<Matiyu 9

[1] Isa ka don kulun kɔnɔ ka kɔɔ tɛɛ ka taa se a fɛso.

[2] K'a to je, mɔɔ dɔlu ka na falifaama jangalotɔ dɔ le a fɛ, min lanin tɛɛ aa dɛvɛ kan. Isa ka aiya limandeya ye mingɛ, a vɛɛ jangalotɔ yɛ: «Ǹ den, i jei kà tɛɛ. Iya julumbulu lɔ vɛ koto.»

[3] Seliya kalanmɔɔ dɔlu ka wo mɛn k'a fɔ i ɲɔɔn yɛ, ai vɛɛ: «Kɛ́ min yi Alalɔnbaliyakan ne fɔla!»

[4] Isa tɛɛ k'ai miliya lɔn, a vɛɛ ai yɛ: «Mindɛ kɛnin miliya yon wo suu y'ài josokun nɔ?

[5] A yi di? K'a fɔ ‹Iya julumbulu lɔ vɛ koto›, baa k'a fɔ ‹I yi wuli i yi taama›, wo fila lɔ mindɛ le fɔ diyanin?

[6] Kɛɛ do fɔ ài y'a lɔn a se yi ǹe Mɔɔnivin Tanin yɛ ka julumbulu lɔkoto dunuɲa.» Wo kɛ, a vɛɛ jangalotɔ yɛ: «I yi wuli, iya dɛvɛ ta ka taa iya bon na.»

[7] Wo lɔ, kɛ́ v'i wulila ka taa aa bon na.

[8] Jama ka wo ye mingɛ, ai ka siyan. Ai ka Ala tanu k'a masɔlɔn ale le ka setiiya min di adamaden ma!

[9] Isa ka bɔ je ka taa. A timintɔ ka kɛ́ dɔ siinin ye nisɔɔnminaya lɔ, min tɔɔ yi ko Matiyu. Isa vɛɛ a yɛ: «Na i bila ǹ kɔ.» Matiyu v'i wulila wo lɔ ka bila a kɔ.

[10] Wo kɔ, ka Isa siinin to tabali la Matiyu ya bon na, nisɔɔnminaba ni konyonkɛba siyama ka na dɔnnikɛya lɔ Isa ni aa kɔbiladennu fɛ.

[11] Falisi dɔlu ka wo ye mingɛ, ai vɛɛ Isa ya kɔbiladennu yɛ: «Mindɛ kɛnin àiya kalanmɔɔ yi dɔmuni kɛla nisɔɔnminabalu ni konyonkɛbalu fɛ?»

[12] Isa ka wo mɛn k'ai javi, a vɛɛ: «Kɛnɛyabatɔ mako tɛ dandaliba la, fɔ jangalotɔ.

[13] Kuma min sɛvɛnin kitabu kɔnɔ, ài yi taa ài mili wo kɔlɔ ma. A sɛvɛnin ko: ‹Hinandeya diyanin ǹ yɛ ka timin kolofen salaka la.› M̀ ma na ka mɔɔ telenninnu kili fɔ julumbutɔlu.»

[14] Wo kɔ, Yaya ya kɔbiladen dɔlu k'i madon Isa la ka a maɲininga, ai vɛɛ: «Ǹu ni Falisilu deinnin sun donna. Mindɛ lɔ iya kɔbiladennu tɛ wo kɛla?»

[15] Isa k'ai javi, a vɛɛ: «A yi di? Ka kɔɲɛfa to a tɔvalu dafɛ kɔɲɛmalɔ lɔ, a tɔvalu yi sene ai ɲakɔlɔ silila? Wo tɛ kɛla. Kɛɛ lon dɔ natɔ, mɔɔlu kɛtɔ kɔɲɛfa bɔla ai tɛma. Wo lon ne, ai kɛtɔ sun donna.

[16] Mɔɔ tɛ faani kula kulunkulun tala ka faani kɔlɔ labalin a la. Ni wo tɛ, faani kula kɛtɔ faani kɔlɔ samanna ka a fala. A falanɲa kɛwonyatɔ ka timin a kunfɔlɔ ta la.

[17] Mɔɔ tɛ gbɛ kula kɛla jitabɔlɔ kɔlɔ lɔ. Ni wo tɛ, a fununtɔ ka bɔlɔ te ka gbɛ bɛ bɔn. Mɔɔ yi gbɛ kula kɛla bɔlɔ kula le lɔ. Wo vɛ kɛla, fen fen tɛnala tiɲala wo lɔ.»

