[1] Kɛnɛ bɔnin, salakalaseba kundiilu ni kɛmɔɔbalu ni seliya kalanmɔɔlu ni kititɛɛjama bɛ k'i ɲɔɔn ye Isa ya ko lɔ. Ai do ka Isa mina k'a sili, ka taa a le Pilati fɛlɔ.
[2] Wo lɔ, Pilati k'a maɲininga, a vɛɛ: «Ile le Jahudiyalu ya masakɛ le?» Isa k'a javi, a vɛɛ: «Ile gbu le na wo fɔla.»
[3] Salakalaseba kundiilu ka kɛ Isa jalaki le ko siyama lɔ.
[4] Pilati ka Isa maɲininga kɔtunun, a vɛɛ: «Ai v'i jalaki ko siyama lɔ. I ma wo mɛn? I tɛ javili kɛla?»
[5] Kɛɛ Isa ma diɲa ka javili suu suu di. Wo ka Pilati kawakoya.
[6] San san, Timinkunna Selilon, jamanatii deinnin tɛɛ kasoden kelen ne bilala. Jama tɛɛ vɛ a fɔla a yɛ a yi min bila, a tɛɛ wo le bilala.
[7] Wo k'a talan kɛ́ dɔ tɛɛ je, min tɔɔ yi ko Balabasi. Ale ni mɔɔlamulutuba tɔlu bilanin tɛɛ kaso la. Ai tɛɛ ka sokɔnɔmɔɔlu lamulutu fɔɔ ka mɔɔ dɔlu faa.
[8] Jama k'i madon Pilati la ka a madiya ko a yi kasoden dɔ bila ai yɛ iwo a deinnin tɛɛ a kɛla teme.
[9] A do k'ai maɲininga, a vɛɛ: «Ài y'a fɛ ǹ'i Jahudiyalu ya masakɛ le bila?»
[10] K'a masɔlɔn Pilati tɛɛ k'a lɔn jɔ ko ɲangbeya le k'a kɛ salakalaseba kundiilu ka Isa mina ka na a le a fɛlɔ.
[11] Kɛɛ salakalaseba kundiilu vɛ jama lɔsunna ko a yi Balabasi bila ai yɛ.
[12] Wo lɔ, Pilati vɛɛ ai yɛ: «Ài y'a fɛ ǹ'i mindɛ le kɛ Isa la wo lɔ, ài y'a fɔla min ma ko Jahudiyalu ya Masakɛ?»
[13] Ai bɛ vɛ gbanɔla, ai vɛɛ: «A gbaan kɔlɔman ma!»
[14] Pilati k'ai maɲininga, a vɛɛ: «Mindɛ lɔ? A na koyon mindɛ kɛla?» Ai do vɛ gbanɔla ka timin kunfɔlɔ ta la, ai vɛɛ: «A gbaan kɔlɔman ma k'a faa!»
[15] Pilati tɛɛ a fɛ ka jama ladiyanan ko kɛ. Wo lɔ, a ka Balabasi bila, ka ban ka mɔɔlu lɔ Isa gbasila gbusan na. Wo kɔ, a ka Isa don sɔdasilu bolo ko ai yi taa a gbaan kɔlɔman ma.
[16] Wo lɔ, sɔdasilu ka taa Isa le jamanatii ya lu ma, ka sɔdasi kulu bɛ ladɛn je.
[17] Ai ka masa faani wulɛn bila a kanna, ka wonin julu mamɔlɔmɔlɔ ka a kɛ masafula sawula le, ka wo bilin a kun na.
[18] Wo kɔ, ai vɛ a fola, ai vɛɛ: «Jahudiyalu ya masakɛ, m'i fola.»
[19] Ai ka to a gbasila a kun nɔ bele la k'ai daji bɔn a kan. Ai k'i mabilin duu ma a kɔlɔ k'a kɛ iwo ai y'a buɲala.
[20] Ai bannin a lafɛyala, ai ka masa faani bɔ a kanna, ka ale jɛlɛ ya faanilu bila a kanna. Wo kɔ, ai ka bɔ a le ka taa a gbaan kɔlɔman ma.
[21] Ai taatɔla, ai ka bɛn Silɛnika kɛ́ dɔ le, a vɛ bɔla tuu kɔlɔ, min tɔɔ yi ko Simɔn, Alɛzandele ni Lufɔ fa kɔni. Sɔdasilu ka a lɔ Isa gbaankɔlɔman tala.
[22] Ai ka taa a le dingila dɔ lɔ, min tɔɔ yi ko Gɔligota. Wo kɔlɔ le ko kunkolo dingila.
[23] Ai do vɛ gbɛ dila Isa ma, basi dɔ ɲaaminnin tɛɛ min nɔ, ai yi fɔla min ma ko milu. A do k'i ban a lɔ.
[24] Wo kɛ, ai ka a gbaan kɔlɔman ma ka ban ka tombola kɛ k'a lɔn aa faanilu lɔtalatɔ teme i ɲɔɔn wotɛ.
