[1] Wo waate lɔ, mɔɔ dɔlu ka samakan dɔ lase Isa ma ko jamanatii Pilati tɛɛ vɛ Galileka dɔlu faa k'ai to salaka bɔla fɔɔ k'ai jeli ni kolofen jeli ɲaamin i ɲɔɔn nɔ.
[2] Isa k'ai javi wo lɔ, a vɛɛ: «A yi di? A y'ài kɔnɔ k'a fɔ Galileka wolu tɛɛ jumumbutɔ le le ka timin Galileka tɔ bɛ la ka bɛn ai na tɔlɔyala ten?
[3] Ɛnɛn dɛ! Kɛɛ ni ài ma tube, àilu gbazan halakitɔ wo ɲa kelen ne ma.
[4] Mɔɔ tan ni sein do, minnu na faala, ni sangaso na benna ai kan Silom fan nɔ? Ài y'i milila k'a fɔ wolu tɛɛ hakɛtaba le le ka timin Jelusalɛmka tɔ bɛ la?
[5] Ɛnɛn dɛ! Kɛɛ ni ài ma tube, àilu gbazan halakitɔ wo ɲa kelen ne ma.»
[6] Wo kɔ, Isa ka sana dɔ la, a vɛɛ: «Kɛ́ dɔ ka biyaju sɛnɛ aa gbele lɔ. Lon dɔ, a ka taa biya wulɛn ɲininya lɔ. A do ma fen ye a la.
[7] A vɛɛ aa baaleden yɛ wo lɔ: ‹A ye. A vɛ kɛ san sawa le, ǹ'i nala kɔlɔman min den ɲininya lɔ. Haan bi, m̀ ma fen fen ye a la. I y'a tɛɛ ka a bɔ je. A nafa tɛ a la duu kan jan.›
[8] Baaleden do vɛɛ a yɛ: ‹Kundii, i y'a to je bene ɲinan. Ǹ'i fulu ladɛn a ju fɛ ka nɔɔ kɛ a kɔlɔ.
[9] Numaija, ni a k'a den kɛ, wo yi bɛnne. Ni wo ma kɛ, i y'a tɛɛ ka a bɔ je.›»
[10] Nɔningɛlon dɔ, Isa tɛɛ mɔɔlu kalanna Aladalibon dɔ la.
[11] Wo k'a talan moso dɔ tɛɛ je, jina tɛɛ vɛ jangalo bila a la fɔɔ san tan ni sein, ka daan sii a kɔ lɔ. A tɛɛ tɛ se i latelenna feu.
[12] Isa ka moso wo ye mingɛ, a ka a kili k'a fɔ a yɛ, a vɛɛ: «Moso, i la vɛ fɛlɛ ka bɔ iya jangalo lɔ.»
[13] Isa ka a bolo tuu moso la mingɛ, a kɔ la ka telen telemanin. A do vɛ Ala tanula.
[14] Kɛɛ Aladalibon ɲamɔɔ k'a ye mingɛ ko Isa ka lakɛnɛyali kɛ Nɔningɛlon ne, a joso ma ka gba. A v'i wulila k'a fɔ jama yɛ, a vɛɛ: «Tele wɔɔlɔ le yi mɔ bolo ka baale kɛ. Ài yi na kɛnɛya ɲinin tele wɔɔlɔ wo kɔlɔ. Ài kà na Nɔningɛlon feu!»
[15] Wo lɔ, Fanma Isa vɛɛ a yɛ: «Àilu filangafolu! Ài kelenkelenna tɛɛ àiya nisi ni wo tɛ sofalinilu fɔlinne ka bɔ wɛlɛ lɔ k'ai lamin Nɔningɛlon, kɛlɛ?
[16] Ni ài yi wo kɛla, a yi di? Mɔ bema Ibulahima bɔzɔn dɔ le ne, Soɛtana tɛɛ vɛ min sili jangalo lɔ haan fɔɔ san tan ni sein. A man kan ka a fɔlin Nɔningɛlon?»
[17] Isa ka wo fɔ mingɛ, a juu bɛ ka maaya. Ado jama bɛ ka sawa ka bɛn Isa ya kawanako kɛninnu ma.
[18] Isa vɛɛ kɔtunun: «Ala y'aa masaya lankɛnɛmayala teme, ǹ'i se a lala mindɛ ma?
