[1] Isa ni aa kɔbiladennu ka bɔ je ka taa a fɛso.
[2] Nɔningɛlon senin, a vɛ mɔɔlu kalanna Aladalibon na. A lamɛnba siyama ka kawakoya, ai vɛɛ: «A yi ko minnu fɔla yi ne, a na wolu kalanna min ne? Jene na hangili min dila a ma? Kawanako se min y'a bolo, a na wo sɔlɔnna min ne?
[3] Jilisaba le tɛ? Moyamu den ne tɛ? A dɔɔkɛ le tɛ Janguba ni Jose ni Jude ni Simɔn ne? A dɔɔmosolu siinin tɛ mɔ tɛma jan ne?» Wo lɔ, ai k'i ban a lɔ.
[4] Isa do vɛɛ ai yɛ: «Kela tɛ dɔɔyala dingila suu suu fɔ ale gbu fɛso ani a badenma ni bonnamɔɔlu tɛma.»
[5] A ma se kawanako kɛla je fɔ k'a bolo la jangalotɔ dana kan k'ai lakɛnɛya.
[6] A do ka kawakoya ka bɛn je mɔɔlu ya limandeyabaliya ma. Wo waate, Isa tɛɛ timintininna so ni solu tɛ ka kalan kɛ.
[7] A do ka aa keladen mɔɔ tan ni fila kili, ka setiiya di ai ma sa ai yi se jinalu gbɛnna ka bɔ mɔɔlu kɔ, ka ban k'ai lataa mɔɔ fila fila.
[8] A vɛɛ ai yɛ: «Ài kà fen suu suu ta ài bolo taaman na, fɔ àiya taama bele. Ài kà dɔnnifen ta, ni wo tɛ bɔlɔ. Ài kà wɔli bila ài kun gbazan.
[9] Ài yi samala don ài sen na, kɛɛ ài kà faaniba fila bila ài kanna.»
[10] A vɛɛ ai yɛ kɔtunun: «Ài vɛ jiyala bon suu suu la, ài yi to wo ja fɔɔ ài taa waate vɛ sena.
[11] Ni wo mɔɔlu k'i ban ài lɔminala tɛɛ tɛɛ lɔ ani k'i ban ai tolo malɔla ài la, wo vɛ kɛla, ài yi bɔ je. Ài vɛ kɛla bɔla je, ài yi je gbangban bɔ ài sen ma ka wo kɛ ai ban tɔɔmase le.»
[12] Wo lɔ, keladennu vɛ bɔla je ka taa mɔɔlu kawani ko ai yi tube.
[13] Ai vɛ jina siyama gbɛnna ka bɔ mɔɔlu kɔ ani ka tulu bɔn jangalotɔ siyama kunna k'ai lakɛnɛya.
[14] Masakɛ Helodi ka Isa mangan mɛn, baa a tɔɔ tɛɛ vɛ bɔ fan bɛ lɔ. Mɔɔ dɔlu tɛɛ a fɔla, ai vɛɛ: «Makoliba Yaya v'a wuli ka bɔ saya lɔ. Wo le n'a kɛla, kawanako se y'a yɛ.»
[15] A dɔlu tɛɛ a fɔla ko kela Iliya le a le. A dɔlu gbazan tɛɛ a fɔla ko kela le a le, iwo kela kɔlɔkɔlɔ dɔ.
[16] Kɛɛ masakɛ Helodi ka ko wolu mɛn mingɛ, a vɛɛ: «Ǹ na Yaya min kun tɛɛla a la, wo le v'a wuli ka bɔ saya lɔ.»
[17] Masakɛ Helodi tɛɛ ka Yaya mina k'a sili k'a bila kaso la k'a masɔlɔn a kɔlɔkɛ Fele moso fɛ, min tɔɔ tɛɛ ko Helodiyasi. Masakɛ Helodi tɛɛ ka wo fulu.
[18] Yaya do tɛɛ a fɔla a yɛ, a vɛɛ: «I kɔlɔkɛ moso man kan k'i sii i kun. Wo ladaannin tɛ i ma!»
