[1] Isa nu ka bɔ je ka Jude koovi lɔtimin ka se Jɔdan kɔɔ kɔma. Mɔɔ siyama k'ai ladɛn a laminin nɔ kɔtunun. A vɛ ai kalanna iwo a deinnin tɛɛ a kɛla teme.
[2] K'a to wo la, Falisi dɔlu ka na a maɲininga a lɔsuman ko lɔ, ai vɛɛ: «A ladaannin ne kɛ́ y'a moso bila?»
[3] Isa k'ai javi, a vɛɛ: «Kela Musa na jamali mindɛ dila ài ma?»
[4] Ai vɛɛ a yɛ: «Kela Musa na diɲala le kɛ́ yi fulusa sɛvɛ ladan ka a moso bila.»
[5] Isa k'ai javi, a vɛɛ: «Kela Musa na jamali wo sɛvɛla ài yɛ, ka bɛn àiya kunnɔgbeleya le ma.
[6] Ni wo tɛ dunuɲa dan waate, Danniba na kɛ́ ni moso le danna.
[7] Ala vɛɛ: ‹Wo le y'a kɛla kɛ́ yi bɔla a fa ni a ba fɛ ka a ni a moso dɛn,
[8] sa ai mɔɔ fila yi kɛ fali kelen ne.› Ai tɛ jatela mɔɔ fila le butu fɔ fali kelen.
[9] Wo lɔ, Ala na minnu ladɛnna k'ai kɛ kelen ne, mɔɔ suu suu kà wolu falan i ɲɔɔn ma.»
[10] Isa nu seikɔnin bon na, aa kɔbiladennu ka a maɲininga ko wo ma.
[11] Wo lɔ, a vɛɛ ai yɛ: «Ni mɔɔ min ka a moso bila ka moso gbɛlɛ fulu, wo tii vɛ jalɔnya kɛ. A do vɛ hakɛ ta a moso kunfɔlɔ la
[12] Wo ɲa kelen ma, ni moso min ka bɔ a kɛ́ kun ka taa i sii kɛ́ gbɛlɛ kun, moso wo vɛ jalɔnya kɛ.»
[13] Mɔɔ dɔlu vɛ nala dennilu le Isa fɛ, sa a a bolo la ai kan ka duwawu kɛ ai yɛ. Kɛɛ kɔbiladennu ka mɔɔ wolu makuma.
[14] Isa ka wo ye mingɛ, a joso la ka kuna. A do k'a fɔ ai yɛ, a vɛɛ: «Ài y'a to dennilu yi na m̀ ma. Ài kà ai dansii, k'a masɔlɔn mɔɔ minnu kɛnin ne iwo denni, wolu le yi Ala ya masaya kɔlɔ.»
[15] Ǹ'i tuɲa fɔ ài yɛ, ni mɔɔ min ma a fanmajii Ala ya masaya kɔlɔ iwo denni, wo tii tɛnala donna aa masaya kɔlɔ tuun.»
[16] Wo kɔ, a ka dennilu ta, ka a bolo la ai kan ka duwawu kɛ ai yɛ.
[17] Isa ka siya mina mingɛ, kɛ́ dɔ bɔlimantɔ ka na a bilin a kumɛlɛni la a kɔlɔ. A do vɛɛ a yɛ: «Kalanmɔɔ ɲuma, ǹ ka kan ka mindɛ le kɛ sa ǹ'i nimaya banbali sɔlɔn?»
[18] Isa k'a javi, a vɛɛ: «Mindɛ kɛnin i n'a fɔla m̀ ma ko ‹kalanmɔɔ ɲuma›? Mɔɔ suu suu ɲumayanin tɛ fɔ Ala kelenpesa.
[19] I ka Ala ya seliyalu lɔn ko: ‹I kà mɔɔ faa, i kà jalɔnya kɛ, i kà suɲali kɛ, i kà kɛ faɲafɔsele le, i kà tɔɲɛli kɛ, ani i i fa ni i ba buɲa.›»
[20] Kɛ́ do vɛɛ a yɛ: «Kalanmɔɔ, m̀'ɛ seliya wo bɛ labato k'a ta ǹ denniya waate ma.»
