[1] Ka Isa to lɔhɔlɔmabonba la, a k'i ɲa kaa ka nafolotiilu ye, ai vɛ fisabilayi wɔli bilala kesu lɔ.
[2] A do ka kɛsamoso fandan dɔ ye, min ka wɔligbanan mɛsɛnni fila bila kesu wo lɔ.
[3] Isa vɛɛ: «Ǹ'i tuɲa fɔ ài yɛ, kɛsamoso fandan wo vɛ wɔli min bɔ, wo walanin vɛ ai bɛ ta le.
[4] K'a masɔlɔn ai bɛ na a dɔɔnin bɔla aiya nafolo ba la ka a di. Kɛɛ moso wo ni a bolokolonya, a na hali aa balo sɔɔn bɛ le bilala je.»
[5] Wo kɔ, aa kɔbiladen dɔlu tɛɛ balola ka bɛn lɔhɔlɔmabonba ma. Ko ai tɛɛ k'a masili kobɛn salakafen ni kawakulun kein keinnu la.
[6] Isa do vɛɛ ai yɛ: «Ài ɲa yi fen minnu la yi ne, lon dɔ wo bɛ tetetɔle tɛtɛ, hali kawakulun fila tɛnala tola i ɲɔɔn ma.»
[7] Ai k'a maɲininga, ai vɛɛ: Kalanmɔɔ, i kain yi ko minnu ma, wolu kɛtɔ waate mindɛ? Tɔɔmase suu mindɛ kɛtɔ a jiyala ko waate wo vɛ se?»
[8] A vɛɛ ai yɛ: «Ài yi jando ài jɛlɛ lɔ sa mɔɔ mɔɔ kana ài lafili. K'a masɔlɔn mɔɔ siyama natɔ ǹ tɔɔ lɔ k'a fɔ ko: ‹Ǹe le Masa Tɔɔmasenin ne›, ani ko: ‹Masaba ya lon vɛ se›. Ài kà bila wo suu suu kɔ.
[9] Ài vɛ kɛlɛ ni mulutu kolu mɛnna, ài kà siyan k'a masɔlɔn ko wolu ka kan ka kɛ, kɛɛ dunuɲa laban tɛnala kɛla wo le bene.»
[10] A vɛɛ ai yɛ kɔtunun: «Sibolomalu wulitɔ i ɲɔɔn kanma. Jamanalu gbazan wulitɔ i ɲɔɔn kanma.
[11] Duukolo jaajaatɔle gbiligbili, ani kɔɔn ni jangalo fitina kɛtɔ dingila suu bɛ lɔ. Ado ko masiyannin ni tɔɔmase ba balu kɛtɔ sangbolo lɔ.
[12] Kɛɛ jani ko wo bɛ yi kɛ, mɔɔlu kɛtɔ ài minala k'ài tɔlɔya. Ai kɛtɔ ài donna Aladalibon ɲamɔɔlu bolo k'ài bila kaso la. Ài lalɔtɔ jamanatii ni masakɛlu ɲakɔlɔ, ka bɛn ǹa ko ma.
[13] Ài kɛtɔ ɲa sɔlɔnna wo lɔ ka ǹa ko fɔ wolu yɛ.
[14] Jani wo yi kɛ, ài hangili la yi tɛɛ k'a fɔ ài tɛnala kuma lɔbɛnna k'ài jɛlɛ lafɛlɛ.
[15] Baa ǹe gbu le kɛtɔ ài lalɔnnila hangilimaya kumalu la, haan fɔɔ ài juu suu suu tɛnala sena ài la, ni wo tɛ k'àiya kumalu bɔ a nɔ lɔ.
[16] Ài sɔlɔnbalu o, ài badenmalu o, ài balamɔɔlu, ani ài tɔvalu, wo bɛ kɛtɔ ài donna mɔɔlu bolo sa ai y'ài dɔlu faa.
[17] Ài gbeyatɔ mɔɔ bɛ yɛ ka bɛn ǹa ko ma.
[18] Wo bɛ n'a kɛ, hali ài kunsiden kelen tɛnala tununna.
[19] Ni do ài ka gbeleya wolu mina ài ma, ài kɛtɔ ài nin nakisila.