[18] Ka Isa to min fɔla, Jahudiyalu ya ɲamɔɔ dɔ ka na i mabilin Isa kɔlɔ, a vɛɛ: «Ǹ denmoso vɛ sa tandainɔ. Kɛɛ i vɛ nala i bolo lala a kan, a yi wulile.»

[19] Isa ni aa kɔbiladennu v'i wulila wo lɔ ka bila kɛ́ kɔ.

[20] Wo k'a talan, moso jangalotɔ dɔ tɛɛ je. A tɛɛ vɛ san tan ni fila kɛ, jelibɔ jangalo y'a la. A k'i madon Isa la a kɔfɛ ka a bolo tuu aa faaniba dagbolo la.

[21] A tɛɛ a fɔla a jɛlɛ ma, a vɛɛ: «Ni ǹ ka se m̀ bolo tuula aa faaniba la dein, ǹ'i kɛnɛyale.»

[22] Isa k'i kɔdon ka moso ye, a vɛɛ a yɛ: «Ǹ denmoso, i jei kà tɛɛ. Iya limandeya vɛ i lakɛnɛya.» Moso ka kɛnɛya telemanin.

[23] Isa senin ɲamɔɔ ya bon na, a ka sɛnfɔbalu talan je ani jama min mangan ba tɛɛ bɔla.

[24] A vɛɛ ai yɛ: «Ài bɔ jan. Singbilini ma sa, a yi sunɔɔ le lɔ.» Wo fɔnin, ai do ka jɛlɛbɔ a lɔ.

[25] Ai ka jama labɔ mingɛ lu ma, Isa ka don bon na, ka singbili su mina a bolo ma. Singbili k'i wuli.

[26] Mɔɔlu vɛ taala wo samakan nasena koovi wo fan bɛ lɔ.

[27] Ka Isa bɔtɔ to je, ɲagbɛ kɛ́ fila v'i wulila ka bila a kɔ. Ai vɛ gbanɔla, ai vɛɛ: «I jaani! Dawuda Bɔzɔn, i hina mɔ la.»

[28] Isa ka don mingɛ bon na, ɲagbɛ fila k'ai madon a la. Isa vɛɛ ai yɛ wo lɔ: «Ài limandeyanin k'a fɔ ǹ'i sene ài ɲa lakala?» Ai vɛɛ: «Aan, Fanma, mɔ vɛ limandeya wo ma.»

[29] Wo kɛ, Isa ka a bolo tuu ai ɲa la, a vɛɛ: «Ka bɛn àiya limandeya ma, wo yi kɛle ài yɛ.»

[30] Wo lɔ, ai ɲa la ka ka. Isa k'a fɔ ai yɛ k'a magbeleya, a vɛɛ: «Ài kà ko min fɔ mɔɔ suu suu yɛ.»

[31] Kɛɛ ai bɔ kɔ so kɔnɔ, ai vɛ Isa mangan nasena koovi wo fan bɛ lɔ.

[32] Ka kɛ́ fila wo bɔtɔ to, mɔɔlu ka na jinatɔ dɔ le Isa fɛ. Jina tɛɛ vɛ kɛ́ wo kɛ bobo le.

[33] Isa ka jina gbɛn mingɛ, bobo wo vɛ kumala. Jama ka kawakoya, ai vɛɛ: «Wo ɲɔɔn tɛɛ ma kɛ ba Isilan jamana lɔ feu.»

[34] Kɛɛ Falisilu vɛɛ: «Jinalu ya kundii le na se dila a ma kosa a yi jinalu gbɛn ka bɔ mɔɔlu kɔ.»

[35] Wo waate, Isa tɛɛ timintiminna so ni tooda bɛ la ka mɔɔlu kalan aiya Aladalibonnu la, ka Samakan Kein nase ai ma ka bɛn Ala ya masaya ma, ani ka jangalotɔ suu bɛ lakɛnɛya.

[36] A ka jama ye mingɛ, ai hina ka don a la. Ai bɛ sɛɛnin tɛɛ, fanga tɛɛ tɛ ai la butu. Ai kɛnin tɛɛ iwo saalu, minnu bilanin ai jɛlɛ ma ni kunnasiiba tɛ ai la.

[37] Wo lɔ, a vɛɛ aa kɔbiladennu yɛ: «Malo mɔnnin walanin bubale, kɛɛ do a kaliba ma siya.

[38] Wo lɔ, ài yi sɛnɛtii madiya, fɔsa a yi baaledennu lɔ aa malo kalila.»