[1] Lon dɔ, Isa tɛɛ Ala dalila dingila dɔ lɔ. A bannin, aa kɔbiladen dɔ vɛɛ a yɛ: «Fanma, i mɔ kalan Ala dali la, iwo Yaya na aa kɔbiladennu kalanna teme.»
[2] Isa vɛɛ ai yɛ: «Ài vɛ kɛla Ala dalila, ài y'a fɔ ko: Mɔ Fa, i tɔɔ yi buɲa mɔɔlu bolo. Iya masaya lankɛnɛmaya.
[3] I yi maa balo sɔniya lon lon.
[4] I yi mɔ hakɛlu lɔkoto, iwo ǹu gbazan vɛ mɔ hakɛtabalu makoto teme. I do kà a to mɔ ma yi nɛɛn ka bila koyon nɔ.
[5] A k'a fɔ aa kɔbiladennu yɛ kɔtunun, a vɛɛ: «Ni ài dɔ k'i wuli su tɛma ka taa a tɔva ya da makɔnkɔn k'a fɔ a yɛ, i vɛɛ: ‹M̀ bɔ, i jon. I yi ǹ sɔ bulukala sawa la.
[6] K'a masɔlɔn ǹ tɔva dɔ bɔnin taaman na ka a jiya ǹ fɛlɔ, kɛɛ foi tɛ m̀ bolo ka kɛ a fana le.›
[7] I tɔva totɔ bon kɔnɔ k'a fɔ i yɛ, a vɛɛ: ‹I kà ǹ ɲagba tan. M̀'ɛ ban da sɔɔla. Ǹe ni ǹ dennu v'i la butu. Ǹ tɛ se m̀ wulila k'i sɔ foi sɔ yi ne.›
[8] Ǹ a fɔ ài yɛ, ǹ ko hali a ma diɲa k'i wuli k'i sɔ ka bɛn àiya tɔvaya ma, kɛɛ ni i ka to a ɲagbala, a yi wulile k'i sɔ i mako yi fen suu suu la.
[9] Ǹ a fɔ ài yɛ wo lɔ, ǹ ko ài yi to Ala dalila, a do kɛtɔ ài sɔla. Ài yi to fen ɲininna Ala fɛ, a do kɛtɔ wo dila ài ma. Ài yi to da makɔnkɔnna, a do kɛtɔ da lakala ài yɛ.
[10] K'a masɔlɔn mɔɔ mɔɔ vɛ Ala dalila ka bɛn ko min ma, a do kɛtɔ wo kɛla wo tii le yɛ. Mɔɔ mɔɔ vɛ fen min ɲininna Ala fɛ, a do kɛtɔ wo dila wo tii le ma. Mɔɔ mɔɔ vɛ da makɔnkɔnna, a do kɛtɔ da lakala wo tii le yɛ.
[11] Fa mindɛ y'ài lɔ, ni a den ka jɛɛ maɲininga a la, a kɛtɔ sa minala ka a di a ma?
[12] Ni wo tɛ, ni a den yi sisɛ kili le kɔ, a kɛtɔ wanzosa minala ka a di a ma?
[13] Hali àilu minnu joso man ɲin, ài yi sene fen kein dila ài dennu ma. Wo lɔ, ǹ Fa Ala min yi haijɛnɛ, a do tɛnala Lɔhɔlɔma Fɔɲɛ dila a maɲiningabalu ma ka timin ài ta dinin na?»
[14] Lon dɔ, Isa tɛɛ jina gbɛnna ka bɔ kɛ́ dɔ kɔ. Jina tɛɛ vɛ kɛ́ wo kɛ bobo le. Jina bɔnin a kɔ, a do vɛ kumala. Jama ka kawakoya wo lɔ.
[15] A dɔlu kɔni ka kɛ a fɔle, a vɛɛ: «Jinalu ya kundii Biyɛzɛbɔ, wo le na a se dila a ma ka jinalu gbɛn ka bɔ mɔɔlu kɔ.»
[16] A dɔlu tɛɛ a lɔsumanna, ko a yi kawanako tɔɔmase dɔ kɛ ai ɲana, min bɔnin Ala fɛ.
[17] Kɛɛ Isa tɛɛ k'ai miliya lɔn. A vɛɛ ai yɛ wo lɔ: «Ni jamana min mɔɔlu ka falan a ma k'ai ɲɔɔn kɛlɛ, wo jamana yi tiɲale fefe. Ni do bonnamɔɔlu ka falan a ma k'ai ɲɔɔn kɛlɛ, wo bon yi tele.
[18] Wo ɲa kelen ma, ni Soɛtana ya bɔlidennu ka falan a ma k'ai ɲɔɔn kɛlɛ, aa masaya yi to a ma di wo lɔ? Ài y'a fɔla ko ǹ'i jinalu gbɛnna Biyɛzɛbɔ le ya setiiya lɔ.
