<Matiyu 1

[1] Masa Tɔɔmasenin Isa ya jilijaalu ko fɔ sɛvɛ le ne. Isa tɛɛ nabi Dawuda ni nabi Ibulahima bɔzɔn ne le.

[2] Ibulahima ka Isiyaka sɔlɔn. Isiyaka ka Janguba sɔlɔn. Janguba ka Juda sɔlɔn ani a badenmakɛ tɔlu.

[3] Juda ka Pɛlɛzi ni Zela sɔlɔn. Wolu ba tɔɔ yi ko Tamali. Pɛlɛzi ka Hesilon sɔlɔn. Hesilon ka Alamu sɔlɔn.

[4] Alamu ka Aminadabu sɔlɔn. Aminadabu ka Nason sɔlɔn. Nason ka Saliman sɔlɔn.

[5] Saliman ka Bowozi sɔlɔn. Wo ba tɔɔ yi ko Lahabu. Bowozi ka Hobedi sɔlɔn. Wo ba le tɛɛ Lutu le. Hobedi ka Jese sɔlɔn.

[6] Jese ka nabi Dawuda sɔlɔn. Dawuda ka nabi Sulimana sɔlɔn. Wo ba tɛɛ Uliya moso le le.

[7] Nabi Sulimana ka Lobohamu sɔlɔn. Lobohamu ka Abiya sɔlɔn. Abiya ka Asafu sɔlɔn.

[8] Asafu ka Josafati sɔlɔn. Josafati ka Jalamu sɔlɔn. Jalamu ka Uziya sɔlɔn.

[9] Uziya ka Jotamu sɔlɔn. Jotamu ka Akazi sɔlɔn. Akazi ka Ezekiyasi sɔlɔn.

[10] Ezekiyasi ka Manase sɔlɔn. Manase ka Amɔn sɔlɔn. Amɔn ka Josiya sɔlɔn.

[11] Josiya ka Jekooniya ni denkɛ gbɛlɛlu sɔlɔn. Jekoniya tele lɔ, Babilɔnkalu ka Isilanmɔɔlu mina ka taa ai le jɔnya lɔ Babilɔn jamana lɔ.

[12] Isilanmɔɔlu senin kɔ Babilɔn jamana lɔ, Jekoniya ka Salatiyɛli sɔlɔn. Salatiyɛli ka Zolobabɛli sɔlɔn.

[13] Zolobabɛli ka Abihudi sɔlɔn. Abihudi ka Eliyakimu sɔlɔn. Eliyakimu ka Azoli sɔlɔn.

[14] Azoli ka Sadoki sɔlɔn. Sadoki ka Akimu sɔlɔn. Akimu ka Eliyudi sɔlɔn.

[15] Eliyudi ka Eleyasali sɔlɔn. Eleyasali ka Matan sɔlɔn. Matan ka Janguba sɔlɔn.

[16] Janguba ka Jusufu sɔlɔn. Jusufu ka Moyamu fulu. Moyamu wo le ka Isa sɔlɔn, mɔɔlu y'a fɔla min ma ko Masa Tɔɔmasenin.

[17] K'a damina nabi Ibulahima ma, jilijaa tan ni naani le ka timin ka sii nabi Dawuda la. K'a damina nabi Dawuda ma ka na a sii Isilanmɔɔlu mina waate la ka taa jɔnya lɔ Babilɔn jamana lɔ, jilijaa siiyama tan ni naani tɛɛ vɛ timin. K'a damina aiya mina waate ma Babilɔn jamana lɔ ka na a sii Masa Tɔɔmasenin Isa la, jilijaa siiyama tan ni naani tɛɛ vɛ timin kɔtunun.

[18] Masa Tɔɔmasenin Isa sɔlɔnnin teme, wo le ne. A ba Moyamu maminanin tɛɛ Jusufu bolo. Kɛɛ jani a yi taa i sii Jusufu kun ka kɛ a moso le, Lɔhɔlɔma Fɔɲɛ k'a kɛ a ka kɔnɔ ta.

[19] Jusufu tɛɛ mɔɔ telennin ne le. Wo le k'a kɛ, a ka Moyamu kɔnɔma ye mingɛ, a tɛɛ tɛ a fɛ ka a lamaaya. A k'a miliya ta wo lɔ ko a yi Moyamu bila doon nɔ.

[20] Ka Jusufu to i milila wo ma, Mɔtii ya mɛlɛka ka a jɛlɛ jiya a la kibalo lɔ. A vɛɛ a yɛ: «Jusufu, Dawuda bɔzɔn, i kà siyan Moyamu fulu ko lɔ k'a masɔlɔn Lɔhɔlɔma Fɔɲɛ le n'a kɛla, a vɛ kɔnɔ ta.

[21] A kɛtɔ denkɛ sɔlɔnna. I y'a tɔɔ la ko Isa, k'a masɔlɔn ale kɛtɔ aa mɔɔlu lakisila ai julumbulu ma.»

[22] Wo bɛ ka kɛ sa Mɔtii ya kuma min fɔnin kela bolo, wo ma yi fa, ko:

[23] «Singbili min ma kɛ́ ko lɔn ba bene, wo kɛtɔ kɔnɔ tala ka den sɔlɔn. Ai kɛtɔ a fɔla a ma ko Emanuɛl.» Emanuɛl kɔlɔ le ko Ala yi mɔ fɛ.

[24] Jusufu k'i wuli sunɔɔ lɔ mingɛ, a k'a kɛ iwo Mɔtii ya mɛlɛka k'a fɔ a yɛ teme. A ka taa Moyamu ta ka na a le aa bon na ka a kɛ a moso le.

[25] Kɛɛ ai ma kafonɲɔɔya kɛ fɔɔ Moyamu ka denkɛ sɔlɔn. Ado Jusufu ka den tɔɔla ko Isa.