[1] Nɔningɛlon timinnin kɔ, Moyamu Magidalaka ni Salome ani Janguba ba Moyamu ka tulu sumadiyanin dɔ san ko ai taatɔ wo kɛla Isa fuleni kan.
[2] Lailon sɔɔma danin na, ai vɛ taala kabulu dala. Tele bɔ waate le tɛɛ.
[3] Ai tɛɛ a fɔla i ɲɔɔn yɛ, ai vɛɛ: «Jene kɛtɔ kawa makulukulula ka a bɔ kabulu da la?»
[4] Kɛɛ ai ka kabulu lasaa mingɛ, ai k'a ye ko kawa ma vɛ kulukulu ka bɔ a nɔ lɔ. A do buɲanin tɛɛ bubale.
[5] Ai donnin kabulu kɔnɔ, ai ka kavelen dɔ siinin ye ai bolokinin fannɔ. Faani gbɛ tɛɛ a kanna. Wo lɔ, ai ka kawakoya kosɛvɛ.
[6] Ado wo vɛɛ ai yɛ: «Ài kà siyan. Ài yi Isa Nazalɛtika le ɲininna, min gbaannin tɛɛ kɔlɔman ma. A v'i wuli! A tɛ jan. A fuleni lanin tɛɛ tɛɛ min ja, ài wo ja lasaa.
[7] Ài yi taa a fɔ Piɛl ni kɔbiladen tɔlu yɛ ko a taatɔ Galile ài ɲa. Ài kɛtɔ a yena wo ja, iwo a k'a fɔ ài yɛ teme.»
[8] Wo kɛ, mosolu jaajaatɔ vɛ bɔlila ka bɔ kabulu lɔ kawakoya boloma. Ai do ma ko fɔ mɔɔ suu suu yɛ k'a masɔlɔn ai tɛɛ siyanna.
[9] Isa k'i wuli ka bɔ saya lɔ Lailon sɔɔma dala. A wulinin kɔ, a ka a jɛlɛ jiya Moyamu Magidalaka la kunfɔlɔ le, a tɛɛ ka jina wolowulan gbɛn ka bɔ min kɔ.
[10] Moyamu ka taa ko wo fɔ Isa ya kɔbiladennu yɛ k'ai talan kasila josomakasa boloma.
[11] Ai k'a mɛn mingɛ ko Isa y'a nin na, ko Moyamu na a yena, ai ma la wo la feu.
[12] Wo kɔ, ka Isa ya kɔbiladen fila to taamana tuu kɔlɔ, Isa k'a jɛlɛ jiya ai la ɲa gbɛlɛ ma.
[13] Mɔɔ fila wo ka bɔ je ka na wo fɔ ai kɔbilaɲɔɔlu yɛ. Kɛɛ wolu ma la ai la.
[14] Wo kɔ, k'aa keladen tan ni kelen to dɔnnila, Isa k'a jɛlɛ jiya ai la. A do k'ai makuma ka bɛn aiya limandeyabaliya ma ani aiya kunnɔgbeleya. K'a masɔlɔn mɔɔ minnu k'a ye a nin na, ka na a fɔ ai yɛ, ai tɛɛ ma la wolu la.
[15] A vɛɛ ai yɛ: «Ài yi taa dunuɲa fan bɛ lɔ ka Samakan Kein nase mɔɔ bɛ ma.
[16] Ni mɔɔ min ka limandeya k'a mako ji kɔlɔ, wo tii kisitɔ. Kɛɛ ni mɔɔ min ma limandeya, wo tii jalakitɔ feu.
[17] Se ditɔ limandeyamɔɔlu le ma, ai yi kawanakolu labaale. Ai kɛtɔ jinalu gbɛnna ka bɔ mɔɔlu kɔ ǹ tɔɔ lɔ. Ai kumatɔ kan gbɛlɛlu lɔ, ai tɛɛ ma minnu lɔn kɔlɔkɔlɔ le.
[18] Ni ai ka sa mina ai bolo la, ni wo tɛ ka jeemu suu suu min, foi tɛ kɛ ai la. Ai vɛ ai bolo lala jangalobatɔ minnu kan, wolu yi kɛnɛya.»
[19] Fanma Isa ka ban wo fɔla ai yɛ mingɛ, a ka jɛlɛ ka taa haijɛnɛ k'i sii Ala bolokinin fɛ.
[20] Keladennu ka bɔ je ka taa Samakan Kein nase mɔɔlu ma fan bɛ lɔ. Fanma Isa k'ai madɛmɛn baale wo la, ka kawanako se di ai ma, k'a jiya ko kuma wo yi tuɲa le le.