[1] Ka Isa joso lafanin to Lɔhɔlɔma Fɔɲɛ la, a ka seikɔ ka bɔ Jɔdan kɔɔ dala. Ado Ala aa Fɔɲɛ ka taa a le fuwa lɔ.
[2] A ka tele binaani kɛ je, Soɛtana vɛ a lɔsumanna. A do ma fen dɔn wo waate. Wo dafanin, kɔɔn ba k'a mina.
[3] Ado Soɛtana vɛɛ a yɛ: «Ni Ala Den ne i le, i y'a fɔ kawakulun min yɛ ko a yi jɛlɛma ka kɛ bulu le.»
[4] Isa k'a javi, a vɛɛ: «A sɛvɛnin kitabu kɔnɔ ko: ‹Mɔɔ tɛ balola bulu la dein.›»
[5] Wo kɔ, Soɛtana ka taa a le dingila lajaanin dɔ la ka dunuɲa jamana bɛ jiya a la waate kelen nɔ.
[6] A do vɛɛ a yɛ: «Ǹ kɛtɔ i lasiila wo bɛ kunna ka aiya fanmaya di i ma. Ni ǹ a fɛ ka wo di mɔɔ min ma, ǹ a dile wo ma, baa a bɛ dinin ǹe ma.
[7] I vɛ diɲala ka suudi ben ǹ yɛ, wo bɛ kɛtɔ i ta le le.»
[8] Isa do k'a javi, a vɛɛ: «A sɛvɛnin kitabu kɔnɔ ko: ‹I i Tii Ala le bato ka baale kɛ ale kelen yɛ.›»
[9] Wo kɛ, Soɛtana ka taa a le Jelusalɛm ka a lalɔ lɔhɔlɔmabonba kɔkan. A vɛɛ a yɛ: «Ni Ala Den ne i le, i i bolotɛ i jɛlɛ la ka bɔ jan,
[10] baa a sɛvɛnin kitabu kɔnɔ ko: ‹Ala kɛtɔ ya ko fɔla mɛlɛkalu yɛ ko ai y'i matanga.
[11] Wo vɛ kɛla, ai kɛtɔ i minala ai bolo la, sa i sen ma kana dimin kawa bolo.›»
[12] Kɛɛ Isa k'a javi, a vɛɛ: «A sɛvɛnin kitabu kɔnɔ ko: ‹I k'i Tii Ala lɔsuman.›»
[13] Soɛtana wɔlinin a lɔsumanna ko bɛ lɔ, a ka bɔ a fɛ ka waate gbɛlɛ makɔnɔn.
[14] Wo kɔ, Isa vɛ seikɔla Galile, Lɔhɔlɔma Fɔɲɛ ya setiiya lɔ. A mangan ka jɛnzɛn koovi wo fan bɛ lɔ.
[15] A tɛɛ mɔɔlu kalanna aiya Aladalibonnu la. Bɛ tɛɛ a tɔɔ kein fɔla.
[16] A do ka taa se Nazalɛti, a buɲanin tɛɛ min ja. Nɔningɛlon senin, a ka taa Aladalibon na, iwo a deinnin tɛɛ a kɛla teme. A k'i lɔ mingɛ ko a yi kalan kɛla,
[17] ai ka kela Aizaya ya kitabu di a ma. A vɛ dingila dɔ ɲininna kitabu wo kɔnɔ ka se a ma. A sɛvɛnin wo ja ko:
[18] «Mɔtii ya Fɔɲɛ yi ǹ kan, baa a vɛ ǹ jiya ko ǹ'i taa Samakan Kein nase bolokolonnu ma. A do vɛ ǹ kela ko ǹ a fɔ kasodennu yɛ ai la vɛ fɛlɛ, k'a fɔ ɲagbɛlu yɛ ko ai ɲa la vɛ ka, ani ka fandannu lafɛlɛ k'ai bɔ ai tɔlɔbalu bolo,
[19] ka Mɔtii ya lɔhɔlɔma waate samakan fɔ.»
[20] A wɔlinin wo kalanna, a ka kitabu datuun ka a don a ladaloba bolo k'i sii. Mɔɔ bɛ ɲa tɛɛ a lɔ.
[21] A do vɛɛ ai yɛ: «Ài na kuma min mɛnna ka bɔ kitabu lɔ, wo ma vɛ fa ài ɲana bi.»
[22] Ai bɛ tɛɛ a tɔɔ kein fɔla ka kawanakoya ka bɛn aa dalɔdiya ma. Ai vɛɛ: «Jusufu den ne tɛ min ne?»
[23] Wo lɔ, Isa vɛɛ ai yɛ: «Sika t'a lɔ, ài kɛtɔ sana min lala ǹ yɛ ko: ‹Danaliba, fɔ ile gbu le y'i jɛlɛ dana kunfɔlɔ le.› Ài kɛtɔ a fɔla ǹ yɛ gbazan ko: ‹I na ko minnu kɛla Kapɛlɛnam, m'i wo kalama. Fɔ ile gbu y'a dɔ kɛ i fɛso jan gbazan.›»
[24] A k'a fɔ ai yɛ kɔtunun, a vɛɛ: «Tuɲa le, kela foi tɛɛ je min nɔ yi minala kobɛn a jɛlɛ fɛso.