[19] A yi di? Ni ǹe yi jinalu gbɛnna Biyɛzɛbɔ ya setiiya le lɔ, àiya kɔbiladennu yi wolu gbɛnna jene ya setiiya lɔ? Ailu gbu y'a jiyala ko ài jo tɛ wo lɔ.
[20] Kɛɛ ni ǹe yi jinalu gbɛnna Ala ya setiiya le lɔ, wo lɔ Ala ya masaya vɛ se ài ma.
[21] Kɛ́ fangama vɛ a jɛlɛ lɔbɛnna kɛlɛkɛfennu la, ko ka aa bon nakana, wo tii bolofennu lakanatɔle.
[22] Kɛɛ ni mɔɔ dɔgbɛlɛ ka na, min fanga walanin a ta le, ni wo tii k'i ben a kan ka se a la, wo vɛ kɛla, a jei siinin kɛlɛkɛfen minnu la, wolu bɔtɔle a bolo. A laban nɔ, a bolofennu lɔtalatɔle mɔɔlu tɛma.»
[23] «Mɔɔ min tɛ ǹ fɛ, wo yi ǹ juu le le. Mɔɔ min do tɛ m̀ madɛmɛnna ka mɔɔlu ladɛn, wo tii yi mɔɔlɔjɛnzɛnba le le.»
[24] «Jina vɛ gbɛnna ka bɔ mɔɔ dɔ kɔ, a timintimintɔ dingila lɔkolonnu lɔ ka nɔningɛya ɲinin ka koli. Wo vɛ kɛla, a kɛtɔ a fɔla, a vɛɛ: ‹To ǹ'i seikɔ m̀ bɔya lɔ.›
[25] A do vɛ nala, a kɛtɔ bon nakolon wo latɛɛnin yena, ani je lɔbɛnnin ve.
[26] Wo vɛ kɛla, jina taatɔ jina wolowulan ladɛnna, minnu yonyanin ale gbu le. A ni wo bɛ natɔ ka don wo ja k'ai sii je. A laban, jinatɔ wo ya ko kɛwonyatɔ ka timin a kunfɔlɔ ta la.»
[27] Ka Isa to kumala, moso dɔ ka to jama tɛma ka a kan nabɔ, a vɛɛ: «Duwawu yi moso yɛ, min na i sɔlɔnna ka sin di i ma.»
[28] A do vɛɛ a yɛ: «Mɔɔ minnu y'ai tolo malɔla Ala ya kumakan na ka a mina, wolu le kɔni duwawuden ne.»
[29] Ka jama walatɔ to Isa laminin nɔ, a vɛɛ ai yɛ: «Bi mɔɔlu yi limandeyabali le le ani kɔnɔgbeyamɔɔ. Ai y'a fɛ ka kawanako tɔɔmase dɔ ye, kɛɛ tɔɔmase foi tɛnala jiyala ai la fɔ nabi Yunusa ta.
[30] K'a masɔlɔn nabi Yunusa gbu ka kɛ tɔɔmase le Ninivakalu yɛ teme, ǹe Mɔɔnivin Tanin gbazan kɛtɔ tɔɔmase le bi mɔɔlu yɛ ten ne.
[31] Kititɛɛlon, Seba jamana masamoso wulitɔ ka bi mɔɔlu jalaki, k'a masɔlɔn ale ka bɔ haan fɔɔ dunuɲa laban nɔ ka na a tolo malɔ nabi Sulimana ya hangilimaya kuma la. Tandainɔ, mɔɔ dɔ yi jan, min buɲanin nabi Sulimana le.
[32] Kititɛɛlon, Ninivakalu wulitɔ ka bi mɔɔlu jalaki, k'a masɔlɔn nabi Yunusa ka wolu kawani waate min nɔ, ai ka tube. Tandainɔ, mɔɔ dɔ yi jan, min buɲanin nabi Yunusa le.»
[33] Isa vɛɛ ai yɛ kɔtunun: «Mɔɔ tɛ fitina lamɛnɛnna ka a sii dingila doonnin nɔ ni wo tɛ nɛɛ kɔlɔ. Fɔ i y'a sii fitinasiiya le lɔ, sa mɔɔ minnu yi donna bon na, wolu yi kɛnɛya ye.
[34] Mɔɔ ɲaden kɛnin ne a falikolo lɔ iwo fitina. Ni i ɲaden kɛnɛyanin, kɛlɛya yi donne i falikolo fan bɛ lɔ. Ni i ɲaden kɛnɛyanin tɛ, i fali fan bɛ kɛtɔ divi le lɔ.
