<Matiyu 3

[1] Wo waate lɔ, Makoliba Yaya ka se Jude koovi fuwa lɔ ka kawanili kɛ, a vɛɛ:

[2] «Ài yi tube, baa Ala ya masaya waate ma vɛ sulunya.»

[3] Kela Aizaya tɛɛ ka Yaya le ko fɔ, a vɛɛ: «Mɔɔ dɔ gbanɔkan yi bɔla fuwa lɔ, a vɛɛ: ‹Ài yi siya ladan Mɔtii yɛ, ka aa senmataamasiyalu latelen a yɛ.›»

[4] Faani min ladannin ɲɔɔmɛ si la, Yaya ka wo bila a kanna ka a tɛ sili gbolojulu dɔ la. Aa dɔnnifennu tɛɛ tɔngɛsani ni tuu kɔlɔ li le le.

[5] Mɔɔ siyama tɛɛ bɔla Jelusalɛm so kɔnɔ ani Jude koovi lɔ ani Jɔdan kɔɔ dafɛ solu la ka taa Yaya fɛlɔ.

[6] Ai tɛɛ vɛ ai da labɔla aiya julumbulu la, Yaya tɛɛ ai mako Jɔdan kɔɔ kɔlɔ.

[7] Falisi ni Sadusi siyama tɛɛ nala Yaya ma fɔsa a ai mako. A ka wo ye k'a fɔ ai yɛ, a vɛɛ: «Àilu fɔnfɔnnidennu! Ala ya jangata min natɔ, jene na ài lalila ko ài yi bɔli ka bɔ wo kɔlɔ ten?

[8] Ài kɛkolu y'a jiya k'a fɔ ko ài vɛ tube.

[9] Ài k'ài mili ko a bɛnnin k'a masɔlɔn ài bema le nabi Ibulahima le! Ǹ a fɔ ài yɛ, ǹ ko Ala yi sene kawakulun minnu lajɛlɛmala k'ai kɛ nabi Ibulahima bɔzɔn ne.

[10] Tandainɔ tɛɛlan tii v'i wuli kɔlɔman tɛɛ ko lɔ. Kɔlɔman minnu tɛ ai den kein kɛla, wo bɛ yi tɛɛle k'ai lafili taa la.

[11] Ǹ ài makola kɔɔ le kɔlɔ k'a jiya ko ài vɛ tube. Kɛɛ mɔɔ min natɔ ǹ kɔ, wo tii fanga walanin ne ǹ ta le. Hali ka aa samala mina a yɛ, ǹe dɔɔyanin ne wo ma. Ale kɛtɔ Lɔhɔlɔma Fɔɲɛ ni taa lajiila ài kan.

[12] A kɛnin ne iwo kɛ́ min lɔnin malo gbasiya lɔ, kɔndɛlɛ y'a bolo. A kɛtɔ malo tɛndɛnna ka a kɛ bolon kɔlɔ ka ban k'a bu lafili taa banbali lɔ.»

[13] Wo kɛnin, Isa ka bɔ Galile koovi lɔ ka na Yaya fɛlɔ Jɔdan kɔɔ dala kosa Yaya y'a mako.

[14] Kɛɛ Yaya tɛɛ a fɛ k'i ban. A vɛɛ Isa yɛ: «Ile le ka kan ka ǹe mako. Kɛɛ mindɛ kɛnin i nanin m̀ ma?»

[15] Isa k'a javi, a vɛɛ: «I yi diɲa wo ma butu, baa a bɛnnin m'i wo kɛ sa Ala sawo ma yi fa.» Wo lɔ, Yaya ka diɲa.

[16] Isa makonin ka bɔ kɔɔ kɔlɔ, sangbolo da ka ka telemanin. A do ka Lɔhɔlɔma Fɔɲɛ jiitɔla ye a kan iwo bilini.

[17] Kumakan dɔ ka bɔ sangbolo lɔ, a vɛɛ: «Ǹ diyanan den ne ne. A do vɛ ǹ kɔnɔ diya bubale.»