[1] Lon dɔ, ka Isa lɔnin to Genesalɛti kɔɔ kawun na, jama ba k'ai madon a la fɔɔ k'a lɔgbalin, sa ai y'ai tolo malɔ Ala ya kumakan na.
[2] A do ka kulun fila ye kɔɔ kawun na, kɔsɔɔmɔnilu tɛɛ vɛ bɔ minnu lɔ ka taa jɔ makoya lɔ.
[3] A ka don kulun dɔ lɔ, min tɛɛ Simɔn ta le k'a fɔ a yɛ ko a yi kulun mabɔ gbele la dɔɔnin. Wo kɛ, a k'i sii ka mɔɔlu kalan.
[4] A wɔlinin mɔɔlu kalanna, a vɛɛ Simɔn yɛ: «Kulun nataa duun kɔkan ka àiya jɔlu bila jɛɛ mina ko lɔ.»
[5] Simɔn vɛɛ a yɛ: «Kundii, mɔ na su bɛ kɛla jɛɛ ɲinila, ado mɔ ma foi sɔlɔn. Kɛɛ ǹ kɛtɔ jɔlu bilala kɔɔ lɔ kɔtunun ka bɛn ya kuma ma.»
[6] Ai ka wo kɛ mingɛ, ai ka jɛɛ siyama mina fɔɔ jɔlu tɛɛ fala bolo le ma.
[7] Ai do vɛ ai baaleɲɔɔlu kilila, minnu tɛɛ kulun gbɛlɛ lɔ, ko ai yi na ai madɛmɛn. Ai nanin, ai ka kulun fila lafa jɛɛ ba la haan fɔɔ kulunnu tɛɛ jii bolo le ma kɔɔ kɔlɔ.
[8] Simɔn Piɛl ka wo ye mingɛ, a v'i mabilinna Isa sen kɔlɔ k'a fɔ a yɛ, a vɛɛ: «Fanma, i k'i madon ǹ na, baa julumbutɔ le ǹ ne.»
[9] A ka wo fɔ k'a masɔlɔn ale ni a dafɛmɔɔlu kawakoyanin tɛɛ jɛɛ mina ko lɔ.
[10] A baaleɲɔɔn minnu tɛɛ Zebede denkɛlu Janguba ni Yaya le, wolu gbazan ka kawakoya. Wo lɔ, Isa vɛɛ Simɔn yɛ: «I kà siyan. K'a damina bi haan ka taa, i yi jɛɛ ɲininna teme, ǹ kɛtɔ i kɛla mɔɔɲininba le ten ne.»
[11] Ai senin kawun na aiya kulunnu le, ai k'ai bolofen bɛ to je ka bila Isa kɔ.
[12] Lon dɔ, ka Isa to wo koovi so dɔ la, kɛ́ dɔ ka na a ma. Kunan ne tɛɛ a fali bɛ ma. A ka Isa ye mingɛ, a v'i ten bilinna a sen kɔlɔ k'a madiya, a vɛɛ: «Fanma, ni i ka diɲa, a se y'i yɛ ka ǹ fali sɛnɛya.»
[13] Wo lɔ, Isa ka a bolo lɔsama ka a tuu kunantɔ la. A vɛɛ a yɛ: «M̀'ɛ diɲa, i yi sɛnɛya.» Wo kɛ, aa kunan ka basi telemanin.
[14] Isa do ka kɛ́ wo jamali, a vɛɛ: «I kà min ko fɔ mɔɔ suu suu yɛ. Taa vɛ. Salakalaseba y'i fali lasaa. Wo vɛ kɛla, kela Musa na salaka min fɔla, i yi wo bɔ k'a jiya bɛ la ko i vɛ sɛnɛya.»
[15] Wo bɛ n'a kɛ, Isa mangan vɛ jɛnzɛnna fan bɛ lɔ ka timin kunfɔlɔ ta la. Mɔɔ siyama tɛɛ nala ai tolo malɔla a la ani ka kɛnɛya ka bɔ aiya jangalolu lɔ.
[16] Kɛɛ waate dɔ Isa tɛɛ a mabɔla ai la ka taa Ala daliya lɔ dingila lɔkolonnu lɔ.
[17] Lon dɔ, Isa tɛɛ mɔɔlu kalanna bon dɔ la. Falisi ni seliya kalanmɔɔlu siinin tɛɛ je. Wolu nanin tɛɛ ka bɔ Galile ni Jude koovi so bɛ la ani Jelusalɛm. Ado Mɔtii ya setiiya tɛɛ Isa fɛ ka lakɛnɛyali kɛ.
[18] K'a to je, mɔɔ dɔlu ka na falifaama jangalotɔ dɔ le, min lanin tɛɛ aa dɛvɛ kan. A lɔɔ tɛɛ ai la ka jangalotɔ la Isa kɛɛna,
[19] kɛɛ ai ma donɲa sɔlɔn ka bɛn jama ma. Wo lɔ, ai ka jɛlɛ bon kɔkan ka woo bila je ka jangalotɔ ni aa dɛvɛ lajii fɔɔ ka taa se Isa kɛɛna jama tɛma.
