[1] Isa vɛ ai kalanna sanalu lɔ, a vɛɛ: «A ka kɛ kɛ́ dɔ le le, min ka gbele kɛ ka a laminin jɔsɔ la. A do ka sɛnɛfennajaya ladan ka kunmagbɛngbalan lɔ. A wɔlinin wo bɛ la, a ka a kalifa gbelekunnasiiba dɔlu la ka ban ka taa taaman na.
[2] Sɛnɛfen kali waate, a ka aa bɔliden dɔ lataa gbelekunnasiibalu ma, ko ai y'a ta nii di a ma sɛnɛfen nɔ.
[3] Kɛɛ ai ka wo tii mina ka a gbasi ka a bolokolongbɛ bila ka taa.
[4] Wo kɛ, gbeletii ka bɔliden gbɛlɛ lataa ai ma kɔtunun. Ai ka wo gbasi a kun nɔ ka a lafɛya.
[5] Wo kɔ, gbeletii ka bɔliden dɔgbɛlɛ lataa ai ma kɔtunun. Ai do ka wo faa. Gbeletii ka to bɔliden siyama lataala kelenkelen ne. Ai do ka a dɔlu gbasi, ka a dɔlu faa.
[6] Mɔɔ kelen min ka to gbeletii bolo, wo tɛɛ a diyanan denkɛ le le. A laban nɔ, a ka wo lataa ai ma, a vɛɛ: ‹Ai kɛtɔ ǹ den buɲala.›
[7] Kɛɛ gbelekunnasiibalu ka wo ye mingɛ, ai k'a fɔ i ɲɔɔn yɛ, ai vɛɛ: ‹Kɛɛtaba le ne. Ài m'a faa fɔsa gbele yi kɛ mɔ ta le.›
[8] Ai do ka a mina ka a faa ka a fɔnfɔn gbele kɔɔkan.»
[9] Isa ka ban sana lala ka jama maɲininga, a vɛɛ: «A yi di? Gbeletii kɛtɔ mindɛ kɛla? A natɔ gbelekunnasiibalu faala ka ban ka gbele kalifa mɔɔ gbɛlɛlu la.
[10] Min sɛvɛnin kitabu kɔnɔ, ài ma wo kalan ba? A sɛvɛnin ko: ‹Bonnɔbalu k'i ban kawakulun min nɔ, wo le ka kɛ bonjuusii kawakulun ne.
[11] Mɔtii nɔ le wo le. A kɛnin mɔ ɲana kawanako ba le le.›»
[12] Diina kundiilu tɛɛ a mina ko ɲa ɲininna k'a masɔlɔn ai k'a ɲaye k'a fɔ a ka sana wo la ailu le ma. Kɛɛ ai tɛɛ siyanna jama ɲa. Wo le k'a kɛ, ai ka Isa to je ka taa.
[13] Wo lɔ, diina kundiilu ka Falisi ni masakɛ Helodi ya mɔɔ dɔlu lataa Isa ma, kosa a yi kuma bɛnbali dɔ fɔ min yi kɛ a mina sabu le.
[14] Ai ka na k'a fɔ Isa yɛ, ai vɛɛ: «Kalanmɔɔ, mɔ k'a lɔn i yi tuɲa le fɔla. I tɛ siyanna mɔɔ suu suu ɲa, i do tɛ mɔɔ bɔla mɔɔ lɔ gbazan. Mɔɔlu ka kan ka Ala ya siya taama teme, i y'ai kalanna wo la tuɲa gbu gbu le lɔ. A yi di wo lɔ? Ka nisɔɔn sala Lɔmu masakɛba ma, wo ladaannin ne mɔ ma baa wo ladaannin tɛ? Mɔ ka kan ka wo sala, baa wo man ɲin?»
[15] Kɛɛ Isa tɛɛ ka aiya filangafoya lɔn. Wo lɔ, a vɛɛ: «Mindɛ lɔ ài yi ǹ nɔsumanna? Na wɔligbanan dɔ le, ǹ a lasaa.»
[16] Ai do ka na wɔligbanan kelen ne Isa fɛ. A vɛɛ ai yɛ wo lɔ: «Jene sawula ni jene tɔɔ yi wɔligbanan min kan?» Ai vɛɛ: «Lɔmu masakɛba.»
[17] Isa vɛɛ: «Awa, ài yi Lɔmu masakɛba ta di Lɔmu masakɛba ma. Ài yi Ala gbazan ta di Ala ma.» Isa ya javili k'ai kawakoya.
[18] Sadusi dɔlu ka na Isa ma, minnu y'a fɔla ko mɔɔ t'i wulila saya kɔ. Ai do ka a maɲininga, ai vɛɛ:
[19] «Kalanmɔɔ, kela Musa n'a fɔla ni i kɔlɔkɛ ka sa ka a moso densɔlɔnbali to a kɔ, ko wo vɛ kɛla i moso wo ta kosa a yi den sɔlɔn i kɔlɔkɛ yɛ.
[20] A ka kɛ badenma wolowulan ne le. Kɔlɔmanda ka moso dɔ fulu. A do ka sa ka moso densɔlɔnbali to a kɔ.
[21] Wo kɛ, a baden filana ka moso wo fulu. Kɛɛ ale gbazan ka sa ka moso densɔlɔnbali to a kɔ. A ka kɛ badenma sawana gbazan na ten ne.
[22] Wo ka to kɛla haan ka taa se den wolowulana ma. Ai bɛ ka sa ka moso wo densɔlɔnbali to ai kɔ. A laban nɔ, moso gbazan ka sa.