[19] A kɛnin ne iwo biyaki kolo, kɛ́ dɔ na min sɛnɛna aa gbele lɔ. A k'i wuli ka kɛ kɔlɔmanju le ka buɲa fɔɔ kɔnɔnilu k'ai ɲaalu lɔ a bololu la.»
[20] Isa vɛɛ kɔtunun: «Ala y'aa masaya lankɛnɛmayala teme, ǹ'i se a lala mindɛ ma kɔtunun?
[21] A kɛnin ne iwo bululafununsɛɛ, moso na min ɲaaminna falinimuu siyama la ka wo kɛ dɛɛ le. Wo do ka dɛɛ bɛ lafunun.»
[22] Ka Isa taatɔ to Jelusalɛm, a tɛɛ mɔɔlu kalanna so ni toodalu la.
[23] Mɔɔ dɔ ka Isa maɲininga, a vɛɛ: «Fanma, mɔɔ dana le kisitɔ dein?» Isa vɛɛ ai yɛ:
[24] «Ài i lɔja kosɛvɛ ka don da dɔɔyanin fɛ, baa ǹ a fɔ ài yɛ, mɔɔ siyama kɛtɔ da wo le ɲininna ka koli.
[25] Bontii v'i wulila ka da sɔɔ, ài totɔ kɛnɛ le ma ka to da makɔnkɔnna k'a fɔ, ài vɛɛ: ‹Fanma, da laka mɔ yɛ!› A do kɛtɔ ài javila, a vɛɛ: ‹M̀ ma ài bɔya lɔn.›
[26] Wo kɔ, ài kɛtɔ a javila, ài vɛɛ: ‹Fanma, mɔ na dɔnni kɛla k'i min i fɛ. I do tɛɛ kalan kɛla maa so kɔnɔ.›
[27] A do kɛtɔ a fɔla ài yɛ kɔtunun, a vɛɛ: ‹Ǹ a fɔ ài yɛ, m̀ ma ài bɔya lɔn. Ài yi bɔ jan, àilu konyonkɛbalu!›
[28] Masaba ya lon, ài kɛtɔ Ibulahima ni Isiyaka ni Janguba ani kela bɛ siinin yena feetikɛya lɔ. Da vɛ sɔɔla ài ɲa, ài kasitɔ bubale k'ài ɲin sii i ɲɔɔn na dimin bolo je.
[29] Masaba ya lon, mɔɔlu bɔtɔ dunuɲa tungun naani bɛ lɔ ka na ai sii feetikɛya lɔ.
[30] Wo lon, bi ɲamɔɔ dɔlu kɛtɔ kɔmɔɔ le le, ani bi kɔmɔɔ dɔlu gbazan kɛtɔ ɲamɔɔ le le.»
[31] Wo waate kelen, Falisi dɔlu ka na a fɔ Isa yɛ, ai vɛɛ: «Bɔ jan nɔ i taa, baa masakɛ Helodi y'i faa ko lɔ.»
[32] Isa k'ai javi, a vɛɛ: «Ài yi taa a fɔ jɛɛkani wo yɛ ko ǹ'i jinalu gbɛnna ka bɔ mɔɔlu kɔ ka lakɛnɛyali kɛ bi ni sinin, ani a tele sawana lon, ǹa baale dafatɔ.
[33] Wo bɛ n'a kɛ, fɔ ǹ'i taama bi, ni sinin, ani sininkɛnɛ, k'a masɔlɔn a bɛnnin tɛ kela yi faa tɛɛ gbɛlɛ lɔ fɔ Jelusalɛm.»
[34] Ɛɛ Jelusalɛm, Jelusalɛm. Ile min yi ɲiminɲɛmɛlu faala ka Ala ya kelalasebalu bon kawa la. A lɔɔ tɛɛ ǹ na siɲa siyama le k'ài ladɛn iwo sisɛ y'a dennu ladɛnna teme k'ai doon a kawa kɔlɔ, kɛɛ ài ma diɲa.
[35] Àiya bon nakolon totɔ ài bolo. Ǹ a fɔ ài yɛ, ǹ ko ài ɲa tɛnala lala ǹ kan butu fɔɔ ài v'a fɔla lon min, ko: ‹Min yi nala Mɔtii tɔɔ lɔ, Ala yi balaka don wo tii lɔ.»