Matiyu 21
[1] Isa ni aa kɔbiladennu sulunyanin Jelusalɛm la, ai ka se Betifase so la, min yi Zeituna tini kɔlɔ. K'ai to je, Isa ka aa kɔbiladen mɔɔ fila kelaya.
[2] A vɛɛ ai yɛ: «Soni min yi mɔ ɲafɛ ve, ài yi taa je. Ài vɛ donna so kɔnɔ, ài kɛtɔ sofalini dɔ silinin yena je telemanin. A den y'a dafɛ. Ài y'a fɔlin ka na ai le jan.
[3] Ni mɔɔ dɔ ka ài maɲininga, ài yi vɛɛ wo tii yɛ: ‹Maa Fanma le mako y'ai la. Ko a tɛ mɛnna, a kɛtɔ ai laseila jan.›»
[4] A ka kɛ ten sa kuma min fɔnin kela bolo, wo ma yi fa, ko:
[5] «A fɔ Jelusalɛmkalu yɛ ko: ‹A ye, àiya masakɛ yi nala ài ma. A fanmajiinin, a do siinin sofalini den kɔkan, sofalini bolan kɔni.›»
[6] Kɔbiladennu ka taa a kɛ iwo Isa tɛɛ k'a fɔ ai yɛ teme.
[7] Ai ka na sofalinimoso ni a den ne, ka aiya faanilu la sofalinilu kɔkan. Isa ka jɛlɛ k'i sii a kɔkan.
[8] Mɔɔ siyama vɛ aiya faanilu fɛzɛnna siya kan Isa ɲa. Dɔlu vɛ kɔlɔman bolo mɛsɛnnilu tɛɛtɛɛla ka wolu fɛzɛn siya kan a ɲa.
[9] Mɔɔ minnu tɛɛ Isa ɲafɛ ani a kɔfɛ, wolu vɛ gbanɔla, ai vɛɛ: «Tanuli yi Dawuda Bɔzɔn yɛ. Min yi nala Mɔtii tɔɔ lɔ, duwawu yi wo tii yɛ. Tanuli yi Ala yɛ!»
[10] Isa ka don Jelusalɛm mingɛ, so bɛ la ka maa, sokɔnɔmɔɔlu vɛ a fɔla i ɲɔɔn yɛ, ai vɛɛ: «Ɛɛ, jene yi min ne tan?»
[11] Jama k'ai javi, ai vɛɛ: «Nabi Isa le ka bɔ Nazalɛti so kɔnɔ, Galile koovi lɔ.»
[12] Isa donnin lɔhɔlɔmabonba la, a vɛ juwa ni sannikɛbalu gbɛnna k'ai labɔ je. A ka wɔlifalinbalu ya tabalilu ani bilini juwalu ya siifennu labenben.
[13] A vɛɛ ai yɛ: «A sɛvɛnin kitabu kɔnɔ ko: ‹Ǹa bon ka kan ka kɛ batokɛbon ne le.› Kɛɛ do ài v'a kɛ sonnu doonya le.»
[14] Ɲagbɛ ni namalanilu tɛɛ nala Isa ma lɔhɔlɔmabonba la. A do ka wolu lakɛnɛya.
[15] Salakalaseba kundiilu ni seliya kalanmɔɔlu ka Isa ya kawanako kɛninnu ye. Ai ka denni dɔlu gbazan ye, minnu tɛɛ gbanɔla lɔhɔlɔmabonba kɔnɔ ko: «Tanuli yi Dawuda Bɔzɔn yɛ!» Diina kundiilu k'ai joso lakuna wo lɔ.
[16] Ai vɛɛ Isa yɛ: «Dennilu yi min fɔla, i tɛ wo mɛnna?» Isa k'ai javi, a vɛɛ: «Aan, ǹ a mɛnna. Min sɛvɛnin kitabu kɔnɔ, ài ma wo kalan ba? A sɛvɛnin ko: ‹I vɛ denni ni sinmindennu lɔ tanulikan fɔla i jɛlɛ ma.›»
[17] Wo fɔnin, Isa k'ai to je ka bɔ so kɔnɔ ka taa si Betani.
