<Matiyu 7

[1] Isa ka to kumala, a vɛɛ: «Ài kà mɔɔlu jalaki, Ala kana àilu gbu jalaki.

[2] K'a masɔlɔn ài vɛ mɔɔlu jalakila teme, Ala kɛtɔ àilu gbu jalakila ten ne. Ài yi fen sumala ài mɔɔɲɔɔlu yɛ teme, Ala kɛtɔ a sumala ài yɛ ten ne.

[3] Mindɛ kɛnin i yi jilimuu lasaala i badenma ɲa ma, k'a talan i tɛ jilifɛlɛn yena, min yi ile gbu ɲa ma?

[4] A yi di? Ka jilifɛlɛn to i ɲa ma, i yi sene a fɔla i badenma yɛ ko: ‹I yi lɔ ǹ'i jilimuu bɔ i ɲa ma›?

[5] Ile filangafo! Fɔ i jilifɛlɛn bɔ i ɲa ma kunfɔlɔ le. Wo vɛ kɛla, i kɛtɔ yeni kɛla kobɛn ka jilimuu bɔ i badenma ɲa ma.

[6] Ài kà lɔhɔlɔma fen di wulunilu ma, sa ai kana seikɔ ài ma k'ài lɔfalafala. Ài kà lulu di kɔsɛlu ma, sa ai kana wo lɔdɔndɔn.»

[7] Isa ka to kumala, a vɛɛ: «Ài yi to Ala dalila, a do kɛtɔ ài sɔla. Ài yi to fen ɲininna Ala fɛ, a do kɛtɔ wo dila ài ma. Ài yi to da makɔnkɔnna, a do kɛtɔ da lakala ài yɛ.

[8] K'a masɔlɔn mɔɔ mɔɔ vɛ Ala dalila ko min ma, a do kɛtɔ wo le kɛla wo tii yɛ. Mɔɔ mɔɔ vɛ fen min ɲininna Ala fɛ, a do kɛtɔ wo dila wo tii ma. Mɔɔ mɔɔ do vɛ da makɔnkɔnna, a kɛtɔ da lakala wo tii yɛ.

[9] Kɛ́ mindɛ le y'ài lɔ, ni a den ka bulu maɲininga a la, a kɛtɔ kawakulun dila a ma?

[10] Ni wo tɛ, ni a den yi jɛɛ kɔ, a kɛtɔ sa minala ka a di a ma? Wo tɛ kɛla!

[11] Hali àilu minnu joso man ɲin, ài yi sene fen kein dila ài dennu ma. Ài ma la a la k'a fɔ ài Fa Ala min yi haijɛnɛ, wo yi sene fen kein lɔnna ka a di a maɲiningabalu ma ka timin ài ta la?

[12] Ni ài y'a fɛ mɔɔlu yi ko min bɛ kɛ ài yɛ, àilu gbu yi wo suu kɛ ai yɛ. A sɛvɛnin ten ne kela Musa ya Taulati lɔ, ani kela dɔgbɛlɛlu ya kitabulu lɔ.»

[13] Isa ka to kumala, a vɛɛ: «Ài yi don da dɔɔyanin fɛ baa siya min yi taala mɔɔ halakiya lɔ, wo da buɲanin ne, a do taama nɔɔyanin. Mɔɔ siyama le yi taala siya wo fɛ.

[14] Kɛɛ siya min yi taala nimaya banbali lɔ, wo donda dɔɔyanin, a do taama gbeleyanin. Mɔɔ minnu y'a yena, wolu ma siya.»

[15] Isa ka to kumala, a vɛɛ: «Ài yi jando ài jɛlɛ lɔ faɲafɔkelalasebalu ya ko lɔ. Ai y'ai jɛlɛ kɛla iwo saalu ka na ài ma, k'a talan soo fali le ai le.

[16] Ài kɛtɔ wolu lɔnna ai kɛkolu le ma, iwo kɔlɔman yi lɔnna a den ma teme. A yi di? Mɔɔ yi sene mangolon bɔla tazan na? Mɔɔ yi sene biyaki bɔla bin woninma la? Wo tɛ kɛla.

[17] Kɔlɔman kein bɛ yi den kein ne kɛla, kɛɛ do kɔlɔman yon yi den yon ne kɛla.

[18] Kɔlɔman kein tɛ se den yon kɛla, kɔlɔman yon gbazan tɛ se den kein kɛla.

[19] Kɔlɔman minnu tɛ den kein kɛla, wo bɛ tɛɛtɔ ka lafili taa la.

[20] Wo lɔ, ài yi sene faɲafɔkelalasebalu lɔnna ai kɛkolu ma.»

[21] Isa ka to kumala, a vɛɛ: «Mɔɔ min bɛ y'a fɔla m̀ ma ‹Fanma, Fanma,› wo bɛ tɛnala donna Ala ya masaya kɔlɔ, fɔ mɔɔ min yi ǹ Fa sawo kɛla, min yi haijɛnɛ.

[22] Kititɛɛlon, mɔɔ siyama kɛtɔ a fɔla ǹ yɛ ko: ‹Fanma, Fanma, ǹu ma kelaya kɛ i tɔɔ le lɔ? Ǹu ma jinalu gbɛn ka bɔ mɔɔlu kɔ i tɔɔ le lɔ? Ǹu ma kawanako siyama kɛ i tɔɔ le lɔ?›

[23] Wo lon, ǹ kɛtɔ a fɔla ai yɛ k'a gbɛ, ǹ ko: ‹M̀ ma ài lɔn feu. Àilu konyonkɛbalu, ài yi bɔ ǹ kɔ!›»

[24] Isa ka to kumala, a vɛɛ: «Mɔɔ mɔɔ vɛ a tolo malɔla ǹa kumakannu la k'a labato, wo tii kɛtɔ iwo kɛ́ hangilima min na aa bon lɔla fala kan.

[25] San ka na, kɔɔ ka fa, ani fɔɲɛ ka bɔ ka se bon wo ma. Kɛɛ bon ma te, k'a masɔlɔn a ju siinin tɛɛ fala le kan.

[26] Mɔɔ mɔɔ do vɛ a tolo malɔla ǹa kumakan minnu la, kɛɛ a do m'a labato, wo tii kɛtɔ iwo kɛ́ hangilindan, min na aa bon lɔla kiɲɛ kan.

[27] San ka na, kɔɔ ka fa, ani fɔɲɛ ka bɔ ka se bon wo ma k'a te fefe.»

[28] Isa bannin kuma wolu fɔla, aa kalanɲa ka jama kawakoya,

[29] k'a masɔlɔn a tɛɛ ai kalanna iwo setiiya yi min bolo mɔɔlu kanma. A tɛɛ tɛ ai kalanna iwo seliya kalanmɔɔlu tɛɛ a kɛla teme.