[20] A do ka aiya limandeya ye mingɛ, a vɛɛ jangalotɔ yɛ: «Ile kɛ́, iya julumbulu lɔ vɛ koto.»
[21] Wo lɔ, seliya kalanmɔɔ ni Falisilu vɛ a fɔla i ɲɔɔn yɛ, ai vɛɛ: «Jene yi min ne yi Alalɔnbaliyakan fɔla? Mɔɔ tɛ se julumbulu lɔkotola, mafɔ Ala.»
[22] Kɛɛ Isa tɛɛ k'ai miliya lɔn. A do vɛɛ ai yɛ wo lɔ: «Mindɛ kɛnin miliya suu wo y'ài josokun nɔ?
[23] A yi di? K'a fɔ ‹Iya julumbulu lɔ vɛ koto›, baa k'a fɔ ‹I yi wuli i yi taama›, wo fila lɔ, mindɛ le fɔ diyanin?
[24] Kɛɛ do fɔ ài y'a lɔn a se yi ǹe Mɔɔnivin Tanin yɛ ka julumbulu lɔkoto dunuɲa.» Wo lɔ, a vɛɛ jangalotɔ yɛ: «I yi wuli. Iya dɛvɛ ta ka taa iya bon na.»
[25] A do v'i wulila telemanin jama bɛ ɲana ka aa dɛvɛ ta ka taa aa bon na. A taatɔla, a tɛɛ Ala tanula kosɛvɛ.
[26] Mɔɔ bɛ ka kawakoya ka Ala tanu. Ai do ka siyan Ala ɲa, ai vɛɛ: «Ɛɛ mɔ na ko ba le yena bi!»
[27] Wo kɔ, ka Isa bɔtɔ to je, a ka nisɔɔnminaba dɔ siinin ye nisɔɔnminaya lɔ, min tɔɔ yi ko Levi. Isa vɛɛ a yɛ: «Na i yi bila ǹ kɔ.»
[28] A do v'i wulila ka aa baale to je ka bila Isa kɔ.
[29] Wo kɔ, Levi ka tiili ba kɛ Isa yɛ aa bon na. Nisɔɔnminaba siyama ani mɔɔ gbɛlɛlu ka na i sii Isa ni aa kɔbiladennu fɛ dɔnnikɛya lɔ.
[30] Falisi ni seliya kalanmɔɔ dɔlu ka na k'ai bɛɛ siinin talan dingila kelen nɔ. Wo ka gbeya ai yɛ. Wo lɔ, ai ka Isa ya kɔbiladennu maɲininga, ai vɛɛ: «Mindɛ lɔ ài yi dɔnni ni minni kɛla nisɔɔnminaba ni konyonkɛbalu fɛ?»
[31] Isa k'ai javi, a vɛɛ: «Kɛnɛyatɔ mako tɛ dandaliba la, fɔ jangalotɔ.
[32] M̀ ma na ka mɔɔ telenninnu kili, fɔ julumbutɔlu sa ai yi tube.»
[33] A dɔlu k'a fɔ Isa yɛ, ai vɛɛ: «Yaya ya kɔbiladennu ani Falisilu talu, ai deinnin sun donna ani Ala dali. I do talu yi dɔnni ni minni kɛla waate bɛ.»
[34] Isa k'ai javi, a vɛɛ: «A yi di? Ka kɔɲɛfa to a tɔvalu dafɛ kɔɲɛmalɔ lɔ, ài yi sene ai dansiila dɔnni kɛ ko lɔ? Wo tɛ kɛla!
[35] Kɛɛ lon dɔ natɔ, mɔɔlu kɛtɔ kɔɲɛfa bɔla ai tɛma. Wo lon ne, ai kɛtɔ sun donna.»
[36] Isa ka sana gbɛlɛ la ai yɛ, a vɛɛ: «Mɔɔ tɛ faani kula kulunkulun tala ka faani kɔlɔ labalin a le. Ni wo tɛ faani kula kɛtɔ faani kɔlɔ samana ka a fala. A falanɲa kɛwonyatɔ ka timin a kunfɔlɔ ta la, ado faani kula kulunkulun tɛnala bɛnna faani kɔlɔ la.
[37] Mɔɔ tɛ gbɛ kula kɛla jitabɔlɔ kɔlɔ lɔ. Ni wo tɛ, a fununtɔ ka bɔlɔ te ka gbɛ bɛ bɔn. Mɔɔ yi gbɛ kula kɛla bɔlɔ kula le kɔnɔ.
[38] Gbɛ kula ka kan ka kɛ bɔlɔ kula le lɔ.
[39] Ado ni mɔɔ deinnin gbɛ kɔlɔ le minna, a kula lɔɔ tɛ gba a la feu! A a fɔle la ko: ‹A kɔlɔ le diyanin.›»