<Yunusa 2

[1] Wo kɛ, mɔ Tii Ala ka jɛɛ ba dɔ lana ka Yunusa lakunun. Yunusa ka tele sawa ni su sawa le kɛ jɛɛ kɔnɔ.

[2] A ka to je, a ka a Tii Ala madiya.

[3] A vɛɛ: «Ǹ Tii Ala, ka ǹ to ǹ josotɔlɔya lɔ, ǹ n'i madiyala, i do na ǹ javila. Ka ǹ to sulu ya so la, ǹ na gbanɔla dɛmɛliko lɔ, i do na ǹ kan mɛnna.

[4] Kamasɔlɔn i na ǹ lafilila kɔɔji lɔ. Ǹ na jiila haan fɔɔ duunba kɔlɔ. Ka ǹ to ji kɔlɔ, i ka to kɔɔji jamannin lanala ka timintimin ǹ kunna.

[5] Ǹ tɛɛ m̀ milila ko i vɛ m̀ gbɛn ka m̀ bɔ i ɲakɔlɔ, ko ǹ tɛnala iya lɔhɔlɔmabonba yena butu.

[6] Kɔɔji na ǹ lamininna ka ǹ nunakili bɔ ǹ nɔ. Ǹ na jiila haan fɔɔ kɔɔji duunba kɔlɔ. Kɔɔjikɔlɔbinnu mɔlɔmɔlɔnin tɛɛ ǹ kunma.

[7] Ǹ na jiila haan fɔɔ tinilu sen kɔlɔ. Ǹ na sena sulu ya so la, min donda tɛɛ sɔɔla ǹ kɔma kudein. Kɛɛ ile, ǹ Tii Ala, i na ǹ ɲɛnɛma lajɛlɛla ka bɔ diɲa gboon lɔjaannin wo kɔnɔ.

[8] Ǹ Tii Ala, ka ǹ to saya boloma, ǹ hangili ka to i lɔ. Ǹa madiyalikan na sena i ma iya lɔhɔlɔmabonba la.

[9] Mɔɔ minu yi joo nafatalu batola, wolu y'ai jɛlɛ majaanyala Ala ya nɛɛma la.

[10] Kɛɛ ǹe koni, ǹ kɛtɔ salaka bɔla i yɛ, ka dɔɔni la ka balika bɔ i yɛ. Ǹ na dakan min tala i yɛ, ǹ kɛtɔ wo mafala. Ǹ Tii Ala, ile kelen yi se mɔɔ lakisila.»

[11] Wo kɔ, mɔ Tii Ala ka jɛɛ ba lɔ, a do ka Yunusa labɔ gbele ma.