[1] Isa vɛ mɔɔlu kalanna kɔtunun kɔɔ kawun na. Jama ba k'ai ladɛn a laminin nɔ mingɛ, a k'i sii kulun dɔ lɔ ka a mabɔ gbele la dɔɔnin. Ka jama to kawun na,
[2] a v'ai kalanna ko siyama la sanalu lɔ, a vɛɛ:
[3] «Ài y'ài tolo malɔ. Sɛnɛkɛba dɔ ka bɔ ka taa malofalinya lɔ.
[4] K'a to malo falinna, a dɔlu ka ben siya dala. Kɔnɔnilu ka na ka wolu ta ta.
[5] Malo dɔlu ka ben fala kan, fulu walanin tɛ tɛɛ min ja. Malo wolu ka soi fɛlɛnna, kɛɛ ai lilen ma don duu kɔlɔ kosɛvɛ.
[6] Tele bɔnin gbolon gbalan, ai bululu ka ja k'a masɔlɔn ai lilen ma don duu kɔlɔ kosɛvɛ.
[7] Malo dɔlu ka ben woninnu tɛma. Ai fɛlɛnnin, woninnu gbazan v'i wulila ka malo lɔgbalin, fɔɔ ai ma se ai den kɛla.
[8] Malo dɔlu gbazan ka ben duu kein nɔ. Wolu ka ɲia kosɛvɛ. A dɔlu k'ai den bisawa kɛ, a dɔlu biwɔɔlɔ, a dɔlu kɛmɛ.»
[9] Isa vɛɛ ai yɛ kɔtunun: «Tolo yi min kun, wo tii y'a tolo malɔ kuma wo la.»
[10] A k'a mataa wo ja la mingɛ, mɔɔ minnu tɛɛ a laminin nɔ ani aa keladen mɔɔ tan ni fila ka a maɲininga, ai vɛɛ: «Sana wolu kɔlɔ yi mindɛ le?»
[11] A vɛɛ ai yɛ: «Ala vɛ aa masaya gbonolu lɔnniya di ài ma, kɛɛ ko bɛ yi fɔla dɔlu yɛ sanalu le lɔ.
[12] Wo lɔ, Ai y'ai ɲa kaana a lɔ, kɛɛ ai tɛ foi yena. Ai y'ai tolo malɔla a la, kɛɛ ai tɛ foi ɲayena. Ni wo tɛ, ai tɛɛ ai jɛlɛ lasei Ala ma, a do tɛɛ ai makoto.»
[13] Isa vɛɛ ai yɛ kɔtunun: «Ài ma malofalinba ya sana kɔlɔ ɲaye? Ài do kɛtɔ dɔ sanalu ɲayena di?
[14] Malofalinba kɛnin ne iwo mɔɔ min yi Ala ya kumakan nasena.
[15] Malo minnu bennin siya dala, wolu kɛnin ne iwo mɔɔ minnu yi Ala ya kuma mɛnna, ado Soɛtana yi nala telemanin ka kuma wo bɔ ai josokun nɔ.
[16] Malo minnu bennin fala kan, wolu kɛnin ne iwo mɔɔ minnu yi Ala ya kumakan mɛnna ka a mina telemanin sawa boloma.
[17] Kɛɛ do kuma wo lilen tɛ donna ka jaanfa ai josokun nɔ. A do tɛ tola ai kɔnɔ. Gbeleya v'ai sɔlɔnna, ni wo tɛ mɔɔlu vɛ ai tɔlɔyala ka bɛn Ala ya kuma ma, ai yi siya bila telemanin.
[18] Malo minnu bennin woninnu tɛma, wolu kɛnin ne iwo mɔɔ minnu yi Ala ya kumakan mɛnna, kɛɛ do dunuɲa ko le hamin yi donna ai josokun nɔ.
[19] Nafolo ladiyaɲɛ ani fen kaijakaijalu lɔɔ y'ai minala ka Ala ya kumakan nɔgbalin ai josokun nɔ. Kumakan wo tɛ foi ɲiala wo lɔ.
[20] Malo minnu bennin duu kein nɔ, wolu kɛnin ne iwo mɔɔ minnu yi Ala ya kumakan mɛnna k'a mina. Kumakan wo yi donna ai josokun nɔ ka kɛ iwo malo minnu yi ɲiala k'ai den kɛmɛ kɛ, ni wo tɛ biwɔɔlɔ, ni wo tɛ bisawa.
[21] Isa vɛɛ ai yɛ kɔtunun: «A yi di? Mɔɔ yi nale fitina le ka a bila nɛɛ kɔlɔ, ni wo tɛ lafen kɔlɔ? A tɛ a sii fitina siiya lɔ?
