Matiyu 22
[1] Isa ka sana dɔ la ai yɛ kɔtunun, a vɛɛ:
[2] «Ala y'aa masaya lankɛmɛmayala teme, wo kɛnin ne iwo masakɛ min na feeti ba kɛla a denkɛ ya fulusili fɛ.
[3] Minnu kilinin tɛɛ fulusiliya lɔ, masakɛ ka aa bɔlidennu lataa wolu ma, kɛɛ do ai ma diɲa ka na.
[4] Wo kɛ, masakɛ ka bɔliden gbɛlɛlu lataa kɔtunun. A vɛɛ ai yɛ: ‹Ài y'a fɔ mɔɔ kilinilu yɛ ko m̀'ɛ tiili ba kɛ. Ko tolalu vɛ faa ani nisi bolan nɔɔlɔnilu. Ko a bɛ lɔ vɛ bɛn. Ko ai yi na fulusiliya lɔ.›
[5] Kɛɛ ai suu suu ma masakɛ ya kililikan jate. A dɔ vɛ bɔla ka taa aa sɛnɛ lɔ. A dɔ gbazan vɛ bɔla ka taa aa juwayakɛya lɔ.
[6] A tɔlu vɛ masakɛ ya bɔlidennu minala k'ai tɔlɔya hinabaliya la, ka ban k'ai faa.
[7] Masakɛ joso la ka kuna wo lɔ. A ka aa sɔdasilu lataa mɔɔfaaba wolu kanma k'ai bɛ faa, ka ban ka aiya so ɲɛnin.
[8] Wo kɔ, masakɛ vɛɛ aa bɔlidennu yɛ: ‹Tiili ba lɔ vɛ bɛn, kɛɛ hɔlɔn tɛ mɔɔ kilininnu le.
[9] Wo lɔ, ài yi taa mɔɔ ɲininya lɔ siya dalu la. Ài vɛ mɔɔ mɔɔ yena, ài y'ai bɛ kili ko ai yi na fulusiliya lɔ.›
[10] Wo kɛ, bɔlidennu v'i wulila ka taa so kɔnɔ. Ai na mɔɔ minnu yena je, ai na wo bɛ kilila fulusiliya lɔ, mɔɔkolon ani mɔɔbɛlɛlu. Wo le k'a kɛ, fulusilibon na ka fa mɔɔ kilininnu le.
[11] Wo kɛ, masakɛ ka don feetikɛya lɔ sa a yi mɔɔ kilininnu lasaa. A ka kɛ́ dɔ ye je, kɔɲɛmalɔ faani tɛɛ tɛ a kanna.
[12] A vɛɛ wo yɛ: ‹M̀ bɔ, i donnin jan nɔ di, i ma faani bɛlɛ bila i kanna?› Wo do ma foi sɔlɔn k'a fɔ.
[13] Wo kɛ, masakɛ vɛɛ aa bɔlidennu yɛ: ‹Ài y'a sen ni a bolo sili k'a lafili divi lɔ kɔɔkan. A kasitɔ ka a ɲin sii i ɲɔɔn na dimin bolo je.›»
[14] Isa ka kuma dɔ la wo kan, a vɛɛ: «Mɔɔ siyama le kilinin, kɛɛ a dana le tanin a tɔlu tɛma.»
[15] Wo kɔ, Falisilu ka taa ai kun bilin sa ai y'a lɔn ni ai yi sene Isa minala a dalakan fɛ.
[16] Wo lɔ, ai ka aiya kalannadennu ni masakɛ Helodi ya mɔɔ dɔlu lataa a ma, wolu vɛɛ a yɛ: «Kalanmɔɔ, mɔ k'a lɔn i yi tuɲa le fɔla. Mɔɔlu ka kan ka Ala ya siya taama teme, i y'ai kalanna wo la tuɲa gbu gbu le lɔ. I tɛ siyanna mɔɔ suu suu ɲa, i do tɛ mɔɔ bɔla mɔɔ lɔ gbazan.
[17] A yi di wo lɔ? Ka nisɔɔn sala Lɔmu masakɛba ma, wo ladaannin ne mɔ ma baa wo ladaannin tɛ? I miliya fɔ mɔ yɛ.»
[18] Kɛɛ Isa k'ai miliya yon lɔn, a vɛɛ ai yɛ: «Àilu filangafolu, mindɛ lɔ ài yi ǹ nɔsumanna?
[19] Nisɔɔn yi salala wɔligbanan min na, ài yi wo dɔ jiya ǹ na, ǹ a lasaa.» Ai ka wɔligbanan wo kelen di a ma mingɛ,
[20] a vɛɛ ai yɛ: «Jene sawula ni jene tɔɔ yi wɔligbanan min kan?»