[19] Yaya ya ko ka gbeya Helodiyasi yɛ bubale. A lɔɔ tɛɛ a la ka a faa. Kɛɛ a ma ɲa sɔlɔn,
[20] k'a masɔlɔn Helodi tɛɛ siyanna Yaya ɲa. Wo le k'a kɛ, a tɛɛ Yaya lakanala kobɛn. A tɛɛ k'a lɔn k'a fɔ wo tɛɛ mɔɔ telennin ne le, ani lɔhɔlɔma mɔɔ. A tɛɛ vɛ a tolo malɔla Yaya la, a kɔnɔ tɛɛ fili. Wo bɛ n'a kɛ, aa tɛɛ wo ya kumalu mɛnna sawa boloma.
[21] K'ai to wo la, Helodiyasi sawonan lon ka se. Masakɛ Helodi sɔlɔnlon sanɲɔɔmɛn ka kɛ lon min, a ka feeti ba kɛ ka aa ɲamɔɔlu kili ani sɔdasi kundiilu ni Galileka mɔɔbalu.
[22] Helodiyasi denmoso ka na mingɛ tolonkɛya lɔ, a do vɛ dɔn kɛla ai ɲana. Wo do ka diya masakɛ Helodi ni aa mɔɔ kilinin bɛ yɛ. Wo lɔ, masakɛ vɛɛ singbili yɛ: «I yi fen suu suu kɔ, i y'a fɔ, ǹ kɛtɔ a dila i ma.»
[23] A do k'a sɛ a yɛ: «I ka fen fen ko fɔ, ǹ kɛtɔ wo dila i ma hali a ka kɛ ǹa jamana fan kelen ne.»
[24] Singbili ka bɔ je ka taa a ba maɲininga, a vɛɛ: «Ǹ'i mindɛ maɲininga a la?» A ba vɛɛ a yɛ: «A fɔ a yi Makoliba Yaya kun di i ma.»
[25] Singbili k'a latɛlɛja ka seikɔ Helodi fɛlɔ ɲagba le, a vɛɛ a yɛ: «Ǹ a fɛ i yi Makoliba Yaya kun di m̀ ma seti lɔ.»
[26] Kuma wo ka masakɛ ninnafin kosɛvɛ. Kɛɛ a tɛɛ tɛ a fɛ k'i ban singbili ya kuma ma, k'a masɔlɔn a tɛɛ vɛ ban a sɛla mɔɔ kilinin bɛ ɲana.
[27] Wo lɔ, a ka lakanaliba dɔ lɔ telemanin ko wo yi na Yaya kun ne. Wo do vɛ taala kasobon na ka Yaya kun tɛɛ a la,
[28] ka ban ka kun bila seti lɔ ka na a di singbili ma. Wo do ka taa a di a ba ma.
[29] Yaya ya kɔbiladennu ka a faa ko mɛn mingɛ, ai ka taa a fuleni ta ka a sudoon.
[30] Isa ya keladennu seikɔnin, ai k'ai ladɛn Isa fɛ. Ai tɛɛ ka ko min bɛ kɛ ani ai tɛɛ ka mɔɔlu kalan teme, ai ka wo bɛ dandɛɛli kɛ a yɛ.
[31] Wo waate kelen, mɔɔ siyama tɛɛ taa ni seila, fɔɔ ai ma dɔnni kɛ waate sɔlɔn. A vɛɛ aa kɔbiladennu yɛ wo lɔ: «Ài m'i taa mɔ jɛlɛ ma dingila lɔkolon dɔ lɔ, sa m'i nɔningɛ dɔɔnin.»
[32] Wo lɔ, ai vɛ donna kulun nɔ ka taa se dingila lɔkolon dɔ lɔ ai jɛlɛ ma.
[33] Kɛɛ mɔɔ siyama k'ai taatɔ ye kulun nɔ, k'a lɔn k'a fɔ ailu le. Wo kɛ, ai vɛ bɔlila ka bɔ aiya so bɛ la ka taa se Isa ni aa kɔbiladennu ɲa ai taaya lɔ.
[34] Isa ka bɔ kulun nɔ ka jama ba ye je mingɛ, ai hina ka don a la, k'a masɔlɔn ai kɛnin tɛɛ iwo saalu, minnu bilanin ai jɛlɛ ma ni kunnasiiba tɛ ai la. A do vɛ ai kalanna ko siyama la.
[35] Wula la, aa kɔbiladennu ka na a fɔ a yɛ, ai vɛɛ: «I m'a ye? Dingila lɔkolon ne min ne. Su kotɔle.
[36] Jama labila sa ai yi taa balo sanya lɔ tooda ni solu la jan naminin nɔ.»
