[1] Isa bannin wo bɛ fɔla jama yɛ, a do vɛ taala ka se Kapɛlɛnam so kɔnɔ.
[2] Lɔmu sɔdasi kundii dɔ tɛɛ je, min diyanan bɔliden tɛɛ man kɛnɛ. A do tɛɛ faa bolo le ma.
[3] Sɔdasi kundii ka Isa mangan mɛn mingɛ, a ka Jahudiya kɛmɔɔba dɔlu kelaya a madiyala, ko a yi na aa bɔliden nakɛnɛya.
[4] Kɛmɔɔbalu senin Isa ma, ai vɛ a madiyala kosɛvɛ, ai vɛɛ: «A bɛnnin i yi kɛ́ min madɛmɛn,
[5] baa maa siboloma diyanin a yɛ bubale. Ale na Aladalibon lɔla mɔ yɛ.»
[6] Wo lɔ, Isa vɛ taala ai fɛ. Ai masulunyanin bon na, sɔdasi kundii ka a tɔvalu kela Isa ma. Ai do vɛɛ a yɛ: «Fanma, i k'i jɛlɛ ɲagba. Hɔlɔ tɛ ǹ ne k'a fɔ i yi don ǹa bon na.
[7] Wo le n'a kɛla, ǹe gbu ma na i ma. I do vɛ kuma kelen fɔla dein, ǹa bɔliden yi kɛnɛyale.
[8] K'a masɔlɔn ǹe gbazan yi dɔ ya fanga kɔlɔ, ado sɔdasilu yi ǹa fanga kɔlɔ. M̀'ɛ a fɔla a dɔ yɛ ko a yi taa, wo yi taale. Ǹe do v'a fɔla a dɔ yɛ a yi na, wo yi nale. M̀'ɛ a fɔla ǹa bɔliden yɛ ko a yi min kɛ, a yi wo kɛle.»
[9] Isa ka kuma wo mɛn mingɛ, a ka kawakoya kosɛvɛ. A do k'i kɔdon k'a fɔ a kɔmɔɔlu yɛ, a vɛɛ: «Ǹ a fɔ ài yɛ, ǹ ko m̀ ma limandeya min ɲɔɔzii ye ba bene hali Isilanmɔɔlu tɛma.»
[10] Keladen wolu seikɔnin bon na, ai ka bɔliden wo kɛnɛyanin ye.
[11] A ma mɛn bakɛ, Isa ka taa se so dɔ la, min tɔɔ yi ko Nain. Aa kɔbiladennu ni jama ba tɛɛ a kɔ.
[12] A masulunyanin so donda la, a ka sokɔnɔmɔɔ siyama taatɔ ye kabuluso la, kavelen dɔ fuleni tɛɛ ai bolo. Kɛsamoso dɔ le denkɛ kelenpesa tɛɛ wo le.
[13] Fanma Isa ka moso wo ye mingɛ, a hina ka don a la. A do vɛɛ a yɛ: «I kà kasi.»
[14] Wo kɔ, a k'i madon sutafen na ka a bolo tuu a la. Ado fulenitabalu k'i lɔ. Isa vɛɛ: «Kavelen, ǹ a fɔ i yɛ, ǹ ko i wuli.»
[15] Fuleni do v'i wulila k'i sii ka kuma jusii. Wo kɛnin, Isa ka a don a ba bolo.
[16] Mɔɔ bɛ ka siyan wo lɔ. Ai vɛ Ala tanula, ai vɛɛ: «Kela ba dɔ v'i wuli mɔ tɛma!» Ai do vɛɛ: «Ala vɛ na ka aa mɔɔlu madɛmɛn.»
[17] Samakan wo ka jɛnzɛn Jude koovi ni a laminin bɛ lɔ ka bɛn Isa ma.
[18] Makoliba Yaya ya kɔbiladennu ka taa wo bɛ ɲafɔ a yɛ.
[19] Wo lɔ, a ka aa kɔbiladen fila kili k'ai kela Fanma Isa ma, ko ai y'a maɲininga ko: «Ala ya Mɔɔ Tanin min ka kan ka na, ile le wo le baa m'i mɔɔ dɔgbɛlɛ makɔnɔ?»