[20] «Ài vɛ Jelusalɛm lamininnin yena sɔdasi jama balu le waate min nɔ, ài y'a lɔn ko so halaki waate ma vɛ sulunya.
[21] Wo vɛ kɛla, mɔɔ minnu yi Jude koovi lɔ, wolu yi bɔli ka taa tinilu kɔkan. Mɔɔ minnu do vɛ kɛla Jelusalɛm so kɔnɔ, wolu yi bɔ je. Ani mɔɔ minnu vɛ kɛla sɛnɛ lɔ, wolu kà don so kɔnɔ butu,
[22] baa Ala ya jangata lonnu le wolu le, fɔsa kuma min bɛ sɛvɛnin kitabu kɔnɔ, wo ma yi fa.
[23] Wo lonnu vɛ sena, gbalo kɛtɔ kɔnɔma ni denbatiikulalu yɛ, baa tɔlɔya ba kɛtɔle jamana min kɔnɔ, ani Ala ya jangata jiitɔ mɔɔ minnu kan.
[24] Ai juulu kɛtɔ ai dɔlu faala siyamifan ne, ani ka a dɔlu jɔnya mina kɛ jamana bɛ kɔnɔ. Ado siboloma gbɛlɛlu kɛtɔ Jelusalɛm lɔdɔndɔnna k'ai fanga sii a kan fɔɔ aiya waate vɛ dafala.
[25] Tɔɔmase dɔlu kɛtɔ tele ni kalo ni lolonilu lɔ, ani siboloma bɛ joso bɔtɔle k'ai kɔnɔ fili duukolo kan, ka bɛn kɔɔji ya kalikali ma i ɲɔɔn kan ani aa jaman ba.
[26] Mɔɔlu kilonkilontɔ siyan boloma, ani ka bɛn masuwako min natɔ kɛla dunuɲa fan bɛ lɔ, ai jii yi min ma. Baa sangbolokɔnɔfangatiilu lamaamaatɔle.
[27] Wo waate lɔ, ài kɛtɔ ǹe Mɔɔnivin Tanin natɔ yena biliya lɔ setiiya la, ani nɔɔlɔ ba.
[28] Ni ài ka ko minnu kɛtɔ ye waate min nɔ, ài y'ài lɔ k'ài kun nawuli k'a masɔlɔn àiya kunmaka waate ma vɛ sulunya.»
[29] Wo kɔ, Isa ka sana dɔ la ai yɛ, a vɛɛ: «Ài y'ài mili tolojulu ma, ni wo tɛ kɔlɔman dɔlu.
[30] Ài v'a filabulu kulalu yena, ài y'a lɔn k'a fɔ telema ma vɛ sulunya.
[31] Wo ɲa kelen ma, ni ài ka ko wo bɛ ye kɛla, ài y'a lɔn k'a fɔ ko Ala ya masaya waate ma vɛ sulunya.
[32] Ǹ'i tuɲa fɔ ài yɛ, bi mɔɔlu bɛ tɛnala banna faala, fɔɔ min ko bɛ yi kɛ ka dafa.
[33] Lon dɔ, sangbolo ni duukolo bantɔle. Kɛɛ ǹa kumakannu tɛnala banna tuun!
[34] Ài yi jando ài jɛlɛ lɔ sa ài joso lɔ kana gbalin. Ài vɛ tola dannatiminbaya ni gbɛtɔya la ka to haminna dunuɲa kolu le, wo lon kɛtɔle balala ài lɔ, iwo sɔɔ yi soo minala teme.
[35] K'a masɔlɔn wo lon kɛtɔ dunuɲa mɔɔ bɛ minala ten ne kɔtunun.
[36] Wo lɔ, ài yi to ài ɲana ka kɛ Ala dalile, sa ài yi fanga sɔlɔn ka timin ko wolu lɔ minnu natɔ ka ban k'ài lɔ ǹe Mɔɔnivin Tanin ɲakɔlɔ.»
[37] Isa tɛɛ mɔɔlu kalanna lɔhɔlɔmabonba la lon lon. Su lɔ, a tɛɛ taala ka si tini dɔ kɔkan, ai yi fɔla min ma ko Zeituna tini.
[38] Sɔɔma danin na, mɔɔ bɛ tɛɛ ai ladɛnna lɔhɔlɔmabonba la k'ai tolo malɔ a la.