[1] Lɔmu masakɛba Tibeli ya masaya san tan ni looluna, Pontia Pilati tɛɛ Jude jamanatiiya la. Wo k'a talan, Helodi tɛɛ Galile koovi masaya la ani a kɔlɔkɛ Fele tɛɛ Itule ni Tilasoniti koovi masaya la. Lisaniya do tɛɛ Abilɛni masaya la.
[2] Ani Anasu ni Kayife le tɛɛ salakalaseba kundiibaya la. Wo waate, Ala ka aa kuma lase Zakaliya den Yaya ma fuwa lɔ, a siinin tɛɛ tɛɛ min ja.
[3] A do vɛ timintiminna Jɔdan kɔɔ laminin nɔ ka kawanili kɛ ko mɔɔlu yi tube k'ai mako ji kɔlɔ, sa ai julumbulu lɔ yi koto.
[4] Aa ko sɛvɛnin kela Aizaya ya kitabu kɔnɔ ɲa min ma, ko: «Mɔɔ dɔ gbanɔkan yi bɔla fuwa lɔ, a vɛɛ: ‹Ài yi siya ladan Mɔtii yɛ, ka aa senmataamasiyalu latelen a yɛ.
[5] Folon bɛ la yi fa. Tini ni koonin bɛ la yi kaɲa. Siya lɔkulunilu la yi telen. Ani siya yonnu lɔ yi bɛn ka a nuun.
[6] Wo vɛ kɛla, adamaden bɛ kɛtɔ Ala ya lakisili ko yena.»
[7] Mɔɔ siyama tɛɛ nala Yaya fɛlɔ sa a ai mako kɔɔ kɔlɔ. A do vɛɛ a dɔlu yɛ: «Àilu fɔnfɔnnidennu! Ala ya jangata min natɔ, jene na ài lalila ko ài yi bɔli wo kɔlɔ tan?
[8] Ài yi tube. Ài kɛkolu y'a jiya k'a fɔ ài vɛ tube. Ài k'ài mili ko a bɛnnin ne k'a masɔlɔn ài bema le nabi Ibulahima le! Ǹ a fɔ ài yɛ, ǹ ko Ala yi sene kawakulun minnu lajɛlɛmana k'ai kɛ nabi Ibulahima bɔzɔn ne.
[9] Tandainɔ, tɛɛlan tii v'i wuli kɔlɔman tɛɛ ko lɔ. Kɔlɔman minnu tɛ ai den kein kɛla, wo bɛ yi tɛɛle k'ai lafili taa la.»
[10] Mɔɔlu ka Yaya maɲininga, ai vɛɛ: «M'i mindɛ kɛ wo lɔ?»
[11] Yaya k'ai javi, a vɛɛ: «Ni faani fila vɛ kɛla mɔɔ min bolo, wo tii y'a kelen di dɔ ma, fen tɛ min bolo. Ni dɔnnifen vɛ kɛla min bolo, wo gbazan y'a kɛ ten.»
[12] Nisɔɔnminaba dɔlu gbazan ka na sa Yaya y'ai mako kɔɔ kɔlɔ. Ai vɛɛ a yɛ: «Kalanmɔɔ, m'i mindɛ kɛ wo lɔ?»
[13] A vɛɛ ai yɛ: «Masakɛ na ài lɔla kɔndɛ min minala, ài yi dan wo ma.»
[14] Sɔdasi dɔlu gbazan ka a maɲininga, ai vɛɛ: «Ǹu do? Mɔ ka kan ka mindɛ kɛ wo lɔ?» A vɛɛ ai yɛ: «Ài kà baa mɔɔ suu suu ma, ni wo tɛ ka tɔɔ la a la ka wɔli mina a la. Ai sala min yi dila ài ma, wo y'ài wasa.»
[15] Mɔɔlu tɛɛ ai jeisii le makɔnɔla. Wo lɔ, ai tɛɛ ai jɛlɛ maɲiningala ni Yaya yi Masa Tɔɔmasenin ne le.
[16] Ka bɛn miliya wo ma Yaya k'ai javi, a vɛɛ: «Ǹ ài makola kɔɔ le kɔlɔ, kɛɛ a dɔgbɛlɛ natɔ ǹ kɔ, min fanga walanin ǹ ta le. Hali ka aa samala julu fɔlin a yɛ, ǹe dɔɔyanin ne wo ma. Ale kɛtɔ Lɔhɔlɔma Fɔɲɛ lajiila ài kan ani taa!
[17] A kɛnin ne iwo kɛ́ min lɔnin malo gbasiya lɔ, kɔndɛlɛ y'a bolo. A kɛtɔ malo tɛndɛnna ka a kɛ bolon kɔlɔ, ka ban k'a bu lafili taa banbali lɔ. »
[18] Yaya tɛɛ ai kawanila ko siyama la ka Samakan Kein nase ai ma.
[19] A do tɛɛ jamanatii Helodi jalakila, k'a masɔlɔn a kɔlɔkɛ moso Helodiyasi ma ani aa koyon tɔ bɛ.
[20] Helodi ka koyon gbɛlɛ kafon wolu kan ka Yaya mina ka a bila kaso la.
[21] Jani Yaya yi bila kaso la, k'a to mɔɔlu makola kɔɔ kɔlɔ, Isa gbazan ka na, a k'a mako. Ka Isa to Ala dalila je, sangbolo da la ka ka.
