[1] Nɔningɛlon dɔ, Isa nu timintɔla sɛnɛ tɛma, aa kɔbiladennu vɛ sɛnɛfen tizan dɔlu bɔla k'ai sisa ai bolo la k'ai dɔn.
[2] Wo lɔ, Falisi dɔlu vɛɛ ai yɛ: «Mindɛ lɔ ài yi ko kɛla min ladaannin tɛ mɔ ma Nɔningɛlon?»
[3] Isa k'ai javi, a vɛɛ: «A yi di? Nabi Dawuda na min kɛla ale ni a taamaɲɔɔlu ya kɔɔn waate lɔ, ài ma wo kalan?
[4] A ka don mingɛ Alabatobon na, a ka salaka bululu ye k'a dɔ ta k'a dɔn k'a dɔ di a taamaɲɔɔlu ma. Wo do ladaanin tɛɛ tɛ ale ni a taamaɲɔɔlu ma ka bɛn seliya ma, mafɔ salakalasebalu jɛlɛ.»
[5] A do vɛɛ ai yɛ kɔtunun: «Ǹe Mɔɔnivin Tanin yi kundii le le Nɔningɛlon kunna.»
[6] Nɔningɛlon gbɛlɛ, Isa ka taa don Aladalibon na ka mɔɔlu kalan. Kɛ́ dɔ tɛɛ je, min bolokinin janin tɛɛ a ma.
[7] Seliya kalanmɔɔ ni Falisi dɔlu tɛɛ Isa lasaala k'a ye ni a kɛtɔ lakɛnɛyali kɛla Nɔningɛlon, sa ai yi dailu sɔlɔn a jalaki ko lɔ.
[8] A do tɛɛ k'ai miliya lɔn. A k'a fɔ kɛ́ yɛ, min bolo janin tɛɛ a ma, a vɛɛ: «I yi wuli i lɔ jama tɛma.» A do v'i wulila k'i lɔ je.
[9] Isa ka jama maɲininga, a vɛɛ: «A yi di? A ladaannin ne ka kokein kɛ Nɔningɛlon baa koyon? Ka mɔɔ lakisi baa ka a halaki?»
[10] Wo fɔ, a v'a ɲa kaana jama lɔ k'a fɔ kɛ́ yɛ, a vɛɛ: «I bolo lɔsama.» Kɛ́ ka a bolo lɔsama mingɛ, a bolo ka kɛnɛya.
[11] Wo lɔ, Falisi ni seliya kalanmɔɔlu k'ai joso lakuna bubale. Ai do ka taa i ɲɔɔn ye k'a lɔn ai yi min kɛ Isa la.
[12] Wo waate lɔ, Isa ka taa Aladaliya lɔ tini dɔ kɔkan. A do ka su bɛ kɛ Ala dalila.
[13] Kɛnɛ bɔnin, a ka aa kɔbiladennu kili ka mɔɔ tan ni fila ta ai lɔ k'a fɔ ai ma ko keladen.
[14] Wo mɔɔ tan ni fila tɔɔ le ne: Simɔn, Isa ka min tɔɔ la ko Piɛl, a ni a dɔɔni Andele, Janguba ni Yaya, Fele ni Batolomu,
[15] Matiyu ni Toma, Alife denkɛ Janguba ni Simɔn, ai tɛɛ a fɔla min ma ko fasokanuba,
[16] Janguba denkɛ Judasi, ani Judasi Sikaliyɔti min ka kɛ janvande le.
[17] Wo kɔ, Isa nu k'i jii tini la k'i lɔ gbɛkɛnɛ dɔ lɔ. Aa kɔbiladen siyama tɛɛ je ani jama ba min bɔnin tɛɛ Jelusalɛm, ani Jude koovi, ni Tili ni Sidɔn solu fannɔ, min yi kɔɔjii dala.
[18] Ai bɛ nanin tɛɛ k'ai tolo malɔ Isa la, ani ka kɛnɛya ka bɔ aiya jangalolu lɔ. Minnu tɔlɔnin tɛɛ jinalu bolo, wolu gbazan ka kɛnɛya.
[19] A lɔɔ tɛɛ mɔɔ bɛ la k'ai bolo tuu Isa la, k'a masɔlɔn fanga tɛɛ a la ka jangalotɔ bɛ lakɛnɛya.
