Matiyu 26
[1] Isa wɔlinin kuma wo bɛ fɔla, a vɛɛ aa kɔbiladennu yɛ:
[2] «Ài k'a lɔn a vɛ to tele fila, Timinkunna Selilon yi se. Wo waate, ai kɛtɔ ǹe Mɔɔnivin Tanin minala ka m̀ gbaan kɔlɔman ma ka ǹ faa.»
[3] Wo waate, salakalaseba kundiilu ni kɛmɔɔbalu ka taa ladɛnkɛya lɔ Kayife ya bon na, min tɛɛ salakalaseba kundiiba le.
[4] Ai k'i ɲɔɔn ye ka Isa mina ko ɲa ɲinin doon nɔ, kosa ai y'a faa.
[5] Kɛɛ ai vɛɛ: «Mɔ kà a mina selilon, sa mɔɔlu kana ai wuli ka mulutu.»
[6] Wo waate, Isa ka taa se Betani ka don Simɔn ya bon na, mɔɔlu tɛɛ a fɔla min ma ko Kunantɔ.
[7] K'a siinin to dɔnnikɛya lɔ je, moso dɔ ka na a ma sani kawalama kein ne. A lafanin tɛɛ tulu sumadiyanin na, min daa gbeleyanin tɛɛ bubale. Moso do vɛ wo kɛla Isa kun nɔ.
[8] Kɔbiladennu ka wo ye mingɛ, ai ka mɔnɛ, ai vɛɛ: «Tiɲani min kun yi mindɛ le?
[9] Tulu min tɛɛ bɛ se felela wɔli ba la, ka wo kɛ bolokolonnu madɛmɛnfen ne.»
[10] Kɛɛ Isa ka wo mɛn mingɛ, a vɛɛ ai yɛ: «Mindɛ kɛnin ài yi moso ɲagbala? A na kokein ne kɛla ǹ yɛ.
[11] Bolokolonnu totɔ ài fɛ waate bɛ. Kɛɛ ǹe do tɛnala tola ài fɛ waate bɛ.
[12] Moso min na tulu sumadiyanin kɛla ǹ fali kan ka ǹ nɔbɛn ǹ sudoon ko le lɔ.
[13] Ǹ'i tuɲa fɔ ài yɛ, Samakan Kein min na vɛ sena mɔɔlu ma dunuɲa tɛɛ tɛɛ lɔ, moso na min kɛla, wo fɔtɔ je, kosa mɔɔlu hangili yi to ale gbazan lɔ.»
[14] Wo kɔ, Judasi Sakaliyɔti ka taa salakalaseba kundiilu fɛlɔ. A tɛɛ Isa ya keladen mɔɔ tan ni fila dɔ le le.
[15] Judasi vɛɛ ai yɛ: «Ni ǹ ka Isa don ài bolo, ài kɛtɔ mindɛ dila m̀ ma?» Ai do ka wɔligbɛ gbanan bisawa di a ma.
[16] K'a ta lon wo ma, Judasi tɛɛ waate ɲininna ka Isa don ai bolo.
[17] Bulufununbali Selilon lon kunfɔlɔ, Isa ya kɔbiladennu ka na a maɲininga, ai vɛɛ: «I y'a fɛ m'i dɔnnifen lɔbɛn i yɛ min ne ja Timinkunna Selilon?»
[18] Isa vɛɛ ai yɛ: «Ài yi taa kɛ́ dɔ talan so kɔnɔ k'a fɔ a yɛ ko: ‹Kalanmɔɔ ya ko aa waate ma vɛ sulunya. Ko ale ni aa kɔbiladennu kɛtɔ Timinkunna Selilon dɔnni kɛla i fɛlɔ.›»
[19] Kɔbiladennu k'a kɛ iwo Isa k'a fɔ ai yɛ teme. Ai ka taa Timinkunna Selilon dɔnnifen lɔbɛn je.
[20] Telejii waate, ale ni aa keladen mɔɔ tan ni fila k'ai sii tabali la.
[21] K'ai to dɔnni la, Isa vɛɛ ai yɛ: «Ǹ'i tuɲa fɔ ài yɛ, ài lɔ kelen kɛtɔ ǹ janvala.»
[22] Kɔbiladennu ninna ka fin kosɛvɛ kuma wo lɔ. Ai bɛ vɛ a fɔla a yɛ kelenkelen ne, ai vɛɛ: «Fanma, ǹe le wo le?»