[21] Ai vɛɛ: «Lɔmu masakɛba.» Wo lɔ, a vɛɛ ai yɛ: «Awa, ài yi Lɔmu masakɛba ta di Lɔmu masakɛba ma. Ài yi Ala gbazan ta di Ala ma.»
[22] Isa ya javili k'ai kawakoya. Ai ka bɔ a dafɛ ka taa.
[23] Wo lon kelen Sadusi dɔlu ka na a ma. Minnu y'a fɔla ko mɔɔ t'i wulila saya kɔ. Ai do ka Isa maɲininga, ai vɛɛ:
[24] «Kalanmɔɔ, kela Musa n'a fɔla ko ni i kɔlɔkɛ ka sa ka a moso densɔlɔnbali to a kɔ, ko wo vɛ kɛla i yi moso wo ta kosa a yi den sɔlɔn i kɔlɔkɛ yɛ.
[25] A ka kɛ badenma wolowulan ne le, minnu tɛɛ mɔ fɛlɔ jan. Kɔlɔmanda ka moso dɔ fulu. A do ka sa ka a moso densɔlɔnbali to a kɔ. Wo kɛ, a dɔɔni ka moso wo ta.
[26] Kɛɛ wo gbazan ka sa, ka moso densɔlɔnbali to a kɔ. A ka kɛ ten ne haan moso wo k'i sii kɛ́ wolowulan kun, kɛɛ a ma den sɔlɔn.
[27] Kɛ́ wo bɛ faa kɔ, moso gbazan ka sa.
[28] A yi di? Fulenilulawulilon, moso wo kɛtɔ jene ta le kɛ́ wolowulan wo lɔ? K'a masɔlɔn a n'i siila a kelen kelenna le bɛ kun.»
[29] Isa k'ai javi, a vɛɛ: «Ài ma kitabu kɔlɔ ɲaye. Ài ma foi lɔn Ala ya setiiya ko lɔ gbazan. Wo le y'a kɛla, ài kɔnɔfilinin!
[30] Baa fulenilu v'i wulila lon min, kɛ́ ni mosolu tɛnala fulu kɛla. Ai bɛ kɛtɔ iwo mɛlɛka minnu yi haijɛnɛ.
[31] Fulenilu wuli ko kɔni, Ala ka min fɔ ài yɛ kitabu kɔnɔ, ài ma wo kalan?
[32] A vɛɛ: ‹Ǹe le Ala le min yi batola Ibulahima, Isiyaka ni Janguba bolo.› Wo kɔlɔ le ko fulenilu tɛ Ala batola, fɔ nimalu.»
[33] Jama ka wo mɛn mingɛ, ai ka kawakoya aa kalan na.
[34] Falisilu k'a mɛn mingɛ ko Isa tɛɛ vɛ Sadusilu lajeden, ai k'ai ladɛn ka taa Isa fɛlɔ.
[35] Seliya kalanmɔɔ dɔ tɛɛ ai lɔ. Wo ka ɲiningali kɛ Isa la ka a lɔsuman, a vɛɛ:
[36] «Kalanmɔɔ, mindɛ le Ala ya seliya bɛ lɔ bubata le?»
[37] Isa vɛɛ a yɛ: «‹I i Tii Ala kanu i josokun bɛ la, ani i nin bɛ, ani i miliya bɛ.›
[38] Wo le seliya kunfɔlɔ le ani a bɛ lɔ bubata.
[39] A filana bɔnin a la ko, ‹I i siiɲɔɔ kanu iwo ile gbu.›
[40] Kela Musa ya Taulati ani kela dɔgbɛlɛlu ya kitabulu silinin seliya fila wo le la.»
[41] Ka Falisilu ladɛnnin to, Isa ka ɲiningali kɛ ai la,
[42] a vɛɛ: «Ài miliya yi di ka bɛn Masa Tɔɔmasenin ya ko ma? Jene bɔzɔn y'a le?» Ai ka Isa javi, ai vɛɛ: «Nabi Dawuda bɔzɔn ne.»
[43] Isa vɛɛ ai yɛ: «Ni wo le, mindɛ lɔ Dawuda ka kuma Lɔhɔlɔma Fɔɲɛ ya se lɔ k'a fɔ a ma, ‹Ǹ Tii.› Baa Dawuda vɛɛ:
[44] ‹Mɔtii Ala n'a fɔla ǹ Tii yɛ, a vɛɛ: «Na i sii m̀ bolokinin fɛ, fɔɔ m̀'ɛ banna i juulu lala i sen kɔlɔ.»›
[45] Ni Dawuda y'a fɔla wo tii ma ko a Tii, wo tii yi se kɛla a bɔzɔn ne di wo lɔ?»
[46] Mɔɔ ma se Isa javila. K'a ta wo lon ma, mɔɔ ma diɲa ka ɲiningali kɛ a la butu.