Matiyu 8
[1] Isa jii ka bɔ tini kɔkan, jama ba ka bila a kɔ.
[2] Wo kɛ, kunantɔ dɔ vɛ nala k'i mabilin a kɔlɔ, a vɛɛ a yɛ: «Fanma, ni i ka diɲa, a se y'i yɛ ka ǹ fali sɛnɛya.»
[3] Isa ka a bolo lɔsama ka a tuu kɛ́ la k'a fɔ a yɛ, a vɛɛ: «M̀'ɛ diɲa, i sɛnɛya.» Aa kunan ka basi telemanin.
[4] Isa vɛɛ a yɛ: «I tolo malɔ. I kà min ko fɔ mɔɔ suu suu yɛ. Taa vɛ. Salakalaseba y'i fali lasaa. Wo vɛ kɛla, kela Musa ka salaka min fɔ, i yi wo bɔ k'a jiya mɔɔ bɛ la ko i vɛ sɛnɛya.»
[5] Isa ka don Kapɛlɛnam so kɔnɔ mingɛ, Lɔmu sɔdasi kundii dɔ k'i madon a la k'a madiya,
[6] a vɛɛ: «Fanma, ǹa bɔliden lanin bon na, a fali faanin a ma. A do vɛ tɔlɔya bubale.»
[7] Isa vɛɛ a yɛ: «Ǹ taatɔ a lakɛnɛyala.»
[8] Sɔdasi kundii vɛɛ: «Fanma, hɔlɔ tɛ ǹ ne k'a fɔ i yi don ǹa bon na. Hali ni i ka kuma kelen fɔ dein, ǹa bɔliden yi kɛnɛyale.
[9] K'a masɔlɔn ǹe gbazan yi dɔ ya fanga kɔlɔ, ado sɔdasilu yi ǹa fanga kɔlɔ. M̀'ɛ a fɔla a dɔ yɛ ko a yi taa, wo yi taale. Ǹe do v'a fɔla a dɔ yɛ ko a yi na, wo yi nale. M̀'ɛ a fɔla ǹa bɔliden yɛ ko a yi min kɛ, a yi wo kɛle.»
[10] Isa ka kuma wo mɛn mingɛ, a ka kawakoya k'a fɔ aa kɔbilabalu yɛ, a vɛɛ: «Ǹ'i tuɲa fɔ ài yɛ, ǹ ko m̀ ma limandeya min ɲɔɔzii ye ba Isilanmɔɔlu tɛma bene.
[11] Ǹ a fɔ ài yɛ, ǹ ko Masaba ya lon, mɔɔ siyama bɔtɔ dunuɲa fan bɛ lɔ ka na ai sii feetikɛya lɔ nabi Ibulahima ni Isiyaka ni Janguba tɔɔfɛ.
[12] Kɛɛ minnu tɛɛ ka kan ka kɛ Masaba ya mɔɔlu le, wolu lafilitɔ divi lɔ kɔɔkan. Ai do kasitɔ k'ai ɲin sii i ɲɔɔn na dimin bolo je.»
[13] Wo kɛ, Isa k'a fɔ sɔdasi kundii yɛ, a vɛɛ: «Taa iya lu ma. I yi min ɲininna, wo kɛtɔ i yɛ ka bɛn iya limandeya ma.» Wo waate kelen, sɔdasi kundii ya bɔliden ka kɛnɛya.
[14] Wo kɔ, Isa ka taa don Piɛl ya bon na ka Piɛl bilanmoso lanin ye nɛnɛgbani boloma.
[15] Isa ka a bolo tuu moso bolo la mingɛ, nɛnɛgbani ka bɔ a fali lɔ. A k'i wuli ka gba don a yɛ.
[16] Wo lon wula la, mɔɔlu ka na jinatɔ siyama le Isa fɛ. A ka jinalu lɔ ko ai yi bɔ mɔɔlu kɔ ani ka jangalotɔ bɛ lakɛnɛya.