[18] Wo kɛnɛbɔ, ka Isa seikɔtɔ to so kɔnɔ, kɔɔn ka a mina.
[19] A ka toloju dɔ ye siya dala ka taa a lasaa, kɛɛ a ma toloden ye, fɔ filabulu gbanzan. A vɛɛ a yɛ: «Ala a kɛ i k'i den butu!» Ado toloju ka ja telemanin.
[20] Kɔbiladennu ka wo ye mingɛ, ai ka kawakoya, ai vɛɛ: «Ɛɛ, toloju janin di vɛ telemanin?»
[21] Isa vɛɛ: «Ǹ'i tuɲa fɔ ài yɛ, ni limandeya y'ài lɔ, ni ài ma sikasika, ǹ na min kɛla toloju la yi ne, ài yi sene wo ɲɔɔn kɛla. Hali ni ài k'a fɔ tini min yɛ ko a yi bɔ a nɔ lɔ ka taa ben kɔɔji lɔ, a kɛtɔ ten ne.
[22] Ni ài ka limandeya Ala ma, ài vɛ fen fen madalila a la, ài kɛtɔ wo le sɔlɔnna.»
[23] Isa donnin lɔhɔlɔmabonba la, a vɛ mɔɔlu kalanna. Wo lɔ, salakalaseba kundiilu ni kɛmɔɔbalu k'ai madon a la k'a fɔ a yɛ, ai vɛɛ: «I yi ko minnu kɛla yi ne, jene na wo se dila i ma?»
[24] Isa k'ai javi, a vɛɛ: «Ǹe gbazan y'ài maɲiningala ko kelen ma. Ài vɛ wo javila, min na setiiya dila m̀ ma ka ko minnu kɛ, ǹ kɛtɔ wo jiyala ài la.
[25] Jene na Yaya lɔla mɔɔlu makola ji kɔlɔ? Ala le na a lɔla baa mɔɔlu?» Ai vɛɛ i ɲɔɔn yɛ: «Mɔ v'a fɔla Ala le na Yaya lɔla, a kɛtɔ a fɔla mɔ yɛ mindɛ kɛnin ài ma la a la?
[26] Kɛɛ ni mɔ k'a fɔ mɔɔlu na a lɔla, wo tɛ bɛn baa m'i siyanna jama ɲa, k'a masɔlɔn ai bɛ yi Yaya yena kela le le.»
[27] Wo lɔ, ai ka Isa javi, ai vɛɛ: «Mɔ m'a lɔn.» Isa vɛɛ ai yɛ: «Ni wo le, ǹ tɛnala a fɔla ài yɛ setiiya min na ǹ lɔla ko minnu kɛla.»
[28] Isa ka to kumala, a vɛɛ: «Ài miliya yi di? Kɛ́ dɔ tɛɛ je, denkɛ fila tɛɛ min bolo. A vɛɛ a den kunfɔlɔ yɛ: ‹Ǹ den, i yi taa baale kɛ gbele lɔ bi.›
[29] A den vɛɛ: ‹Ǹ tɛ taala.› Kɛɛ kɔfɛ, a ka nimisa ka taa gbele lɔ.
[30] Fa ka kuma kelen wo fɔ den filana yɛ. Wo vɛɛ: ‹Ǹ fa, ǹ'i taale.› Kɛɛ a ma taa.
[31] Den fila wo lɔ, jene na a fa sawo kɛla?» Mɔɔlu ka Isa javi, ai vɛɛ: «Den kunfɔlɔ wo.» Isa vɛɛ: «Ǹ'i tuɲa fɔ ài yɛ, nisɔɔnminaba ani sungulunbalu dontɔle Ala ya masaya kɔlɔ àilu ɲa.
