<Matiyu 23

[1] Wo kɔ, Isa vɛ kumala jama ni aa kɔbiladennu yɛ, a vɛɛ:

[2] «Ka mɔɔlu kalan kela Musa ya Taulati la, baale wo kalifanin seliya kalanmɔɔ ni Falisilu le la.

[3] Ai vɛ min fɔla ài yɛ, ài yi wo labato. Kɛɛ ai yi ko minnu kɛla, àilu kà wo ɲɔɔzii kɛ dɛ, k'a masɔlɔn ai yi min fɔla, ai tɛ wo kɛla.

[4] Ai yi doni gbililu silila ka wo sii mɔɔlu kun. Ai do tɛ diɲa hali k'ai bolokɔni kelen tuu a la ka mɔɔ wolu madɛmɛn dɔɔnin.

[5] Ai y'aiya kolu bɛ kɛla, sa mɔɔlu y'ai ye k'ai buɲa. Wo le y'a kɛla, ai yi Alatɔɔmasilininnu bilala ai kanna ka wolu labuɲa. Julu denni minnu silinin aiya faani senkɔlɔ, ai yi wolu jaanyana.

[6] Ai vɛ taala feetikɛya lɔ, ni wo tɛ Aladalibon na, ai yi ɲamɔɔ siiyalu le ɲininna.

[7] Ai vɛ taala lɔɔ lɔ, ai y'a fɛ mɔɔlu y'ai fo buɲa boloma. Ai y'a fɛ gbazan mɔɔlu y'a fɔ ai ma ko kalanmɔɔ.

[8] Kɛɛ ài kà diɲa mɔɔlu y'a fɔ ài ma ko kalanmɔɔ, k'a masɔlɔn kalanmɔɔ kelen ne y'ài bolo. Ài tɔ bɛ yi badenma le le.

[9] Ài kà a fɔ mɔɔ suu suu ma duukolo kan ko ài Fa, k'a masɔlɔn Fa kelen ne y'ài bolo, ni a yi Ala le, min yi haijɛnɛ.

[10] Ài kà diɲa mɔɔlu y'a fɔ ài ma ko kundii, k'a masɔlɔn kundii kelen ne y'ài bolo, ni a yi Masa Tɔɔmasenin ne.

[11] Mɔɔ min buɲanin ài bɛ le, wo tii le ka kan ka kɛ àiya bɔliden ne.

[12] Mɔɔ mɔɔ vɛ a fannɔbuɲala, Ala kɛtɔ wo tii lajiila. Ni do mɔɔ mɔɔ vɛ a fanmajiila, Ala kɛtɔ wo tii lajɛlɛla.»

[13] «Gbalo y'ài yɛ, seliya kalanmɔɔ ni Falisilu! Àilu filangafolu! K'a masɔlɔn ài yi Ala mataama siya datuunna mɔɔlu ɲa. Àilu gbu tɛ taamana siya wo kan, ado ài yi mɔɔlu dansiila sa ai kana a taama.

[15] Gbalo y'ài yɛ, seliya kalanmɔɔ ni Falisilu! Àilu filangafolu! K'a masɔlɔn ài yi taala duukolo fan bɛ lɔ ka kɔɔji tɛɛ, sa mɔɔ kelen yi tube ka don àiya diina lɔ. Kɛɛ ài vɛ a ladonna, ài y'a kɛla jahanamaden ne le ka timin àilu la.

[16] Gbalo y'ài yɛ, k'a masɔlɔn àilu minnu ɲa gbɛnin, ài y'ài jɛlɛ kɛla ɲabila le le. Ài vɛɛ ko ni mɔɔ dɔ k'a kalin lɔhɔlɔmabonba la, ko kalinni bɛlɛbɛlɛ tɛ. Ko kɔni ni mɔɔ dɔ k'a kalin lɔhɔlɔmabonba kɔnɔ sanu la, ài vɛɛ ko wo tii ka kan ka a kalinnikan mafa.

[17] Àilu ɲagbɛ kundannu! Mindɛ le buɲanin? Sanu le buɲanin baa lɔhɔlɔmabonba? Wo min yi sanu kɛla lɔhɔlɔma sanu le.

[18] Ài vɛɛ gbazan ko ni mɔɔ k'a kalin salakagbalan na, ko kalinni bɛlɛbɛlɛ tɛ. Ko kɔni salaka min yi gbalan kɔkan, ni mɔɔ k'a kalin wo la, wo le yi kalinni gbu gbu le.

[19] Àilu ɲagbɛlu! Mindɛ le buɲanin? Salaka le buɲanin baa salakagbalan? Wo min yi salaka kɛla lɔhɔlɔma salaka le.

[20] Ni mɔɔ k'a kalin salakagbalan na, fen fen y'a kan, wo tii v'a kalin wo bɛ la gbazan.