[20] Mɔɔ fila wolu senin Isa ma, ai k'a maɲininga, ai vɛɛ: «Yaya na mɔ kelala i ma. A vɛɛ ko m'i i maɲininga ko: ‹Ala ya Mɔɔ Tanin min ka kan ka na, ko wo le ile le baa m'i mɔɔ gbɛlɛ makɔnɔ?›»
[21] Wo waate kelen nɔ, Isa ka mɔɔ siyama lakɛnɛya ka bɔ aiya jangalo ni tɔlɔyalu lɔ ka jinalu gbɛn ka bɔ mɔɔlu kɔ ani ka ɲagbɛ siyama ɲa laka.
[22] Wo lɔ, Isa ka keladen wolu javi, a vɛɛ: «Min bɛ kɛnin ài ɲana jan, ani min bɛ fɔnin ài ɲana, ài yi taa wo ɲafɔ Yaya yɛ. Ko ɲagbɛlu ɲa la vɛ ka, namalanilu vɛ taama kobɛn, kunantɔlu la vɛ sɛnɛya, tologbɛlɛnnu tolo la vɛ ka, fulenilu v'i wuli ka bɔ saya lɔ, ani Samakan Kein na vɛ se bolokolonnu ma.
[23] Ni mɔɔ mɔɔ ma tɛɛ ǹ nɔ, wo tii yi duwawuden ne le.»
[24] Yaya ya keladennu ka bɔ je mingɛ, Isa ka kuma jama yɛ ka bɛn Yaya ma, a vɛɛ: «Ài na taala ka mindɛ ye fuwa lɔ? Ài na kaa yena, fɔɲɛ yi min namaamaala? Wo tɛ dɛ!
[25] Ài na taala ka mindɛ ye wo lɔ? Faani kein tii? Minnu yi faani keinnu donna, k'ai sii mɛndiya lɔ, wolu yi yena masakɛlu ya bonnu lu la.
[26] Ài na taala ka mindɛ ye? Jalasa ài ma taa ka kela dɔ ye? Ǹ a fɔ ài yɛ, ǹ ko kela le a le. A do buɲanin kela le feu!
[27] Yaya aa ko sɛvɛnin kitabu kɔnɔ ko: ‹Ǹ kɛtɔ ǹa keladen nataala i ɲa ka siya ladan i yɛ.›
[28] Ǹ a fɔ ài yɛ, ǹ ko mɔɔ tɛ moso ya densɔlɔnnin nɔ min buɲanin ka timin Yaya la, wo bɛ n'a kɛ, hali dennimanda min yi Ala ya masaya kɔlɔ, wo tii buɲanin Yaya le.»
[29] Mɔɔ bɛ k'ai tolo malɔ Yaya la mingɛ, ai ka diɲa Yaya y'ai mako, hali nisɔɔnminabalu, k'a jiya ko jo yi Ala fɛ.
[30] Kɛɛ do Falisi ni seliya kalanmɔɔlu k'i ban Ala sawo ma. Ai ma diɲa Yaya y'ai mako. Isa ka to kumala, a vɛɛ:
[31] «Ǹ'i bi mɔɔlu la fen suu mindɛ ma? Ai kɛnin di?
[32] Ai bɔnin dennilu la, minnu siinin ɲanatɛɛla bala lɔ. Ai y'a fɔla ai tɔvalu yɛ, ai vɛɛ: ‹Mɔ na tolon kɛla ài yɛ, kɛɛ do ài ma dɔn kɛ. Ani mɔ na saya dɔɔni lala ài yɛ, ài ma kasi.›
[33] Makoliba Yaya ka na mingɛ, a deinnin tɛɛ sun donna. A tɛɛ tɛ gbɛ minna. Ài y'a fɔla wo le lɔ ko jina le y'a kɔ.
[34] Ǹe Mɔɔnivin Tanin gbazan vɛ na. Ǹ'i dɔnni ni minni kɛla k'a diyabɔ. Ài y'a fɔla wo le lɔ ko nooma le ǹe le ani gbɛtɔ. Ài vɛɛ ko ǹe yi nisɔɔnminaba ni konyonkɛbalu kɛla ǹ tɔva le le.