[23] Isa vɛɛ: «Mɔɔ min vɛ a bolo don nɛɛ lɔ ǹ fɛ, wo tii le kɛtɔ ǹ janvala.
[24] Ado ǹe Mɔɔnivin Tanin faatɔle iwo a sɛvɛnin kitabu kɔnɔ ka bɛn m̀ ma teme. Kɛɛ mɔɔ min kɛtɔ ǹ janvala, gbalo yi wo tii yɛ. Hali ni wo tii sɔlɔnbali tɛɛ ka to, wo tɛɛ ka fisa a ma feu.»
[25] Judasi, min tɛɛ ka diɲa Isa janva ko ma, wo vɛɛ a yɛ: «Kalanmɔɔ, ǹe le wo le?» Isa vɛɛ a yɛ: «Ile gbu le na wo fɔla.»
[26] K'ai to dɔnnila, Isa ka bulu ta ka balika bɔ Ala yɛ. A vɛ bulu lɔkalikalila ka a di aa kɔbiladennu ma k'a fɔ ai yɛ, a vɛɛ: «Ài yi min mina k'a dɔn. Ǹ fali le ne.»
[27] Wo kɔ, a ka jiyafɛ ta, lɛzɛnji tɛɛ min nɔ, ka balika bɔ Ala yɛ, ka ban ka a di ai ma. A vɛɛ: «Ài bɛ yi dɔ min a lɔ.
[28] Lɛzɛnji min yi salatikan tɔɔmase le le, Ala yi min tala mɔɔ siyama yɛ ǹ jeli bɔn ko le fɛ, kosa ai julumbulu lɔ yi koto.
[29] Ǹ a fɔ ài yɛ, ǹ ko ǹ tɛnala lɛzɛnji minna butu, fɔɔ ǹ Fa v'aa masaya lankɛnɛmayala lon min na. Wo vɛ kɛla, ǹe ni àilu kɛtɔ a kula le minna.»
[30] Wo kɛ, ai ka baiti bɔ, ka ban ka taa Zeituna tini kɔkan.
[31] Ai senin je, Isa vɛɛ ai yɛ: «Ài bɛ bɔlitɔ ka ǹ kelen to su min nɔ, k'a masɔlɔn a sɛvɛnin kitabu kɔnɔ, ko: ‹Ǹ kɛtɔ saakunnasiiba gbasila ka a faa. Wo vɛ kɛla, saa bɛ jɛnzɛntɔ.›
[32] Kɛɛ m̀'ɛ m̀ wulila ka bɔ saya lɔ, ǹ taatɔ ài ɲa Galile koovi lɔ.»
[33] Piɛl vɛɛ Isa yɛ: «Hali bɛ k'i bila, ǹ t'i bila tuun.»
[34] Isa vɛɛ a yɛ: «Ǹ'i tuɲa fɔ i yɛ, bi su min nɔ, jani donon yi kumun, i kɛtɔ a fɔla mɔɔlu yɛ haan fɔɔ siɲa sawa ko i ma ǹ lɔn.»
[35] Kɛɛ Piɛl vɛɛ a yɛ: «Hali ai k'a fɔ ko ǹ'i faa i fɛ, ǹ tɛnala a fɔla ko m̀ m'i lɔn feu.» Kɔbiladen tɔlu bɛ vɛ wo kuma kelen fɔla.
[36] Wo kɛnin, Isa ni aa kɔbiladennu ka se dingila dɔ lɔ, min tɔɔ yi ko Gɛsɛmɛni. Isa vɛɛ ai yɛ: «Ài sii ài m̀ makɔnɔ jan. Ǹ taatɔ Aladaliya lɔ ve.»
[37] A ka Piɛl ni Zebede denkɛ fila kili ko ai yi taa a malɔ. Isa ninna ka fin, a joso ka tɔlɔya kosɛvɛ.
[38] A vɛɛ ai yɛ: «Ǹ nin na vɛ fin kosɛvɛ fɔɔ k'a kɛ iwo ǹ faatɔle. Ài yi to jan ka to ài ɲana ǹ fɛ.»
[39] A ka taa ɲafɛ dɔɔnin k'i ten bilin duu ma. A vɛ Ala dalila, a vɛɛ: «Ǹ Fa, ni a yi sene kɛla, i y'a kɛ tɔlɔya min yi timin ǹ kunna. Kɛɛ ǹe gbu sawo kà kɛ, fɔ i sawo.»
