[1] Bulufununbali Selilon, ai y'a fɔla min ma ko Timinkunna Selibɔ, wo ma tɛɛ vɛ sulunya.
[2] Ado salakalaseba kundii ni seliya kalanmɔɔlu tɛɛ siyanna jama ɲa, wo lɔ ai tɛɛ Isa faa ko ɲa ɲininna doon nɔ.
[3] Wo waate, Soɛtana ka don Judasi josokun nɔ, ai y'a fɔla min ma ko Sikaliyɔti, min tɛɛ Isa ya keladen mɔɔ tan ni fila dɔ le.
[4] Judasi ka taa kuma salakalaseba ani lɔhɔlɔmabonba lakanaliba kundiilu fɛ, ko a yi sene Isa donna ai bolo.
[5] Ai do ka sawa wo lɔ ka lahedi ta a yɛ ko ai kɛtɔ wɔli dila a ma.
[6] Judasi do ka diɲa wo ma. K'a ta lon wo ma, a tɛɛ waate ɲininna sa a yi Isa don ai bolo, jama tɛ tɛɛ min ja.
[7] Bulufununbali Selilon ka se. Wo lon Jahudiyalu tɛɛ ka kan ka saaden ne kannatɛɛ ka Timinkunna Selilon salaka bɔ.
[8] Wo lɔ, Isa ka Piɛl ni Yaya kelaya, a vɛɛ: «Ài yi taa Timinkunna Selilon dɔnnifen lɔbɛn mɔ yɛ.»
[9] Ai do ka a maɲininga, ai vɛɛ: «I y'a fɛ m'a lɔbɛn min ne ja?»
[10] Isa vɛɛ ai yɛ: «Ài vɛ donna so kɔnɔ, ài kɛtɔ kɛ́ dɔ yena je, jidaa y'a kun. Ài yi bila a kɔ. A vɛ donna bon min na,
[11] ài y'a fɔ lutii wo yɛ ko: ‹Kalanmɔɔ ya ko a jiyabon yi min, ale ni aa kɔbiladennu kɛtɔ Timinkunna Selilon dɔnni kɛla tɛɛ min ja?›
[12] Kɛ́ wo kɛtɔ bon ba dɔ jiyala ài la sangaso san ma, min lɔbɛnnin kobɛn. Mɔ mako yi fen minnu la, wo bɛ kɛtɔ kɛla je. Ài yi dɔnnifen lɔbɛn wo ja.»
[13] Piɛl ni Yaya bɔnin je, ai ka kolu talan iwo Isa k'a fɔ ai yɛ teme. Ai do ka Timinkunna Selilon dɔnnifen lɔbɛn.
[14] Dɔnni waate senin, Isa ni aa keladennu k'i sii tabali la.
[15] K'ai to dɔnnila, a vɛɛ ai yɛ: «A lɔɔ tɛɛ ǹ na bubale ko ǹ'i selilon dɔnni min kɛ ài fɛ jani ǹ'i tɔlɔya.
[16] K'a masɔlɔn ǹ a fɔ ài yɛ, ǹ ko ǹ tɛnala a ɲɔɔn dɔnni kɛla butu fɔɔ m̀'ɛ a kɛla kula kɛ Masaba ya lon na ka a kɔlɔ mafa.»
[17] A do ka jiyafɛ ta ka balika bɔ Ala yɛ ka ban k'a fɔ, a vɛɛ: «Ài kelenkelenna bɛ y'a ta k'a dɔ min a lɔ.
[18] K'a masɔlɔn ǹ a fɔ ài yɛ, ǹ ko ǹ tɛnala lɛzɛnji minna butu fɔɔ Ala vɛ aa masaya lankɛnɛmayala lon min na.»
[19] Wo kɔ, a ka bulu ta. A bannin balika bɔla Ala yɛ, a ka a lɔkalikalila ka a di ai ma, a do vɛɛ: «Ǹ fali le ne, min dinin àiya ko lɔ. Ài y'a dɔn fɔsa ài hangili yi to ǹ nɔ.»