[20] Isa k'i ɲa kaa aa kɔbiladennu lɔ k'a fɔ ai yɛ, a vɛɛ: «Àilu minnu yi fandan ne, ài yi duwawuden ne le, k'a masɔlɔn ài yi Ala ya masaya kɔlɔ.
[21] Àilu minnu yi kɔɔntɔ le butu, ài yi duwawuden ne le, k'a masɔlɔn ài kɛtɔ balo sɔlɔnna ka wasa. Àilu minnu yi kasila butu, ài yi duwawuden ne le, k'a masɔlɔn ài kɔnɔ diyatɔ fɔɔ ka jɛlɛ.
[22] Ài yi duwawuden ne le, ni mɔɔlu k'ài lagbeyaɲɛ, k'i ban ài lɔ, k'ài nɛnin, ani k'ài tɔɔyon fɔ ka bɛn ǹe Mɔɔnivin Tanin ya ko ma.
[23] Wo vɛ kɛla lon min, ài yi gban sawa boloma, k'a masɔlɔn ài kɛtɔ balayi ba sɔlɔnna haijɛnɛ. Baa minnu yi koyon wo suu kɛla ài la, wolu bemanu na wo ɲɔɔzii le kɛla kelalu la.
[24] Gbalo yi àilu nafolotiilu yɛ k'a masɔlɔn ài vɛ àiya hɛlɛ sɔlɔn ka ban.
[25] Gbalo yi ài yɛ, àilu minnu yi dɔmuni kɛla k'i fa kpekpe bi, k'a masɔlɔn kɔɔn kɛtɔ ài minala. Gbalo yi ài yɛ, àilu minnu yi jɛlɛla bi, k'a masɔlɔn ài kasitɔ k'ài ɲaji bɔ.
[26] Gbalo yi ài yɛ, ni mɔɔ bɛ y'ài tɔɔ kein fɔla, k'a masɔlɔn wolu bemanu tɛɛ faɲafɔkelalasebalu minala wo ɲa kelen ne ma.»
[27] «Àilu minnu tolo yi ǹ kumakan na, ǹ ko ài y'ài juulu kanu ka kokein kɛ ài lagbeyabalu yɛ.
[28] Mɔɔ minnu y'ài daanna, ài yi duwawu kɛ wolu yɛ ka Ala dali ài jɛvɛbalu yɛ.
[29] Ni mɔɔ v'i gbasila i tolo dɔ la, i y'a tɔ kelen di a ma gbazan. Ni do mɔɔ v'iya faaniba minala i la, i kà a dansii, iya faani kɔlɔbila di a ma gbazan.
[30] Ni mɔɔ k'a fɔ ko: ‹Ǹ sɔ fen na›, i y'a sɔ. Ni do mɔɔ ka fen dɔ ta i bolo, i kà a fɔ a yɛ: ‹Fɔ i y’a lasei m̀ ma.›
[31] Ni ài y'a fɛ mɔɔlu yi ko min bɛ kɛ ài yɛ, àilu gbu yi wo suu dɔ kɛ ai yɛ.
[32] Ni ài k'ài ɲiilu kanu dein, ài kɛtɔ balayi mindɛ sɔlɔnna wo lɔ? Hali konyonkɛbalu y'ai ɲiilu kanuna.
[33] Mɔɔ minnu yi kokein kɛla ài yɛ, ni ài ka kokein kɛ wolu yɛ dein, ài kɛtɔ balayi mindɛ sɔlɔnna wo lɔ? Hali konyonkɛbalu yi wo ɲɔɔzii kɛla.
[34] Ni ài k'a lɔn julu sala se yi mɔɔ min yɛ, ni ài ka julu la wo tii la dein, ài kɛtɔ balayi mindɛ sɔlɔnna wo lɔ? Hali konyonkɛbalu gbu yi julu lala ai konyonkɛ ɲɔɔlu la, a sala se yi minnu yɛ.