[21] Isa k'i ɲa kaa a lɔ diyaɲɛ boloma k'a fɔ a yɛ, a vɛɛ: «I dɛsɛyanin ko kelen na bene. Taa i bolofen bɛ fele k'a wɔli lɔtala bolokolonnu wotɛ. Wo vɛ kɛla, nafolo ba kɛtɔ i bolo haijɛnɛ. Wo kɔ, na i yi bila ǹ kɔ.»
[22] Kɛ́ do ka kuma wo mɛn, a k'a ɲakɔlɔ sili ka taa ninnafin boloma, k'a masɔlɔn nafolobatii le tɛɛ.
[23] Wo kɛnin, Isa k'i kɔdon k'a fɔ aa kɔbiladennu yɛ, a vɛɛ: «A gbeleyanin ne k'a fɔ nafolotii yi don Ala ya masaya kɔlɔ!»
[24] Kuma wo ka kɔbiladennu kawakoya, kɛɛ Isa vɛɛ ai yɛ kɔtunun: «Dennilu, a gbeleyanin ne k'a fɔ mɔɔ yi don Ala ya masaya kɔlɔ!
[25] Ɲɔɔmɛ don sɛɛlan woo la, wo nɔɔyanin ne danin nafolotii yi don Ala ya masaya kɔlɔ.»
[26] Ai do ka kawakoya k'a dan natimin ka kɛ a fɔle i ɲɔɔn yɛ, ai vɛɛ: «Jene yi se kisila wo lɔ?»
[27] Wo lɔ, Isa k'a ɲa kaa ai lɔ k'a fɔ ai yɛ, a vɛɛ: «Mɔɔ tɛ se wo kɛla, kɛɛ do Ala yi sene ko bɛ kɛla.»
[28] Wo kɛ, Piɛl vɛɛ Isa yɛ: «Ǹu do? Mɔ vɛ fen bɛ to je ka bila i kɔ.»
[29] Isa k'a fɔ, a vɛɛ: «Ǹ'i tuɲa fɔ ài yɛ, ni mɔɔ min ka aa bon to a kɔ, ni wo tɛ a badenmalu, ni wo tɛ a ba, ni wo tɛ a fa, ni wo tɛ a dennu, ni wo tɛ aa sɛnɛlu, ka bɛn ǹa ko ma ani Samakan Kein ya ko, wo vɛ kɛla,
[30] wo tii kɛtɔ wolu ɲɔɔn kɛmɛ sɔlɔnna dunuɲa min nɔ jan. Bonnu le o, badenmalu le o, balu le o, dennu le o, ani sɛnɛlu, a kɛtɔ wo bɛ le sɔlɔnna. A do tɔlɔyatɔ mɔɔlu bolo. Kiyamalon, wo tii kɛtɔ nimaya banbali sɔlɔnna.
[31] Kɛɛ ɲamɔɔ siyama kɛtɔ kɔmɔɔ le le. Kɔmɔɔ siyama kɛtɔ ɲamɔɔ le gbazan.»
[32] K'ai taamantɔ to Jelusalɛm, Isa tɛɛ mɔɔlu ɲa siya la. Aa keladennu ka kawakoya. Ado mɔɔ minnu bilanin tɛɛ ai kɔ, wolu tɛɛ siyanna. Isa ka aa keladen mɔɔ tan ni fila ta ka taa ai le ai jɛlɛ ma. Ko minnu kɛtɔ a sɔlɔnna, a vɛ wo bɛ fɔla ai yɛ, a vɛɛ:
[33] «Mɔ taatɔle Jelusalɛm. Ai kɛtɔ ǹe Mɔɔnivin Tanin donna salakalaseba kundii ni seliya kalanmɔɔlu bolo. Wolu kɛtɔ kiti bilala ǹ na ka ǹ don siboloma gbɛlɛ mɔɔlu bolo sa ai yi ǹ faa.
[34] Ai kɛtɔ ǹ nafɛyala, k'ai daji bɔn ǹ kan, ka m̀ gbasi gbusan na, ka ban ka ǹ faa. Kɛɛ tele fila a sawana, m̀ wulitɔ.»
[35] Wo kɔ, Zebede denkɛ fila minnu tɛɛ Janguba ni Yaya le, wolu k'ai madon Isa la k'a fɔ a yɛ, ai vɛɛ: «Kalanmɔɔ, mɔ v'i maɲiningala min na, m'a fɛ i yi wo le kɛ mɔ yɛ.»