[22] Lɔhɔlɔma Fɔɲɛ ka jii a kan bilini sawula lɔ. Kumakan dɔ ka bɔ sangbolo lɔ, a vɛɛ: «I yi ǹ diyanan den ne le. I do vɛ ǹ kɔnɔ diya bubale.»
[23] Isa tɛɛ vɛ san bisawa ɲɔɔn bɔ aa baale damina waate. Mɔɔlu tɛɛ a jatela Jusufu denkɛ le le. Jusufu tɛɛ Heli denkɛ le le.
[24] Heli tɛɛ Matati denkɛ le le. Matati tɛɛ Levi denkɛ le le. Levi tɛɛ Mɛlɛki denkɛ le le. Mɛlɛki tɛɛ Janayi denkɛ le le. Janayi tɛɛ Jusufu denkɛ le le.
[25] Jusufu tɛɛ Matatiyasi denkɛ le le. Matatiyasi tɛɛ Amɔsi denkɛ le le. Amɔsi tɛɛ Nahɔmu denkɛ le le. Nahɔmu tɛɛ Ɛsili denkɛ le le. Ɛsili tɛɛ Nakayi denkɛ le le.
[26] Nakayi tɛɛ Maati denkɛ le le. Maati tɛɛ Matatiyasi denkɛ le le. Matatiyasi tɛɛ Semi denkɛ le le. Semi tɛɛ Joseki denkɛ le le. Joseki tɛɛ Joda denkɛ le le.
[27] Joda tɛɛ Jowanan denkɛ le le. Jowanan tɛɛ Lesa denkɛ le le. Lesa tɛɛ Zolobabɛli denkɛ le le. Zolobabɛli tɛɛ Salatiyɛli denkɛ le le. Salatiyɛli tɛɛ Nɛli denkɛ le le.
[28] Nɛli tɛɛ Mɛlɛki denkɛ le le. Mɛlɛki tɛɛ Adi denkɛ le le. Adi tɛɛ Kosamu denkɛ le le. Kosamu tɛɛ Elimada denkɛ le le. Elimada tɛɛ Iliya denkɛ le le.
[29] Iliya tɛɛ Jasuwa denkɛ le le. Jasuwa tɛɛ Eliyɛzɛli denkɛ le le. Eliyɛzɛli tɛɛ Jolimu denkɛ le le. Jolimu tɛɛ Matati denkɛ le le. Matati tɛɛ Levi denkɛ le le.
[30] Levi tɛɛ Simiyɔn denkɛ le le. Simiyɔn tɛɛ Juda denkɛ le le. Juda tɛɛ Jusufu denkɛ le le. Jusufu tɛɛ Jonamu denkɛ le le. Jonamu tɛɛ Eliyakimu denkɛ le le.
[31] Eliyakimu tɛɛ Mɛliya denkɛ le le. Mɛliya tɛɛ Mena denkɛ le le. Mena tɛɛ Matata denkɛ le le. Matata tɛɛ Natan denkɛ le le. Natan tɛɛ nabi Dawuda denkɛ le le.
[32] nabi Dawuda tɛɛ Jese denkɛ le le. Jese tɛɛ Obɛdi denkɛ le le. Obɛdi tɛɛ Bowozi denkɛ le le. Bowozi tɛɛ Saliman denkɛ le le. Saliman tɛɛ Nasun denkɛ le le.
[33] Nasun tɛɛ Aminadabu denkɛ le le. Aminadabu tɛɛ Adimɛn denkɛ le le. Adimɛn tɛɛ Alini denkɛ le le. Alini tɛɛ Hɛzilɔn denkɛ le le. Hɛzilɔn tɛɛ Pɛlɛzi denkɛ le le. Pɛlɛzi tɛɛ Juda denkɛ le le.
[34] Juda tɛɛ Janguba denkɛ le le. Janguba tɛɛ Isiyaka denkɛ le le. Isiyaka tɛɛ Ibulahima denkɛ le le. Ibulahima tɛɛ Tela denkɛ le le. Tela tɛɛ Nakoli denkɛ le le.
[35] Nakoli tɛɛ Selugi denkɛ le le. Selugi tɛɛ Lewu denkɛ le le. Lewu tɛɛ Pelegi denkɛ le le. Pelegi tɛɛ Ebɛli denkɛ le le. Ebɛli tɛɛ Sala denkɛ le le.
[36] Sala tɛɛ Kanaan denkɛ le le. Kanaan tɛɛ Alifasadi denkɛ le le. Alifasadi tɛɛ Sɛmu denkɛ le le. Sɛmu tɛɛ Nuho denkɛ le le. Nuho tɛɛ Lamɛki denkɛ le le.
[37] Lamɛki tɛɛ Metusala denkɛ le le. Metusala tɛɛ Enɔki denkɛ le le. Enɔki tɛɛ Jalɛdi denkɛ le le. Jalɛdi tɛɛ Malalɛli denkɛ le le. Malalɛli tɛɛ Kenan denkɛ le le.
[38] Kenan tɛɛ Enosi denkɛ le le. Enosi tɛɛ Sɛti denkɛ le le. Sɛti tɛɛ Adama denkɛ le le. Ala ka Adama dan.