<Matiyu 10

[1] Wo kɔ, Isa k'aa keladen mɔɔ tan ni fila kili ka setiiya di ai ma sa ai yi se jinalu gbɛnna ka bɔ mɔɔlu kɔ, ani ka mɔɔlu lakɛnɛya ka bɔ aiya jangalo ni tɔlɔya suu bɛ lɔ.

[2] Keladen mɔɔ tan ni fila wolu tɔɔ le ne: a kunfɔlɔ Simɔn, mɔɔlu y'a fɔla min ma ko Piɛl, ni a dɔɔni Andele, ani Zebede denkɛ Janguba ni a dɔɔni Yaya,

[3] ani Fele ni Batolomu, ani Tomasi ni Matiyu min yi nisɔɔnminaba le, ani Alife denkɛ Janguba ni Tade,

[4] ani Simɔn, ai y'a fɔla min ma ko fasokanuba, ani Judasi Sakaliyɔti, min ka Isa janva.

[5] Isa ka mɔɔ tan ni fila wolu kelaya, a vɛɛ: «Ài kà taa siboloma gbɛlɛlu fɛlɔ, ài kà don Samalikalu ya so suu suu la.

[6] Fɔ ài yi taa Isilanmɔɔlu le fɛlɔ, minnu kɛnin iwo saalu minnu bilanin ai jɛlɛ ma.

[7] Ài vɛ timinna tɛɛ tɛɛ lɔ, ài yi mɔɔlu kawani ko Ala ya masaya ma vɛ sulunya.

[8] Ài yi jangalotɔlu lakɛnɛya, ka fulenilu lawuli, ka kunantɔlu lasɛnɛya, ka jinalu gbɛn ka bɔ mɔɔlu kɔ. M̀'ɛ setiiya di ài ma, ài do ma wɔli sala. Wo lɔ, ài vɛ ko min kɛla mɔɔlu yɛ, ai kà wɔli sala.

[9] Ài kà sanu bila ài kun, ni wo tɛ wɔli suu suu.

[10] Ài kà bɔlɔ ta, ài kà taama bele ta, ài kà àiya faaniba ni samala kɛ fila le, k'a masɔlɔn baalekɛba ka kan ka a balo sɔlɔn.

[11] Ni do ài ka don so suu suu la, ài yi mɔɔ ɲinin min yi diɲa k'ài jiya. Ài yi to wo tii fɛlɔ fɔɔ ài taa waate vɛ sena.

[12] Ài vɛ donna wo tii ma ya bon na, ài yi bonnamɔɔlu fo kunfɔlɔ le, ài vɛɛ: ‹Ala hɛlɛ kɛ ài yɛ.›

[13] Ni ai k'ài lɔ mina kobɛn, àiya duwawu yi mina ai ma. Ni do ai ma ài lɔmina kobɛn, àiya duwawu yi sei ài ma.

[14] Ni wo mɔɔlu k'i ban ài lɔminala ani k'i ban ai tolo malɔla ài la, wo vɛ kɛla, ài yi bɔ je. Ài vɛ kɛla bɔla lu wo ma, ni wo tɛ so wo la, ài yi je gbangban bɔ ài sen ma ka wo kɛ ai ban tɔɔmase le.

[15] Ǹ'i tuɲa fɔ ài yɛ, kititɛɛlon, Ala kɛtɔ hilala Sɔdɔm ni Gɔmɔli so yonnu la ka timin wo sokɔnɔmɔɔlu la.»

[16] Isa vɛɛ aa kɔbiladennu yɛ: «Ài tolo malɔ! Ǹ ài kelayala ka kɛ iwo saalu, minnu bilanin soo falilu tɛma. Ài ja yi teya, iwo sa jateyanin teme. Àiya kokɛ ma yi fa, iwo bilini mafanin teme.

[17] Ài jando ài jɛlɛ lɔ mɔɔlu kanma. Ai kɛtɔ ài minala ka taa ài le kititɛɛya lɔ. Ai kɛtɔ ài gbasila gbusan na aiya Aladalibonnu la,

[18] ani k'ài lalɔ jamanatii ni masakɛlu ɲakɔlɔ ka bɛn ǹa ko ma. Àilu gbu le kɛtɔ ǹe masele le wo lɔ ka ǹa ko fɔ wolu yɛ ani siboloma gbɛlɛlu.

[19] Ai vɛ ài minala ka taa ài le kititɛɛya lɔ, ài ka kan ka kuma min fɔ je ani ài ka kan ka a fɔ teme, ài kà hamin wo lɔ. K'a masɔlɔn ài ka kan ka min fɔ, Ala gbu le kɛtɔ wo donna ài da wo waate kelen nɔ.

[20] Baa ài kumakannu tɛnala kɛla ài jɛlɛ ta le, mafɔ ài Fa Ala gbu gbu ya kumakan.

[21] Mɔɔ kɛtɔ a badenma donna mɔɔlu bolo sa ai y'a faa. Fa gbazan kɛtɔ wo ɲɔɔn kɛla a den na. Dennu mulututɔ ai sɔlɔnbalu ma k'ai don mɔɔlu bolo sa ai y'ai faa.

[22] Ài gbeyatɔ mɔɔ bɛ yɛ ka bɛn ǹa ko ma. Kɛɛ do mɔɔ minnu vɛ tɔlɔya wolu minala ai ma k'a sii a ban na, wolu le kisitɔ.