[36] Isa vɛɛ ai yɛ: «Ài y'a fɛ ǹ'i mindɛ kɛ ài yɛ?
[37] Ai k'a javi, ai vɛɛ: «I vɛ kɛla masakɛ magbiliyanin ne lon min na, i yi diɲa ǹu mɔɔ kelen y'i sii i bolokinin fɛ, dɔ y'i sii i bolonunma fɛ.»
[38] Kɛɛ Isa k'ai javi, a vɛɛ: «Ài yi m̀ maɲiningala min na, ài ma wo lɔn. Tɔlɔya min kɛtɔ ǹ sɔlɔnna, ài yi sene wo kɔlɔ?»
[39] Ai k'a javi, ai vɛɛ: «Aan, m'i sene.» Isa vɛɛ ai yɛ: «Ǹ kɛtɔ tɔlɔya min sɔlɔnna, àilu gbazan kɛtɔ wo suu le sɔlɔnna.
[40] Kɛɛ siiya minnu yi m̀ bolokinin ni m̀ bolonunma fɛ, wolu diba tɛ ǹe le. Ala na siiya wolu ladanna mɔɔ minnu yɛ, a kɛtɔ ai dila wolu le ma.»
[41] Keladen tɔ tan ka kuma wo mɛn mingɛ, wolu joso la ka kuna Janguba ni Yaya kanma.
[42] Wo kɛnin, Isa k'ai kili k'a fɔ ai yɛ, a vɛɛ: «Ài k'a lɔn minnu yi jatela siboloma gbɛlɛ masakɛlu le, wolu yi kundiiya kɛla aiya jamanadennu kunna diyanigbeya le la. Aiya mɔɔbalu yi fanga le lala ai kan.
[43] Kɛɛ do a man kan ka kɛ ten ài tɛma. Min a fɛ ka kɛ mɔɔba le ài lɔ, fɔ wo tii yi kɛ àiya bɔliden ne le.
[44] Min do a fɛ ka kɛ ɲamɔɔ le ài lɔ, fɔ wo tii yi kɛ ài bɛ ya jɔn ne le.
[45] Hali ǹe Mɔɔnivin Tanin ma na sa mɔɔlu yi kɛ ǹa bɔliden ne, fɔ ǹe yi kɛ aiya bɔliden ne le, ani ka ǹ nin di ka kɛ mɔɔ siyama kunmaka sala le.»
[46] Wo kɔ, Isa nu ka se Jɛliko so kɔnɔ. Ai ni jama ba bɔtɔla so kɔnɔ, ɲagbɛ kɛ́ dɔ siinin tɛɛ siya dala je dailila. Ai tɛɛ a fɔla min ma ko Baatimiyɔ. A fa tɔɔ yi ko Timiyɔ.
[47] A k'a mɛn mingɛ ko Isa Nazalɛtika le yi timinna, a do vɛ gbanɔla, a vɛɛ: «Isa, Dawuda Bɔzɔn, hina ǹ na.»
[48] Mɔɔ siyama vɛ a makumala ko a yi jeden. Kɛɛ a ka to gbanɔla ka timin kunfɔlɔ ta la, a vɛɛ: «Dawuda Bɔzɔn, hina ǹ na.»
[49] Wo lɔ, Isa k'i lɔ. A vɛɛ: «Ài y'a kili.» Ai do ka ɲagbɛ kili, ai vɛɛ: «I joso lagbeleya. I yi wuli. Isa y'i kilila.»
[50] Kɛ́ do vɛ aa faani lafilila duu ma k'i wuli ɲagba le ka taa Isa ma.
[51] Isa ka a maɲininga, a vɛɛ: «I y'a fɛ ǹ'i mindɛ kɛ i yɛ?» A do k'a javi, a vɛɛ: «Kalanmɔɔ, ǹ a fɛ ǹ ɲa la yi ka.»
[52] Isa vɛɛ a yɛ: «Taa vɛ. Ka bɛn iya limandeya ma, i vɛ kɛnɛya.» A ɲa la ka ka telemanin. A do vɛ bilala Isa kɔ siya la.