[20] A do ka jiyafɛ ta ɲa kelen wo ma, lɛzɛnji tɛɛ min nɔ. A ka wo di ai ma k'a fɔ, a vɛɛ: «Lɛzɛnji min yi salatikan kula tɔɔmase le le, Ala yi min tala ài yɛ ǹ jeli bɔn ko le lɔ.
[21] Kɛɛ do mɔɔ min kɛtɔ ǹ janvala, wo siinin ǹ dafɛ dɔnnikɛya lɔ jan.
[22] Ǹe Mɔɔnivin Tanin faatɔle iwo Ala na a latɛɛla teme. Kɛɛ do mɔɔ min kɛtɔ ǹ janvala, gbalo yi wo tii yɛ.»
[23] Ai do v'i ɲɔɔn maɲiningala ko jene y'ai tɛma, min diɲatɔ ka ko suu wo kɛ?
[24] Wo waate, sɔsɔyali dɔ k'i wuli keladennu tɛma ko jene y'ai lɔ min ka kan ka jate ɲamɔɔ le.
[25] Wo lɔ, Isa vɛɛ ai yɛ: «Siboloma gbɛlɛ masakɛlu yi kundiiya kɛla aiya jamanadennu kunna diyanigbeya le la. Ai do y'a fɔla ai jɛlɛ ma ko koɲumakɛbalu.
[26] Kɛɛ a man kan ka kɛ ten ài tɛma. Min yi ɲamɔɔ le ài tɛma, wo y'a jɛlɛ kɛ iwo dɔɔmanda. Min do yi kundiiya la, wo yi kɛ iwo bɔliden.
[27] A yi di? Bɔliden min yi gba donna ani aa kundii min siinin dɔnnikɛya lɔ, jene buɲanin a dɔ le? Jalasa min siinin dɔnnikɛya lɔ, wo le buɲanin, kɛlɛ? Wo bɛ n'a kɛ, ǹ kɛnin ne ài tɛma jan iwo bɔliden.
[28] Ài vɛ to ǹ kɔ ǹa lɔsumanni ko bɛ lɔ.
[29] Wo lɔ saa, ǹ Fa na masaya dila m̀ ma teme, ǹ'i masaya dila ài ma ten ne,
[30] fɔsa ài yi dɔnni kɛ k'i min ǹ fɛ ǹa masaya waate lɔ. Ài do siitɔ masayasiifennu lɔ ka maa Isilanmɔɔlu ya kabila tan ni fila ya kiti tɛɛ.»
[31] Wo kɔ, a vɛɛ Simɔn Piɛl yɛ: «Simɔn, Simɔn, i tolo malɔ. Soɛtana tɛɛ a fɛ a ài lɔsuman, iwo malo lɔ yi fɛla teme.
[32] Ǹe do vɛ Ala dali i yɛ, sa iya limandeya kana koli, ani fɔsa i vɛ seikɔla ǹ ma, i i badenmalu sɛmɛ don.»
[33] A do vɛɛ Isa yɛ: «Ǹ nɔbɛnnin ka taa i kɔ hali kaso la, ani ka faa i fɛ.»
[34] Isa vɛɛ a yɛ: «Piɛl, ǹ a fɔ i yɛ, ǹ ko donon tɛnala kumunna bi, fɔ i v'a fɔla haan siɲa sawa le ko i ma ǹ lɔn.»
[35] Isa k'a fɔ aa keladennu yɛ kɔtunun, a vɛɛ: «Ǹ na ài kelala mingɛ, ǹ ko ài kà wɔli ta, ni wo tɛ bɔlɔ, sa samala. Wo waate, ài ka gbala le fen ko lɔ?» Ai k'a javi, ai vɛɛ: «Ɛnɛn, mɔ ma gbala ko ko lɔ.»
