[1] Isa nu sulunyatɔla Jelusalɛm la, ai k'ai madon Betifase ni Betani sonilu la, Zeituna tini kɔlɔ. Wo lɔ, a ka aa keladen mɔɔ fila lataa ai ɲa.
[2] A vɛɛ ai yɛ: «Soni min yi mɔ ɲafɛ ve, ài yi taa je. Ài vɛ donna so kɔnɔ, ài kɛtɔ sofalini bolan dɔ silinin yena telemanin, mɔɔ m'i sii ba min kɔkan bene. Ài y'a fɔlin ka na a le jan.
[3] Ni mɔɔ dɔ k'ài maɲininga ko ài yi min kɛla di, ài vɛɛ wo tii yɛ: ‹Maa Fanma le mako y'a la. Ko a tɛ mɛnna, a kɛtɔ a laseila jan.›»
[4] Ai do vɛ taala ka sofalini bolan dɔ silinin ye bon dala siya dafɛ k'a fɔlin.
[5] Mɔɔ minnu lɔnin tɛɛ je, wo dɔlu k'ai maɲininga, ai vɛɛ: «Ài yi mindɛ kɛla tan? Mindɛ lɔ ài yi sofalini fɔlinna?»
[6] Keladennu k'ai javi iwo Isa k'a fɔ ai yɛ teme. Wo kɛ, mɔɔ wolu ka sofalini to ai bolo ko ai yi taa a le.
[7] Wo lɔ, ai ka na sofalini le Isa fɛ, ka aiya faanilu la sofalini kɔkan. A do ka jɛlɛ k'i sii a kɔkan.
[8] Mɔɔ siyama vɛ aiya faanilu fɛzɛnna siya kan Isa ɲa. Dɔlu ka kɔlɔman bolo mɛsɛnnilu fɛzɛn siya kan a ɲa, ai tɛɛ ka minnu tɛɛtɛɛ tuu kɔlɔ.
[9] Mɔɔ minnu tɛɛ a ɲafɛ ani a kɔfɛ, wolu tɛɛ gbanɔla, ai vɛɛ: «Tanuli yi Ala yɛ! Min yi nala Mɔtii tɔɔ lɔ, duwawu yi wo tii yɛ!
[10] Ala yi balaka don mɔ bema Dawuda ya masaya lɔ, min lankɛnɛmayatɔ! Tanuli yi Ala yɛ sanfɛ dingilalu lɔ!»
[11] Ai donnin Jelusalɛm, Isa ka taa lɔhɔlɔmabonba la ka fen bɛ lasaa je. Wo kɔ, ale ni aa keladen mɔɔ tan ni fila ka taa Betani, k'a masɔlɔn su tɛɛ ko bolo le ma.
[12] Wo duusa gbɛ, k'ai bɔtɔ to Betani, kɔɔn ka Isa mina.
[13] A do ka to poon ka toloju dɔ ye, filabulu tɛɛ a la. A ka taa ka a lasaa ni toloden dɔ yi sɔlɔnne a la. Kɛɛ a ka se toloju kɔlɔ mingɛ, a ma toloden ye, fɔ filabulu gbanzan, k'a masɔlɔn a den waate tɛɛ ma se ba bene.
[14] Wo kɛ, Isa vɛɛ toloju yɛ: «Ala a kɛ mɔɔ k'i den dɔn butu!» Aa kɔbiladennu ka kuma wo mɛn.
[15] Ai senin Jelusalɛm, Isa ka don lɔhɔlɔmabonba la. A do vɛ juwa ni sannikɛbalu gbɛnna k'ai labɔ je. A ka wɔlifalinbalu ya tabalilu labenben ani bilini juwalu ya siifennu.
[16] A ma diɲa mɔɔ suu suu yi don lɔhɔlɔmabonba la aiya felefennu le.
