[1] Ai ka ban kɔɔ tɛɛla ka se Gelasenekalu makɛya lɔ.
[2] Isa jiinin ka bɔ kulun nɔ, kɛ́ jinatɔ dɔ vɛ nala a labɛnya lɔ ka bɔ kabuluso la,
[3] ale siinin tɛɛ tɛɛ min ja. Mɔɔ suu suu tɛɛ tɛ se a silila butu, hali jɔlɔkɔ la.
[4] Siɲa siyama mɔɔlu tɛɛ ka a bolo sili jɔlɔkɔ la, ka a sen gbaan kulun na. Wo bɛ n'a kɛ, a tɛɛ jɔlɔkɔ ni kulun nɔkalikalila. Ado fanga tɛɛ tɛ mɔɔ suu suu la ka a lakana.
[5] Su ni tele a tɛɛ timintiminna kabululu tɛma ani tinilu kɔkan, ka to gbanɔla k'a jɛlɛ madimin kawakulunnu la.
[6] A ka to poon ka Isa ye mingɛ, a v'i bɔlila ka na i mabilin a sen kɔlɔ.
[7] A ka gbanɔ, a vɛɛ: «Ile Isa, Ala Kɔlɔtaninba Den, mindɛ le ile ni ǹe wotɛ? Ǹ'i madiyala Ala tɔɔ lɔ, i kà ǹ tɔlɔ.»
[8] A ka wo fɔ k'a masɔlɔn Isa tɛɛ k'a fɔ a yɛ, a vɛɛ: «Ile jina, bɔ kɛ́ min kɔ!»
[9] Isa k'a maɲininga, a vɛɛ: «I tɔɔ di?» A ka Isa javi, a vɛɛ: «Ǹ tɔɔ le Jamaba, baa mɔ walanin ne.»
[10] A ka to Isa madiyala ko a kà ai gbɛn ka bɔ duu wo lɔ.
[11] Wo k'a talan kɔsɛ kulu ba tɛɛ dɔnnila tini kɔkan ai dafɛ.
[12] Jinalu vɛ Isa madiyala, ai vɛɛ: «I yi mɔ lataa kɔsɛlu tɛma fɔsa m'i don ai lɔ.»
[13] A do ka diɲa wo ma. Wo kɛ, jinalu vɛ bɔla kɛ́ kɔ ka taa don kɔsɛlu lɔ. Ai bɛ bɔlimantɔ ka jii tini la ka taa don kɔɔ kɔlɔ k'ai bɛ faa. Ai tɛɛ kɔsɛ waa fila ɲɔɔn bɔ le.
[14] Wo kɛnin, kɔsɛkunnasiibalu vɛ bɔlila ka taa wo ɲafɔ so ni toodalu la mɔɔ bɛ yɛ. Mɔɔlu v'i wulila wo lɔ ka na ko lasaaya lɔ.
[15] Ai senin Isa ma, ai ka kɛ́ wo masumanin siinin ye, jina siyama tɛɛ min kɔ kɔlɔkɔlɔ le. Faani tɛɛ a kanna. A hangili tɛɛ vɛ sei a ma. Ai bɛ ka siyan wo lɔ.
[16] Minnu tɛɛ ka a ye ko minnu kɛnin jinatɔ ni kɔsɛlu la, wolu ka dandɛɛli kɛ mɔɔ tɔlu yɛ.
[17] Ai ka ko wolu mɛn mingɛ, ai v'i wulila ka Isa madiya ko a yi bɔ ai makɛya lɔ.
[18] Isa dontɔla kulun nɔ, jinatɔ kɔlɔ wo vɛ a madiyala, a vɛɛ: «Ǹ a fɛ ǹ'i to i fɛ.»
[19] Kɛɛ Isa ma diɲa. A vɛɛ a yɛ: «Taa i fɛso. Mɔtii na ko ba min kɛla i yɛ ka hina i la teme, i yi wo lase i balamɔɔlu ma.»
[20] Wo lɔ, kɛ́ vɛ taala. Isa tɛɛ vɛ min kɛ a yɛ, a vɛ wo bɛ lasena So Tan naminin nɔ. Mɔɔ bɛ ka kawakoya wo lɔ.
[21] Isa ni aa kɔbiladennu ka kɔɔ tɛɛ mingɛ kulun nɔ kɔtunun, jama ba k'ai madon a la kawun na.
