<Matiyu 28

[1] Nɔningɛlon timinnin kɔ, Lailon sɔɔma danin na, Magidalaka Moyamu ni a tɔɔma Moyamu vɛ taala kabulu lasaaya lɔ.

[2] Wo waate kelen, duukolo vɛ jaajaala fanga la. Baa Mɔtii ya mɛlɛka ka jii ka bɔ haijɛnɛ, ka kawa bɔ kabulu da la, ka ban k'i sii kawa wo kan.

[3] A tɛɛ mɛnɛnmɛnɛnna gbesekele iwo sanfɛlɛ. Aa faani gbɛnin tɛɛ pepe.

[4] Lakanalibalu vɛ jaajaala siyan boloma k'ai ben duu ma fɔɔ ka kɛ iwo ai vɛ faa.

[5] Ado mɛlɛka vɛɛ mosolu yɛ: «Ài kà siyan. Ǹ k'a lɔn ài yi Isa le ɲininna, min gbaannin tɛɛ kɔlɔman ma.

[6] A tɛ jan. A v'i wuli iwo a n'a fɔla teme. A fuleni lanin tɛɛ tɛɛ min ja, ài na ài wo ja lasaa.

[7] Ài yi taa fala, ài y'a fɔ aa kɔbiladennu yɛ ko a v'i wuli ka bɔ saya lɔ. Ko a taatɔ ài ɲa Galile koovi lɔ. Ài kɛtɔ a yena wo ja. Ǹ nanin min fɔ ko lɔ ài yɛ, wo le ve.»

[8] Wo lɔ, ai bɔla kabulu lɔ ɲagba le, siyan ni sawa ba boloma ka bɔli ka wo lase Isa ya kɔbiladennu ma.

[9] Ado Isa ka bala ai lɔ siya la. A vɛɛ ai yɛ: «Ài ni ke.» Ai v'i madonna a la ka a sen mina a bato ko lɔ.

[10] Wo kɛ, Isa do vɛɛ ai yɛ: «Ài kà siyan. Ài yi taa a fɔ ǹ kɔbiladennu yɛ ko ai yi taa Galile. Ko ai kɛtɔ ǹ yena je.»

[11] Mosolu taatɔla, kabulu lakanaliba dɔlu vɛ taala so kɔnɔ ka ko timinnin wolu ɲafɔ salakalasebalu yɛ.

[12] Salakalaseba kundiilu ni kɛmɔɔbalu k'i ɲɔɔn ye ka bɛn kan kelen ma mingɛ, ai ka wɔli ba di lakanalibalu ma

[13] k'a fɔ ai yɛ, ai vɛɛ: «Ài y'a fɔ mɔɔlu yɛ, ài vɛɛ: ‹Ka mɔ to sunɔɔ lɔ su lɔ, Isa ya kɔbiladennu ka na ka a su suɲa ka taa a le.›

[14] Ni àiya sunɔɔ ko k'a fɔ jamanatii yɛ, mɔ kumatɔ a fɛ ka wo kunko bɔ ài kun.»

[15] Lakanalibalu ka wɔli mina ka mɔɔbalu ya kumakan labato. Wo kuma le jɛnzɛnnin Jahudiyalu tɛma hali bi.

[16] Wo kɔ, keladen mɔɔ tan ni kelen vɛ taala Galile. Isa tɛɛ ka tini min ko fɔ ai yɛ, ai ka se wo ja.

[17] Ai ka Isa ye mingɛ, ai ka suudi ben a yɛ, kɛɛ a dɔlu ka sika.

[18] Wo kɛ, Isa k'i madon ai la k'a fɔ ai yɛ, a vɛɛ: «Se bɛ vɛ di m̀ ma duukolo kan, ani haijɛnɛ.

[19] Wo lɔ, ài yi taa mɔɔlu kɛ ǹ kɔbiladen ne siboloma bɛ tɛma. Ài y'ai mako ji kɔlɔ Va Ala, ani a Den, ani Lɔhɔlɔma Fɔɲɛ tɔɔ lɔ.

[20] Ǹ na ài lɔla ko ko la, ài y'ai makalan wolu la, kosa ai yi kɛ wolu labatola. Ǹ ài fɛ waate bɛ, fɔɔ ka taa a sii dunuɲa laban na.»