[1] A tɛɛ vɛ to tele fila la Timinkunna Selilon yi se, ani Bulufununbali Selilon. Salakalaseba kundii ni seliya kalanmɔɔlu tɛɛ Isa mina ko ɲa ɲininna janva lɔ, kosa ai y'a faa.
[2] Ai vɛɛ: «Mɔɔ kà a mina selilon, sa mɔɔlu kana ai wuli ka mulutu.»
[3] Wo waate, Isa ka se Betani ka taa don Simɔn ya bon na, mɔɔlu tɛɛ a fɔla min ma ko Kunantɔ. K'a siinin to dɔnnikɛya lɔ je, moso dɔ ka na a ma sani kawalama kein ne. A lafanin tɛɛ tulu sumadiyanin na min tɔɔ yi ko naladu, ado daa gbeleyanin ne tɛɛ bubale. A do ka sani lɔte ka tulu wo kɛ Isa kun nɔ.
[4] Wo kɛnin, je mɔɔ dɔlu joso ka bɔ. Ai k'a fɔ i ɲɔɔn yɛ, ai vɛɛ: «Mindɛ lɔ tulu sumadiyanin vɛ tiɲan tan?
[5] Tulu min tɛɛ sene felela ka wɔli di bolokolonnu ma. A tɛɛ baaleden san kelen sala ɲɔɔn bɔle!» Ai do tɛɛ moso makumala bubale.
[6] Kɛɛ Isa vɛɛ ai yɛ: «Ài yi moso to je! Mindɛ kɛnin ài y'a ɲagbala? A vɛ kokein ne kɛ ǹ yɛ.
[7] Bolokolonnu totɔ ài fɛ waate bɛ. Waate waate v'ài diyala, ài yi sene ai madɛmɛnna. Kɛɛ ǹe do tɛnala tola ài fɛ waate bɛ.
[8] Moso min na a senko le kɛla. A na tulu sumadiyanin ne kɛla ǹ fali kan ka ǹ nɔbɛn ǹ sudoon ko le lɔ, jani wo waate yi se.
[9] Ǹ'i tuɲa fɔ ài yɛ, Samakan Kein na vɛ sena mɔɔlu ma dunuɲa tɛɛ tɛɛ lɔ, moso na min kɛla, wo fɔtɔ je, kosa mɔɔlu hangili yi to ale gbazan lɔ.»
[10] Wo kɔ, Judasi Sakaliyɔti, min tɛɛ Isa ya keladen mɔɔ tan ni fila dɔ le, wo ka taa salakalaseba kundiilu fɛlɔ ko a yi sene Isa donna ai bolo.
[11] Ai ka kuma wo mɛn mingɛ, wo ka diya ai yɛ. Ai ka lahedi ta Judasi yɛ ko ai kɛtɔ wɔli dila a ma. K'a ta lon wo ma, a tɛɛ waate ɲininna ka Isa don ai bolo.
[12] Bulufununbali Selilon ka se. Wo lon, Jahudiyalu deinnin tɛɛ saaden ne kannatɛɛla ka Timinkunna Selilon salaka bɔ. Isa ya kɔbiladennu k'a maɲininga wo lɔ, ai vɛɛ: «I y'a fɛ m'i dɔnnifen lɔbɛn i yɛ min ne ja Timinkunna Selilon?»
[13] A do k'aa kɔbiladen fila kelaya k'a fɔ ai yɛ, a vɛɛ: «Ài yi taa so kɔnɔ. Ài kɛtɔ kɛ́ dɔ yena je, ji daa y'a kun. Ài yi bila a kɔ.
[14] A vɛ donna bon min na, ài y'a fɔ lutii wo yɛ, ài vɛɛ: ‹Kalanmɔɔ ya ko a jiyabon yi min, ale ni aa kɔbiladennu kɛtɔ Timinkunna Selilon dɔnni kɛla tɛɛ min ja?›
[15] Kɛ́ wo kɛtɔ bon ba dɔ jiyala ài la sangaso sanma, min lɔbɛnnin kobɛn. Mɔ mako yi fen minnu la, wo bɛ kɛtɔ je. Ài yi dɔnnifen lɔbɛn mɔ yɛ wo ja.»
[16] Ai ka bɔ je ka taa se so wo la mingɛ, ai k'a talan iwo Isa k'a fɔ ai yɛ teme. Ado ai ka Timinkunna Selilon dɔnnifen lɔbɛn je.