[40] Isa seikɔnin kɔbiladen sawa fɛlɔ k'ai talan sunɔɔ lɔ. A vɛɛ Piɛl yɛ: «A se tɛ ài yɛ ka to ài ɲana ǹ fɛ hali lɛlɛ kelen?
[41] Ài yi to ài ɲana ka Ala dali, sa ài ma kana nɛɛn ka bila koyon nɔ. Sika t'a lɔ, kokein kɛ lɔɔ yi mɔɔlu la, kɛɛ wo kɛ se tɛ ai yɛ.
[42] Isa ka bɔ ai fɛ a siɲa filana lɔ ka taa Ala dali kɔtunun, a vɛɛ: «Ǹ Fa, ni i ma diɲa tɔlɔya min yi timin ǹ kunna, fɔ a yi m̀ masɔlɔn, i sawo yi kɛ.»
[43] A seikɔnin aa kɔbiladennu ma, a k'ai talan sunɔɔ lɔ kɔtunun, k'a masɔlɔn sunɔɔ ba tɛɛ ai ɲa la.
[44] Wo kɛ, a ka bɔ ai fɛ ka taa ɲafɛ kɔtunun ka Ala dali a siɲa sawana lɔ. A tɛɛ ka min fɔ kunfɔlɔ le, a ka wo fɔ kɔtunun.
[45] Wo kɛ, a ka seikɔ kɔbiladennu fɛlɔ. A vɛɛ ai yɛ: «Ài yi sunɔɔ lɔ k'i nɔningɛ hali bi? A ye, waate vɛ se. Ai kɛtɔ ǹe Mɔɔnivin Tanin janvala ka ǹ don konyonkɛbalu bolo.
[46] Ài yi wuli. Ài ndaa vɛ. Ǹ janvande vɛ se.»
[47] K'a to kumala, Judasi ka se je, min tɛɛ aa keladen mɔɔ tan ni fila dɔ le. Jama ba bilanin tɛɛ a kɔ siyamifan ni kɔlɔmankulunnu le. Ai kelayanin tɛɛ salakalaseba kundiilu ni kɛmɔɔbalu le bolo.
[48] Isa janvande Judasi tɛɛ ka tɔɔmase jiya jama la, a vɛɛ: «M̀'ɛ ǹ filila mɔɔ min nɔ k'a sumu, wo le. Ài yi wo tii mina.»
[49] Judasi k'i madon Isa la telemanin k'a fɔ a yɛ, a vɛɛ: «Kalanmɔɔ, i ni wula.» A do v'i filila a lɔ k'a sumu.
[50] Isa do vɛɛ a yɛ: «Ǹ tɔva, i nanin min kɛ ko lɔ, i yi wo kɛ.» Wo kɛnin, ai k'ai madon Isa la ka a mina.
[51] Isa ya kɔbiladen dɔ ka aa siyamifan nabɔ aa ɲaa lɔ ka salakalaseba kundiiba ya jɔn tolo tɛɛ a la.
[52] Wo kɛ, Isa vɛɛ kɔbiladen wo yɛ: «Iya siyamifan don a ɲaa lɔ! Mɔɔ min vɛ siyamifan minala kɛlɛkɛ ko lɔ, wo tii gbazan faatɔ siyamifan ne la.
[53] I m'a lɔn k'a fɔ m̀'ɛ ǹ Fa dalila, a kɛtɔ aa mɛlɛka kulu ba tan ni fila lanala telemanin kɛlɛkɛ ko lɔ?
[54] Kɛɛ a vɛ kɛla ten, min sɛvɛnin kitabu kɔnɔ, wo ma yi se fala di? Baa a sɛvɛnin ko ko minnu ka kan ka kɛ ten ne.»
[55] Wo waate, Isa vɛɛ jama yɛ: «Mindɛ kɛnin ài nanin m̀ minaya lɔ siyamifan ni kɔlɔmankulunnu le iwo mɔɔlu yi bɔla benganikɛba kanma teme? Ǹ siinin tɛɛ kalanna lɔhɔlɔmabonba la lon lon. Ài do ma m̀ mina je.
[56] Kɛɛ min bɛ kɛnin sa kelalu na min sɛvɛla kitabulu kɔnɔ, wo ma yi fa.» Isa ya kɔbiladen bɛ ka a bila ka ale kelen to je.
[57] Wo kɛnin, Isa minabalu ka taa a le Kayife ya bon na, min tɛɛ salakalaseba kundiiba le. Seliya kalanmɔɔ ni kɛmɔɔbalu ladɛnnin tɛɛ je.