[37] Isa vɛɛ ai yɛ: «Àilu gbu yi balo di ai ma.» Ai vɛɛ a yɛ: «M'i se wo la di? Fɔ m'i taa kalo sein sala ɲɔɔn don bulu lɔ ka wo di jama ma.»
[38] Isa k'ai maɲininga, a vɛɛ: «Bulukala jein y'ài bolo? Ài yi taa a lasaa.» Ai ka wo lɔn mingɛ, ai vɛɛ a yɛ: «Bulukala loolu, ani jɛɛni fila.»
[39] Wo lɔ, Isa k'ai lɔ mɔɔlu lasiila kpɛkpɛ duu ma bin kɛnɛ kan.
[40] Mɔɔlu k'ai sii mɔɔ kɛmɛ kɛmɛ jate ani mɔɔ biloolu loolu jate.
[41] Wo kɛ, Isa ka bulukala loolu ni jɛɛni fila ta, k'a ɲa lajɛlɛ sanma ka balika bɔ Ala yɛ. A ka bulu ni jɛɛni lɔkalikali, ka a di aa kɔbiladennu ma ko ai y'a lɔtala jama wotɛ.
[42] Mɔɔ bɛ ka dɔnni kɛ k'ai fa kpe.
[43] Ai wɔlinin, Isa ya kɔbiladennu ka bulu ni jɛɛni kulunkulun tɔlu ladɛn, ka gbɔlɔ tan ni fila lafa wo lɔ.
[44] Jama min ka dɔnni wo kɛ, kɛ́ mɔɔ waa loolu tɛɛ ai lɔ.
[45] Wo kɔ, Isa k'a fɔ aa kɔbiladennu yɛ telemanin ko ai yi don kulun nɔ ka taa a ɲa Betisaida so la kɔɔ kɔma. Ko ale le kɛtɔ jama labilala.
[46] Isa wɔlinin mɔɔlu lasalanala, a vɛ taala Aladaliya lɔ tini kɔkan.
[47] Su ka ko ka kɔbiladennu to kulun nɔ kɔɔ tɛma. Ado Isa kelen ka to gbele ma.
[48] A k'a ye k'a fɔ aa kɔbiladennu vɛ sɛɛ kosɛvɛ kulun bɔlila, baa ai ɲa tilinminnin tɛɛ fɔɲɛ le la. Donon kumun waate, Isa vɛ taamana kɔɔ kɔkan ka taa ai kɔ. A ka se ai ma k'a kɛ iwo a tɛɛ timinna ai la.
[49] Ai ka a taamatɔ ye kɔɔ kɔkan mingɛ, a tɛɛ ai kɔnɔ k'a fɔ sugboloni le. Ai do vɛ gbanɔla,
[50] baa ai bɛ ka a ye ka siyan. Wo lɔ, Isa ka kuma ai fɛ telemanin, a vɛɛ: «Ài y'ài joso lagbeleya! Ǹe le. Ài kà siyan!»
[51] A do ka don ai fɛ kulun nɔ. Wo lɔ telemanin, fɔɲɛ k'i lɔ tue. Ai do vɛ kawakoyala k'a dan natimin,
[52] baa ai tɛɛ ma bulu lasiyaya ko ɲaye ba bene. K'a masɔlɔn ai hangili gbeleyanin ne tɛɛ.
[53] Ai wɔlinin kɔɔ tɛɛla, ai ka se Genesalɛti duu kɔnɔ ka kulun nalɔ kawun na je.
[54] Ai ka bɔ mingɛ kulun nɔ, je mɔɔlu ɲanɔ ka to a ma telemanin ko Isa le.
[55] Wo lɔ, ai bɔlimantɔ ka taa duu fan bɛ lɔ. Ai tɛɛ vɛ a mɛnna ko Isa yi tɛɛ min ja, ai tɛɛ taa jangalotɔlu le dɛvɛ kan je.
[56] A tɛɛ vɛ sena tɛɛ tɛɛ lɔ, so o, tooda o, tuu kɔlɔ o, mɔɔlu tɛɛ na jangalotɔlu le k'ai lala bala lɔ, ai vɛ a madiyala ko ai y'ai bolo tuu hali aa faaniba dagbolo la. Mɔɔ mɔɔ k'ai bolo tuu a la, wo bɛ ka kɛnɛya.