[1] Wo lonnu lɔ, jama ba ka na ai ladɛn Isa dafɛ kɔtunun. A k'a ye mingɛ ko dɔnnifen tɛ ai bolo, a ka aa kɔbiladennu kili k'a fɔ ai yɛ, a vɛɛ:
[2] «Jama min hina yi ǹ na. Baa ai vɛ tele sawa le kɛ ǹ fɛ jan, ado balo suu suu tɛ ai bolo.
[3] Ǹ t'a fɛ ǹ ai kɔɔntɔ labila ten, sa ai kana taa kilon siya la. Baa a dɔlu bɔnin dingila majaan ne lɔ.»
[4] Ai do vɛɛ a yɛ: «M'i se bulu sɔlɔnna di dingila lɔkolon min nɔ, sa mɔɔ minnu yi dɔnni kɛ k'ai fa?»
[5] Wo lɔ, Isa k'ai maɲininga, a vɛɛ: «Bulukala jein y'ài bolo?» Ai vɛɛ: «Bulukala wolowulan.»
[6] Isa k'a fɔ jama yɛ ko ai y'ai sii duu ma. Wo kɛ, a ka bulukala wolowulan wo ta ka balika bɔ Ala yɛ, a vɛ a lɔkalikalila ka a di aa kɔbiladennu ma ko ai y'a lɔtala jama wotɛ. Ai do ka wo kɛ.
[7] Jɛɛni dɔlu gbazan tɛɛ ai bolo. Isa ka balika bɔ Ala yɛ wo ko lɔ k'a fɔ aa kɔbiladennu yɛ ko ai yi jɛɛni lɔtalatala jama wotɛ.
[8] Ai bɛ ka dɔnni kɛ k'ai fa kpe kpe. Ado bulu ni jɛɛ kulunkulunni tɔ min ka to, kɔbiladennu ka wo tɔmɔntɔmɔn ka gbɔlɔ wolowulan nafa.
[9] Ado mɔɔ waa naani ɲɔɔn tɛɛ je. Wo kɔ, Isa ka jama labila.
[10] A ni aa kɔbiladennu ka don kulun nɔ telemanin, ka taa Damanuta koovi lɔ.
[11] Falisi dɔlu ka na Isa ma, ai vɛ sɔsɔyali kɛla a lɔsuman ko lɔ. Ai vɛɛ ko a yi kawanako tɔɔmase dɔ kɛ ai ɲana, min bɔnin Ala fɛ.
[12] Wo lɔ, Isa ka nunakili bakɛ k'a fɔ, a vɛɛ: «Mindɛ lɔ bi mɔɔlu y'a fɛ ka kawanako tɔɔmase dɔ ye? Ǹ'i tuɲa fɔ ài yɛ, ǹ ko tɔɔmase foi tɛ jiya bi mɔɔlu la.»
[13] Wo fɔnin, Isa k'ai to je. Ale ni aa kɔbiladennu ka don kulun nɔ kɔtunun ka taa kɔɔ kɔma.
[14] Kɔbiladennu do ka ɲina, ai ma bulu ta fɔ bulukala kelen dein, min tɛɛ ai bolo kulun nɔ.
[15] Ado Isa vɛ ai lalila, a vɛɛ: «Ài jando ài jɛlɛ lɔ Falisilu ni masakɛ Helodi ya bululafununsɛɛ kanma.»
[16] Kɔbiladennu k'a kɛ a fɔle i ɲɔɔn yɛ, ai vɛɛ: «Bulu tɛ mɔ bolo jan. Wo le n'a kɛla, a na kuma wo fɔla.»
[17] Isa tɛɛ k'ai miliya lɔn. A vɛɛ ai yɛ wo lɔ: «Mindɛ lɔ ài y'a fɔla ko bulu tɛ ài bolo? Ài m'a ɲaye bene? Ài hangili datununnin?
[18] Ɲa y'ài ma, ài do tɛ yeni kɛla? Tolo y'ài ma, ài do tɛ mɛnni kɛla? Ài hangili ma to ko minnu lɔ?
[19] Ǹ na bulukala loolu tala ka kɛ́ waa loolu balo mingɛ, ài na gbɔlɔ jein nafala bulu kulunkulun tɔ la?» Ai k'a javi, ai vɛɛ: «Gbɔlɔ tan ni fila.»
[20] Isa vɛɛ: «Ǹ na bulukala wolowulan tala ka kɛ́ waa naani balo mingɛ, ài na gbɔlɔ jein nafala bulu kulunkulun tɔ la?» Ai vɛɛ: «Gbɔlɔ wolowulan.»
