[1] Wo kɔ, Isa ka aa kɔbiladen mɔɔ biwolowulan ni fila gbɛlɛ lataa a ɲa, mɔɔ fila fila, ko ai yi taa so ni tooda bɛ la, ale gbu taatɔ tɛɛ min jalu.
[2] A vɛɛ ai yɛ: «Malo mɔnnin walanin bubale, kɛɛ a kaliba ma siya. Wo lɔ, ài yi sɛnɛtii madiya, fɔsa a yi baaledennu lɔ aa malo kalila.
[3] Ài yi taa vɛ. Ǹ ài kelayala ka kɛ iwo saa dennilu, minnu bilanin soo falilu tɛma.
[4] Ài kà wɔli bila ài kun. Ài kà bɔlɔ ta. Ài kà samala gbɛlɛ ta, ani ài kà mɔɔ fo siya la.
[5] Ài vɛ donna bon suu suu la, ài yi bonnamɔɔlu fo kunfɔlɔ le, ài vɛɛ: ‹Ala yi hɛlɛ kɛ ài yɛ.›
[6] Ni hɛlɛmɔɔ ka kɛ je, wo tii kɛtɔ àiya duwawu sɔlɔnna. Ni wo tɛ, àiya duwawu seikɔtɔle ài ma.
[7] Min vɛ diɲala k'ài jiya, ài yi to wo tii fɛlɔ. A vɛ ài sɔla dɔnnifen ni minnifen suu suu la, ài y'ài bolo sii wo kɔlɔ, k'a masɔlɔn baalekɛba ka kan ka a sala sɔlɔn. Ài k'ài jiya jɛlɛmajɛlɛma.
[8] Ài vɛ donna so suu suu la, ni je mɔɔlu k'ài lɔmina kobɛn k'ài fana dɔnnifen suu suu la, ài y'a dɔn.
[9] Ài yi jangalotɔlu lakɛnɛya ani ài y'a fɔ mɔɔlu yɛ je ko Ala ya masaya waate ma vɛ sulunya ài la.
[10] Kɛɛ ài vɛ donna so suu suu kɔnɔ, ni je mɔɔlu ma ài lɔmina, ài yi taa ài lɔ siya kan k'a fɔ ko:
[11] ‹Hali àiya so gbangban min yi mɔ sen ma, m'i wo matɛɛla ka wo kɛ ài ban tɔɔmase le. Wo bɛ n'a kɛ, ài y'a lɔn ko Ala ya masaya waate ma vɛ sulunya.›
[12] Ǹ a fɔ ài yɛ, kititɛɛlon, Ala kɛtɔ hinala Sɔdɔmka mɔɔ yonnu la ka timin wo sokɔnɔmɔɔlu la.»
[13] «Kolazinkalu, gbalo yi ài yɛ. Betisaidakalu, gbalo yi àilu gbazan yɛ. Baa kawanako ba minnu kɛnin ài fɛlɔ, ni wolu tɛɛ ka kɛ Tili so kɔnɔ, ni wo tɛ Sidɔn so kɔnɔ, je mɔɔlu tɛɛ soile tubela. Ai tɛɛ ai siile buuli lɔ, ka kasabɔlɔlu bila ai kanna, ka wo kɛ ai tube tɔɔmase le.
[14] Kɛɛ kititɛɛlon vɛ sena, àiya kolu gbeleyatɔle ka timin Tili ni Sidɔnkalu ta la.
[15] Kapɛlɛnamkalu, àilu do? Ài y'ài milila ko àiya so jɛlɛtɔle haan ka a se sangbolo ma? Wo tɛnala kɛla! Ài jiitɔle ka taa se haan fɔɔ sulu ya so la!»
[16] Isa vɛɛ aa kɔbiladennu yɛ: «Mɔɔ min vɛ a tolo malɔla ài la, wo tii vɛ a tolo malɔ ǹ na. Mɔɔ min v'i banna ài lɔ, wo tii v'i ban ǹe gbazan nɔ ani mɔɔ min v'i banna ǹ nɔ, wo tii v'i ban ǹ kelaba lɔ gbazan.»
[17] Wo kɔ, mɔɔ biwolowulan ni fila wo ka seikɔ sawa boloma. Ai vɛɛ Isa yɛ: «Fanma, hali jinalu yi kolola mɔ yɛ. Mɔ vɛ min fɔla i tɔɔ lɔ, ai yi wo le kɛla.»
[18] Isa k'ai javi, a vɛɛ: «Ǹ na Soɛtana jiitɔ yena ka bɔ sangbolo lɔ iwo sanfɛlɛ.
[19] Ài tolo malɔ, m̀'ɛ setiiya di ài ma ka sa ni wanzosalu lɔdɔndɔn ani ka se ài juu Soɛtana ni a fanga bɛ la. Ani koyon suu suu tɛnala kɛla ài la.
[20] Wo bɛ n'a kɛ, ài kà sawa wo lɔ k'a fɔ jinalu kolonin ài yɛ, fɔ ài yi sawa k'a masɔlɔn ài tɔɔlu sɛvɛnin haijɛnɛ.»
[21] Wo waate gbu lɔ, Isa kɔnɔ ka diya Lɔhɔlɔma Fɔɲɛ fɛ, a vɛɛ: «Ǹ Fa Ala, sangbolo ni duukolo Tii, ǹ'i balika bɔla i yɛ k'a masɔlɔn i na ko minnu doonna hangilima ni lɔnnilalu ma, i vɛ wolu jiya kalankɛbalilu la. Ǹ Fa, a diyanin i yɛ ka kokein min kɛ.»