[25] Ǹ'i tuɲa fɔ ài yɛ, kela Iliya ya tele lɔ, kɛsamoso walanin tɛɛ Isilan jamana lɔ. Wo waate, san ma na haan fɔɔ sanji sawa kalo wɔɔlɔ ani kɔɔn fitina ka don jamana fan bɛ lɔ.
[26] Kɛɛ kela Iliya la ma taa k’ai suu suu madɛmɛn fɔ kɛsamoso dɔ, min siinin tɛɛ Zalɛfata so kɔnɔ, Sidɔn duu lɔ.
[27] K'a dɔ la wo kan, kela Elisa ya tele lɔ, kunantɔ walanin tɛɛ Isilan jamana lɔ. Kɛɛ a ma wo suu suu lasɛnɛya, fɔ Siliyaka kɛ́ dɔ, min tɔɔ tɛɛ ko Naaman. Wo ka bɔ aa jamana lɔ ka na ka kɛnɛya kela Elisa bolo.»
[28] Aladalibonnamɔɔ bɛ ka kuma wo mɛn mingɛ, ai ka mɔnɛ bubale.
[29] Ai do v'i wulila ka Isa lasusu k'a labɔ so kɔnɔ. So wo lɔnin tɛɛ tini le kɔkan. Ai vɛ taala a le tini dala ko ai y'a lasusu ka a laben duu ma.
[30] Kɛɛ a ka timin ai tɛma ka taa.
[31] Wo kɔ, Isa ka taa Kapɛlɛnam, min yi Galile koovi so dɔ le. A do vɛ mɔɔlu kalanna Nɔningɛlon.
[32] Aa kalanɲa k'ai kawakoya, baa setiiya tɛɛ aa kuma lɔ.
[33] Wo waate kelen, kɛ́ jinatɔ dɔ tɛɛ Aladalibon na je. A do v'i wulila ka gbanɔ, a vɛɛ:
[34] «Ɛɛ Isa Nazalɛtika! Mindɛ le ile ni ǹu wotɛ? I nanin mɔ halaki ko le lɔ? Ǹ k'i suu lɔn. Ala ya Lɔhɔlɔma Mɔɔ le i le.»
[35] Wo lɔ, Isa vɛ jina jamalila, a vɛɛ: «I yi jeden! Bɔ kɛ́ wo kɔ!» Jina vɛ kɛ́ labenna duu ma jama bɛ ɲana ka ban ka bɔ a kɔ. Foi ma kɛ a la.
[36] Mɔɔ bɛ ka kawakoya ka kɛ a fɔle i ɲɔɔn yɛ, ai vɛɛ: «Kuma suu mindɛ le min ne? A yi jinalu jamalila fanga ni setiiya le la. A a fɔla ai yɛ ko ai yi bɔ, ai do yi bɔla.»
[37] Ado Isa mangan vɛ jɛnzɛnna koovi wo fan bɛ lɔ.
[38] Wo kɔ, Isa k'i wuli ka bɔ Aladalibon na ka taa don Simɔn ya bon na. Wo k'a talan Simɔn bilanmoso tɔlɔnin tɛɛ nɛnɛgbanin bolo kosɛvɛ. Ai do ka aa ko lase Isa ma.
[39] Wo lɔ, Isa ka taa a lɔ a kunna ka nɛnɛgbani jamali, ko a yi bɔ moso lɔ. A do ka bɔ a lɔ. Moso v'i wulila telemanin ka gba don ai yɛ.
[40] Telejii waate, mɔɔlu vɛ nala jangalotɔ kaijakaija bɛ le Isa fɛ. A do ka a bolo lala ai kelenkelenna bɛ kan k'ai lakɛnɛya.
[41] Jinalu ka bɔ mɔɔ siyama kɔ gbazan. Ai bɔ waate, ai tɛɛ gbanɔla, ai vɛɛ: «Ala Den ne i le.» Kɛɛ Isa do k'ai jamali ko ai yi jeden. A ma diɲa ai yi kuma, baa ai tɛɛ k'a lɔn k'a fɔ ale le Masa Tɔɔmasenin ne.
[42] Wo duusa gbɛ, Isa ka bɔ so kɔnɔ ka taa dingila lɔkolon nɔ. Ado jama vɛ a ɲininna. Ai ka a ye mingɛ, ai vɛ a madiyala ko a kà bɔ ai fɛ.
[43] Kɛɛ Isa vɛɛ ai yɛ: «Samakan Kein ka bɛn Ala ya masaya ma, fɔ ǹ'i wo lase so gbɛlɛlu la gbazan, baa ǹ kelayanin wo le lɔ.»
[44] A do tɛɛ Jude koovi fan bɛ lɔtaamantaamana ka mɔɔlu kawani Aladalibonnu la.