[36] Isa vɛɛ: «Tandainɔ kɔni, ni wɔli ka kɛ mɔɔ min bolo, ni wo tɛ bɔlɔ wo tii y'a ta. Ani ni siyamifan tɛ mɔɔ min bolo, wo tii y'aa faaniba fele k'a dɔ san.
[37] K'a masɔlɔn ǹ a fɔ ài yɛ, ǹa ko sɛvɛnin kitabu fan min nɔ, fɔ wo ma yi fa, ko: ‹Ai na a jatela konyonkɛba dɔ le le.› Wo lɔ, wo mafa waate ma vɛ sulunya.»
[38] Ai vɛɛ a yɛ: «Fanma, i ɲa kaa, siyamifan fila yi jan.» A vɛɛ ai yɛ: «Wo vɛ a bɔ.»
[39] Wo kɔ, Isa ka bɔ je ka taa Zeituna tini la, iwo a deinnin tɛɛ a kɛla teme. Aa kɔbiladennu ka bila a kɔ.
[40] Ai senin wo ja, a vɛɛ ai yɛ: «Ài yi Ala dali, sa ài ma kana nɛɛn ka bila koyon nɔ.»
[41] Wo kɛ, a k'i mabɔ ai la k'i mabilin ka Ala dali,
[42] a vɛɛ: «Ǹ fa, ni i ka diɲa a ma, i y'a kɛ tɔlɔya min yi timin ǹ kunna. Kɛɛ ǹe sawo kà kɛ, fɔ i sawo.»
[43] Wo waate, mɛlɛka dɔ ka bɔ haijɛnɛ ka na a sɛmɛ don.
[44] Ka Isa josomakasanin to, a k'a dɔ la aa madaili kan. A do talaji tɛɛ bɔla a la fɔɔ ka benben duu ma iwo jeli.
[45] A bannin Ala dalila, a v'i wulila ka taa se aa kɔbiladennu ma. A k'ai talan sunɔɔ lɔ k'a masɔlɔn ai tɛɛ vɛ sɛɛ josomakasi boloma.
[46] A vɛɛ ai yɛ: «Mindɛ lɔ ài yi sunɔɔ lɔ? Ài yi wuli ka Ala dali sa ài ma kana nɛɛn ka bila koyon nɔ.»
[47] Ka Isa to kumala, jama ka bala ai lɔ. Judasi, min tɛɛ aa keladen mɔɔ tan ni fila dɔ le, wo bilanin tɛɛ ai ɲa. A do v'i madonna Isa la k'a sumu.
[48] Isa vɛɛ a yɛ wo lɔ: «Judasi, i yi janva donna ǹe Mɔɔnivin Tanin ne ma sumuli lɔ?»
[49] Aa kɔbiladennu k'a ye mingɛ ko jama vɛ na Isa minaya lɔ, ai k'a maɲininga, ai vɛɛ: «Fanma, mɔ tɛ ai kɛlɛ maa siyamifannu la?»
[50] Wo kɛ, ai lɔ kelen ka aa siyamifan nabɔ ka salakalaseba kundiiba ya jɔn bolokinin tolo tɛɛ a la.
[51] Wo lɔ, Isa vɛɛ: «Ài y'a to ten!» A ka a bolo tuu wo tolo la ka a lakɛnɛya.
[52] Salakalaseba kundiilu tɛɛ jama lɔ, ani lɔhɔlɔmabonba lakanaliba kundiilu ni kɛmɔɔbalu. Ai bɛ nanin tɛɛ a minaya le lɔ. Wo lɔ, Isa vɛɛ ai yɛ: «Mindɛ kɛnin ài nanin m̀ minaya lɔ siyamifan ni kɔlɔmankulunnu le iwo mɔɔlu yi bɔla benganikɛba kanma teme?
