[1] Isa vɛɛ ai yɛ kɔtunun: «Ǹ'i tuɲa fɔ ài yɛ, a dɔlu y'ài tɛma jan, minnu tɛnala sala fɔɔ ai vɛ Ala ya masaya lankɛnɛmayatɔ yena fanga la.»
[2] Tele wɔɔlɔ timinnin kɔ, Isa ka Piɛl ni Janguba ni Yaya kili ka taa ai le tini jaan dɔ kɔkan ai jɛlɛ ma. K'ai to je, Isa kɛɲa ka jɛlɛma ai ɲana.
[3] Aa faanilu ka gbɛ pepe fɔɔ ka mɛnɛnmɛnɛn gbesekele. A kɛnin tɛɛ teme, faanikoba foi tɛ duukolo kan min yi se faani kola k'a gbɛ ten.
[4] Wo kɛ, kela Iliya ni kela Musa ka bɔ gbɛ lɔ kɔbiladen sawa wolu ɲakɔlɔ. Wolu ni Isa tɛɛ kumala i ɲɔɔn fɛ.
[5] Piɛl k'a fɔ Isa yɛ, a vɛɛ: «Kalanmɔɔ, mɔ kɛ jan, wo bɛnnin ne. I yi lɔ m'i gbaa sawa lɔ: i ta kelen, kela Musa ta kelen, ani kela Iliya ta kelen.»
[6] A tɛɛ m'a lɔn a tɛɛ min fɔla, k'a masɔlɔn ai mɔɔ sawa tɛɛ siyanna bubale.
[7] Wo kɛ, biliya ka na bilin ai kunna. Kumakan dɔ vɛ bɔla biliya lɔ, a vɛɛ: «Ǹ diyanan Den ne ne. Ài y'ài tolo malɔ a la.»
[8] Ai do k'ai ɲa kaa ai laminin nɔ telemanin, kɛɛ ai ma mɔɔ ye ai fɛ je fɔ Isa kelenpesa.
[9] Ai jiitɔla tini la, a v'ai jamalila, a vɛɛ: «Ài na min yena, ài kà wo fɔ mɔɔ suu suu yɛ bene, fɔɔ ǹe Mɔɔnivin Tanin vɛ m̀ wulila ka bɔ saya lɔ.»
[10] Kɔbiladennu ka kuma wo labato, kɛɛ ai k'a kɛ i ɲɔɔn maɲininga le, ai vɛɛ: «A tɛɛ a fɔla ko: ‹K'i wuli ka bɔ saya lɔ›, wo kɔlɔ yi mindɛ le?»
[11] Wo kɔ, ai ka Isa maɲininga, ai vɛɛ: «Mindɛ lɔ seliya kalanmɔɔlu y'a fɔla ko kela Iliya le ka kan ka na kunfɔlɔ le?»
[12] Isa k'ai javi, a vɛɛ: «Tuɲa le, kela Iliya ka kan ka na kunfɔlɔ le ka ko bɛ lɔbɛn. Kɛɛ mindɛ lɔ a sɛvɛnin kitabu kɔnɔ ko Mɔɔnivin Tanin ka kan ka tɔlɔya bubale, ko mɔɔlu kɛtɔ ai banna a lɔ?
[13] Ǹ a fɔ ài yɛ, ǹ ko kela Iliya vɛ ban nala. Kɛɛ mɔɔlu k'ai sawonan ko bɛ kɛ a la iwo a sɛvɛnin teme aa ko lɔ kitabu kɔnɔ.»
[14] Ai ka se kɔbiladen tɔlu ma mingɛ, ai ka jama ba ye ai laminin lɔ. Wolu ni seliya kalanmɔɔ dɔlu tɛɛ i ɲɔɔn sɔsɔla.
[15] Jama ka Isa ye mingɛ, ai ka kawakoya kosɛvɛ. Ai vɛ bɔlila ka taa a foya lɔ.
[16] Isa ka aa kɔbiladennu maɲininga, a vɛɛ: «Ài ni wolu y'i ɲɔɔn sɔsɔla mindɛ ma?»
