[1] Wo waate, ka Isa to mɔɔlu kalanna ka Samakan Kein nase ai ma lɔhɔlɔmabonba kɔnɔ, salakalaseba kundii ni seliya kalanmɔɔ ni kɛmɔɔbalu k'ai madon a la.
[2] Ai vɛɛ a yɛ: «I yi ko minnu kɛla yi ne, jene na i lɔla wo la? Jene na se wo dila i ma?
[3] Isa k'ai javi, a vɛɛ: «Ǹe gbazan y'ài maɲiningala ko kelen ma. Ài yi ǹ javi.
[4] Jene na Yaya lɔla mɔɔlu makola kɔɔ kɔlɔ? Ala le baa mɔɔlu?»
[5] Ai k'a fɔ i ɲɔɔn yɛ, ai vɛɛ: «Mɔ vɛ a fɔla Ala le na Yaya lɔla, a kɛtɔ a fɔla mindɛ kɛnin ài ma la a la?
[6] Kɛɛ ni mɔ k'a fɔ mɔɔlu na a lɔla, jama min yi wulile ka mɔ bon kawa la, baa ai lanin ne a la kela le tɛɛ Yaya le.»
[7] Wo lɔ, ai ka Isa javi, ai vɛɛ: «Mɔ ma Yaya kelaba lɔn.»
[8] Isa vɛɛ ai yɛ: «Ni wo le, ǹ tɛnala a fɔla ài yɛ setiiya min na ǹ lɔla ko minnu kɛla.»
[9] Wo kɛ, Isa vɛ sana lala jama yɛ, a vɛɛ: «A ka kɛ kɛ́ dɔ le le, min ka gbele kɛ ka ban ka a kalifa gbelekunnasiiba dɔlu la. Wo kɛ, a ka taa jamana jaan dɔ lɔ ka mɛn je.
[10] Sɛnɛfen kali waate ka se mingɛ, a k'aa bɔliden dɔ lataa gbelekunnasiibalu fɛlɔ, ko ai y'a ta nii di a ma. Kɛɛ a se je, ai k'a mina k'a gbasi k'a bolokolongbɛ bila ka taa.
[11] Wo kɛ, gbeletii ka bɔliden gbɛlɛ lataa kɔtunun. Ai do ka wo gbazan gbasi ka a lafɛya ka a bolokolongbɛ bila ka taa.
[12] Wo kɛ, a ka mɔɔ sawana lataa ai ma. Ai do ka wo gbazan madimin k'a fɔnfɔn gbele kɔɔkan.
[13] Wo lɔ, gbeletii vɛɛ a jɛlɛ yɛ: ‹Ǹ a kɛ di vɛ? Fɔ ǹ'i ǹ diyanan denkɛ lataa ai ma. Tumado ai kɛtɔ wo buɲala.›
[14] Kɛɛ gbelekunnasiiba wolu ka a den natɔ ye mingɛ, ai k'a fɔ i ɲɔɔn yɛ, ai vɛɛ: ‹Kɛɛtaba le ne. Ài m'a faa fɔsa gbele yi kɛ mɔ ta le.›
[15] Wo boloma, ai k'a minala k'a fɔnfɔn gbele kɔɔkan ka a faa.» Isa ka ban sana lala ka jama maɲininga, a vɛɛ: «A yi di? Gbeletii kɛtɔ mindɛ kɛla ai la?
[16] A natɔ gbelekunnasiibalu faala, ka ban ka gbele kalifa mɔɔ gbɛlɛlu la.» Jama ka sana wo mɛn k'a fɔ, ai vɛɛ: «Ɛɛ! Ala yi mɔ matanga wo ma!»
[17] Isa k'a ɲa kaa jama lɔ k'a fɔ ai yɛ, a vɛɛ: ‹Min sɛvɛnin kitabu kɔnɔ, wo kɔlɔ yi mindɛ le? A vɛɛ: ‹Bonnɔbalu k'i ban kawakulun min nɔ, wo le ka kɛ bonjuusii kawakulun ne.›
[18] Ni mɔɔ mɔɔ kɔni ka ben kawakulun wo kan, wo tii lɔkalikalitɔle. Ni do kawakulun wo ka ben mɔɔ mɔɔ kan, wo tii lɔgbɛnɛngɛtɔle feu.»
[19] Seliya kalanmɔɔ ni salakalaseba kundiilu tɛɛ Isa mina ko ɲa ɲininna k'a masɔlɔn ai k'a ɲaye k'a fɔ ko a ka sana wo la ailu le ma. Kɛɛ ai tɛɛ siyanna jama ɲa.
[20] Wo boloma, ai tɛɛ a lasaala waate bɛ ka lakɔlɔsiba dɔlu kelaya a ma. Wolu tɛɛ ai jɛlɛ kɛla iwo mɔɔ sɔvɛ ka a lɔsuman, kosa a yi kuma bɛnbali dɔ fɔ min yi kɛ a mina sabu le. Wo tɛɛ vɛ kɛla, ai tɛɛ taa a don Lɔmu jamanatii ya setiiya kɔlɔ, sa a a kiti.
[21] Wo lɔ, ai vɛ a maɲiningala, ai vɛɛ: «Kalanmɔɔ, mɔ k'a lɔn i kumakan ni iya kalan telenin ne. I tɛ mɔɔ bɔla mɔɔ lɔ. Mɔɔlu ka kan ka Ala ya siya taama ɲa min, i y'ai kalanna wo la tuɲa gbu gbu lɔ.