[25] Ai do ka a gbaan kɔlɔman ma siinintele waati.
[26] Wala dɔ gbaannin tɛɛ Isa kunma. A faa kun sɛvɛnin tɛɛ min kan, a vɛɛ: «Jahudiyalu ya Masakɛ le.»
[27] Ai ka Isa ni bengannikɛba fila gbaan kɔlɔmannu ma waate kelen nɔ: dɔ tɛɛ a bolokinin fɛ, a dɔ tɛɛ a bolonunma fɛ.
[29] Timinbatɔlu tɛɛ a jɛvɛla, k'ai kun nadɔn aa ko lɔ. Ai vɛɛ a yɛ: «Ile m'a fɔ ko i yi sene lɔhɔlɔmabonba tela ka a lɔ kɔtunun tele sawa kɔlɔ?
[30] I yi jii ka bɔ kɔlɔman na k'i jɛlɛ lakisi!»
[31] Wo ɲa kelen ma, salakalaseba kundii ni seliya kalanmɔɔlu gbazan tɛɛ a lafɛyala, k'a kɛ a fɔle i ɲɔɔn yɛ, ai vɛɛ: «A na a dɔlu lakisila, kɛɛ a do tɛ se a jɛlɛ lakisila.
[32] Ni ale le Masa Tɔɔmasenin ne, ani Isilanmɔɔlu ya masakɛ, wo vɛ kɛla a yi jii ka bɔ kɔlɔman na. Mɔ vɛ wo yena, mɔ limandeyatɔ a ma.» Mɔɔ fila minnu gbaannin tɛɛ Isa tɔɔfɛ, wolu gbazan tɛɛ a jɛvɛla.
[33] Telelatelen waate senin, divi ka don jamana fan bɛ lɔ ka to ten haan fɔɔ lɛlɛ sawa.
[34] Wo waate, Isa ka gbanɔ, a vɛɛ: «Eloyi, Eloyi, lama sabakatani?» Wo kɔlɔ le ko: «Ǹ Tii, ǹ Tii, mindɛ lɔ i vɛ ǹ nabila?»
[35] Mɔɔ minnu lɔnin tɛɛ wo ja, wo dɔlu ka wo mɛn k'a fɔ, ai vɛɛ: «A ye, a yi kela Iliya le kilila.»
[36] Ai lɔ mɔɔ kelen vɛ bɔlila ka fu dɔ ta k'a sun gbɛ kumunnin nɔ. Wo kɛ, a k'a dɛn kɔlɔman na k'a lɔ Isa da la ko a a dɔ min. Wo lɔ, a vɛɛ: «A to ten. Mɔ kɛtɔ a yena, ni kela Iliya natɔ a bɔla kɔlɔman na.»
[37] Wo kɛnin, Isa ka a kan ba labɔ ka sa.
[38] Wo waate kelen, lɔhɔlɔmabonba daladɛn faani ka fala fila le ka damina san ma ka se duu ma.
[39] Sɔdasi kundii min lɔnin tɛɛ Isa ɲakɔlɔ je, wo ka a sa ɲa ye mingɛ, a vɛɛ: «Kɛ́ min tɛɛ Ala Den ne le jɔ!»
[40] Moso dɔlu tɛɛ je gbazan, minnu ka to poon ko lasaaya lɔ. Moyamu Magidalaka tɛɛ ai lɔ, ani a tɔɔma min tɛɛ Janguba dɔɔmaninda ni Jose ba le, ani Salome.
[41] Moso wolu bilanin tɛɛ Isa kɔ, ka kɛ a madɛmɛn ne, k'a ta a kawanili waate ma Galile. Moso siyama gbɛlɛ lɔnin tɛɛ je, minnu nanin tɛɛ Isa malɔya lɔ Jelusalɛm.
[42] Wulada ka se, ado mɔɔlu tɛɛ ai lɔbɛnna Nɔningɛlon na wo lon ne.
[43] Wo k'a talan mɔɔba dɔ tɛɛ je, min fɛ tɛɛ kititɛɛjama la, ai tɛɛ a fɔla min ma ko Jusufu Alimateka. A do tɛɛ Ala ya masaya waate makɔnɔna. Jusufu ka a joso lagbeleya ka taa Pilati fɛlɔ ko a yi Isa fuleni don a bolo.
[44] Isa sanin teme fala, wo ka Pilati kawakoya. A do ka sɔdasi kundii kili k'a maɲininga ni bikoma a sa.
[45] Sɔdasi kundii ka a ɲafɔ a yɛ mingɛ, Pilati ka diɲa Jusufu yi taa Isa fuleni ta.
[46] Wo lɔ, Jusufu ka faani gbɛ dɔ san, ka fuleni kasange, ka taa a sudoon kawawoo dɔ lɔ, a tɛɛ ka mɔɔlu lɔ min senna ka kɛ a kabulu le. Wo kɔ, a ka kawa makulukulu ka kabulu datuun.
[47] Ado Moyamu Magidalaka ni Jose ba Moyamu ka Isa sudoonya ye.