[17] A ka kɛ ten sa kuma min fɔnin kela Aizaya bolo, wo ma yi fa, ko: «A ka maa tɔlɔyalu bɔ mɔ kan, ka mɔ lakɛnɛya maa jangalolu lɔ.»
[18] Isa ka jama ba ye mingɛ a laminin nɔ, a vɛɛ aa kɔbiladennu yɛ: «Ài m'i taa kɔɔ kɔma.»
[19] Seliya kalanmɔɔ dɔ k'i madon Isa la k'a fɔ a yɛ, a vɛɛ: «Kalanmɔɔ, i vɛ taala tɛɛ tɛɛ lɔ, ǹ'i bilale i kɔ.»
[20] Isa vɛɛ a yɛ: «Diɲa yi jɛɛkani bolo, ɲaa yi kɔnɔni bolo. Kɛɛ dingila tɛ ǹe Mɔɔnivin Tanin bolo, ǹ'i ǹ nɔningɛ tɛɛ min ja.»
[21] Isa ya kɔbiladen gbɛlɛ vɛɛ a yɛ: «Fanma, i y'a to ǹ'i taa ǹ fa sudoon kunfɔlɔ le.»
[22] Isa vɛɛ a yɛ: «Bila ǹ kɔ. I y'a to fulenilu gbu y'aiya fulenilu sudoon.»
[23] Wo kɔ, Isa ni aa kɔbiladennu ka don kulun kɔnɔ ka taa.
[24] K'ai to kɔɔ kɔkan, san ka na fɔɲɛ ba le ka kɔɔ lajaman fɔɔ ji tɛɛ donna kulun kɔnɔ. Kɛɛ Isa lanin tɛɛ sunɔɔ lɔ.
[25] Wo lɔ, aa kɔbiladennu ka na ka a lakunun, ai vɛɛ: «Fanma, i yi mɔ lakisi! Mɔ faatɔle!»
[26] A vɛɛ ai yɛ: «Àilu minnu limandeya dɔɔyanin, mindɛ lɔ ài yi siyanna?» Wo kɛ, a k'i wuli ka kɔɔ ni fɔɲɛ jamali. Ado kɔɔ ni fɔɲɛ lɔ ka suma tue.
[27] Kɔbiladennu ka kawakoya k'a kɛ a fɔle i ɲɔɔn yɛ, ai vɛɛ: «Ɛɛ! Kɛ́ suu mindɛ le min ne? Hali fɔɲɛ ni kɔɔ y'a kan minala.»
[28] Ai wɔlinin kɔɔ tɛɛla ka se Gadalakalu makɛya lɔ, jinatɔ fila vɛ bɔla kabuluso la ka na Isa labɛn. Wolu faliyanin tɛɛ, fɔɔ mɔɔ tɛɛ tɛ se timinna wo ja.
[29] Ai ka gbanɔ, ai vɛɛ: «Ala Den, mindɛ le ile ni ǹu wotɛ? I nanin ne ka mɔ tɔlɔya jani mɔ kititɛɛ waate yi se?»
[30] Wo k'a talan kɔsɛ kulu ba tɛɛ dɔnni kɛla dingila majaan nɔ.
[31] Jinalu vɛ Isa madiyala, ai vɛɛ: «Ni i ka mɔ gbɛn, i yi diɲa m'i taa don kɔsɛlu lɔ.»
[32] Isa vɛɛ ai yɛ: «Ài yi taa!» Jinalu ka bɔ kɛ́ fila wo kɔ ka taa don kɔsɛlu lɔ. Wo kɛnin, kɔsɛ bɛ bɔlimantɔ ka jii tini la ka don kɔɔ kɔlɔ k'ai bɛ faa je.
[33] Min kɛnin jinatɔ fila la, kɔsɛkunnasiibalu vɛ bɔlila ka taa wo ɲafɔ mɔɔlu yɛ so kɔnɔ.
[34] Wo ma, sokɔnɔmɔɔ bɛ vɛ nala ka Isa kunkɔlɔ bɛn. Ai do ka Isa ye mingɛ, ai ka a madiya ko a yi bɔ ai makɛya lɔ.