[1] Samakan Kein damina le min ne, ka bɛn Masa Tɔɔmasenin Isa ma, Ala Den kɔni.
[2] Aa ko sɛvɛnin kela Aizaya ya kitabu kɔnɔ ɲa min ma ko, Ala vɛɛ: «A ye, ǹ kɛtɔ ǹa keladen nataala i ɲa, ka siya ladan i yɛ.
[3] Mɔɔ dɔ gbanɔkan yi bɔla fuwa lɔ, a vɛɛ: ‹Ài yi siya ladan Mɔtii yɛ, ka aa senmataamasiyalu latelen a yɛ.»
[4] Yaya k'a jɛlɛ jiya fuwa lɔ. A do tɛɛ mɔɔlu makola ji kɔlɔ, k'ai kawani ko ai yi tube k'ai mako, sa aiya julumbulu lɔ yi koto.
[5] Mɔɔ siyama tɛɛ bɔla Jude koovi lɔ ani Jelusalɛm so kɔnɔ ka taa Yaya fɛlɔ. Ai tɛɛ vɛ ai da labɔla aiya julumbulu la, Yaya tɛɛ ai mako Jɔdan kɔɔ kɔlɔ.
[6] Faani min ladannin ɲɔɔmɛ si la, Yaya ka wo bila a kanna, ka a tɛ sili gbolojulu dɔ la. A tɛɛ tuukɔlɔli ni tɔngɛsanilu le dɔnna.
[7] A do tɛɛ mɔɔlu kawanilila, a vɛɛ: «Mɔɔ min natɔ ǹ kɔ, wo tii fanga walanin ǹ ta le. Hali k'i mabilin aa samala julu fɔlin ko lɔ, ǹ dɔɔyanin wo ma.
[8] Ǹ ài makola kɔɔ le kɔlɔ, kɛɛ ale kɛtɔ Lɔhɔlɔma Fɔɲɛ lajiila ài kan.»
[9] Wo waate lɔ, Isa ka na ka bɔ Nazalɛti so kɔnɔ, Galile koovi lɔ. Ado Yaya ka a mako Jɔdan kɔɔ kɔlɔ.
[10] Isa bɔtɔla ji lɔ, a ka sangbolo da lakanin ye telemanin, ka Lɔhɔlɔma Fɔɲɛ jiitɔla ye a kan iwo bilini.
[11] Kumakan dɔ ka bɔ sangbolo lɔ, a vɛɛ: «I yi ǹ diyanan den ne le. I do vɛ ǹ kɔnɔ diya bubale.»
[12] Wo kɛ, Lɔhɔlɔma Fɔɲɛ ka Isa lataa fuwa lɔ telemanin.
[13] A ka tele binaani kɛ fuwa lɔ, soo falilu tɛɛ tɛɛ min ja. Ado Soɛtana tɛɛ a lɔsumanna, kɛɛ mɛlɛkalu tɛɛ a mako laɲala.
[14] Yaya bilanin kɔ kaso la, Isa ka taa Galile koovi lɔ. A vɛ Ala ya Samakan Kein nasena mɔɔlu ma.
[15] A do vɛɛ: «Ala na waate min natɛɛla, wo vɛ se. Ala ya masaya waate ma vɛ sulunya. Wo lɔ, ài tube ka limandeya Samakan Kein ma.»
[16] Lon dɔ, ka Isa taamantɔ to Galile kɔɔ kawun na, a ka Simɔn ni a dɔɔni Andele ye. Wolu tɛɛ jɔ lafilila kɔɔ lɔ, k'a masɔlɔn ai tɛɛ kɔɔsɔmɔɔnilu le le.
[17] Isa vɛɛ ai yɛ: «Ài yi bila ǹ kɔ. Ài yi jɛɛ le ɲininna, ǹe do kɛtɔ ài kɛla mɔɔɲininba le le.»
[18] Ai do vɛ aiya jɔlu tola je telemanin ka bila Isa kɔ.
[19] Isa timinnin wo ja la dɔɔnin ne, a ka Zebede denkɛ fila ye, minnu tɛɛ Janguba ni a dɔɔni Yaya le. Ai siinin tɛɛ jɔlu lɔbɛnna aiya kulun kɔnɔ.
[20] Isa k'ai kili telemanin. Ai do k'ai fa ni baaledennu to kulun kɔnɔ ka bila a kɔ.
[21] Wo kɔ, Isa nu ka taa Kapɛlɛnam so kɔnɔ. Nɔningɛlon senin, a ka don Aladalibon na ka mɔɔlu kalan.