[23] A yi di? Fulenilulawulilon, moso wo kɛtɔ jene ta le kɛ́ wolowulan wo lɔ? K'a masɔlɔn a n'i siila a kelenkelenna bɛ le kun.»
[24] Isa k'ai javi, a vɛɛ: «Ài ma kitabulu kɔlɔ ɲaye, ni wo tɛ Ala ya setiiya. Wo lɔ, ài kɔnɔfilinin!
[25] Baa fulenilu v'i wulila lon min na, kɛ́ ni mosolu tɛnala fulu kɛla. Ai bɛ kɛtɔle iwo mɛlɛka, minnu yi haijɛnɛ.
[26] Fulenilu lawuli ko kɔni, Ala na kuma min fɔla kela Musa yɛ kɔlɔmanjuni taalama dafɛ, ài ma wo kalan ba Taulati lɔ? Ala vɛɛ: ‹Ǹe le Ala le min yi batola Ibulahima, Isiyaka ni Janguba bolo.›
[27] Wo kɔlɔ le ko fulenilu tɛ Ala batola, fɔ nimalu. Wo lɔ, ài kɔnɔfilinin fefe.»
[28] Seliya kalanmɔɔ dɔ ka na bɛn ai le i ɲɔɔn sɔsɔla k'a ye ko Isa vɛ ai javi kobɛn. Wo lɔ, a ka a maɲininga, a vɛɛ: «Mindɛ yi Ala ya seliya bɛ lɔ bubata le?»
[29] Isa k'a javi, a vɛɛ: «Seliyalu bɛ lɔ bubata le min ne, ko: ‹Àilu Isilanmɔɔlu, ài y'ài tolo malɔ. Ala yi Mɔtii le le. Ala kelenpesa le yi je.
[30] I i Tii Ala kanu i josokun bɛ la, ani i nin bɛ, ani i hangili bɛ, ani i fanga bɛ.›
[31] A filana le min ne, ko: ‹I i siiɲɔɔ kanu iwo ile gbu.› Ala ya seliya bɛ lɔ, a dɔ buɲanin tɛ ka timin seliya fila min na.»
[32] Ado seliya kalanmɔɔ k'a fɔ Isa yɛ, a vɛɛ: «Kalanmɔɔ, i na tuɲa le fɔla. I vɛɛ ko Ala kelenpesa le yi je, ko tii tii tɛ je ale kɔ. I jɔ yi wo lɔ.
[33] Ni i yi Ala kanuna i josokun bɛ la, ani i hangili bɛ, ani i fanga bɛ, ka i siiɲɔɔ kanu iwo ile gbu, wo le fisayanin ka timin kolofen salaka suu bɛ la, hali kolofen lakunnin min vɛ ɲɛnin salaka ko lɔ.»
[34] Isa k'a ye mingɛ ko kɛ́ wo vɛ javili kɛ hangilimaya la, a vɛɛ a yɛ: «A vɛ to dɔɔnin i yi don Ala ya masaya kɔlɔ.» Mɔɔ ma diɲa ka ɲiningali kɛ a la wo kɔ.
[35] Ka Isa to mɔɔlu kalanna lɔhɔlɔmabonba lu kɔnɔ, a k'ai maɲininga, a vɛɛ: «Mindɛ lɔ seliya kalanmɔɔlu y'a fɔla ko Masa Tɔɔmasenin yi nabi Dawuda bɔzɔn ne le?
[36] Dawuda gbu na kumala Lɔhɔlɔma Fɔɲɛ ya se lɔ, a vɛɛ: ‹Mɔtii n'a fɔla ǹ Tii yɛ, a vɛɛ: «Na i sii m̀ bolokinin fɛ, fɔɔ m̀'ɛ banna i juulu lala i sen kɔlɔ.»›
[37] Ni Dawuda y'a fɔla wo tii ma ko a Tii, wo yi se kɛla a bɔzɔn ne di wo lɔ?» Jama ba tɛɛ ai tolo malɔla a la sawa boloma.
[38] K'a to kalanna, a vɛɛ: «Ài jando ài jɛlɛ lɔ seliya kalanmɔɔlu kanma! A diyanin ai yɛ ka pipɔ jaan don k'i lɔjaalajaala. Ai vɛ taala lɔɔ lɔ, ai y'a fɛ mɔɔlu y'ai fo buɲa boloma.
[39] Ai vɛ taala Aladalibon na, ni wo tɛ feetikɛya lɔ, ai yi ɲamɔɔ siiyalu le ɲininna.
[40] Ai yi kɛsamosolu bolofen bɛ dɔnna. Ai yi mɛnna Ala daliya lɔ sa mɔɔlu y'ai ye k'ai matɔɔ. Wo le y'a kɛla, aiya kolatɔn gbeleyatɔ ka timin dɔlu ta la.»
[41] Wo kɛ, Isa k'i sii wɔlijaabilakesu ɲatelenma. A do vɛ mɔɔlu ya wɔli di ɲa lasaala. Nafolotii siyama tɛɛ wɔli ba bilala je.
[42] A ka kɛsamoso fandan dɔ gbazan ye. Wo ka na ka wɔligbanan dɔɔmaninda fila bila kesu lɔ.
[43] Isa ka aa kɔbiladennu kili k'a fɔ ai yɛ, a vɛɛ: «Ǹ'i tuɲa fɔ ài yɛ, kɛsamoso fandan wo vɛ wɔli min bɔ, wo walanin vɛ ai bɛ ta le.
[44] K'a masɔlɔn ai bɛ na dɔɔnin ne bɔla aiya nafolo ba la k'a di. Kɛɛ ka moso wo to bolokolonya lɔ, a na aa wɔli bɛ le dila. Hali dɔnnifen sɔɔn ma to a bolo butu.»