[23] Ni ai k'ài tɔlɔya so dɔ la, ài yi bɔli ka taa so gbɛlɛ la. Ǹ'i tuɲa fɔ ài yɛ, jani ài wɔlitɔ Isilan jamana so bɛ lɔtaamana, ǹe Mɔɔnivin Tanin kɛtɔ nala.

[24] Kalannaden tɛ buɲala ka timin aa kalanmɔɔ la. Jɔn gbazan tɛ buɲala ka timin aa jɔnfa la.

[25] Ni do kalannaden ka kɛ aa kalanmɔɔ ɲɔɔzii le, a dan ne ve. Ni do jɔn ka kɛ aa jɔnfa ɲɔɔzii le, a dan ne ve. A yi di? Ni do ai k'a fɔ lutii kɛmɔɔba ma ko jina kundiiba Biyɛzɛbɔ, ai tɛnala aa bonnamɔɔlu mafɔla ka timin wo la?

[26] Wo lɔ, ài kà siyan mɔɔ wolu ɲa. Fen doonnin suu suu tɛ je min la tɛnala nkɛnɛmayala, kumatɛ gbono ko ma k'a fɔ min tɛnala lɔnna.

[27] Ǹ na minnu fɔla ài yɛ doon nɔ, ài yi wolu fɔ bala lɔ. Ǹ na minnu fɔla ài tolo kɔlɔ kan majii lɔ, ài y'ài lɔ bon kɔkan ka wolu fɔ gbanɔkan nɔ.

[28] Mɔɔlu yi sene mɔɔ fali faala, kɛɛ ai tɛ se foi kɛla mɔɔ nunakili la. Ài kà siyan wolu ɲa fɔ Ala dein, min yi se mɔɔ nunakili ni a fali bɛ halakila jahanama.

[29] Wɔli mɛsɛnni kelen ne, ai yi kɔnɔni fila felela a la, kɛlɛ? Wo bɛ n'a kɛ, kɔnɔni wo kelen tɛ ben duu ma ni ài Fa Ala ma diɲa a ma.

[30] Àilu do, hali ài Fa Ala ka ài kunsi bɛ kɔndɛ lɔn.

[31] Wo lɔ, ài kà siyan. Àilu kulu gbeleyanin vɛ kɔnɔni jilika jilika le.

[32] Ni mɔɔ min v'a fɔla mɔɔlu ɲana ko ǹe le ta y'a le, ǹe gbazan kɛtɔ a fɔla ǹ Fa ɲana, min yi haijɛnɛ, ǹ ko ǹe le ta yi wo tii le.

[33] Ni do mɔɔ min v'a fɔla mɔɔlu ɲana ko ǹe ta tɛ a le, ǹe gbazan kɛtɔ a fɔla ǹ Fa ɲana, min yi haijɛnɛ, ǹ ko ǹe ta tɛ wo tii le.

[34] Ài k'ài mili ko ǹ nanin ka hɛlɛ kɛ duukolo kan. M̀ ma na hɛlɛ le, fɔ kɛlɛ.

[35] Ǹ nanin ka kɛ́ ni a fa falan, ka moso ni a ba falan, ka maamoso ni a mama falan.

[36] Mɔɔ juu bɔtɔ ai jɛlɛ balamɔɔlu le lɔ.

[37] Mɔɔ min vɛ a fa ni wo tɛ a ba kanuna ka timin ǹ na, wo tii tɛ se kɛla ǹa kɔbiladen ne. Mɔɔ min vɛ a denkɛ ni wo tɛ a denmoso kanuna ka timin ǹ na, wo tii gbazan tɛ se kɛla ǹa kɔbiladen ne.

[38] Ni do mɔɔ min ma diɲa ka a gbaankɔlɔman ta ka bila ǹ kɔ, wo tii tɛ se kɛla ǹa kɔbiladen ne.

[39] Baa ni mɔɔ min a fɛ ka a nin nakisi, wo tii bɔnɔtɔ nimaya la. Ni do mɔɔ min vɛ bɔnɔla a nin na ka bɛn ǹe ma, wo tii kɛtɔ a sɔlɔnna.

[40] Ni mɔɔ min k'ài mina kobɛn, wo tii vɛ m̀ mina kobɛn. Ni do mɔɔ min ka m̀ mina kobɛn, wo tii vɛ ǹ kelaba gbazan mina kobɛn.

[41] Ni mɔɔ min ka Ala ya keladen dɔ mina kobɛn k'a masɔlɔn keladen ne, keladen yi balayi min sɔlɔnna, wo tii gbazan kɛtɔ wo suu le sɔlɔnna. Ani ni do mɔɔ min ka Alaɲasiyanɲamɔɔ dɔ mina kobɛn k'a masɔlɔn Alaɲasiyanɲamɔɔ le, Alaɲasiyanɲamɔɔ kɛtɔ balayi min sɔlɔnna, wo tii gbazan kɛtɔ wo suu le sɔlɔnna.

[42] Ǹ'i tuɲa fɔ ài yɛ, ni mɔɔ min ka ǹa mɔɔ dɔɔyanin dɔ sɔ hali ji suma jiyafɛ ɲa kelen na k'a masɔlɔn ǹa kɔbiladen ne, wo tii tɛnala bɔnɔla balayi wo la feu.»