[32] K'a masɔlɔn Makoliba Yaya ka na siya telennin jiya ài la. Ài do ma la a la, kɛɛ nisɔɔnminaba ni sungulunbalu le ka la a la. Ài na wo yena. Wo bɛ n'a kɛ, ài ma ài miliya mafalin ka la a la.»
[33] Isa vɛɛ kɔtunun: «Ài y'ài tolo malɔ sana gbɛlɛ la. A ka kɛ duutii dɔ le le, min ka gbele kɛ ka a laminin jɔsɔ la. A ka sɛnɛfennajaya ladan ka a kunmagbɛngbalan lɔ. A wɔlinin wo bɛ la, a k'a kalifa gbelekunnasiiba dɔlu la ka taa jamana gbɛlɛ lɔ.
[34] Sɛnɛfen kali waate, a k'aa bɔlidennu lataa gbelekunnasiibalu ma, ko ai y'a ta nii di a ma.
[35] Kɛɛ bɔlidennu senin je, gbelekunnasiibalu k'ai mina, k'ai gbasi, ka dɔ faa, ka dɔ bon kawakulun na.
[36] Wo kɛ, gbeletii ka bɔliden gbɛlɛlu lataa kɔtunun ka timin kunfɔlɔ talu la. Ai do ka wolu gbazan mina k'ai tɔlɔya wo ɲa le.
[37] A laban nɔ, a ka ale gbu denkɛ lataa ai ma. A tɛɛ a kɔnɔ ai kɛtɔ a denkɛ buɲala.
[38] Kɛɛ gbelekunnasiibalu ka a den natɔ ye mingɛ, ai k'a fɔ i ɲɔɔn yɛ, ai vɛɛ: ‹Kɛɛtaba le ne. Ài m'a faa fɔsa gbele yi kɛ mɔ ta le.›
[39] Wo lɔ, ai ka a mina ka a fɔnfɔn gbele kɔɔkan ka taa a faa.»
[40] Isa ka ban sana lala ka jama maɲininga, a vɛɛ: «A yi di? Gbeletii vɛ sena wo ja, a kɛtɔ mindɛ kɛla gbelekunnasiibalu la?»
[41] Ai vɛɛ a yɛ: «A bentɔ mɔɔ yon wolu kan hinabaliya la k'ai faa. Wo vɛ kɛla, a kɛtɔ gbele kalifala mɔɔ gbɛlɛlu la, minnu kɛtɔ a nii dila a ma sɛnɛfen kali waate.»
[42] Isa vɛɛ ai yɛ: «Min sɛvɛnin kitabu kɔnɔ, ài ma wo kalan ba? A sɛvɛnin ko: ‹Bonnɔbalu k'i ban kawakulun min nɔ, wo le ka kɛ bon juu sii kawakulun ne. Mɔtii nɔ le wo le. A kɛnin mɔ ɲana kawanako ba le le.›»
[43] «Wo lɔ, ǹ a fɔ ài yɛ, ǹ ko ài yi nɛɛma min sɔlɔnna k'a masɔlɔn Ala ya mɔɔ le ài le, a do kɛtɔ wo bɔla ài bolo ka a di mɔɔ gbɛlɛlu ma, minnu kɛtɔ aa siya taamana ka a diyanan kolu kɛ. [
[44] Ni mɔɔ mɔɔ kɔni ka ben kawakulun wo kan, wo tii lɔkalikalitɔle. Ni do kawakulun wo ka ben mɔɔ mɔɔ kan, wo tii lɔgbɛnɛngɛtɔle feu.]»
[45] Salakalaseba kundii ni Falisilu ka sana wolu mɛn mingɛ, ai k'a ɲaye ko Isa kain tɛɛ ailu le ma.
[46] Ai tɛɛ a mina ko ɲa ɲininna, kɛɛ ai tɛɛ siyanna jama ɲa, k'a masɔlɔn mɔɔlu tɛɛ Isa jatela kela dɔ le le.