banbali sɔlɔn sinin.»
[31] Wo kɔ, Isa ka aa keladen mɔɔ tan ni fila kili k'a fɔ ai yɛ, a vɛɛ: «Mɔ taatɔle Jelusalɛm. Kelalu na min bɛ sɛvɛla kitabulu kɔnɔ ka bɛn ǹe Mɔɔnivin Tanin ma, wo bɛ mafatɔle.
[32] Ai kɛtɔ m̀ minala ka ǹ don siboloma gbɛlɛ mɔɔlu bolo. Ai kɛtɔ m̀ majɛlɛla ka ǹ jɛvɛ ani k'ai daji bɔn ǹ kan.
[33] Ai kɛtɔ m̀ gbasila gbusan na ka ban ka ǹ faa. Kɛɛ tele fila a sawana, m̀ wulitɔ.»
[34] Kɛɛ do ai tɛɛ ma ko ko ɲaye aa kuma wolu lɔ. Wo kɔlɔ doonnin tɛɛ ai ma, ai do tɛɛ ma lɔn Isa kain yi min ma.
[35] Ka Isa masulunyatɔ to Jɛliko so la, ɲagbɛ kɛ́ dɔ siinin tɛɛ siya dala je, min tɛɛ dailila.
[36] A ka jama timin kan mɛn mingɛ, a ka ɲiningali kɛ, a vɛɛ: «Mindɛ kɛnin?»
[37] Ai vɛɛ a yɛ ko Nazalɛtika Isa le yi timinna.
[38] A ka wo mɛn mingɛ, a vɛ gbanɔla, a vɛɛ: «Isa, Dawuda Bɔzɔn, i yi hina ǹ na.»
[39] Minnu tɛɛ jama ɲa, wolu k'a makuma ko a yi jeden. Kɛɛ a ka to gbanɔla ka timin kunfɔlɔ ta la, a vɛɛ: «Dawuda Bɔzɔn, i yi hina ǹ na.»
[40] Wo lɔ, Isa k'i lɔ k'a fɔ ko ai yi na a le a fɛ. A masulunyanin, Isa ka a maɲininga, a vɛɛ:
[41] «I y'a fɛ ǹ'i mindɛ kɛ i yɛ?» A do ka Isa javi, a vɛɛ: «Fanma, ǹ a fɛ ǹ ɲa la yi ka kɔtunun.»
[42] Isa vɛɛ a yɛ: «I ɲa la yi ka. Ka bɛn iya limandeya ma, i vɛ kɛnɛya.»
[43] A do ɲa la ka ka telemanin. A vɛ bilala Isa kɔ ka to Ala tanula. Mɔɔ bɛ ka wo ye mingɛ, ailu gbazan ka Ala tanu.