[53] Ǹ tɛɛ ài fɛ lɔhɔlɔmabonba la lon lon, kɛɛ do ài m'i lɔja ka m̀ mina je. Kɛɛ ài ta waate vɛ se butu, Soɛtana a fanga lɔjiyala divi waate min nɔ.»
[54] Wo kɛ, ai ka Isa mina ka taa a le salakalaseba kundiiba ya bon na. Ado Piɛl ka to poon ka bila ai kɔ.
[55] Ai bannin taa bilala lu tɛma k'i sii a kunna, Piɛl gbazan k'i sii ai tɛma.
[56] Wo kɛ, bɔlidenmoso dɔ ka na ka Piɛl siinin ye taamɛnɛ la. A do k'a lasaa kobɛn k'a fɔ, a vɛɛ: «Kɛ́ min gbazan tɛɛ Isa le fɛ jɔ.»
[57] Kɛɛ Piɛl k'i ban i lɔla a la, a vɛɛ: «Moso, m̀ ma kɛ́ wo lɔn.»
[58] A ma mɛn, mɔɔ gbɛlɛ ka na Piɛl ye. Wo vɛɛ a yɛ: «Ile gbazan yi Isa ya kɔbilaba dɔ le le jɔ.» Piɛl do vɛɛ a yɛ: «Ǹ tɛ wo dɔ le dɛ!»
[59] Lɛlɛ kelen ɲɔɔn timin kɔ, mɔɔ gbɛlɛ ka na k'a fɔ k'a magbeleya, a vɛɛ: «Sika t'a lɔ, kɛ́ min tɛɛ Isa le kɔ k'a masɔlɔn ale gbazan yi Galileka le le.»
[60] Kɛɛ Piɛl vɛɛ: «Kɛ́, m̀ m'iya kuma ɲaye.» Ka Piɛl to kumala, donon ka kumun telemanin.
[61] Wo waate kelen nɔ, Fanma Isa k'i kɔdon k'a ɲa kaa Piɛl lɔ. A do hangili ka bila Fanma Isa ya kumakan nɔ, ko: ‹Jani donon yi kumun bi, i kɛtɔ a fɔla haan siɲa sawa le ko i ma ǹ lɔn.›
[62] Wo lɔ, a ka bɔ lu ma ka taa kasi josomakasa boloma.
[63] Isa minabalu tɛɛ a lafɛyala, ai vɛ a gbasila.
[64] Ai do ka a ɲa lasili ka to a maɲiningala, ai vɛɛ: «Kelaya kɛ! Mɔɔ min n'i gbasila, i yi wo tii tɔɔ fɔ.»
[65] Ai ka to a jɛvɛla ka kuma yon siyama fɔ a ma.
[66] Kɛnɛ bɔnin, salakalaseba kundii ni seliya kalanmɔɔlu ka aiya kititɛɛjama ladɛn ka na Isa lalɔ ai ɲakɔlɔ.
[67] Ai vɛɛ a yɛ: «I y'a fɔ mɔ yɛ ni ile le Masa Tɔɔmasenin ne.» Isa k'ai javi, a vɛɛ: «Ni ǹ k'a fɔ ài yɛ, ài tɛnala lala ǹ na.
[68] Ni ǹe gbazan k'ài maɲininga, ài tɛnala ǹ javila.
[69] Kɛɛ ǹ a fɔ ài yɛ, ǹ ko k'a ta bi ma, ǹe Mɔɔnivin Tanin kɛtɔ ǹ siila Sebɛtii Ala bolokinin fɛ.»
[70] Wo lɔ, ai bɛ vɛ a maɲiningala, ai vɛɛ: «Ala Den ne ile le?» Isa k'ai javi, a vɛɛ: «Àilu gbu le na wo fɔla.»
[71] Wo kɛ, ai vɛɛ: «Mɔ mako tɛ mɔɔ ya seleya la butu. Mɔ vɛ ban a jɛlɛ dalakan mɛnna.»