[1] Ka Isa bɔtɔ to lɔhɔlɔmabonba la, aa kɔbiladen dɔ vɛɛ a yɛ: «Kalanmɔɔ, a lasaa! Lɔhɔlɔmabonba lɔnin kawakulun makawanin minnu la! A bonnu keinyanin bubale!»
[2] Isa k'a javi, a vɛɛ: «I vɛ bon makawani minnu ye? Lon dɔ, wo bɛ tetetɔle tɛtɛ, hali kawakulun fila tɛnala tola i ɲɔɔn ma.»
[3] Ka Isa siinin to Zeituna tini kɔkan, lɔhɔlɔmabonba ɲatelenma, Piɛl ni Janguba ni Yaya ni Andele ka na a maɲiningaya lɔ doon nɔ,
[4] ai vɛɛ: «I kain tɛɛ ko minnu ma, wolu kɛtɔ waate mindɛ? Tɔɔmase suu mindɛ kɛtɔ a jiyala ko waate wo vɛ se?»
[5] Isa vɛɛ ai yɛ: «Ài yi jando ài jɛlɛ lɔ sa mɔɔ mɔɔ kana ài lafili.
[6] K'a masɔlɔn mɔɔ siyama natɔ ǹ tɔɔ lɔ k'a fɔ ko: ‹Ǹe le Masa Tɔɔmasenin ne.› Ai kɛtɔ mɔɔ siyama lafilila wo lɔ.
[7] Ài vɛ kɛlɛ kolu mɛnna ani kɛlɛlu mangan, ài joso kà bɔ k'a masɔlɔn ko wolu ka kan ka kɛ, kɛɛ dunuɲa laban tɛnala kɛla wo le bene.
[8] Sibolomalu wulitɔ i ɲɔɔn kanma. Jamanalu gbazan wulitɔ i ɲɔɔn kanma. Kɔɔn fitina ni duukolo jaajaa kɛtɔ dingila suu bɛ lɔ. Ko wo bɛ yi tɔlɔya damina le le, iwo tinkɔnɔdimin yi kɔnɔma minala teme kunfɔlɔ le.
[9] «Ài y'ài jando ài jɛlɛ lɔ. Mɔɔlu kɛtɔ ài minala ka taa ài le kititɛɛya lɔ. Ai kɛtɔ ài gbasila gbusan na Aladalibonnu la ani k'ài lalɔ jamanatii ni masakɛlu ɲakɔlɔ ka bɛn ǹa ko ma. Àilu gbu le kɛtɔ ǹe masele le wo lɔ, ka ǹa ko fɔ wolu yɛ.
[10] Wo ɲa le, Samakan Kein na yi se siboloma bɛ ma kunfɔlɔ le.
[11] Ai vɛ ài minala ka taa ài le kititɛɛya lɔ, ài ka kan ka min fɔ, ài kà hamin wo la. Ala vɛ kuma min donna ài da wo waate kelen nɔ, ài yi wo le fɔ, baa ài jɛlɛ tɛnala kumala, mafɔ Lɔhɔlɔma Fɔɲɛ.
[12] Mɔɔ kɛtɔ a badenma donna mɔɔlu bolo sa ai y'a faa. Fa gbazan kɛtɔ wo suu kɛla a den na. Dennu mulututɔ ai sɔlɔnbalu ma k'ai don mɔɔlu bolo sa ai y'ai faa.
[13] Ài gbeyatɔ mɔɔ bɛ yɛ ka bɛn ǹa ko ma. Kɛɛ do mɔɔ minnu vɛ tɔlɔya wolu minala ai ma k'a sii a ban na, wolu le kisitɔ.
[14] Ài tolo malɔ k'i lɔja ka ko min ɲaye. Fen daannin min yi lɔhɔlɔmabonba nɔɔla, ni ài ka wo siinin ye dingila dɔ lɔ, a man kan ka kɛ tɛɛ min ja, wo vɛ kɛla mɔɔ minnu yi Jude koovi lɔ, wolu yi bɔli ka taa tinilu kɔkan.
[15] Ni waate wo ka mɔɔ min talan bon kɔkan, wo tii kà jii bon kɔnɔ k'a fɔ a a bolofennu tala.
[16] Wo vɛ mɔɔ min talanna sɛnɛ lɔ, wo tii kà seikɔ aa bon na k'a fɔ a aa faaniba tala.
