<Yunusa 3

[1] Wo kɛ, mɔ Tii Ala ka kuma Yunusa yɛ a siɲa filana lɔ,

[2] a vɛɛ: «I wuli, i yi taa Ninive so ba la. Ǹ na min fɔla i yɛ, i yi wo lase Ninivekalu ma.»

[3] Wo kɛ, Yunusa k'i wuli ka taa Ninive, iwo mɔ Tii Ala n'a fɔla a yɛ teme. Ninive tɛɛ so ba dɛgbɛ le le, mɔɔ tɛɛ tele sawa jate kɛle a lɔtiminko lɔ.

[4] Yunusa do ka tele kelen muumɛ kɛ so lɔtiminna. Wo kɛ, a vɛ kawanili kɛla, a vɛɛ: «A vɛ to tele binaani, Ninive halakitɔ!

[5] Ninivekalu ka limaniya Ala ya samakan ma. Ai vɛɛ ko mɔɔ bɛ yi sundon ka sayakasifaani bila ai kanna, k'a ta ɲamɔɔlu ma ka taa sii fantannilu la, ka wo kɛ ai tube tɔɔmase le.

[6] Samakan wo ka se Ninive masakɛ ma mingɛ, a k'i wuli aa masayasiifen nɔ ka aa pipɔ bɔ ka sayakasifaani bila a kanna, ka ban k'i sii buuli lɔ.

[7] Wo kɔ, a ka mɔɔlu lɔ kela lasena Ninivekalu ma ko: «Masakɛ ni aa ɲamɔɔlu vɛ tɔn sii ko mɔɔ ni kolofen suu suu k'i min, kumatɛ dɔnni kɛ ko ma.

[8] Mɔɔ ni aiya kolofen bɛ yi sayakasifaani bila ai kanna, k'ai kasi kan ba lɔ Ala yɛ. Bɛ yi koyon ni balawu to je.

[9] Jene k'a lɔn? Tumadɔ Ala kɛtɔ a miliya jɛlɛmana ka aa mɔnɛ to je, fɔsa mɔ kana halaki.»

[10] Ala k'a ye mingɛ ko Ninivekalu vɛ nimisa ka aiya koyonnu boloka, a ka a miliya jɛlɛma. A ma ai jangata iwo a n'a fɔla teme.