[17] Telejii waate, Isa ni aa keladen mɔɔ tan ni fila ka se je.
[18] K'ai siinin to dɔnnila, Isa vɛɛ ai yɛ: «Ǹ'i tuɲa fɔ ài yɛ, ài lɔ kelen kɛtɔ ǹ janvala. Wo tii yi dɔnnila ǹ fɛ jan.»
[19] Ai do ninna ka fin kuma wo lɔ. Ai bɛ vɛɛ a yɛ kelen kelen ne: «Ǹe le wo le?»
[20] Isa vɛɛ ai yɛ: «Wo tii y'ài mɔɔ tan ni fila dɔ le le. A bolo yi nɛɛ lɔ ǹ fɛ.
[21] Ado ǹe Mɔɔnivin Tanin faatɔ iwo a sɛvɛnin kitabu kɔnɔ ka bɛn m̀ ma teme. Kɛɛ mɔɔ min kɛtɔ ǹ janvala, gbalo yi wo tii yɛ. Hali ni wo tii sɔlɔnbali tɛɛ ka to, wo tɛɛ fisale a ma feu.»
[22] K'ai to dɔnnila, Isa ka bulu ta ka balika bɔ Ala yɛ. A vɛ bulu lɔkalikalila, k'a di aa kɔbiladennu ma k'a fɔ ai yɛ, a vɛɛ: «Ài yi min mina. Ǹ fali le ne.»
[23] Wo kɔ, a ka jiyafɛ ta, lɛzɛnji tɛɛ min nɔ. A ka balika bɔ Ala yɛ, ka ban ka jiyafɛ di ai ma. Ai bɛ k'a dɔ min a lɔ.
[24] A do vɛɛ ai yɛ: «Lɛzɛnji min yi salatikan tɔɔmase le le, Ala yi min tala mɔɔ siyama yɛ ǹ jeli bɔn ko le fɛ.
[25] Ǹ'i tuɲa fɔ ài yɛ, ǹ tɛnala lɛzɛnji minna butu feu, fɔɔ Ala vɛ aa masaya lankɛnɛmayala lon min na. Wo vɛ kɛla, ǹ kɛtɔ a kula le minna.»
[26] Wo kɛ, ai ka baiti bɔ Ala yɛ, ka ban ka taa Zeituna tini kɔkan.
[27] Ai senin je, Isa vɛɛ ai yɛ: «Ài bɛ bɔlitɔ ka ǹ kelen to su min nɔ, k'a masɔlɔn a sɛvɛnin kitabu kɔnɔ ko: ‹Ǹ kɛtɔ saakunnasiiba gbasila ka a faa. Wo vɛ kɛla, saa bɛ jɛnzɛntɔ.›
[28] Kɛɛ m̀'ɛ m̀ wulila ka bɔ saya lɔ, ǹ taatɔ ài ɲa Galile koovi lɔ.»
[29] Piɛl vɛɛ Isa yɛ: «Hali bɛ k'i bila, ǹ t'i bila tuun.»
[30] Isa do vɛɛ a yɛ: «Ǹ'i tuɲa fɔ i yɛ, bi su min nɔ, jani donon yi kumun, i kɛtɔ a fɔla haan siɲa sawa le ko i ma ǹ lɔn.»
[31] Kɛɛ Piɛl k'a fɔ k'a magbeleya kosɛvɛ, a vɛɛ: «Hali ai k'a fɔ ai yi ǹ faa ya ko lɔ, ǹ tɛnala a fɔla ko m̀ m'i lɔn feu.» Kɔbiladen tɔ bɛ ka kuma kelen wo fɔ.
[32] Wo kɛ, ai ka se dingila dɔ lɔ, min tɔɔ yi ko Gɛsɛmɛni. Isa vɛɛ aa kɔbiladennu yɛ: «Ài sii jan. Ǹ taatɔ Aladaliya lɔ.»
[33] A ka Piɛl ni Janguba ni Yaya kili ko ai yi taa a malɔ. Ai ka taa dɔɔnin, Isa ninna ka fin, a joso ka tɔlɔ kosɛvɛ.
[34] A vɛɛ ai yɛ: «Ǹ ninna vɛ fin kosɛvɛ fɔɔ k'a kɛ iwo ǹ faatɔle. Ài yi to jan, ka to ài ɲana.»