[35] Wo le y'a kɛla, ài y'ài jando ài jɛlɛ lɔ, sa àiya kɛnɛya kana ban ka kɛ divi le.
[36] Ni mɔɔ fali bɛ ka kɛ kɛnɛya lɔ, ni divi tɛ a fan suu suu lɔ, wo vɛ kɛla, a fan bɛ kɛtɔ kɛnɛya le lɔ gbesekele, iwo fitina yi mɛnɛnna ka ài bila kɛnɛya lɔ teme.»
[37] Isa bannin kumala, Falisi kɛ́ dɔ ka a kili ko a yi taa dɔnnikɛya lɔ a fɛlɔ. Wo lɔ, a ka taa bon na k'i sii tabali la.
[38] Isa tɛɛ ma a bolo lako kunfɔlɔ le iwo Falisilu tɛɛ a kɛla teme. Wo ka Falisi kɛ́ kawakoya kosɛvɛ.
[39] Wo kɛ, Fanma Isa vɛɛ a yɛ: «Àilu Falisilu yi jiyafɛ ni nɛɛ kɔkala mako yi la kobɛn k'ài kɔnɔ nɔɔnin to natabaya ni koyon suu bɛ la.
[40] Àilu hangilindannu! Min na a kɔkala ladanna, wo kelen ne ma a kɔnɔla ladan?
[41] Ài yi jiyafɛ ni nɛɛ kɔnɔfennu ta ka bolokolonnu sɔ wo la. Wo vɛ kɛla, fen bɛ yi sɛnɛyale ài yɛ.
[42] Gbalo y'àilu seliya kalanmɔɔ ni Falisilu yɛ! Àilu filangafolu! Ài yi àiya gbelelɔfen mɛsɛnni bɛ jaa bɔla ka telentiiya ko ni Ala ya kanundeya kolu to je. Ài tɛɛ ka kan ka wolu kɛ kunfɔlɔ le ka a tɔ la wo kan.
[43] Gbalo yi àilu Falisilu yɛ! K'a masɔlɔn ài vɛ taala Aladalibon na, ài yi ɲamɔɔ siiyalu le ɲininna. Ài vɛ taala lɔɔ lɔ, ài y'a fɛ mɔɔlu y'ài fo buɲa boloma.
[44] Gbalo yi àilu Falisilu yɛ! K'a masɔlɔn ài kɛnin iwo kabulu tɔɔmasebali. Mɔɔlu yi taamana min kɔkan, ai do m'a lɔn k'a fɔ kabulu le.»
[45] Seliya kalanmɔɔ dɔ ka Isa javi, a vɛɛ: «Kalanmɔɔ, i v'a fɔla ten, i vɛ ǹu gbazan jɛvɛ!»
[46] Isa k'a javi, a vɛɛ: «Gbalo yi àilu seliya kalanmɔɔlu yɛ gbazan! K'a masɔlɔn ài yi doni gbililu lala mɔɔlu kun. Àilu gbu do tɛ diɲa ka hali ài bolokɔni kelen tuu a la, k'ai madɛmɛn dɔɔnin.
[47] Gbalo yi ài yɛ k'a masɔlɔn ài bemanu na kela minnu faala, ài yi wolu kabululu lɔla.
[48] Ài yi kɛla àilu gbu maselelu le wo lɔ, ko ài vɛ diɲa ài bemanu kɛkolu ma. Ài bemanu na kelalu faala, k'a talan ài y'ai kabululu lɔla.
[49] Ala n'a fɔla aa hangilimaya lɔ, a vɛɛ: ‹Ǹ kɛtɔ kela ni keladennu lataala ai ma. Ai do kɛtɔ a dɔlu faala ka a dɔlu tɔlɔya.›
[50] Wo lɔ, kela minnu bɛ ka faa mɔɔlu bolo k'a ta dunuɲa dan waate ma, ai faa hakɛ bilatɔ bi mɔɔlu kɔ,
[51] k'a ta Habila ma, haan fɔɔ ka na a sii Zakali la, min na faala lɔhɔlɔmabonba ni salakagbalan wotɛ. Ǹ'i tuɲa fɔ ài yɛ, mɔɔ wo bɛ faa hakɛ bilatɔ bi mɔɔlu kɔ.
[52] Gbalo yi àilu seliya kalanmɔɔlu yɛ! Ài v'i ban lɔnni bɛlɛ lɔ ka wo da tuun k'a sɔɔ. Àilu gbu tɛ donna a lɔ, ado ài yi dɔlu dansiila sa ai kana don.»
[53] Isa bɔtɔla je, seliya kalanmɔɔ ni Falisilu vɛ a mabaala ɲiningali siyama le.
[54] Ai tɛɛ a fɛ a yi kuma bɛnbali dɔ fɔ, min yi kɛ a mina sabu le.