[1] Isa na aa keladen tan ni fila ladɛnna mingɛ, a ka fanga ni setiiya di ai ma sa ai yi se jinalu gbɛnna ka bɔ mɔɔlu kɔ ani ka jangalotɔlu lakɛnɛya.
[2] A do k'ai kelaya ko ai yi taa Ala ya masaya ko lase mɔɔlu ma ani ka lakɛnɛyali kɛ.
[3] A vɛɛ ai yɛ: «Ài kà fen suu suu ta àiya taama ko lɔ. Taamabele o, bɔlɔ o, dɔnnifen o, wɔli o, ài kà wo suu suu ta. Ài do kà àiya faaniba kɛ fila le.
[4] Ài vɛ jiyala bon suu suu la, ài yi to wo ja fɔɔ ài taa waate vɛ sena.
[5] Ni do ai k'ai ban ài lɔminala, ài yi bɔ ai fɛlɔ ka je gbangban bɔ ài sen ma ka wo kɛ ai ban tɔɔmase le.»
[6] Wo kɛ, Isa ya keladennu ka bɔ je ka taa solu la ka Samakan Kein nase, ani ka jangalotɔlu lakɛnɛya fan bɛ lɔ.
[7] Ko min bɛ kɛnin Isa bolo, masakɛ Helodi ka wo samakan mɛn. A kɔnɔ ka fili wo lɔ kosɛvɛ k'a masɔlɔn a dɔlu tɛɛ Isa jatela Yaya le le, ko a v'i wuli ka bɔ saya lɔ.
[8] A dɔlu tɛɛ a fɔla ko kela Iliya la vɛ nkɛnɛmaya kɔtunun. A dɔlu gbazan tɛɛ a fɔla ko ɲiminɲɛmɛ kɔlɔkɔlɔ dɔ vɛ seikɔ dunuɲa.
[9] Kɛɛ masakɛ Helodi vɛɛ: «Ǹ na Yaya kun tɛɛla a la. A yi di wo lɔ? Ǹ'i ko min mɛnna yi ne, jene yi wo tii le?» Wo lɔ, a lɔɔ tɛɛ a la ka Isa ye.
[10] Isa ya keladennu seikɔnin, ai ka ko min bɛ kɛ, ai ka wo bɛ dandɛɛli kɛ a yɛ. Wo kɔ, a vɛ taala ai le Betisaida so la ai jɛlɛ ma.
[11] Jama ka wo mɛn mingɛ, ai vɛ taala a kɔ. A do k'ai bɛ lɔmina kobɛn. A tɛɛ Ala ya masaya ko lasena ai ma ani ka jangalotɔlu lakɛnɛya.
[12] Teleben waate, aa keladen mɔɔ tan ni fila ka na a fɔ a yɛ, ai vɛɛ: «Fanma, i yi jama labila sa ai yi taa so ni toodalu la jan naminin nɔ, ai yi jiyabon ni dɔnnifen ɲinin, baa m'i dingila lɔkolon ne lɔ.»
[13] Isa k'ai javi, a vɛɛ: «Àilu gbu yi balo di ai ma.» Ai do vɛɛ a yɛ: «Bulukala loolu ni jɛɛni fila le yi mɔ bolo dein. Fɔ m'i taa dɔmunifen san jama min bɛ yɛ.»
[14] Kɛ́ mɔɔ waa loolu ɲɔɔn tɛɛ jama wo lɔ. Ado Isa vɛɛ aa keladennu yɛ: «Ài yi jama lasii mɔɔ biloolu loolu jate.»
[15] Keladennu k'a kɛ ten ka jama lasii.
[16] Wo kɛ, Isa ka bulukala loolu ni jɛɛni fila ta k'a ɲa lajɛlɛ sanma ka balika bɔ Ala yɛ. Wo kɔ, a vɛ bulu ni jɛɛni lɔkalikalila ka a di aa keladennu ma, ko ai y'a lɔtala jama wotɛ.
[17] Ai bɛ ka dɔnni kɛ k'ai fa kpe. Ai wɔlinin, aa keladennu ka bulu ni jɛɛ kulunkulun tɔlu tɔmɔntɔmɔn ka gbɔlɔ tan ni fila lafa.
[18] Lon dɔ, ka Isa to Ala dalila a jɛlɛ ma, aa kɔbiladennu tɛɛ a dafɛ. A bannin, a k'ai maɲininga, a vɛɛ: «Mɔɔlu yi ǹ jatela jene le?»
[19] Ai k'a javi, ai vɛɛ: «A dɔlu y'a fɔla ko Makoliba Yaya le ile le. A dɔlu gbazan y'a fɔla ko kela Iliya le ile le. A dɔgbɛlɛlu y'a fɔla ko kela kɔlɔkɔlɔ dɔgbɛlɛ v'i wuli ka bɔ saya lɔ.»
[20] A k'ai maɲininga, a vɛɛ: «Àilu do? Ài yi ǹ jatela jene le?» Piɛl k'a javi, a vɛɛ: «Ile le Masa Tɔɔmasenin ne ka bɔ Ala fɛlɔ.»