[35] Wo kɛ, a ka taa ɲafɛ dɔɔnin, k'i ten bilin duu ma. A vɛ Ala dalila ko ni a yi sene kɛla, tɔlɔya wo waate yi timin a kunna.
[36] A vɛɛ: «Ǹ Fa, i yi sene ko bɛ la. I y'a kɛ tɔlɔya min yi timin ǹ kunna. Kɛɛ ǹe gbu sawo kà kɛ, fɔ i sawo.»
[37] Isa seikɔnin kɔbiladen sawa fɛlɔ k'ai talan sunɔɔ lɔ. A k'a fɔ Piɛl yɛ, a vɛɛ: «Simɔn, i yi sunɔɔ lɔ? A se t'i yɛ ka to i ɲana hali lɛlɛ kelen?
[38] Ài yi to ài ɲana ka Ala dali, sa ài ma kana nɛɛn ka bila koyon nɔ. Sika t'a lɔ, kokein kɛ lɔɔ yi mɔɔlu la, kɛɛ wo kɛ se tɛ ai yɛ.»
[39] Isa ka bɔ ai fɛ ka taa ɲafɛ kɔtunun ka Ala dali wo ɲa kelen ma.
[40] A seikɔnin kɔbiladennu ma, a k'ai talan sunɔɔ lɔ kɔtunun k'a masɔlɔn sunɔɔ ba tɛɛ ai ɲa la. Ai kununnin, ai m'a lɔn ai ka kan ka min fɔ a yɛ.
[41] A ka seikɔ kɔbiladennu fɛlɔ a siɲa sawana lɔ. A vɛɛ ai yɛ: «Ài yi sunɔɔ lɔ k'i nɔningɛ hali bi? A ye, waate vɛ se. Ai kɛtɔ ǹe Mɔɔnivin Tanin janvala ka ǹ don koyonkɛbalu bolo.
[42] Ài yi wuli. Ài ndaa vɛ. Ǹ janvande vɛ se.»
[43] Ka Isa to kumala, Judasi ka se je telemanin, min tɛɛ Isa ya keladen mɔɔ tan ni fila dɔ le. Jama bilanin tɛɛ a kɔ siyamifan ni kɔlɔmankulunnu le. Ai kelayanin tɛɛ salakalaseba kundiilu ni seliya kalanmɔɔlu ni kɛmɔɔbalu le bolo.
[44] Isa janvande Judasi tɛɛ ka tɔɔmase dɔ jiya jama la. A vɛɛ: «M̀'ɛ ǹ filila mɔɔ min nɔ k'a sumu, wo le. Ài yi wo tii mina k'a lakana.»
[45] Judasi senin je, a v'i madonna Isa la telemanin k'a fɔ a yɛ, a vɛɛ: «Kalanmɔɔ!» A do v'i filila Isa lɔ k'a sumu.
[46] Wo kɛnin, ai ka Isa mina.
[47] Isa ya kɔbiladen dɔ k'aa siyamifan nabɔ aa ɲaa lɔ ka salakalaseba kundiiba ya jɔn tolo tɛɛ a la.
[48] Wo waate, Isa vɛɛ jama yɛ: «Mindɛ kɛnin ài nanin m̀ minaya lɔ siyamifan ni kɔlɔmankulunnu le iwo mɔɔlu yi bɔla benganikɛba kanma teme?
[49] Ǹ tɛɛ mɔɔlu kalanna ài fɛ lɔhɔlɔmabonba kɔnɔ lon lon. Ài do ma m̀ mina je. Kɛɛ min sɛvɛnin kitabulu kɔnɔ, fɔ wo ma yi fa.»
[50] Wo kɛ, Isa ya kɔbiladen bɛ ka ale kelen to ka bɔli.
[51] Kavelen dɔ vɛ bilala Isa kɔ, bilinga le mɔlɔnmɔlɔnnin tɛɛ a ma dein. Ai do ka a mina,
[52] kɛɛ a falimakolon ka bɔli ka taa.
[53] Wo kɔ, jama ka taa Isa le salakalaseba kundiiba fɛlɔ. Salakalaseba kundii tɔlu ni kɛmɔɔbalu ni seliya kalanmɔɔ bɛ ladɛnnin tɛɛ je.
[54] Ai taatɔla Isa le je, Piɛl tɛɛ taamana ai kɔ dingila majaan nɔ. A ka taama wo ɲa le haan fɔɔ ka se salakalaseba kundiiba ya lu kɔnɔ. A ka don je ka taa i sii lakanalibalu fɛ taa dafɛ k'a ja.