[21] A vɛɛ ai yɛ: «Ài ma wo ɲaye ba bene?»
[22] Wo kɔ, Isa ni aa kɔbiladennu ka se Betisaida so kɔnɔ. Mɔɔ dɔlu ka na ɲagbɛ kɛ́ dɔ le Isa fɛ ka a madiya ko a a bolo la a kan ka a lakɛnɛya.
[23] Wo lɔ, a ka ɲagbɛ mina a bolo ma ka taa a le so kɔɔkan. A do k'a daji kɛ a ɲa kan ka a bolo la a kan mingɛ, a vɛɛ a yɛ: «I yi fen yena?»
[24] Kɛ́ k'a ɲa lajɛlɛ k'a fɔ, a vɛɛ: «Ǹ'i mɔɔlu yena, kɛɛ ai kɛnin ne iwo kɔlɔmanju min yi taamana.»
[25] Isa k'a bolo bilin a ɲa kan kɔtunun. Kɛ́ do ɲa la ka ka. A tɛɛ yeni kɛla kobɛn.
[26] Wo lɔ, Isa ka kɛ́ lataa aa bon na ka a lali, a vɛɛ: «I kà seikɔ so wo la.»
[27] Lon dɔ, Isa ni aa kɔbiladennu ka siya mina ka taa Sezale Filipi laminin solu la. K'ai to siya kan, a k'ai maɲininga, a vɛɛ: «Mɔɔlu yi ǹ jatela jene le?»
[28] Ai k'a javi, ai vɛɛ: «A dɔlu y'a fɔla ko Makoliba Yaya le ile le. A dɔlu gbazan y'a fɔla ko kela Iliya le ile le. A dɔgbɛlɛlu y'a fɔla ko kela kɔlɔkɔlɔ dɔ le ile le.»
[29] A k'ai maɲininga, a vɛɛ: «Àilu do? Ài yi ǹ jatela jene le?» Piɛl vɛɛ: «Ile le Masa Tɔɔmasanin ne.»
[30] Isa do k'a fɔ ai yɛ k'a magbeleya ko ai kà wo fɔ mɔɔ suu suu yɛ.
[31] Wo kɔ, Isa vɛ aa kɔbiladennu kalanna, a vɛɛ: «Ǹe Mɔɔnivin Tanin ka kan ka tɔlɔya bubale; kɛmɔɔba ni salakalaseba kundii ni seliya kalanmɔɔlu kɛtɔ ai banna ǹ nɔ, ka m̀ mina ka ǹ faa. Kɛɛ tele fila a sawana, m̀ wulitɔ.»
[32] A ka wo fɔ k'a lagbɛ. Wo lɔ, Piɛl k'i dɔɔni mataa a le, a vɛ a makumala.
[33] Kɛɛ Isa k'i kɔdon mingɛ ka aa kɔbiladennu ye, a ka Piɛl makuma, a vɛɛ: «Ile Soɛtana, bɔ ǹ kɔ! Baa i t'i milila Ala sawo ma, fɔ adamadennu sawo.»
[34] A do ka jama ni aa kɔbiladennu kili k'a fɔ ai yɛ, a vɛɛ: «Ni mɔɔ min a fɛ ka bila ǹ kɔ, fɔ wo tii y'i ban a jɛlɛ lɔ ka a gbaankɔlɔman mina ka bila ǹ kɔ.
[35] Baa ni mɔɔ min a fɛ ka a nin nakisi, wo tii bɔnɔtɔ nimaya la. Ni do mɔɔ min vɛ bɔnɔla a nin na ka bɛn ǹe ni Samakan Kein ma, wo tii kɛtɔ a nin nakisila.
[36] A yi di? Ni mɔɔ ka dunuɲa bɛ sɔlɔn ka bɔnɔ a nin na, tɔnɔ mindɛ yi wo la?
[37] Mɔɔ yi se mindɛ dila ka a nin kunmaka?
[38] Wo le kɛtɔ a kɛla, ni mɔɔ min vɛ maayala ǹe ni ǹa kumalu ma bi telenbali ni Alalɔnbalilu ɲana, wo vɛ kɛla, ǹe Mɔɔnivin Tanin maayatɔ wo tii ma, m̀'ɛ nala lon min na ǹ Fa aa magbiliya lɔ, lɔhɔlɔma mɛlɛkalu vɛ ǹ fɛ.