[22] Isa vɛɛ kɔtunun: «Ǹ Fa vɛ fen bɛ di m̀ ma. Mɔɔ ma ǹe Ala Den lɔn bɛlɛbɛlɛ kɛ fɔ ǹ Fa Ala. Ado mɔɔ ma ǹ Fa Ala lɔn bɛlɛbɛlɛ kɛ fɔ ǹe a Den, ani ǹ a fɛ ka a lankɛnɛmaya minnu yɛ.»
[23] Wo kɔ, Isa k'i kɔdon k'a fɔ aa kɔbiladennu yɛ ai jɛlɛ ma, a vɛɛ: «Mɔɔ minnu ɲa yi ko minnu yena, wolu yi duwawuden ne le,
[24] k'a masɔlɔn ǹ a fɔ ài yɛ, ǹ ko ài ɲa yi ko minnu yena, a lɔɔ tɛɛ kela ni masakɛ siyama la ko ai yi wolu ye, kɛɛ do ai ma ai ye. Ài do tolo yi minnu mɛnna, a lɔɔ tɛɛ ai la ko ai yi wolu mɛn, kɛɛ do ai ma a mɛn.»
[25] Wo kɔ, seliya kalanmɔɔ dɔ k'i lɔ ka Isa lɔsuman. A vɛɛ: «Kalanmɔɔ, ǹ'i mindɛ kɛ kosa ǹ'i nimaya sɔlɔn kudein?»
[26] Isa k'a javi, a vɛɛ: «Mindɛ le sɛvɛnin Kela Musa ya Taulati lɔ? I yi mindɛ ɲayena wo lɔ?»
[27] A ka Isa javi, a vɛɛ: «I i Tii Ala kanu i josokun bɛ la, ani i nin bɛ, ani i fanga bɛ, ani i hangili bɛ, ado i i siiɲɔɔ kanu iwo ile gbu.»
[28] Isa k'a javi, a vɛɛ: «Iya javili bɛnnin ne. I vɛ wo kɛla, i yi kisile.»
[29] Kɛɛ a lɔɔ tɛɛ kɛ́ wo la ka jo di a jɛlɛ ma. Wo lɔ, a ka Isa maɲininga, a vɛɛ: «Jene ǹ siiɲɔɔ le wo lɔ?»
[30] Isa k'a javi sana dɔ lɔ, a vɛɛ: «A ka kɛ kɛ́ dɔ le le, min ka bɔ Jelusalɛm ka taa Jɛliko. A ka to taamana, benganikɛba dɔlu k'ai ben a kan, k'aa faani bɔ a kanna, ka a gbasi ka taa, ka a lanin to saya boloma.
[31] Wo ka bɛn salakalaseba dɔ timintɔ ma siya kelen wo kan. A ka kɛ́ lanin ye mingɛ, a ka timin siya fan kelen fɛ ka taa.
[32] Lɔhɔlɔmabonba baaleden dɔ gbazan tɛɛ timinna siya kelen wo kan. A ka se wo ja mingɛ ka kɛ́ lanin ye, a ka timin siya fan kelen fɛ ka taa wo ɲa kelen ma.
[33] Wo kɔ, Samalika kɛ́ dɔ gbazan tɛɛ taamana siya kelen wo kan. A ka se wo ja mingɛ ka kɛ́ lanin ye, wo hina ka don a la.
[34] A k'i madon a la ka tulu ni gbɛ kɛ a daalu la k'ai lasili. Wo kɔ, a ka kɛ́ lajɛlɛ k'a lala aa sofalini kɔkan ka taa a le lonajiyabon na. Ai se je, a do k'a jando a lɔ.
[35] Wo kɛnɛbɔ lon, a ka wɔli bɔ k'a di bontii ma k'a fɔ a yɛ, a vɛɛ: ‹I i jando kɛ́ min nɔ. A mako vɛ kɛla fen fen na, i yi wo di a ma. Ni wɔli min ma a bɛ bɔ, m̀'ɛ ǹ kɔseila, ǹ kɛtɔ i salala.›»
[36] Isa ka ban sana lala ka seliya kalanmɔɔ maɲininga, a vɛɛ: «Iya miliya lɔ, bengɛnikɛbalu k'ai ben kɛ́ min kan, jene ka kɛ a siiɲɔɔ le siyalatiminba sawa wo lɔ minnu k'a ye?»
[37] A ka Isa javi, a vɛɛ: «Mɔɔ min ka hina a la ka a madɛmɛn.» Isa vɛɛ: «Taa, ile gbazan yi wo ɲɔɔn kɛ.»
[38] Ka Isa ni aa kɔbiladennu to taamana ka taa Jelusalɛm, ai ka se soni dɔ la. Moso dɔ tɛɛ je min tɔɔ yi ko Maata. Wo k'ai jiya a fɛlɔ.
[39] Maata dɔɔmoso gbazan tɛɛ je, min tɔɔ yi ko Moyamu. Moyamu ka taa i sii Fanma Isa sen kɔlɔ k'a tolo malɔ aa kalan na.
[40] Wo k'a talan Maata ɲagbanin tɛɛ gba donna kosɛvɛ. A do k'i madon Fanma Isa la k'a fɔ a yɛ, a vɛɛ: «Fanma, ǹ dɔɔmoso vɛ ǹ kelen to baale la. Wo tɛ gbala i la? I y'a fɔ a yɛ ko a yi wuli ka m̀ madɛmɛn.»
[41] Kɛɛ Fanma Isa k'a javi, a vɛɛ: «Maata, Maata, i yi haminna k'i jɛlɛ ɲagba ko siyama la.
[42] Kɛɛ mɔɔlu mako yi ko kelen ne la. Moyamu vɛ kobɛlɛ le ta, wo do tɛ se minala a la feu.»