[55] Wo waate kelen, salakalaseba kundiilu ni kititɛɛmɔɔ bɛ tɛɛ sele ɲininna Isa kanma, min yi se kɛla a faa kun ne, kɛɛ ai ma foi sɔlɔn.
[56] K'a masɔlɔn mɔɔ siyama ka tɔɔ la a la, kɛɛ ai kan ma kɛ kelen ne.
[57] A dɔlu k'i lɔ ka tɔɔ la a la, ai vɛɛ:
[58] «Mɔ na a kan mɛnna ko lɔhɔlɔmabonba min lɔnin mɔɔlu bolo, ko a kɛtɔ wo tela k'a dɔgbɛlɛ lɔ tele sawa kɔlɔ, mɔɔ ma min lɔ.»
[59] Kɛɛ hali sele wolu kan ma kɛ kelen ne.
[60] Wo kɛ, salakalaseba kundiiba k'i lɔ jama tɛma ka Isa maɲininga, a vɛɛ: «Mɔɔ minnu yi min fɔla i ma yi ne, i tɛ wo javila?»
[61] Kɛɛ Isa ka jeden. A ma javili kɛ. Salakalaseba kundiiba ka a maɲininga kɔtunun, a vɛɛ: «I y'a fɔ mɔ yɛ ni ile le Masa Tɔɔmasenin ne. Jalasa m'i min batola, i yi wo Den ne le?»
[62] Isa k'a javi, a vɛɛ: «Ile gbu le na wo fɔla. Kɛɛ ǹ a fɔ ài yɛ, ǹ ko k'a damina bi ma, ài kɛtɔ ǹe Mɔɔnivin Tanin siinin yena Setii Ala bolokinin fɛ. Wo kɔ, ài kɛtɔ ǹ natɔ yena biliya tɛma ka bɔ sangbolo lɔ.»
[63] Wo fɔ, salakalaseba kundiiba vɛ aa faaniba lɔfalafalala mɔnɛ boloma, a vɛɛ: «Mɔ mako tɛ mɔɔ ya seleya la butu.
[64] Àilu gbu na aa Alalɔnbaliyakan mɛnna. M'i mindɛ kɛ wo lɔ?» Ai bɛ vɛɛ ko Isa ka kan ka faa.
[65] Mɔɔ dɔlu v'i wulila k'ai daji bɔn a kan k'a ɲa lasili, k'a gbuun ai bolo le. Ai vɛɛ: «Kelaya kɛ! Mɔɔ min na i gbasila, i yi wo tii tɔɔ fɔ!» Lakanalibalu gbazan k'a mina k'a gbasi a tama lɔ.
[66] Ka Piɛl to lu ma je sangaso bon kɔlɔ, salakalaseba kundiiba ya bɔlidenmoso dɔ ka na.
[67] A do ka Piɛl ye mingɛ, a a jala taa dafɛ, a k'i ɲa kaa a lɔ k'a fɔ, a vɛɛ: «Ile gbazan tɛɛ Isa fɛ, Nazalɛtika wo.»
[68] Kɛɛ Piɛl k'i ban i lɔla a la, a vɛɛ: «M̀ m'iya kuma ɲaye.» A ka bɔ je ka taa lu da la mingɛ, donon ka kumun.
[69] Bɔlidenmoso wo ka Piɛl ye je k'a fɔ a dafɛ mɔɔlu yɛ kɔtunun, a vɛɛ: «Kɛ́ min yi ai dɔ le le.»
[70] A do k'i ban i lɔla a la kɔtunun. A ma mɛn, Piɛl dafɛmɔɔlu k'a fɔ a yɛ, ai vɛɛ: «Sika t'a lɔ, ile gbazan yi mɔɔ wolu dɔ le le, k'a masɔlɔn Galileka le i le.»
[71] Wo waate, Piɛl k'i kalin fɔɔ ka ale gbu daan, a vɛɛ: «Ài kain yi kɛ́ min ma, m̀ ma wo tii lɔn feu.»
[72] Wo fɔ, donon ka kumun telemanin a siɲa filana lɔ. Piɛl hangili ka bila Isa ya kuma wo lɔ, ko: «Jani donon yi kumun siɲa fila le bi, i kɛtɔ a fɔla mɔɔlu yɛ siɲa sawa le ko i ma ǹ lɔn.» Ado Piɛl vɛ kasila kosɛvɛ.