[1] Nɔningɛlon dɔ, Falisilu ya ɲamɔɔ dɔ ka Isa kili ko a yi taa dɔnnikɛya lɔ a fɛlɔ. Ado mɔɔlu tɛɛ a lasaala kobɛn.
[2] Wo k'a talan, kɛ́ dɔ tɛɛ Isa ɲana, jangalo tɛɛ vɛ min fali fan dɔlu mafununfunun.
[3] Isa ka seliya kalanmɔɔ ni Falisilu maɲininga, a vɛɛ: «A yi di? Ka mɔɔ lakɛnɛya Nɔningɛlon, wo ladaannin ne baa wo ladaannin tɛ ka bɛn maa seliya ma?»
[4] Ai do ka jeden. Wo kɛnin, Isa ka jangalotɔ ta ka a lakɛnɛya ka ban ka a labila.
[5] Wo kɔ, Isa vɛɛ ai yɛ: «Ǹi ài dɔ denkɛ, ni wo tɛ aa nisi ka ben kɔlɔn nɔ Nɔningɛlon, a tɛ a labɔ telemanin?»
[6] Ai do ma se javili dila ko minnu lɔ.
[7] Ka Isa to dɔnnikɛya lɔ, a tɛɛ mɔɔ kilininnu lasaala k'a ye ai tɛɛ ɲamɔɔ siiyalu tala ai jɛlɛ yɛ. Wo le k'a kɛ, a ka sana dɔ la ai yɛ, a vɛɛ:
[8] «Ai v'i kilila ka taa fulusiliya lɔ, i k'i sii ɲamɔɔ siiya lɔ. Ni wo tɛ tumado mɔɔ gbɛlɛ kilinin je, min buɲanin i le.
[9] Wo vɛ kɛla, mɔɔ min na ài mɔɔ fila kilila, wo natɔ a fɔla i yɛ, a vɛɛ: ‹I yi wuli, i siiya di min ma.› Wo lɔ, i kɛtɔ i wulila maaya le lɔ ka kɔfɛ dɔ siiya ɲinin.
[10] Ai do v'i kilila tɛɛ suu wo lɔ, i taa i sii kɔfɛ siiya dɔ lɔ. Wo vɛ kɛla, fulusɔlɔnfa natɔ a fɔla i yɛ, a vɛɛ: ‹M̀ bɔ, a yi di? I t'i wuli i sii ɲafɛ?› Wo lɔ, i kɛtɔ buɲa sɔlɔnna i dɔmunikɛɲɔɔlu ɲana.
[11] K'a masɔlɔn mɔɔ mɔɔ vɛ a jɛlɛ lajɛlɛla, Ala kɛtɔ wo tii lajiila. Kɛɛ mɔɔ mɔɔ do vɛ a jɛlɛ lajiila, Ala kɛtɔ wo tii lajɛlɛla.»
[12] Kɛ́ min tɛɛ ka a kili dɔnnikɛya lɔ, Isa vɛɛ a yɛ: «I vɛ feeti kɛla, i k'i tɔvalu kili ni wo tɛ i badenmalu, sa i siiɲɔɔma banalu. Ni i ka wo kɛ, lon dɔ, wolu gbazan kɛtɔ wo suu kɛla i yɛ k'iya kokein julu sala.
[13] Ni do i ka feeti kɛ, i bolokolon ni namalani ani ɲagbɛlu kili.
[14] I yi nɛɛma sɔlɔnne wo lɔ, k'a masɔlɔn wolu tɛ se iya julu suu suu salala. Ala gbu le kɛtɔ i salala, mɔɔ bɛlɛlu v'i wulila ka bɔ saya lɔ lon min na.»
[15] Mɔɔ dɔ siinin tɛɛ Isa dafɛ dɔnnikɛya lɔ, wo ka Isa ya kuma mɛn mingɛ, a vɛɛ a yɛ: «Mɔɔ minnu kɛtɔ feetikɛya lɔ Masaba ya lon, wolu le yi duwawuden ne.»
[16] Isa vɛɛ a yɛ: «Lon dɔ, kɛ́ dɔ ka feeti ba kɛ ka mɔɔ siyama kili.