[35] Àilu kɔni, fɔ y'ài juulu kanu ka kokein kɛ ai yɛ. Ài vɛ julu lala, ài y'ài jii bɔ a sala ko kɔ. Wo vɛ kɛla, ài kɛtɔ balayi ba sɔlɔnna. Ài kɛtɔ iwo Ala Kɔlɔtaninba dennu. K'a masɔlɔn a yi kokein kɛla mɔɔ bɛ yɛ, hali koɲumalɔnbalilu ni mɔɔ yonnu.
[36] Ài yi kɛ hinandelu le, iwo ài Fa Ala yi hinande le teme.»
[37] «Ài kà kiti bila mɔɔ la, Ala kana kiti bila ài la. Ài do kà mɔɔ jalaki, Ala kana taa àilu gbu jalaki. Ài y'ài mɔɔɲɔɔlu makoto, Ala gbazan kɛtɔ ài makotola.
[38] Ài y'ài mɔɔɲɔɔlu sɔ, Ala gbazan kɛtɔ ài sɔla. A do kɛtɔ fen sumala ài yɛ bɛlɛbɛlɛ kɛ, ka àiya bɔlɔlu lafa kpe kpe, k'a lajaajaa, k'a dɔ kafon a kan, fɔɔ ka bɔn. Baa ài yi fen sumala ài mɔɔɲɔɔlu yɛ teme, Ala kɛtɔ a sumala ài yɛ ten ne.»
[39] Isa ka sana gbɛlɛlu la ai yɛ, a vɛɛ: «A yi di? Ɲagbɛ tɛ se kɛla a ɲagbɛɲɔɔ ya ɲabila le, kɛlɛ? Wo vɛ kɛla, ai mɔɔ fila yi benne diɲa lɔ, kɛlɛ?
[40] Kalannaden tɛ buɲala ka timin aa kalanmɔɔ la, kɛɛ ni a ka aa kalan dafanin sɔlɔn, a yi kɛ le a kalanmɔɔ ɲɔɔzii le.
[41] Mindɛ kɛnin i yi jilimuu lasaala i badenma ɲa ma, k'a talan i tɛ jilifɛlɛn yena, min y'i gbu ɲa ma?
[42] Ni i tɛ jilifɛlɛn yena i jɛlɛ ɲa ma, i yi sene a fɔla i badenma yɛ ko: ‹I yi lɔ ǹ'i jili muu bɔ i ɲa ma›? Ile Filangafo! Fɔ i yi jilifɛlɛn bɔ i jɛlɛ ɲa ma kunfɔlɔ le. Wo vɛ kɛla, i kɛtɔ yeni kɛla kobɛn ka jili muu bɔ i badenma ɲa ma.»
[43] «Kɔlɔman kein tɛ se den kɛwon kɛla. Kɔlɔman yon gbazan tɛ se den kein kɛla.
[44] Mɔɔlu yi kɔlɔman lɔnna a den ne fɛ. Mɔɔ tɛ biyaki ni wo tɛ mangolo bɔla tazan na.
[45] Mɔɔ kein yi kokein ne kɛla, k'a masɔlɔn wo yi bɔla a josokun kein ne lɔ. Kɛɛ do mɔɔ yon do yi koyon ne kɛla, k'a masɔlɔn wo yi bɔla a josokun yon ne lɔ. Mɔɔ josokun nafanin ko min na, a da yi wo le fɔla.»
[46] «Mindɛ lɔ ài yi fɔla m̀ ma ko ‹Fanma, Fanma› k'a talan ài tɛ ǹ kumakannu kabatola?
[47] Mɔɔ min yi nala m̀ ma ka ǹa kumakannu labato, ǹ'i se wo tii lala mindɛ ma, ǹ kɛtɔ a fɔla ài yɛ.
[48] A kɛnin ne iwo bonnɔba, min na diɲa senna ka taa se fala ma, ka aa bonju sii wo kan. Bon lɔnin kɔ, san ba ka na. Kɔɔ do ka fa ka se bon wo ma. Kɛɛ bon ma jaajaa k'a masɔlɔn ai ka a lɔ kobɛn.
[49] Kɛɛ mɔɔ min yi ǹa kumakannu mɛnna, a do tɛ a labatola, wo tii kɛnin ne iwo bonnɔba min ma diɲa sen aa bonjusii waate. Bon lɔnin kɔ, san ba ka na. Kɔɔ ka se bon wo ma mingɛ, a do ka te telemanin ka tiɲan fefe!»