[21] Ni mɔɔ k'a kalin lɔhɔlɔmabonba la, wo tii vɛ a kali a la, ani Ala min siinin je.

[22] Ni mɔɔ k'a kalin haijɛnɛ la, wo tii v'a kalin Ala ya masayasiifen na, ani Ala min siinin a lɔ.

[23] Gbalo y'ài yɛ, seliya kalanmɔɔ ni Falisilu! Àilu filangafolu! Ài y'àiya gbelelɔfen mɛsɛnni bɛ jaa bɔla, k'a talan ài yi Ala ya seliya ko gbililu tola je, iwo telentiiya ko, ni hinandeya ko, ani kankelentiiya ko. Ài tɛɛ ka kan ka wolu kɛ kunfɔlɔ le, ka a tɔ la wolu kan.

[24] Àilu minnu ɲa gbɛnin, ài y'ài jɛlɛ kɛla ɲabila le le. Ài y'àiya minji masɛnɛla ka hali limɔɔ mɛsɛnnilu bɔ a lɔ, k'a talan ài yi ɲɔɔmɛ lakununna.

[25] Gbalo y'ài yɛ, seliya kalanmɔɔ ni Falisilu! Àilu filangafolu! Ài yi jiyafɛ ni nɛɛ kɔkala makola kobɛn. Kɛɛ wolu kɔnɔ fanin fen minnu la, ài na wo sɔlɔnna tɔɲɔli ni natabaya le lɔ.

[26] Ile Falisi ɲagbɛ! I yi jiyafɛ ni nɛɛ kɔnɔ le ko kunfɔlɔ le. Wo vɛ kɛla, a kɔkala gbazan sɛnɛyatɔ.

[27] Gbalo y'ài yɛ, seliya kalanmɔɔ ni Falisilu! Àilu filangafolu! Ài kɛnin iwo kabulu minnu kɔkala dagbɛnin keinya le k'a talan ai kɔnɔ fanin mɔɔ kolo ni nɔɔ suu bɛ dɔ la.

[28] Wo ɲa kelen ma, ài kɛnin mɔɔlu ɲana iwo Alaɲasiyanɲamɔɔlu, k'a talan ài kɔnɔ fanin filangafoya ni koyon na.

[29] Gbalo y'ài yɛ, seliya kalanmɔɔ ni Falisilu! Àilu filangafolu! Ài yi kelalu kabulu lɔla, ani Alaɲasiyanɲamɔɔ minnu sanin, ài yi wolu sudoonyalu masilila ka lakeinya.

[30] Ài vɛɛ: ‹Ni mɔ tɛɛ kɛ je mɔ bemanu ya waate lɔ, mɔ tɛɛ tɛ mɔ sen bila kelalu faa ko lɔ.›

[31] Ài y'a jiyala wo le lɔ ko àilu yi kela faabalu bɔzɔn ne le.

[32] A tɛɛ bɛn, ni ài yi taale ài bemanu ya baale tɔ dafa!

[33] Àilu sa kɛwonnu! Àilu fɔnfɔnnidennu! Ài kisitɔ jahanama jangata ma di?

[34] Wo le y'a kɛla, ǹ'i ɲiminɲɛmɛlu kelala ài ma ani hangilima ni seliya kalanmɔɔlu. Ài kɛtɔ a dɔlu gbaanna kɔlɔman ma k'ai faa, k'a dɔlu gbasi gbusan na àiya Aladalibonnu la. Ai vɛ kɛla bɔlila ka taa so suu suu la, ài kɛtɔ ai salanna k'ai tɔlɔya je.

[35] Wo lɔ, Alaɲasiyanɲamɔɔ bɛ minnu jeli vɛ bɔn mɔɔlu bolo dunuɲa, wo hakɛ bilatɔ ài kɔ, k'a ta hakɛtabali Habila ma, fɔɔ ka na a sii Balaki denkɛ Zakali la, ài ka min faa lɔhɔlɔmabonba ni salakagbalan wotɛ.

[36] Ǹ'i tuɲa fɔ ài yɛ, mɔɔ wo bɛ faa hakɛ bilatɔ bi mɔɔlu kɔ.»

[37] Isa vɛɛ: «Ɛɛ Jelusalɛm, Jelusalɛm, ile min yi ɲiminɲɛmɛlu faala ka Ala ya kelalasebalu bon kawa la. A lɔɔ tɛɛ ǹ na siɲa siyama le k'ài ladɛn iwo sisɛ y'a dennu ladɛnna teme k'ai doon a kawa kɔlɔ, kɛɛ ài ma diɲa a ma.

[38] Àiya bon nakolon totɔ ài bolo.

[39] Ǹ a fɔ ài yɛ, ài ɲa tɛnala lala ǹ kan butu fɔɔ ài v'a fɔla lon min na, ko: ‹Min yi nala Mɔtii tɔɔ lɔ, Ala yi balaka don wo tii lɔ.›»