[17] Kɛ́ dɔ lɔnin ka to jama tɛma ka Isa javi, a vɛɛ: «Kalanmɔɔ, ǹ nanin ǹ denkɛ le i fɛ. Baa jina le y'a kɔ, min v'a kɛ bobo le.
[18] A vɛ a minala tɛɛ tɛɛ lɔ, a a labenna duu ma. Den dakaavu yi bɔla, a do a ɲin siila i ɲɔɔn na. A fali yi jala a kan. Ǹ na iya kɔbiladennu madiyala fɔsa ai yi jina wo gbɛn, ai do ma se.»
[19] Isa vɛɛ ai yɛ: «Bi mɔɔlu filinin ani limandeyabali le ai le. Ǹ'i to ài tɛma ka àiya ko mina m̀ ma haan fɔɔ waate mindɛ? Na denni le ǹ fɛ jan.»
[20] Wo lɔ, ai ka na denni le. Jina ka Isa ye mingɛ, a vɛ denni lajaajaala fanga la telemanin. Denni k'i ben duu ma k'i kulukulu k'a dakaavu bɔ.
[21] Wo kɛnin, Isa ka denni fa maɲininga, a vɛɛ: «A yi kɛla ten k'a ta waate mindɛ ma?» Kɛ́ do vɛɛ: «K'a ta a denmɛsɛnniya waate ma.
[22] Jina v'a mina siɲa siyama le k'a laben taa la ni wo tɛ kɔɔ lɔ, fɔsa a a faa. Ni a se y'i yɛ ka ko dɔ kɛ, i hina mɔ la ka mɔ madɛmɛn.»
[23] Isa vɛɛ a yɛ: «Mindɛ kɛnin i n'a fɔla, i vɛɛ: ‹Ni a se y'i yɛ ka ko dɔ kɛ?› Mɔɔ min vɛ limandeyala m̀ ma, ko bɛ yi sene kɛla wo tii yɛ.»
[24] Denni fa ka gbanɔ telemanin, a vɛɛ: «M̀'ɛ limandeya! Kɛɛ ǹa limandeya le dɔɔyanin. Fɔ i yi m̀ madɛmɛn k'a dɔ kafon ǹa limandeya kan.»
[25] Isa ka jama bɔlitɔ ye ka na mingɛ, a ka jina jamali, a vɛɛ: «Ile jina, min yi mɔɔ kɛla bobo ni tologbɛlɛn ne, ǹ a fɔ i yɛ, ǹ ko i bɔ denni min kɔ. I do kà na a kɔ butu.»
[26] Jina wo vɛ gbanɔla ka denni lajaajaa fanga la ka ban ka bɔ a kɔ. Denni kɛnin tɛɛ iwo fuleni. Wo lɔ, mɔɔ siyama vɛɛ: «A vɛ sa.»
[27] Kɛɛ Isa ka a mina a bolo ma ka a lawuli, ado denni k'i wuli k'i lɔ.
[28] Isa ka don bon na mingɛ, aa kɔbiladennu ka a maɲininga doon nɔ, ai vɛɛ: «Mindɛ kɛnin ǹu ma se jina wo gbɛnna?»
[29] Isa k'ai javi, a vɛɛ: «Jina min suu kɔni, foi tɛ se a gbɛnna ni Ala madali tɛ.»
[30] Isa nu vɛ bɔla je ka Galile koovi lɔtimin. A tɛɛ tɛ a fɛ mɔɔ y'a lɔn a yi tɛɛ min ja,
[31] k'a masɔlɔn a tɛɛ aa kɔbiladennu le kalanna, a vɛɛ ai yɛ: «Ai kɛtɔ ǹe Mɔɔnivin Tanin donna mɔɔlu bolo. Ai do kɛtɔ ǹ faala. Kɛɛ tele fila a sawana, m̀ wulitɔ ka bɔ saya lɔ.»
[32] Ai do ma aa kuma ɲaye, kɛɛ ai tɛɛ siyanna k'a maɲininga wo kɔlɔ ma.
