Matiyu 2
[1] Isa ka sɔlɔn Bɛtilɛhɛm so kɔnɔ, Jude koovi lɔ, Helodi ya masaya waate lɔ. Wo kɔ, lɔnnila dɔlu ka bɔ telebɔ jamana dɔ lɔ ka na Jelusalɛm.
[2] Ai ka se Jelusalɛm ka mɔɔlu maɲininga, ai vɛɛ: «Jahudiyalu ya masakɛ min sɔlɔnnin, wo yi min ne? Mɔ na aa lolo jɛlɛtɔ yena sangbolo lɔ telebɔ fan nɔ. Mɔ do nanin a bato ko le lɔ.»
[3] Kuma wo k'a fɔ masakɛ Helodi yɛ mingɛ, a kɔnɔ ka fili ani Jelusalɛmkalu bɛ.
[4] Masakɛ ka Isilanmɔɔlu ya salakalaseba kundii ani seliya kalanmɔɔ bɛ ladɛn k'ai maɲininga ko Masa Tɔɔmasenin ka kan ka sɔlɔn min ne?
[5] Ai vɛɛ: «A ka kan ka sɔlɔn Bɛtilɛhɛm le, Jude koovi lɔ, k'a masɔlɔn kela dɔ ka a sɛvɛ ko:
[6] ‹Ile Bɛtilɛhɛm, ile min yi Jude koovi lɔ, i tɛ Jude solu lɔ dɔɔmanin ne dɛ! k'a masɔlɔn kundii dɔ bɔtɔ i lɔ, min kɛtɔ a jandola ǹa Isilanmɔɔlu lɔ.›»
[7] Wo kɛ, Helodi ka lɔnnilalu kili doon nɔ sa a a lɔn lolo wo bɔnin waate min.
[8] Wo kɔ, a ka siya di ai ma ko ai yi taa Bɛtilɛhɛm, a vɛɛ: «Ài yi taa den ɲinin kobɛn. Ài v'a yena, ài yi na a fɔ ǹ yɛ, sa ǹe gbu yi taa a bato.»
[9] Helodi ka kuma wo fɔ ka ban mingɛ, lɔnnilalu ka bɔ je ka taa. K'ai to siya kan, ai tɛɛ ka lolo min jɛlɛtɔ ye ai fɛlɔ telebɔ fan nɔ, wo lolo kelen ka bɔ kutunun ka taa ai ɲa fɔɔ ka se denni fɛlɔ k'i lɔ wo ja kunna.
[10] Lɔnnilalu ka lolo ye mingɛ, ai ka sawa kosɛvɛ.
[11] Ai donnin bon na ka denni ye ani a ba Moyamu. Ai vɛ suudi benna a yɛ ka ban ka aiya nafololu labɔ den sama ko lɔ. Ai ka sanu di a ma ani wusulan ani kɔlɔmanjɛn sumadiyanin min tɔɔ yi ko milu.
[12] Wo kɔ, Ala na lɔnnilalu lalila kibalo lɔ ko ai kà se Helodi fɛlɔ butu. Wo lɔ, ai vɛ seikɔla aiya jamana lɔ siya gbɛlɛ kan.
[13] Ai taanin kɔ, Mɔtii ya mɛlɛka dɔ ka a jɛlɛ jiya Jusufu la kibalo lɔ, a vɛɛ a yɛ: «I yi wuli i yi den ni a ba ta ka bɔli ka taa Misilan jamana lɔ. I yi to je fɔɔ m̀'ɛ a fɔla i yɛ lon min ko i yi na, k'a masɔlɔn Helodi kɛtɔ den ɲinila a faa ko lɔ.»
[14] Jusufu k'i wuli su lɔ ka den ni a ba ta ka taa Misilan,
[15] ka to je haan fɔɔ Helodi ka faa. Wo ka kɛ sa Mɔtii ya kuma min fɔnin kela bolo, wo ma yi fa, ko: «Ǹ na ǹ denkɛ kilila ko a yi bɔ Misilan.»
[16] Helodi k'a lɔn mingɛ ko lɔnnilalu vɛ a janva, a ka a joso lakuna bubale. Wo lɔ, denkɛ minnu ma timin ba sanji fila la bene, a ka aa mɔɔlu lɔ wo bɛ faala Bɛtilɛhɛm ni a laminin nɔ. Helodi ka dan san fila dennu la ka bɛn lɔnnilalu ya lolo ye waate ma, ai tɛɛ ka min fɔ a yɛ.
[17] Wo ka kɛ sa kela Jelemi ya kuma ma yi fa, ko:
[18] «Kan dɔ ka bɔ Lama so kɔnɔ, kasikan ni josomakasa ba. Lasɛli yi kasila a dennu ya ko lɔ. A ma diɲa mɔɔ foi y'a masawali, k'a masɔlɔn a dennu tɛ je butu.»
[19] Ka Jusufu to Misilan Helodi sanin kɔ, Mɔtii ya mɛlɛka k'a jɛlɛ jiya a la siwo lɔ,
[20] a vɛɛ a yɛ: «I yi wuli i yi den ni a ba ta. Ài yi seikɔ Isilan jamana lɔ, baa mɔɔ minnu tɛɛ denni faa ko lɔ, wolu vɛ faa.»
[21] Wo lɔ, Jusufu v'i wulila ka denni ni a ba ta ka taa Isilan jamana lɔ.
[22] Kɛɛ Jusufu k'a mɛn ko Alikilayosi le siinin masaya la Jude koovi kunna a fa Helodi nɔ lɔ. Wo le k'a kɛ, a ka siyan a taa ko lɔ je. Ala ka a lali siwo lɔ ko a yi taa Galile koovi lɔ.
[23] A do ka taa i sii Nazalɛti so kɔnɔ. Wo ka kɛ sa kelalu ya kuma ma yi fa ko: «Mɔɔlu kɛtɔ a fɔla a ma ko Nazalɛtika.»