[22] A yi di wo lɔ? Ka nisɔɔn sala Lɔmu masakɛba ma, wo ladaannin ne mɔ ma baa wo ladaannin tɛ?
[23] Kɛɛ Isa tɛɛ k'a lɔn a laɲinin kuma le ne. Wo lɔ, a vɛɛ ai yɛ:
[24] «Ài yi wɔligbanan dɔ jiya ǹ na. Jene sawula ni jene tɔɔ y'a kan?» Ai k'a javi, ai vɛɛ: «Lɔmu masakɛba.»
[25] Isa vɛɛ: «Awa, ài yi Lɔmu masakɛba ta di Lɔmu masakɛba ma. Ài yi Ala gbazan ta di Ala ma.»
[26] Mɔɔ wolu ma hali kumaden kelen sɔlɔn Isa fɛ jama ɲana min yi kɛ a mina sabu le. Aa javili k'ai kawakoya fɔɔ k'ai jeden.
[27] Sadusi dɔlu ka na Isa ma. Minnu y'a fɔla ko mɔɔ t'i wulila saya kɔ. Ai do ka a maɲininga, ai vɛɛ:
[28] «Kalanmɔɔ, kela Musa k'a fɔ ko ni i kɔlɔkɛ ka sa ka a moso densɔlɔnbali to a kɔ, ko wo vɛ kɛla, i moso wo ta kosa a yi den sɔlɔn i kɔlɔkɛ yɛ.
[29] A ka kɛ badenma wolowulan ne le. Kɔlɔmanda ka moso dɔ fulu. A do ka sa ka a moso densɔlɔnbali to a kɔ.
[30] Wo kɛ, badenma filana ka moso wo fulu, kɛɛ wo gbazan ka sa ka moso densɔlɔnbali to a kɔ.
[31] A ka kɛ badenma sawana gbazan na ten ne. Wo ka to kɛla haan ka taa se den wolowulanna ma. Ai bɛ ka sa ka moso densɔlɔnbali to ai kɔ.
[32] Wo kɔ, moso gbazan ka sa.
[33] A yi di? Fulenilulawulilon, moso kɛtɔ jene ta le wo lɔ? K'a masɔlɔn a n'i siila a kelenkelenna bɛ le kun.»
[34] Isa k'ai javi, a vɛɛ: «Bi kɛ́ ni mosolu yi fulu kɛla.
[35] Kɛɛ fulenilu v'i wulila lon min na, a tɛnala kɛla ten. Ala do vɛ diɲala mɔɔ minnu ma, ko ai yi wuli ka kɛ je waate wo lɔ, wolu tɛnala fulu kɛla butu.
[36] Ai kɛtɔle iwo mɛlɛkalu, saya tɛ minnu ma. Ala do kɛtɔ ai jatela a den ne le, baa ai vɛ bɔ saya lɔ ka nimaya banbali sɔlɔn.
[37] Fulenilu lawuli ko kɔni, sika tɛ wo lɔ. Kela Musa gbu na wo le jiyala aa Taulati lɔ. A ka to kɔlɔmanjuni taalama dafɛ k'a fɔ Fanma Ala ma, a vɛɛ: ‹Ala min yi batola Ibulahima, Isiyaka ani Janguba bolo.›
[38] Wo kɔlɔ le fulenilu tɛ Ala batola, fɔ nimalu, baa bɛ yi nima le le Ala ɲakɔlɔ.»
[39] Wo fɔnin, seliya kalanmɔɔ dɔlu vɛɛ Isa yɛ: «Kalanmɔɔ, i vɛ javili kɛ kobɛn!»
[40] Mɔɔ ma diɲa ka ɲiningali kɛ a la wo kɔ.
[41] Isa do k'ai maɲininga, a vɛɛ: «Mindɛ lɔ ai y'a fɔla ko Masa Tɔɔmasenin yi nabi Dawuda bɔzɔn ne le?
[42] Baa Dawuda gbu n'a sɛvɛla Zabuli kitibu lɔ ko: ‹Mɔtii Ala n'a fɔla ǹ Tii yɛ, a vɛɛ: «Na i sii m̀ bolokinin fɛ,
[43] fɔɔ m̀'ɛ banna i juulu lala i sen kɔlɔ.»›
[44] Ni Dawuda y'a fɔla wo tii ma ko a Tii, wo yi se kɛla a bɔzɔn ne di wo lɔ?»
[45] Wo kɛ, Isa ka kuma dɔ fɔ aa kɔbiladennu yɛ jama ɲana, a vɛɛ:
[46] «Ài jando ài jɛlɛ lɔ seliya kalanmɔɔlu kanma! A diyanin minnu yɛ ka pipɔ jaan bila k'i lɔjaalajaala. Ai vɛ taala lɔɔ lɔ, ai y'a fɛ mɔɔlu y'ai fo buɲa boloma. Ai do vɛ taala Aladalibon na, ni wo tɛ feetikɛya, ai yi ɲamɔɔ siiyalu le ɲininna.
[47] Ai yi kɛsamosolu bolofen bɛ dɔnna ka ban ka mɛn Aladaliya sa mɔɔlu y'ai ye. Aiya kolatɔn gbeleyatɔle bubale.»