[1] Lon dɔ, Isa ka don Aladalibon dɔ la kɔtunun. Kɛ́ dɔ tɛɛ je min bolo janin tɛɛ a ma.
[2] Mɔɔlu vɛ Isa lasaala kosɛvɛ k'a ye ni a kɛtɔ kɛ́ wo lakɛnɛyala Nɔningɛlon, k'a masɔlɔn ai tɛɛ dailu ɲininna a jalaki ko lɔ.
[3] Ado Isa k'a fɔ kɛ́ yɛ, min bolo janin tɛɛ a ma, a vɛɛ: «I yi wuli, i lɔ jama tɛma.»
[4] Isa vɛɛ mɔɔlu yɛ: «A yi di? A ladaannin ne ka kokein kɛ Nɔningɛlon baa koyon? Ka mɔɔ lakisi baa k'a faa?» Ai bɛ ka jeden.
[5] Wo kɛ, Isa v'i ɲa kaana ai lɔ k'a joso lakuna. A ninna ka fin ka bɛn ai kunnɔgbeleya ma. Isa vɛɛ kɛ́ yɛ: «I bolo lɔsama.» Kɛ́ k'a bolo lɔsama mingɛ, a bolo ka kɛnɛya telemanin.
[6] Wo kɛ, Falisilu ka bɔ je telemanin. Ai ni masakɛ Helodi kɔmɔɔ dɔlu ka taa i ɲɔɔn ye ka Isa faa ko ɲa ɲinin.
[7] Wo kɔ, Isa ni aa kɔbiladennu ka bɔ je ka taa Galile kɔɔ kawun na. Ado mɔɔ siyama ka bila a kɔ, minnu bɔnin tɛɛ Galile ni Jude koovilu lɔ,
[8] ani Jelusalɛm so kɔnɔ, ani Idume duu kɔnɔ, ani Jɔdan kɔɔ kɔma solu, ani Tili ni Sidɔn solu fannɔ. Jama ba wo ka na a ma, ka bɛn ai ka a kɛkolu mɛn.
[9] Ka bɛn jama ba ma, Isa k'a fɔ aa kɔbiladennu yɛ ko ai yi kulun nɔbɛn a yɛ sa jama kana a lɔgbalin.
[10] K'a masɔlɔn a tɛɛ vɛ jangalotɔ siyama lakɛnɛya. Ado jangalotɔ tɔ bɛ t'i ɲɔɔn lasusula fɔsa ai yi ɲa sɔlɔn k'ai bolo tuu a la.
[11] Ado jinatɔlu tɛɛ vɛ Isa yena waate waate, ai tɛɛ ai ten bilin a kɔlɔ ka gbanɔ, ai vɛɛ: «Ala Den ne ile le.»
[12] A do tɛɛ ai jamalila k'a magbeleya ko ai kà a mangan jɛnzɛn.
[13] Wo kɔ, Isa ka jɛlɛ tini dɔ kɔkan. A tɛɛ a fɛ mɔɔ minnu yi kɛ a kɔ, a ka wolu kili, ado wolu ka na a ma.
[14] Wo kɛ, a ka mɔɔ tan ni fila ta k'a fɔ ai ma ko keladen, sa ai yi kɛ a kɔ, a vɛ ai lɔla kawanilila,
[15] ani sa se yi kɛ ai yɛ ka jinalu gbɛn mɔɔlu kɔ gbazan.
[16] A ka mɔɔ tan ni fila minnu kɛ keladennu le, wolu le ne. A ka Simɔn ta, a tɛɛ a fɔla min ma ko Piɛl.
[17] A ka Zebede denkɛ fila gbazan ta, minnu yi Janguba ni Yaya le. A tɛɛ a fɔla wolu ma ko Bowanɛlɛgɛsi, wo kɔlɔ le ko sanfɛlɛkandennu.
[18] A ka Andele ni Fele ni Batolomu gbazan ta, ani Matiyu ni Toma ni Alife denkɛ Janguba ni Tade ni Simɔn, ai tɛɛ a fɔla min ma ko fasokanuba.
[19] A ka Judasi Sakaliyɔti gbazan ta, min ka Isa janva.
[20] Wo kɔ, Isa ka don bon dɔ la. Mɔɔ siyama vɛ ai ladɛnna kɔtunun haan fɔɔ Isa ni aa kɔbiladennu ma se sɔlɔn hali ka dɔnni kɛ.
[21] Ko wo k'a fɔ Isa balamɔɔ dɔlu yɛ mingɛ, ai vɛ taala a minaya lɔ baa ai tɛɛ a fɔla, ai vɛɛ: «A vɛ kɛ fatɔ le.»
[22] Seliya kalanmɔɔ minnu nanin tɛɛ a fɛlɔ ka bɔ Jelusalɛm, wolu tɛɛ a fɔla, ai vɛɛ: «Biyɛzɛbɔ y'a kɔ. Jinalu ya kundiiba le na setiiya dila a ma sa a yi jinalu gbɛn ka bɔ mɔɔlu kɔ.»
[23] Wo kɛ, Isa k'ai kili ka sana dɔlu la ai yɛ, a vɛɛ: «Soɛtana yi se a jɛlɛ kɛlɛla di?
[24] Ni jamana min mɔɔlu ka falan a ma k'ai ɲɔɔn kɛlɛ, wo jamana yi tiɲale fefe.
[25] Ni do bonnamɔɔlu ka falan a ma k'ai ɲɔɔn kɛlɛ, wo bon yi halakile.
[26] Wo ɲa kelen ma, ni Soɛtana ya bɔlidennu ka falan a ma k'ai ɲɔɔn kɛlɛ, aa setiiya tɛ se tola a ma, fɔ ka ban.
[27] «Mɔɔ tɛ se donna kɛ́ fangama ya bon na k'a bolofennu suɲa, ni a ma kɛ́ fangama wo mina kunfɔlɔ le k'a sili, kɛlɛ? Wo vɛ kɛla, a yi sene suɲali kɛla wo tii ya bon na.
[28] «Ǹ'i tuɲa fɔ ài yɛ, mɔɔlu yi julumbu min bɛ tala ani ai yi Alalɔnbaliyakan suu suu fɔla, wo bɛ lɔ yi sene kotola.
[29] Kɛɛ mɔɔ mɔɔ vɛ Alalɔnbaliyakan fɔla Lɔhɔlɔma Fɔɲɛ ma, wo tii ma tɛ koto dunuɲa min nɔ. Julumbu wo totɔ wo tii kan kudein.»
[30] Isa na wo fɔla k'a masɔlɔn ai vɛɛ ko jina le y'a kɔ.
[31] Ka Isa to wo ja, a ba ni a dɔɔkɛlu ka na ai lɔ lu ma ka mɔɔ dɔ lɔ a kilila.
[32] Wo k'a talan, jama siinin tɛɛ a laminin nɔ. Ai vɛɛ a yɛ: «I ba ni i dɔɔkɛlu lɔnin lu ma. Ai y'a fɛ k'i ye.»
[33] A vɛɛ ai yɛ: «Jene yi m̀ ba le? Ǹ dɔɔkɛ yi jene ni jenelu le?»
[34] A v'i ɲa kaana mɔɔlu lɔ, minnu siinin tɛɛ a laminin nɔ je k'a fɔ ai yɛ, a vɛɛ: «Mɔɔ minnu yi m̀ ba ni ǹ dɔɔkɛlu le le.
[35] K'a masɔlɔn mɔɔ mɔɔ vɛ Ala sawo kɛla, wo tii yi ǹ dɔɔkɛ ni ǹ dɔɔmoso ni m̀ ba le le.»