[17] A vɛ je mɔɔlu kalanna, a vɛɛ: «A sɛvɛnin kitabu kɔnɔ ko: ‹Ǹa bon ka kan ka kɛ siboloma bɛ ya batokɛbon ne le.› Kɛɛ do ài v'a kɛ sonnu doonya le.»
[18] Salakalaseba kundiilu ni seliya kalanmɔɔlu ka wo mɛn. Ai do tɛɛ a faa ko ɲa ɲininna, kɛɛ ai tɛɛ siyanna a ɲa k'a masɔlɔn aa kalan tɛɛ jama kawakoyala.
[19] Wulada senin, Isa ni aa kɔbiladennu ka bɔ so kɔnɔ.
[20] Wo kɛnɛ bɔnin, ka Isa ni aa kɔbiladennu timintɔ to, ai ka toloju wo ye, k'a talan a janin haan fɔɔ ka se a lilennu ma.
[21] Piɛl hangili ka bila Isa ya kuma lɔ. A k'a fɔ a yɛ wo lɔ, a vɛɛ: «Kalanmɔɔ, a ye! I na toloju min daanna, a vɛ ja.»
[22] Isa k'ai javi, a vɛɛ: «Ài yi limandeya Ala ma.
[23] Ǹ'i tuɲa fɔ ài yɛ, ni mɔɔ min k'a fɔ tini min yɛ ko a yi bɔ a nɔ lɔ ka taa ben kɔɔji lɔ, ni wo tii ma sika a joso lɔ fɔ ka limandeya k'a fɔ ko wo yi kɛle iwo a n'a fɔla teme, wo vɛ kɛla Ala do yi wo kɛle wo tii yɛ.
[24] Ǹ a fɔla ài yɛ wo le lɔ, ǹ ko ài vɛ Ala dalila min na, ài yi limandeya k'a fɔ ài vɛ ban wo sɔlɔnna. Wo vɛ kɛla, Ala kɛtɔ a dila ài ma.
[25] I do v'i lɔla Ala daliya, ni i hangili ka bila ko mɔɔ dɔ na hakɛ tala i la, i yi wo tii makoto, sa i Fa min yi haijɛnɛ, wo gbazan y'i hakɛlu lɔkoto.»
[27] Isa ni aa kɔbiladennu ka se Jelusalɛm kɔtunun. Ka Isa lɔjaalajaalatɔ to lɔhɔlɔmabonba lu ma, salakalaseba kundiilu ni seliya kalanmɔɔlu ni kɛmɔɔba dɔlu k'ai madon a la.
[28] Ai vɛɛ a yɛ: «I yi ko minnu kɛla yi ne, jene na i lɔla wo la. Jene na se wo dila i ma?»
[29] Isa k'ai javi, a vɛɛ: «Ǹe gbazan y'ài maɲiningala ko kelen ma. Ài vɛ ǹ javila, ǹ kɛtɔ a jiyala ài la mɔɔ min na setiiya dila m̀ ma.
[30] Jene na Yaya lɔla mɔɔlu makola ji kɔlɔ? Ala le na a lɔla baa mɔɔlu? Ài yi ǹ javi.»
[31] Ai k'a fɔ i ɲɔɔn yɛ, ai vɛɛ: «Mɔ v'a fɔla Ala na Yaya lɔla, a kɛtɔ a fɔla ko mindɛ kɛnin ài ma la a la?
[32] Kɛɛ ni mɔ k'a fɔ mɔɔlu na a lɔla, a tɛ bɛn!» Ai vɛɛ ten k'a masɔlɔn ai tɛɛ siyannna jama ɲa. Baa mɔɔ bɛ tɛɛ Yaya jatela kela bɛlɛ le le.
[33] Wo lɔ, ai ka Isa javi, ai vɛɛ: «Mɔ m'a lɔn.» Isa gbazan k'ai javi, a vɛɛ: «Ni wo le, ǹ tɛnala a fɔla ài yɛ setiiya min na ǹ lɔla ko minnu kɛla.»