[22] Aa kalanɲa ka mɔɔlu kawakoya, k'a masɔlɔn a tɛɛ ai kalanna iwo setiiya yi min bolo mɔɔlu kanma. A tɛɛ tɛ ai kalanna iwo seliya kalanmɔɔlu tɛɛ a kɛla teme.
[23] Wo waate kelen, kɛ́ jinatɔ dɔ v'i wulila Aladalibon kɔnɔ ka gbanɔ, a vɛɛ:
[24] «Ɛɛ, Isa Nazalɛtika! Mindɛ le ile ni ǹu wotɛ? I nanin mɔ halaki ko le lɔ? Ǹ k'i suu lɔn, Ala ya Lɔhɔlɔma Mɔɔ le i le.»
[25] Ado Isa ka jina jamali, a vɛɛ: «Jeden! Bɔ kɛ́ wo kɔ!»
[26] Jina vɛ kɛ́ wo lajaajaala bubale, ka gbanɔ, ka ban ka bɔ a kɔ.
[27] Mɔɔ bɛ ka kawakoya fɔɔ k'a fɔ i ɲɔɔn yɛ, ai vɛɛ: «Mindɛ le yi ne? Kalan kula suu dɔ le? Alalaa se y'a yɛ hali ka jinalu jamali. Ai do y'a kan minala.»
[28] Ado Isa mangan ka jɛnzɛn telemanin Galile fan bɛ lɔ.
[29] Wo kɔ, ai ka bɔ Aladalibon na ka taa don Simɔn ni Andele ya bon na. Janguba ni Yaya tɛɛ ai fɛ.
[30] Wo k'a talan Simɔn bilanmoso lanin tɛɛ je nɛnɛgbani boloma. Ai donnin telemanin, ai ka wo fɔ Isa yɛ.
[31] Wo lɔ, Isa ka taa a ma ka a mina a bolo ma ka a lawuli. Ado nɛnɛgbanin ka bɔ a fali lɔ. A k'i wuli ka gba don ai yɛ.
[32] Telejii kɔ, mɔɔlu vɛ nala jangalotɔ ni jinatɔlu le Isa fɛ.
[33] Sokɔnɔmɔɔ bɛ k'ai ladɛn bon da la.
[34] Isa ka jangalotɔ kaijakaijalu lakɛnɛya ka jinalu gbɛn ka bɔ mɔɔ siyama kɔ. Kɛɛ a ma diɲa jina wolu yi kuma, k'a masɔlɔn ai tɛɛ k'a lɔn a yi mɔɔ min ne.
[35] Wo sɔɔma danin na, Isa v'i wulila ka taa Aladaliya lɔ dingila lɔkolon dɔ lɔ.
[36] Wo lɔ, Simɔn ni a bilankɔɲɔɔlu vɛ taala a ɲininya lɔ.
[37] Ai k'a ye mingɛ, ai vɛɛ a yɛ: «Mɔɔ bɛ y'i ɲininna.»
[38] Isa vɛɛ ai yɛ: «M'i bɔ jan ka taa jan naminin solu la fɔsa ǹ'i kawanili kɛ, baa ǹ nanin wo le lɔ.»
[39] Wo lɔ, Isa tɛɛ Galile koovi fan bɛ lɔtaamana, a vɛ kawani kɛla Aladalibonnu la, ka jinalu gbɛn ka bɔ mɔɔlu kɔ.
[40] Lon dɔ, kunantɔ dɔ ka na i bilin a kumɛlɛni la Isa kɔlɔ k'a fɔ a yɛ, a vɛɛ: «Ni i ka diɲa, a se y'i yɛ ka ǹ fali sɛnɛya.»
[41] Hina boloma, Isa ka a bolo lɔsama k'a tuu kɛ́ la k'a fɔ a yɛ, a vɛɛ: «M̀'ɛ diɲa, i yi sɛnɛya.»
[42] Kunan ka kɛ́ wo bila telemanin, a do ka kɛnɛya.
[43] Isa k'a fɔ a yɛ ka a magbeleya, a vɛɛ: «I tolo malɔ. I kà min fɔ mɔɔ suu suu yɛ. Taa vɛ. Salakalaseba y'i fali lasaa. Wo vɛ kɛla, kela Musa na salaka min fɔla, i yi wo bɔ k'a jiya mɔɔ bɛ la ko i vɛ sɛnɛya.» Wo fɔ, a ka kɛ́ labila.
[45] Ado kɛ́ wo ka bɔ je ka taa wo ko lase damina fan bɛ. Wo lɔ, Isa ma se donna so suu suu kɔnɔ gbɛ la butu, fɔ ka to dingila lɔkolonnu lɔ. Wo bɛ n'a kɛ, mɔɔlu tɛɛ bɔla fan bɛ lɔ ka taa a kɔ.