[17] Wo lonnu vɛ sena, gbalo kɛtɔ kɔnɔma ni denbatiikulalu yɛ.
[18] Ài yi Ala dali sa ko wolu kana kɛ nɛnɛbɔ waate lɔ.
[19] K'a masɔlɔn wo lonnu tɔlɔya suu ma kɛ ba bene k'a damina dunuɲa dan waate ma fɔɔ ka na a sii bi la. Wo do suu tɛnala kɛla butu tuun.
[20] Ni Mɔtii tɛɛ ma wo tɔlɔya waate lɔsulunya, mɔɔ foi tɛɛ tɛnala kisila. Kɛɛ a vɛ a latɛɛ ka dɔ bɔ a la ka bɛn aa mɔɔ tanilu ma.
[21] Wo waate, ni mɔɔ dɔ k'a fɔ ài yɛ, a vɛɛ: ‹A ye, Masa Tɔɔmasenin yi jan ne›, ni wo tɛ ‹A yi jan ve›, ài kà la a la tuun.
[22] K'a masɔlɔn faɲafɔkelalasebalu wulitɔ ani minnu y'a fɔla ko ailu le Masa Tɔɔmasenin ne. Ai kɛtɔ tɔɔmase ba ani kawanakolu kɛla ka Ala ya mɔɔ taninnu lafili, ini wo yi sene kɛla.
[23] Ài yi jando ài jɛlɛ lɔ. M̀'ɛ wo bɛ fɔ ài yɛ jani ai yi kɛ.
[24] Wo waate tɔlɔya vɛ timinna, tele fintɔ telemanin. Kalo tɛnala mɛnɛnna butu.
[25] Lolonilu benbentɔ ka bɔ sangbolo lɔ. Ado sangbolokɔnɔfangatiilu lamaamaatɔ.
[26] Wo kɔ, ai kɛtɔ ǹe Mɔɔnivin Tanin natɔ yena biliya lɔ setiiya la, ani nɔɔlɔ ba.
[27] Ani ǹ kɛtɔ ǹa mɛlɛkalu kelayala dunuɲa tongun naani bɛ la. K'a bɔ dunuɲa kun dɔ la fɔɔ ka taa se a kun dɔ la, ǹa mɛlɛkalu kɛtɔ ǹa mɔɔ tanilu ladɛnna.»
[28] Ài yi hangili sɔlɔn ka bɔ toloju ya sana ma. Ài vɛ a bolo kula ni a bulu nɛlɛnnu yena, ài y'a lɔn k'a fɔ telema bɔtɔle.
[29] Wo ɲa kelen ma, ni ài ka ko wo bɛ ye kɛla, ài y'a lɔn k'a fɔ ko waate vɛ sulunya, a do vɛ to dɔɔnin a yi se.
[30] Ǹ'i tuɲa fɔ ài yɛ, bi mɔɔlu bɛ tɛnala banna faala, fɔɔ min ko bɛ yi kɛ ka dafa.
[31] Lon dɔ, sangbolo ni duukolo bantɔle. Kɛɛ ǹa kumakannu tɛnala banna tuun!
[32] Ko wolu kɛtɔ lon min na ani waate min nɔ, mɔɔ suu suu ma wo lɔn. Mɛlɛka minnu yi haijɛnɛ, wolu gbazan m'a lɔn. Hali ǹe Ala Den m'a lɔn, fɔ ǹ Fa Ala kelenpesa.
[33] Ài yi to ài ɲana, k'a masɔlɔn ài ma ko wolu kɛ waate lɔn.
[34] A kɛnin ne iwo kɛ́ min tɛɛ taala taaman na. A ka aa bonnakoɲa bɛ kalifa aa bɔlidennu la, a bɛ ni aa ta baale. A k'a fɔ bonnadalasiiba yɛ ko a yi to a ɲana, a kà sunɔɔ.
[35] Wo ɲa kelen ma, àilu gbazan yi to ài ɲana, baa ài m'a lɔn bontii natɔ waate suu suu. A yi na wula le la o, sutala o, donon kumun waate o, ni wo tɛ sɔɔma dala o, ài ma wo lɔn.
[36] Wo lɔ, ài kà a to a yi na bala ài lɔ, ài do vɛ sunɔɔ lɔ.
[37] Ǹ'i min fɔla ài yɛ yi ne, ǹ'i wo le fɔla bɛ yɛ, ǹ ko ài yi to ài ɲana.»