[21] Isa k'a fɔ ai yɛ k'a magbeleya ko ai kà wo fɔ mɔɔ mɔɔ yɛ,
[22] a vɛɛ: «Ǹe Mɔɔnivin Tanin ka kan ka tɔlɔya bubale. Kɛmɔɔba ni salakalaseba kundii ni seliya kalanmɔɔlu kɛtɔ ai banna ǹ nɔ, ka m̀ mina ka ǹ faa. Kɛɛ tele fila a sawana, m̀ wulitɔ.»
[23] A bannin wo fɔla aa kɔbiladennu yɛ, a vɛɛ jama yɛ: «Ni mɔɔ min a fɛ ka bila ǹ kɔ, fɔ wo tii y'i ban a jɛlɛ lɔ lon lon k'a gbaankɔlɔman mina ka bila ǹ kɔ.
[24] Baa ni mɔɔ min a fɛ ka a nin nakisi, wo tii bɔnɔtɔ nimaya la. Ni do mɔɔ min vɛ bɔnɔla a nin na ka bɛn ǹe ma, wo tii kɛtɔ a nin nakisila
[25] A yi di? Ni mɔɔ ka dunuɲa bɛ sɔlɔn ka bɔnɔ ale gbu la, tɔnɔ mindɛ yi wo la?
[26] Wo le kɛtɔ a kɛla, mɔɔ min vɛ maayala ǹe ni ǹa kumalu ma, ǹe Mɔɔnivin Tanin yi maayale wo tii ma, m̀'ɛ nala lon min na ǹa magbiliya lɔ, ani ǹ Fa Ala ta, ani lɔhɔlɔma mɛlɛkalu ta.
[27] Ǹ'i tuɲa fɔ ài yɛ, dɔlu y'ài tɛma jan, minnu tɛnala sala fɔɔ ai vɛ Ala ya masaya lankɛnɛmatɔ yena.»
[28] Tele sein ɲɔɔn timinnin kɔ, Isa ka Piɛl ni Yaya ni Janguba ta ka taa Aladaliya lɔ tini dɔ kɔkan.
[29] Ka Isa to Ala dalila, a ɲakɔlɔla ka jɛlɛma. Aa faanilu ka gbɛ pepe.
[30] Kɛ́ fila ka bɔ gbɛ lɔ telemanin ka kuma Isa fɛ, minnu tɛɛ kela Musa ni kela Iliya le.
[31] Ai lɔnin tɛɛ nɔɔlɔ ba lɔ ka kuma Isa fɛ. Isa tɛɛ ka kan ka taa Jelusalɛm ka Ala sawo kɛ ka faa teme, ai tɛɛ kumala ka bɛn ko wo le ma.
[32] Wo k'a talan Piɛl ni a dafɛɲɔɔlu tɛɛ vɛ sunɔɔ. Ai kununnin, ai ka Isa nɔɔlɔnin ye ani kɛ́ fila minnu lɔnin tɛɛ a dafɛ.
[33] Mɔɔ fila wolu taatɔla, Piɛl k'a fɔ Isa yɛ, a vɛɛ: «Kundii, mɔ kɛ jan, wo bɛnnin ne. I yi lɔ m'i gbaa sawa lɔ: i ta kelen, kela Musa ta kelen, ani kela Iliya ta kelen.» A do tɛɛ m'a lɔn a tɛɛ min fɔla.
[34] Ka Piɛl to kumala, biliya ka na ka bilin ai kunna. Biliya jiinin ai kunna, ai ka siyan.
[35] Wo kɛ, kumakan dɔ ka bɔ biliya lɔ, a vɛɛ: «Ǹ diyanan den ne ne, ǹ na min tala mɔɔlu tɛma. Ài y'ài tolo malɔ a la.»
[36] Kuma wo fɔnin kɔ, kɔbiladennu ma mɔɔ ye fɔ Isa kelen. Ai bɛ ka jeden ko wo ma. Ai ka min ye, ai ma wo ɲafɔ mɔɔ yɛ waate wo lɔ.
[37] Wo kɛnɛbɔ lon, ai jiinin tini la, jama ba ka na Isa labɛn.
[38] Kɛ́ dɔ ka to jama tɛma ka a kan nabɔ, a vɛɛ: «Kalanmɔɔ, i jaani, i yi ǹ denkɛ lasaa. Ale kelen ne yi m̀ bolo.
[39] Jina dɔ y'a tɔlɔyala. A v'a minala, denni yi gbanɔ telemanin. A a lajaajaala, a dakaavu yi bɔ. A a lasɛɛla bubale. A gbeleyanin ne k'a fɔ a yi bɔ a kɔ.
[40] Ǹ na ya kɔbiladennu madiyala, fɔsa ai yi jina gbɛn a kɔ, kɛɛ ai do ma se.»