[33] Wo kɔ, Isa nu ka se Kapɛlɛnam. K'ai to bon na, a k'ai maɲininga, a vɛɛ: «Ài tɛɛ kumala mindɛ le ma siya la?»
[34] Ai do ka jeden, k'a masɔlɔn ai tɛɛ i ɲɔɔn sɔsɔla siya la ko jene yi ɲamɔɔ le ai tɛma.
[35] Wo lɔ, Isa k'i sii k'ai mɔɔ tan ni fila kili, a vɛɛ ai yɛ: «Ni mɔɔ min y'a fɛ ka kɛ ai bɛ lɔ ɲamɔɔ le, fɔ wo tii yi kɛ ai bɛ lɔ kɔmɔɔ le le ani ai bɛ ya bɔliden.»
[36] Wo fɔ, a ka denni dɔ ta ka wo lalɔ ai tɛma, k'a bolo mɔlɔmɔlɔ a ma. A do k'a fɔ ai yɛ, a vɛɛ:
[37] «Ni mɔɔ min vɛ denni minnu ɲɔɔzii minala kobɛn ka bɛn ǹa ko ma, wo tii vɛ ǹe gbu mina kobɛn. Ni do mɔɔ min vɛ m̀ minala kobɛn, wo tii ma dan ǹe kelen ya minali la dein, fɔ ǹ kelaba.»
[38] Yaya k'a fɔ Isa yɛ, a vɛɛ: «Kalanmɔɔ, mɔ na kɛ́ dɔ yena, a tɛɛ jinalu gbɛnna ka bɔ mɔɔlu kɔ i tɔɔ lɔ. Mɔ vɛɛ a yɛ a yi wo boloka, baa a tɛ mɔ dɔ le.»
[39] Isa vɛɛ ai yɛ: «Ài kà a dansii wo la. K'a masɔlɔn mɔɔ suu suu tɛ se kawanako kɛla ǹ tɔɔ lɔ, ka ban ka Alalɔnbaliyakan fɔ m̀ ma.
[40] Mɔɔ min tɛ mɔ juu le, mɔ dɔ le wo tii le.
[41] Ǹ'i tuɲa fɔ ài yɛ, mɔɔ min vɛ ài sɔla jiyafɛ ɲa kelen na minji lɔ k'a masɔlɔn ài yi Masa Tɔɔmasenin ta le le, wo tii kɛtɔ wo balayi sɔlɔnna feu.
[42] Ni mɔɔ dɔ ka denni minnu dɔ kelen nafili, minnu limandeyanin m̀ ma, a fisayanin ne ai yi kawa ba sili wo tii kanna k'a lafili kɔɔ duun ba lɔ.
[43] Ni i bolo v'i lafilila, i y'a tɛɛ a la ka a lafili. K'a masɔlɔn ni i bolokelentɔ ka don nimaya banbali lɔ, wo le fisayanin i ma jani i bolofilatɔ la yi fili Jahanama, taa banbali yi tɛɛ min ja.
[45] Ni i sen v'i lafilila, i y'a tɛɛ a la ka a lafili. K'a masɔlɔn ni i senkelentɔ ka don nimaya banbali lɔ, wo le fisayanin i ma jani i senfilatɔ la yi fili Jahanama.
[47] Ni i ɲaden kelen v'i lafilila, i y'a bɔ a lɔ ka a lafili, k'a masɔlɔn ni i ɲakelentɔ ka don Ala ya masaya kɔlɔ, wo le fisayanin i ma jani i ɲafilatɔ la yi fili Jahanama.
[48] Tumu minnu yi mɔɔ soo dɔnna, wolu tɛ faala tɛɛ min ja. Ado taa la tɛ se sala tuun.
[49] Taa kɛtɔle mɔɔ bɛ kan k'ai sɛnɛya iwo kɔɔ yi kɛla soo la teme.
[50] Kɔɔ yi fen kein ne le. Kɛɛ ni kɔɔ timiya vɛ bɔla a la, a yi se timiyala di kɔtunun? Diyaɲɛ yi to ài wotɛ, iwo kɔɔ yi dɔnnifen diyala teme. Ado hɛlɛ yi kɛ ài wotɛ.»