[58] Ai taatɔla Isa le je, Piɛl tɛɛ taamana ai kɔ dingila majaan nɔ haan fɔɔ ka se salakalaseba kundiiba ya lu ma. A ka don ka taa i sii lakanalibalu fɛ k'a ye kolu labantɔ teme.
[59] Wo waate kelen nɔ, salakalaseba kundiilu ni kititɛɛmɔɔ bɛ tɛɛ faɲafɔsele ɲininna Isa kanma, min yi se kɛla a faa kun ne.
[60] Hali mɔɔ siyama tɛɛ ai ɲa labɔla gbɛ lɔ ka tɔɔ la a la, wo bɛ n'a kɛ, ai ma foi sɔlɔn. A laban, mɔɔ fila ka bɔ k'a fɔ, ai vɛɛ:
[61] «Kɛ́ min n'a fɔla ko a yi sene lɔhɔlɔmabonba tela, ka ban ka a lɔ kɔtunun tele sawa kɔlɔ.»
[62] Wo kɛ, salakalaseba kundiiba k'i lɔ ka Isa maɲininga, a vɛɛ: «Mɔɔ minnu yi min fɔla i ma, i tɛ wo javila?»
[63] Kɛɛ Isa ka jeden. Salakalaseba kundiiba do vɛɛ a yɛ: «Ǹ a fɛ i yi sɛ Nimayadiba Ala tɔɔ la k'a fɔ mɔ yɛ ni ile le Masa Tɔɔmasenin ne ani Ala Den.»
[64] Isa vɛɛ a yɛ: «Ile gbu le na wo fɔla. Kɛɛ ǹ a fɔ ài yɛ, ǹ ko k'a ta bi ma, ài kɛtɔ ǹe Mɔɔnivin Tanin siinin yena Setii Ala bolokinin fɛ. Wo kɔ, ài kɛtɔ ǹ natɔ yena biliya tɛma ka bɔ sangbolo lɔ.»
[65] Wo fɔ, salakalaseba kundiiba vɛ aa faaniba minala ka a lɔfalafala, a vɛɛ: «A vɛ Alalɔnbaliyakan fɔ. Mɔ mako tɛ mɔɔ ya seleya la butu. Àilu gbu na Alalɔnbaliyakan wo mɛnna.
[66] M'i mindɛ kɛ wo lɔ?» Jama vɛɛ: «A ka kan ka faa!»
[67] Wo kɛ, ai k'ai daji bɔn a ɲa lɔ ka a gbuun ai bolo le. Dɔlu vɛ a gbasila a tama lɔ.
[68] Ai vɛɛ: «Ile, Masa Tɔɔmasenin, kelaya kɛ! Mɔɔ min na i gbasila, i yi wo tii tɔɔ fɔ!»
[69] Ka Piɛl siinin to lu ma wo waate, bɔlidenmoso dɔ k'i madon a la, a vɛɛ a yɛ: «Ile gbazan tɛɛ Galileka Isa kɔbiladen ne le.»
[70] Kɛɛ Piɛl k'i ban i lɔla a la mɔɔlu ɲana. A vɛɛ a yɛ: «M̀ m'iya kuma ɲaye.»
[71] Piɛl ka bɔ je ka taa lu da la. Bɔlidenmoso gbɛlɛ k'a ye k'a fɔ je mɔɔlu yɛ, a vɛɛ: «Kɛ́ min tɛɛ Isa Nazalɛtika ya kɔbiladen dɔ le le.»
[72] Kɛɛ Piɛl m'i lɔ a la. A k'a kalin a yɛ, a vɛɛ: «M̀ ma kɛ́ wo lɔn.»
[73] A ma mɛn bakɛ, je mɔɔ dɔlu k'ai madon Piɛl la, ai vɛɛ a yɛ: «Sika t'a lɔ, ile gbazan yi mɔɔ wolu dɔ le le. I kumaɲa yi wo jiyala feuǃ»
[74] Wo kɛ, Piɛl k'i kalin fɔɔ ka ale gbu daan, a vɛɛ: «M̀ ma kɛ́ wo lɔn feu.» Ado donon ka kumun telemanin.
[75] Piɛl hangili ka bila Isa ya kuma wo lɔ ko: «Jani donon yi kumun bi, i kɛtɔ a fɔla mɔɔlu yɛ siɲa sawa le ko i ma ǹ lɔn.» Wo kɛ, Piɛl ka bɔ lu ma ka taa kasi josomakasa boloma.