[22] Baa fen doonnin suu suu tɛ je min la tɛnala nkɛnɛmayala, kumatɛ gbono ko ma k'a fɔ min tɛnala lɔnna.
[23] Tolo yi min kun, wo tii y'a tolo malɔ kuma wo la.»
[24] Isa vɛɛ ai yɛ kɔtunun: «Ài tolo malɔ kobɛn ka ài mili min ma: ài yi fen sumala ài mɔɔɲɔɔlu yɛ teme, Ala kɛtɔ a sumala ài yɛ ten ne. A do kɛtɔ a dɔ lala wo kan.
[25] K'a masɔlɔn fen yi min bolo, a dɔ latɔ wo tii ta kan. Kɛɛ fen tɛ min bolo, hali min ni y'a bolo, wo minatɔ a la.»
[26] Isa vɛɛ kɔtunun: «Ala y'aa masaya lankɛnɛmayala teme, wo le ne. A kɛnin ne iwo kɛ́ min yi malo falinna aa sɛnɛ lɔ.
[27] A yi sunɔɔla su lɔ, k'i wuli sɔɔma. Su ni tele malo yi fɛlɛnna ka buɲa. Kɛɛ a tii m'a lɔn wo yi kɛla teme.
[28] Malo yi fɛlɛnna ka bɔ duu kɔlɔ a jɛlɛ ma. A yi wulila ka kɛ a gbaan ne, ka ban k'a tizan nabɔ. Wo kɔ, a kama yi kɛ a tizan na.
[29] Malo kama wolu vɛ wulɛnna, a tii yi wɔlɔtɔ ta k'a kali damina k'a masɔlɔn a kali waate vɛ se.»
[30] Isa vɛɛ kɔtunun: «Ala y'aa masaya lankɛnɛmayala teme, m'i se a lala mindɛ ma? A kɛnin teme, m'i sana mindɛ la ka wo jiya?
[31] A kɛnin ne iwo biyaki kolo. Hali a dɔɔyanin ka timin sɛnɛfen kolo bɛ la duukolo kan,
[32] a vɛ sɛnɛna, a fɛlɛntɔ ka buɲa ka timin gbelelɔfen bɛ la. A do bololu jaanyatɔle fɔɔ kɔnɔnilu yi se ai ɲaa lɔla a duulen kɔlɔ.»
[33] Isa tɛɛ Ala ya kuma lasena ai ma sana min ɲɔɔn siyama le lɔ. Mɔɔlu tɛɛ se ko ɲayena teme, a tɛɛ ai kalanna wo ɲa le.
[34] A ma ko ko fɔ ai yɛ ni a ma min fɔ sana lɔ, kɛɛ ale ni aa kɔbiladennu tɛɛ vɛ kɛla ai jɛlɛ ma, a tɛɛ sana bɛ kɔlɔ fɔla ai yɛ.
[35] Wula wo la, Isa vɛɛ aa kɔbiladennu yɛ: «Ài m'i taa kɔɔ kɔma.»
[36] Ai ka bɔ jama lɔ mingɛ, Isa siinin tɛɛ kulun min nɔ, aa kɔbiladennu ka taa a fɛ kulun kelen wo lɔ. Ado kulun gbɛlɛlu tɛɛ ai kɔ.
[37] Wo lɔ, fɔɲɛ ba vɛ bɔla telemanin ka kɔɔ lajaman, fɔɔ ji vɛ donna kulun nɔ.
[38] Wo k'a talan Isa tɛɛ v'i la sunɔɔ lɔ kulun kɔfɛla lɔ. A kun lanin tɛɛ kunkɔlɔla kan. Kɔbiladennu ka a lakunun, ai vɛɛ: «Kalanmɔɔ, mɔ faatɔle! I gbalanin tɛ wo le?»
[39] Wo kɛ, Isa ka kunun ka fɔɲɛ jamali k'a fɔ kɔɔ yɛ, a vɛɛ: «I lɔ, i jeden.» Ado fɔɲɛ ni kɔɔ lɔ ka suma tue.
[40] Isa vɛɛ aa kɔbiladennu yɛ: «Mindɛ lɔ ài yi siyanna? Limandeya tɛ ài bolo hali bi?»
[41] Ai ka siyan bubale k'a kɛ a fɔle i ɲɔɔn yɛ, ai vɛɛ: «Ɛɛ! Mɔɔ suu mindɛ le min ne? Hali fɔɲɛ ni kɔɔ y'a kan minala.»