[41] Isa vɛɛ ai yɛ: «Bi mɔɔlu filinin ne ani limandeyabali le ai le. Ǹ'i to ài tɛma ka àiya ko mina m̀ ma haan fɔɔ waate mindɛ? Na i den ne jan.»
[42] Denni natɔla Isa ma, jina k'a laben duu ma ka lajaajaa gbiligbili. Ado Isa vɛ jina jamalila ka denni lakɛnɛya ka ban ka a lasei a fa ma.
[43] Mɔɔ bɛ ka kawakoya ka bɛn Ala ya foniseleya ma. K'ai kawakoyanin to a kɛko bɛ lɔ, a vɛɛ aa kɔbiladennu yɛ:
[44] «Ài y'ài tolo malɔ kobɛn kuma min na. Ai kɛtɔ ǹe Mɔɔnivin Tanin donna mɔɔlu bolo.»
[45] Kɛɛ kɔbiladennu ma kuma wo ɲaye. A kɔlɔ doonnin tɛɛ ai ma, kosa ai kana a ɲaye. Ai bɛ do tɛɛ siyanna ka a maɲininga a kɔlɔ ma.
[46] Wo waate, sɔsɔyali dɔ v'i wulila kɔbiladennu tɛma ko jene yi ɲamɔɔ le ai tɛma?
[47] Isa do tɛɛ k'ai miliya lɔn. Wo lɔ, a ka denni dɔ ta ka a lalɔ a tɔɔfɛ.
[48] A vɛɛ ai yɛ: «Mɔɔ min vɛ diɲala ka denni min ɲɔɔzii mina kobɛn ka bɛn ǹa ko ma, wo tii vɛ ǹe gbu mina kobɛn. Mɔɔ min do vɛ m̀ minala kobɛn, wo tii vɛ ǹ kelaba lɔmina kobɛn gbazan. Ani mɔɔ min vɛ diɲala ka kɛ ài bɛ lɔ dennimanda le, wo tii le yi mɔɔba le.»
[49] Yaya vɛɛ Isa yɛ: «Kundii, mɔ na kɛ́ dɔ yena, a tɛɛ jinalu gbɛnna ka bɔ mɔɔlu kɔ i tɔɔ lɔ. Mɔ vɛɛ a yɛ a yi wo boloka, baa a tɛ mɔ dɔ le.»
[50] Isa vɛɛ ai yɛ: «Ài kà a dansii wo la. Mɔɔ min tɛ ài juu le, ài dɔ le wo le.»
[51] Isa ya waate ma ka suluya mingɛ, ko a lajɛlɛtɔle ka taa haijɛnɛ, a k'a latɛɛ ko a vɛ kɛla ɲa ɲa ma, fɔ a yi taa Jelusalɛm.
[52] Wo lɔ, a ka keladen dɔlu lataa a ɲa. Ai do ka taa don Samalikalu ya soni dɔ la ka kolu lɔbɛn a yɛ.
[53] Kɛɛ je mɔɔlu ma diɲa ka Isa jiya k'a masɔlɔn a taatɔla le tɛɛ Jelusalɛm.
[54] A kɔbiladen Janguba ni Yaya ka wo mɛn mingɛ, ai ka Isa maɲininga, ai vɛɛ: «Fanma, i y'a fɛ m'i taa lajii ka bɔ sanma ai halaki ko lɔ?»
[55] Isa do k'i kɔdon k'ai makuma.
[56] Ai ka timin wo ja la ka taa so gbɛlɛ la.
[57] K'ai to taamana siya la, mɔɔ dɔ k'a fɔ Isa yɛ, a vɛɛ: «I vɛ taala tɛɛ tɛɛ lɔ, ǹ'i bilale i kɔ.»
[58] Isa vɛɛ a yɛ: «Diɲa yi jɛɛkani bolo, ɲaa yi kɔnɔni bolo, kɛɛ dingila tɛ ǹe Mɔɔnivin Tanin bolo, ǹ'i ǹ nɔningɛ tɛɛ min ja.»
[59] Isa k'a fɔ kɛ́ gbɛlɛ yɛ, a vɛɛ: «Bila ǹ kɔ.» Wo k'a javi, a vɛɛ: «Fanma, i y'a to ǹ'i taa ǹ fa sudoon kunfɔlɔ le.»
[60] Isa vɛɛ a yɛ: «I y'a to fulenilu gbu yi aiya fulenilu sudoon. Ile kɔni yi taa Ala ya masaya ko lase mɔɔlu ma.»
[61] A dɔgbɛlɛ k'a fɔ a yɛ kɔtunun, a vɛɛ: «Fanma, ǹ a fɛ ǹ'i bila i kɔ, kɛɛ to ǹ'i taa ǹ sala m̀ balamɔɔlu la kunfɔlɔ le.»
[62] Isa k'a javi, a vɛɛ: «Mɔɔ min vɛ dawa minala sɛnɛ buluwa ko lɔ ka ban ka to a kɔ fɛlɛnna, wo tii bɛnnin tɛ Masaba ya baale lɔ.»