<Yunusa 4

[1] Kɛɛ sokɔnɔmɔɔlu ya tube ko ma diya Yunusa yɛ feu. A do ka mɔnɛ bubale

[2] ka mɔ Tii Ala madiya, a vɛɛ: «Ɛɛ ǹ Tii Ala, ǹ tɛɛ ǹa jamana lɔ waate min nɔ, m̀ m'a fɔ, ǹ ko, i kɛtɔ a kɛla ten ne? Wo le k'a kɛ, ǹ na bɔlila ka taa Talisi. Kamasɔlɔn ǹ tɛɛ k'a lɔn ne feu ko i le le Ala le, min ya hena ni kanundeya walanin kosɛvɛ. I tɛ mɔnɛla jona. I i joso lɔgbɛla adamadennu yɛ. I v'a fɔla ko i kɛtɔ jangatali kɛla, i yi wo tola je.

[3] Wo lɔ saa mɔ Tii Ala, ǹ'a fɛ i yi m̀ bɔ dunuɲa yi ne. Kamasɔlɔn saya fisayanin m̀ ma ka timin niimaya la.»

[4] Wo fɔnin Yunusa bolo, mɔ Tii Ala do vɛɛ a yɛ: «A yi di? I jo yi mɔnɛ ko lɔ?»

[5] Wo kɛnin, Yunusa ka bɔ Ninive k'i sii so telebɔ fannɔ. A do ka gbaa dɔ lɔ k'a sii wo duulen kɔlɔ ka makɔnɔli kɛ, fɔsa a a ye Ala kɛtɔ ko min kɛla so la.

[6] Wo waate, mɔ Tii Ala ka kɔlɔmajuni dɔ lafɛlɛn ka jɛlɛ Yunusa kunma, fɔsa Yunusa tɛɛ duulen dɔ sɔlɔn a josolajiiko lɔ. Ado kɔlɔmajuni wo ya ko ka diya Yunusa yɛ kosɛvɛ.

[7] Kɛɛ wo kɛnɛ bɔnin, Ala ka tumu dɔ lɔ kɔlɔmajuni wo dɔnna, a do ka ja.

[8] Tele ka bɔ mingɛ, Ala ka fɔɲɛ gbanin lana ka bɔ telebɔ fannɔ. Tele ka gba Yunusa la haan fɔɔ a tɛɛ kilon bolo le ma. A ka Ala madiya ko a yi sa, a vɛɛ: «Saya fisayanin m̀ ma ka timin ka timin niimaya la.»

[9] Ala ka Yunusa maɲininga, a vɛɛ: «A yi di? I jo yi mɔnɛ lɔ kɔlɔmajuni jako lɔ?» Yunusa vɛɛ: «Aan! Ǹ jo y'a lɔ! M̀ɛ mɔnɛ haan fɔɔ ka ǹ diɲa saya ma.»

[10] Mɔ Tii Ala vɛɛ: «Kɔlɔmajuni wo hena y'i la. I do ma baale suu suu kɛ aa ko lɔ, min tɛɛ a labuɲa. A na fɛlɛnna su kelen lɔ ka ja su kelen lɔ.

[11] Ninive so ba do? Je mɔɔlu yi mɔɔ waa kɛmɛ ni mɔɔ waa muan ni kɔ le le, minu ma koyon ni kokein wotɛbɔ lɔn. Aiya kolofennu fana walanin kosɛvɛ. M̀ man kan ka hena wolu la?»