[1] Wo kɔ, Isa ka don Jɛliko ka to so lɔtiminna.
[2] Kɛ́ dɔ tɛɛ je, min tɔɔ yi ko Zakiya. Nisɔɔnminabalu ya kundii le tɛɛ ani nafolotii.
[3] A lɔɔ tɛɛ a la k'a ɲa la Isa kan ka a lɔn. Kɛɛ jama walanin tɛɛ Isa laminin nɔ bubale. Wo boloma, Zakiya ma se a yena k'a masɔlɔn a sulunyanin.
[4] A do vɛ bɔlila ka taa jama ɲa ka jɛlɛ toloju la sa a yi Isa ye, baa wo tɛɛ timinna wo ja le.
[5] Isa senin toloju kɔlɔ, a k'a ɲa lajɛlɛ k'a fɔ Zakiya yɛ, a vɛɛ: «Zakiya, i yi latɛlɛja i yi jii, baa ǹ a fɛ ǹ'i jiya i fɛ le lɔ bi.»
[6] Wo lɔ, Zakiya k'i latɛlɛja ka jii ka Isa lɔmina sawa le ka taa a le aa lu ma.
[7] Mɔɔlu ka wo ye mingɛ, ai vɛ Isa mafɔla, ai vɛɛ: «A diɲanin ka julumbutɔ kɛ a jetii le.»
[8] Zakiya k'i lɔ Fanma Isa ɲana k'a fɔ a yɛ, a vɛɛ: «Fanma, bi ǹ'i m̀ bolofennu lɔtalala ka fan kelen di bolokolonnu ma. Ni ǹ na mɔɔ dɔ tɔɲɔla ka a bolofen mina a la, ǹ kɛtɔ wo ɲɔɔzii naani laseila wo tii ma.»
[9] Isa k'a javi, a vɛɛ: «Kisi ko vɛ se bon min na bi k'a masɔlɔn kɛ́ min gbazan yi sedina Ibulahima bɔzɔn dɔ le le.
[10] Baa ǹe Mɔɔnivin Tanin nanin fɔsa ǹ'i mɔɔ tununnilu ɲinin k'ai lakisi.»
[11] K'ai to ai tolo malɔla kuma wolu la, Isa ka sana dɔ la ai yɛ k'a masɔlɔn ai ma tɛɛ vɛ sulunya Jelusalɛm so la, ado mɔɔlu tɛɛ i milila k'a fɔ ko Ala ya masaya lankɛnɛmayatɔ wo waate gbu gbu le lɔ,
[12] a vɛɛ: «A ka kɛ fanma dɔ le le, min ka taa jamana majaan dɔ lɔ, fɔsa a yi masaya sɔlɔn ka na a sii aa duu kunna.
[13] Jani a yi taa, a ka aa bɔliden mɔɔ tan kili ka wɔligbɛ tan di ai kelen kelenna bɛ ma k'a fɔ ai yɛ, a vɛɛ: ‹Ài yi juwaya kɛ ai lɔ ka se ǹ kɔsei la.›
[14] Kɛɛ jamana wo duulennu ka mɔɔba wo lagbeyaɲɛ. A bɔnin ye ai fɛlɔ, ai ka kela lataa a kɔ ko ai t'a fɛ a yi na i sii ai kunna.
[15] Wo bɛ n'a kɛ, a ka masaya sɔlɔn ka seikɔ aa jamana lɔ. A ka se mingɛ, a ka aa bɔlidennu kili, a na aa wɔli dila minnu ma, k'a lɔn k'a fɔ ai vɛ jein sɔlɔn juwaya lɔ.
[16] Bɔliden kunfɔlɔ ka na k'a fɔ a yɛ, a vɛɛ: ‹Fanma, m̀'ɛ iya wɔli wo ɲɔɔzii tan sɔlɔn.›
[17] A do vɛɛ a yɛ: ‹I gbu n'a ke le la kobɛn! Bɔliden sɔvɛ le i le. I na fen denni le lɔminala kɔbɛn, wo le y'a ma ǹ i lasiila so tan ne kunna.›
[18] Wo kɔ, a filana ka na a fɔ a yɛ: ‹Fanma, m̀'ɛ iya wɔli wo ɲɔɔzii loolu sɔlɔn.›
[19] A do vɛɛ a yɛ: ‹Ile gbazan kɛtɔ i siila so loolu le kunna.›
[20] Wo kɛ, a dɔgbɛlɛ ka na k'a fɔ a yɛ, a vɛɛ: «Fanma, ɛɛn. I na wɔli min dila m̀ ma, a ye. A ladalonin tɛɛ m̀ bolo faanin ne lɔ.
[21] K'a masɔlɔn ǹ tɛɛ siyanna i ɲa, baa iya ko gbeleyanin ne. I yi min tala, ile ma wo bila je. I do yi malo kalila, i ma min sɛnɛ.›
[22] A do vɛɛ a yɛ wo lɔ: ‹Ile bɔliden yon! Ǹ kɛtɔ i latɔnna ka bɛn ile jɛlɛ dalakan ne ma. I tɛɛ k'a lɔn ne k'a fɔ ǹa ko gbeleyanin ne. Ko ǹ'i min tala, ǹe ma wo bila je ani ko ǹ'i malo le kalila, ǹe ma min sɛnɛ.