[17] Dɔmuni kɛ waate ka se mingɛ, a ka aa bɔliden kela ko a yi taa a fɔ mɔɔ kilininnu yɛ ko: ‹Ài yi na, fen bɛ lɔ vɛ bɛn.›
[18] Kɛɛ ai kelenkelen na ka makotoli ɲinin a fɛ. Mɔɔ kunfɔlɔ vɛɛ a yɛ: ‹Ǹ na duu dɔ le sanna. Ǹ a fɛ n'i taa a lasaa. I jon, i yi diɲa ǹa madiyali ma
[19] Mɔɔ filana vɛɛ: ‹Ǹ na sɛnɛkɛ nisi tan ne sanna, ǹ a fɛ ka taa ai lɔsuman yi ne. I jon, i yi ǹa madiyali mina.›
[20] Mɔɔ sawana gbazan vɛɛ: ‹Ǹ na moso kula le fulula yi ne. Wo le y'a kɛla, ǹ tɛ se nala.›
[21] Bɔliden ka taa wo ɲafɔ aa kundii yɛ mingɛ, a joso la ka kuna bubale. A do vɛɛ bɔliden yɛ: ‹Taa falafala, i yi se so siya ba ni a siya denni bɛ la. I vɛ bolokolon, ni senkelenni ni ɲagbɛ ani namalanilu suu suu yena, i yi na ai bɛ le jan.›
[22] Bɔliden do vɛɛ: ‹Ǹ kundii, i na min fɔla, m̀'ɛ ban wo kɛla. Kɛɛ hali bi, iya bonna ma fa ba bene.›
[23] Wo lɔ, kundii vɛɛ a yɛ: ‹Bɔ i taa sɛnɛlu ni gbele lɔ siyalu la. I vɛ mɔɔ mɔɔ yena je, i yi ǹa kililikan magbeleya ài yɛ, sa ai yi diɲa ka don ka ǹa bon nafa.
[24] K'a masɔlɔn ǹ a fɔ ài yɛ, mɔɔ minnu kilinin kunfɔlɔ le, ai suu suu tɛnala ǹa feeti kinin dɔ mafɛlɛnna.›»
[25] Lon dɔ, ka jama ba bilanin to Isa kɔ taamana, a k'i kɔdon k'a fɔ ai yɛ, a vɛɛ:
[26] «Mɔɔ min a fɛ ka na m̀ ma, ni wo tii m'i ban a fa lɔ, ni wo tɛ a ba, ni wo tɛ a moso, ni wo tɛ a dennu, ni wo tɛ a badenmalu, hali ale gbu ya nimaya, wo tii tɛ se kɛla ǹa kɔbiladen ne.
[27] Ani mɔɔ min ma diɲa k'a gbaankɔlɔman ta ka bila ǹ kɔ, wo tii tɛ se kɛla ǹa kɔbiladen ne.
[28] A yi di? Jene yi ài lɔ, ni a a fɛ ka sangaso lɔ, a t'i sii kunfɔlɔ le ka kɔndɛbɔ k'a lɔn ni a yi sene a lɔla ka a ban?
[29] Ni wo tɛ, a vɛ bonju siila ka aa wɔli dɛsɛ, a tɛnala sena a labanna. Wo vɛ kɛla, mɔɔlu kɛtɔ a yena ka jɛlɛbɔ a lɔ,
[30] ai vɛɛ: ‹Ɛɛ, kɛ́ min na bon lɔ jusiila, kɛɛ do a ma se a labanna!›
[31] A yi di? Masakɛ mindɛ kɛtɔ diɲala ka a masakɛɲɔɔn kɛlɛ, ni a m'i sii kunfɔlɔ le ka kɔndɛbɔ k'a lɔn ni aa sɔdasi mɔɔ waa tan yi sene aa masakɛɲɔɔn ya sɔdasi mɔɔ waa muan na.
[32] Ni a tɛ se wo la, a kɛtɔ kela lataala ka kɛlɛ ban ale ni a masaɲɔɔn wotɛ k'a to tɛɛ majaan nɔ.
[33] Wo ɲa kelen ma, ài suu suu tɛ se kɛla ǹa kɔbiladen ne, ni ài m'i ban ài jɛlɛ lɔ ka fen bɛ to je.
[34] «Kɔɔ yi fen kein ne le. Kɛɛ ni kɔɔ timiya vɛ bɔla a la, a yi se timiyala di kɔtunun?
[35] A nafa tɛ kɛ a la duu kan ni wo tɛ gbuan kan, fɔ k'a lafili dein. Tolo yi min kun, wo tii y'a tolo malɔ kuma wo la.»