[1] Tele dana timinnin kɔ, Isa ka seikɔ Kapɛlɛnam so kɔnɔ. Mɔɔlu do k'a mɛn mingɛ ko a yi bon na je,
[2] ai siyama vɛ ai ladɛnna bon na fɔɔ lɔya ma sɔlɔn hali bon da la. Ado Isa tɛɛ Ala ya kumakan nasena ai ma.
[3] K'a to wo la, kɛ́ naani vɛ nala falifaama jangalotɔ dɔ le a fɛ.
[4] Kɛɛ ai ma se ai madonna a la ka bɛn jama ma. Wo le k'a kɛ, ai ka jɛlɛ bon kɔkan ka woo bila Isa kunma, ka ban ka jangalotɔ ni aa dɛvɛ lajii woo wo la.
[5] Isa ka aiya limandeya ye mingɛ, a vɛɛ jangalotɔ yɛ: «Ǹ den, iya julumbulu lɔ vɛ koto.»
[6] Wo k'a talan seliya kalanmɔɔ dɔlu siinin tɛɛ je. Ai ka kuma wo mɛn k'a fɔ ai miliya lɔ, ai vɛɛ:
[7] «Mindɛ lɔ kɛ́ min yi Alalɔnbaliyakan fɔla yi ne? Mɔɔ tɛ se julumbulu lɔkotola, mafɔ Ala.»
[8] Isa do k'ai miliya lɔn telemanin, a vɛɛ ai yɛ wo lɔ: «Mindɛ kɛnin miliya suu wo y'ài josokun nɔ?
[9] A yi di? K'a fɔ jangalotɔ yɛ ko ‹Iya julumbulu lɔ vɛ koto› baa k'a fɔ ‹I yi wuli, iya dɛvɛ ta ka taama›, wo fila lɔ, mindɛ fɔ diyanin?
[10] Kɛɛ do fɔ ài y'a lɔn a se yi ǹe Mɔɔnivin Tanin yɛ ka julumbulu lɔkoto dunuɲa.» Wo fɔ, a vɛɛ jangalotɔ yɛ:
[11] «I yi wuli. Iya dɛvɛ ta, i yi taa iya bon na.»
[12] Kɛ́ v'i wulila telemanin ka aa dɛvɛ ta ka taa aa bon na mɔɔ bɛ ɲana. Ai bɛ ka kawakoya ka Ala tanu, ai vɛɛ: «Ǹu ma min ɲɔɔn ye ba bene feu!»
[13] Isa ka taa kɔɔ kawun na kɔtunun. Jama ba ka na a ma, a do vɛ ai kalanna.
[14] A timintɔla, a ka kɛ́ dɔ siinin ye nisɔɔnminaya lɔ. Alife denkɛ Levi le tɛɛ. A vɛɛ a yɛ: «Bila ǹ kɔ.» A do v'i wulila ka bila Isa kɔ.
[15] Wo kɔ, ka Isa ni aa kɔbiladennu siinin to dɔnnikɛya lɔ Levi ya bon na, nisɔɔnminaba ni konyonkɛba siyama siinin tɛɛ ai fɛ, k'a masɔlɔn wo siyama bilanin tɛɛ a kɔ.
[16] Seliya kalanmɔɔ ni Falisi dɔlu tɛɛ je. Wolu k'a ye mingɛ ko Isa ni aa kɔbiladennu yi dɔnni kɛla nisɔɔnminaba ni konyonkɛbalu fɛ, ai vɛɛ aa kɔbiladennu yɛ: «Mindɛ lɔ àiya kalanmɔɔ yi dɔmuni kɛla nisɔɔnminabalu ni konyonkɛbalu fɛ?»
[17] Isa ka wo mɛn k'ai javi, a vɛɛ: «Kɛnɛyabatɔ mako tɛ dandaliba la, fɔ jangalobatɔ. M̀ ma na ka mɔɔ telenninnu kili, fɔ julumbutɔlu.»
[18] Lon dɔ, ka Yaya ya kɔbiladennu ni Falisilu ya kɔbiladennu to sun donna, mɔɔ dɔlu ka na Isa maɲininga, ai vɛɛ: «Yaya ya kɔbiladennu ni Falisilu talu deinnin sun donna. Mindɛ lɔ iya kɔbiladennu tɛ wo kɛla?»
[19] Isa k'ai javi, a vɛɛ: «A yi di? Ka kɔɲɛfa to a tɔvalu dafɛ kɔɲɛmalɔ lɔ, a tɔvalu yi sene sun donna? Ka kɔɲɛfa to ai fɛ, ai tɛ se ai dansiila dɔnnikɛ ko lɔ.
[20] Kɛɛ lon dɔ natɔ, mɔɔlu kɛtɔ kɔɲɛfa bɔla ai tɛma. Wo lon ne, ai kɛtɔ sun donna.»
[21] Mɔɔ tɛ faani kula kulunkulun tala ka faani kɔlɔ labalin a la. Ni wo tɛ faani kula kɛtɔ faani kɔlɔ samana ka a fala. A falanɲa kɛwonyatɔ ka timin a kunfɔlɔ ta la.
[22] Mɔɔ tɛ gbɛ kula kɛla jitabɔlɔ kɔlɔ lɔ. Ni wo tɛ, a fununtɔ ka bɔlɔ te ka gbɛ bɛ bɔn. Mɔɔ yi gbɛ kula kɛla bɔlɔ kula le lɔ.»
[23] Nɔningɛlon dɔ, Isa nu timintɔla sɛnɛ dɔ tɛma, aa kɔbiladennu vɛ sɛnɛfen tizan dɔ bɔla.
[24] Wo lɔ, Falisilu vɛɛ Isa yɛ: «I m'a ye? Ai yi min na Nɔningɛlon, wo ladaannin tɛ ka bɛn maa seliya ma.»
[25] Isa k'ai javi, a vɛɛ: «A yi di? Nabi Dawuda na min kɛla ale ni a taamaɲɔɔlu ya kɔɔn waate lɔ, ài ma wo kalan?
[26] A ka don mingɛ Alabatobon na, a ka salaka bululu ye k'a dɔ ta k'a dɔn k'a dɔ di a taamaɲɔɔlu ma. Wo do ladaanin tɛɛ tɛ ale ni a taamaɲɔɔlu ma ka bɛn seliya ma, mafɔ salakalasebalu dein. Wo waate, Abiyata le tɛɛ salakalaseba kundiiya la.»
[27] Wo fɔ, Isa vɛɛ Falisilu yɛ: «Ala na Nɔningɛlon danna ka bɛn mɔɔlu ya ko ma. A ma mɔɔlu dan ka bɛn Nɔningɛlon ya ko ma.
[28] Wo lɔ, ǹe Mɔɔnivin Tanin yi kundii le le hali Nɔningɛlon kunna.»