[23] Mindɛ kɛnin i ma taa ǹa wɔli bila wɔlilamalabon na? Ni wo tɛɛ vɛ kɛla, ǹ tɛɛ vɛ ǹ kɔseila, ǹ tɛɛ taa ǹa wɔli tale, k'a tɔnɔ sɔlɔn a kan.›
[24] Wo kɛ, a k'a fɔ a dafɛmɔɔlu yɛ, a vɛɛ: ‹Ài wɔli wo bɔ a bolo k'a di wɔligbɛ tan tii ma.›
[25] Ai do vɛɛ a yɛ: ‹Fanma, wɔligbɛ tan ne yi wo bolo butu!›
[26] Kɛɛ a do vɛɛ ai yɛ: ‹Ǹ a fɔ ài yɛ, ǹ ko fen yi min bolo, a dɔ latɔle wo tii ta le kan. Kɛɛ do fen tɛ min bolo, hali min ni y'a bolo, wo minatɔle a la.
[27] Ǹ juulu kɔni, minnu tɛɛ tɛ a fɛ ǹ'i ǹ sii ai kunna, ài taa ai bɛ mina ka na ai faa ǹ ɲakɔlɔ jan.›»
[28] Isa bannin sana wo lala, a vɛ bilala jama ɲa ka taa Jelusalɛm.
[29] A masulunyanin Betifase ni Betani solu la, a ka se tini dɔ ma, mɔɔlu yi fɔla min ma ko Zeituna tini. Wo lɔ, a ka aa kɔbiladen mɔɔ fila kelaya.
[30] A vɛɛ ai yɛ: «Soni min yi mɔ ɲafɛ ve, ài yi taa je. Ài vɛ donna so kɔnɔ, ài kɛtɔ sofalini bolan dɔ silinin yena, mɔɔ m'i sii ba min kɔkan bene. Ài y'a fɔlin ka na a le jan.
[31] Ni mɔɔ dɔ ka ài maɲininga ko: ‹Mindɛ kɛnin ài y'a fɔlinna?›, ài vɛɛ wo tii yɛ: ‹Maa Fanma le mako y'a la.›»
[32] Keladen fila wo ka bɔ je ka taa a talan iwo Isa k'a fɔ ai yɛ teme.
[33] Ai tɛɛ sofalini fɔlinna waate min nɔ, a tiilu ka na k'a fɔ, ai vɛɛ: «Mindɛ kɛnin ài yi sofalini fɔlinna?»
[34] Ai do ka wolu javi, ai vɛɛ: «Maa Fanma mako y'a la.»
[35] Wo lɔ, ai ka sofalini ta ka taa a le Isa fɛ. Ai senin a ma, ai ka aiya faanilu la sofalini kɔkan. Wo kɛ, Isa ka jɛlɛ k'i sii a kɔkan.
[36] A taatɔla, mɔɔlu vɛ aiya faanilu fɛzɛnna siya kan a ɲa.
[37] Wo ɲa ma, a ma ka sulunya Jelusalɛm la ka na se Zeituna tini ma. A senin tini lajii lɔ, aa kɔbiladen jama ba vɛ sawala ka kɛ Ala tanule kan ba lɔ ka bɛn kawanakolu ma, ai ka minnu kɛnin ye a bolo.
[38] Ai vɛɛ: «Duwawu yi masakɛ yɛ, min yi nala Mɔtii tɔɔ lɔ. Hɛlɛ yi kɛ sanfɛ dingilalu lɔ. Tanuli yi Ala yɛ.»
[39] Falisi dɔlu ka to jama tɛma k'a fɔ Isa yɛ, ai vɛɛ: «Kalanmɔɔ, a fɔ iya kɔbiladennu yɛ ko ai yi jeden.»
[40] A do k'ai javi, a vɛɛ: «Ǹ a fɔ ài yɛ, ǹ ko ai vɛ jedenna, hali kawalu gbanɔtɔ ai nɔ lɔ.»
[41] Isa masulunyanin Jelusalɛm la ka so ye, a vɛ kasila aa ko lɔ, a vɛɛ:
[42] «A tɛɛ bɛnne, ni ài tɛɛ ka hɛlɛ siya lɔn bi. Kɛɛ wo doonnin ài ma butu.
[43] Lon dɔ sentɔ, ài juulu natɔ ài lamininna fan bɛ lɔ ka àiya siya bɛ tɛɛtɛɛ fɔɔ k'ài bila jiin nɔ.
[44] Ai kɛtɔ àiya so halakila tɛtɛ, ani ka sokɔnɔmɔɔ bɛ lɔdɔndɔn. Hali ai tɛnala kawakulun fila tola i ɲɔɔn ma àiya so kɔnɔ, baa a lɔɔ tɛɛ Ala la ka ài madɛmɛn waate min nɔ, ài ma wo jate feu!»
[45] Isa donnin lɔhɔlɔmabonba la, a vɛ juwa ni sannikɛbalu gbɛnna k'ai labɔ je,
[46] a vɛɛ ai yɛ: «A sɛvɛnin kitabu kɔnɔ ko: ‹Ǹa bon ka kan ka kɛ batokɛbon ne le.› Kɛɛ do ài vɛ a kɛ sonnu doonya le.»
[47] Wo kɔ, Isa tɛɛ mɔɔlu kalanna lon lon lɔhɔlɔmabonba kɔnɔ. Salakalaseba kundii ni seliya kalanmɔɔ ni jamana ɲamɔɔlu tɛɛ a faa ko ɲa ɲininna,
[48] kɛɛ ai tɛɛ tɛ se, baa Isa ya ko tɛɛ vɛ mɔɔ bɛ kun mina. Ai bɛ tɛɛ ai tolo malɔla a ma kobɛn.