[35] Wo bɛ n'a kɛ, mɔɔ min yi taamana Ala ya hangilimaya lɔ, wo tii kɛko bɛ kɛtɔ a jiyala ko a yi siya bɛlɛ le kan.»
[36] Lon dɔ, Falisi kɛ́ dɔ ka Isa kili ko a yi taa a fɛlɔ dɔnnikɛya lɔ. Isa do ka taa aa bon na k'i sii tabali la.
[37] Ado sokɔnɔmoso dɔ tɛɛ je, min tɛɛ julumbutɔ le. Wo k'a mɛn mingɛ ko Isa yi dɔnnikɛya lɔ Falisi kɛ́ ya bon na, a do vɛ nala sani kawalama kein ne, min lafanin tɛɛ tulu sumadiyanin na.
[38] A v'i madonna Isa la a kɔfɛ k'i lɔ a sen fɛ ka kasi. A ɲaji vɛ benbenna Isa sennu kan k'ai ɲiin. Wo kɛ, a k'a sennu matɛɛ a kunsi la ka ban k'ai sumu, ka tulu sumadiyanin kɛ ai kan.
[39] Falisi kɛ́ min tɛɛ ka Isa kili je, a ka wo ye k'a fɔ a jɛlɛ ma, a vɛɛ: «Ni kɛ́ min tɛɛ kɛ kela le, a tɛɛ moso min suu lɔnne, min y'a bolo tuula a la yi ne, baa julumbutɔ le.»
[40] Isa vɛɛ a yɛ wo lɔ: «Simɔn, ǹ a fɛ ǹ'i kuma dɔ fɔ i yɛ.» Simɔn k'a javi, a vɛɛ: «Kalanmɔɔ, a fɔ.»
[41] Isa vɛɛ: «Kɛ́ dɔ ya julu tɛɛ mɔɔ fila la. Dɔ ta bɛnnin tɛɛ wɔligbɛ kɛmɛ loolu le ma. A dɔ ta bɛnnin tɛɛ wɔligbɛ biloolu le ma.
[42] Wɔlitii k'a ye mingɛ ko ai mɔɔ fila tɛ se jululu salala, a k'ai lɔkoto.» Wo fɔ, a ka Simɔn maɲininga, a vɛɛ: «A yi di? Ai mɔɔ fila lɔ, jene kɛtɔ kɛ́ wo kanuna bɛlɛbɛlɛ kɛ?»
[43] Simɔn k'a javi, a vɛɛ: «M̀ miliya lɔ, min ya julu walanin tɛɛ, wo tii le kɛtɔ a kanula.» Isa vɛɛ a yɛ: «I jo le.»
[44] Wo kɛ, Isa k'i kɔdon k'i ɲa kaa moso lɔ. A vɛɛ Simɔn yɛ: «I ma moso min ye? Ǹ na donna ya bon na mingɛ, i ma ji di m̀ ma ko ǹ'i ǹ sen mako. A do ka ǹ sennu ɲiin a ɲaji le k'ai matɛ a kunsi le.
[45] Ile ma ǹ sumu foli boloma. Kɛɛ k'a ta ǹ don ma jan, ale ma ǹ sennu sumu boloka.
[46] I ma kunnamuntulu di m̀ ma, a do ka tulu sumadiyanin mun ǹ sennu ma.
[47] Ǹ a fɔ i yɛ wo lɔ, ǹ ko hali moso min ya julumbu walanin, wo bɛ lɔ vɛ koto baa aa kanundeya le walanin. Ni julumbu siyama lɔ ma koto mɔɔ min yɛ, wo tii ya kanundeya dɔɔyatɔle gbazan. »
[48] Ado Isa vɛɛ moso yɛ: «Iya julumbulu lɔ vɛ koto.»
[49] Wo lɔ, mɔɔ minnu tɛɛ dɔnni kɛla Isa fɛ je, ai vɛ a fɔla i ɲɔɔn yɛ, ai vɛɛ: «Ɛɛ mɔɔ suu mindɛ le min ne, fɔɔ a yi se julumbu lɔkoto le la?»
[50] Ado Isa vɛɛ moso yɛ: «Iya limandeya v'i lakisi. Taa hɛlɛ lɔ.»