[22] Wo kɛnin, Aladalibon ɲamɔɔ dɔ ka na, min tɔɔ yi ko Jailusi. A ka Isa ye mingɛ, a v'i bilinna a sen kɔlɔ
[23] ka a madiya kosɛvɛ, a vɛɛ: «Ǹ denmoso yi faa bolo le ma. I jaani, i yi na i bolo la a kan. Wo vɛ kɛla, a yi kɛnɛyale ka to a nin na.»
[24] A do vɛ taala a fɛ. Wo kɛ, jama ba ka bila Isa kɔ haan fɔɔ ka a lɔgbalin ai tɛma.
[25] Wo k'a talan moso jangalotɔ dɔ tɛɛ je. Wo tɛɛ vɛ san tan ni fila kɛ jelibɔ jangalo y'a la.
[26] A tɛɛ vɛ tɔlɔya kosɛvɛ danaliba siyama bolo. Ai tɛɛ vɛ a bolofen bɛ dɔn, kɛɛ aa jangalo ma fisaya fɔ ka kɛwonya.
[27] Moso wo ka Isa ya ko mɛn mingɛ, a ka don jama tɛma k'i madon a la a kɔfɛ ka a bolo tuu aa faaniba la.
[28] A tɛɛ a fɔla a jɛlɛ ma, a vɛɛ: «Ni ǹ ka m̀ bolo tuu aa faaniba la dein, ǹ'i kɛnɛyale.»
[29] A ka wo kɛ mingɛ, aa jelibɔ k'i lɔ telemanin. A do k'a lɔn k'a fɔ aa jangalo vɛ ban.
[30] Isa do k'a lɔn a jɛlɛ ma telemanin k'a fɔ ko fanga dɔ vɛ bɔ a lɔ. Wo lɔ, a k'i kɔdon jama tɛma k'a fɔ, a vɛɛ: «Jene n'a bolo tuula ǹ na?»
[31] Aa kɔbiladennu vɛɛ a yɛ: «I ma mɔɔ siyama ye, minnu y'i lɔgbalinna ai tɛma? I yi se a fɔla di wo lɔ ko jene n'a bolo tuula ǹ na?»
[32] Ado Isa k'i ɲa kaa a laminin nɔ, sa a yi mɔɔ ye min na wo kɛla.
[33] Moso wo tɛɛ jaajaala siyan boloma, baa a tɛɛ k'a lɔn min kɛnin a la. Wo lɔ, a v'i bilinna Isa kɛɛna ka tuɲa bɛ fɔ a yɛ.
[34] Isa do vɛɛ a yɛ: «Ǹ denmoso, iya limandeya v'i lakisi. Taa hɛlɛ lɔ. I vɛ kɛnɛya ka bɔ iya jangalo lɔ.»
[35] Ka Isa to wo fɔla, keladen dɔlu ka na ka bɔ ɲamɔɔ wo fɛlɔ k'a fɔ a yɛ, ai vɛɛ: «I denmoso vɛ sa. I kà kalanmɔɔ ɲagba butu.»
[36] Isa ka kuma wo mɛn mingɛ, a vɛɛ ɲamɔɔ yɛ: «I jei kà tɛɛ. I yi limandeya m̀ ma dein.»
[37] Isa ma diɲa mɔɔ yi taa a malɔ fɔ Piɛl ni Janguba ni a dɔɔni Yaya.
[38] Ai senin Aladalibon ɲamɔɔ ya bon na, ai k'a mɔɔlu talan saya gbanɔla ani mangan ba.
[39] Isa donnin, a vɛɛ je mɔɔlu yɛ: «Mindɛ lɔ ài mangan yi bɔla ka saya gbanɔ kɛ? Denni ma sa, a yi sunɔɔ le lɔ.»
[40] Ai do ka jɛlɛbɔ a lɔ. Kɛɛ a k'ai bɛ labɔ lu ma. Wo kɔ, a ka den fa ni a ba ta ani a dafɛ kɔbiladennu, ka don sibon na, den su lanin tɛɛ tɛɛ min ja.
[41] Isa ka den mina a bolo ma k'a fɔ a yɛ ai balakan nɔ, a vɛɛ: «Talita kumi.» Wo kɔlɔ le ko: «Singbilini, ǹ a fɔ i yɛ, i wuli.»
[42] Singbilini k'i wuli telemanin ka a kɛ taamataama le. Ai bɛ ka kawakoya kosɛvɛ wo lɔ. Singbilini sɔlɔn tɛɛ vɛ san tan ni fila bɔ.
[43] Isa k'a fɔ ai yɛ k'a magbeleya ko ai kà ko wo fɔ mɔɔ suu suu yɛ. A do vɛɛ ko ai yi dɔnnifen di singbilini ma.