<Yunusa 1

[1] Lon dɔ, mɔ Tii Ala ka kuma Amitai den Nabi Yunusa yɛ,

[2] a vɛɛ: «I wuli, i yi taa Ninive so ba kɔnɔ k'ai makuma, kamasɔlɔn aiya koyon vɛ wala ǹ ɲakɔlɔ.»

[3] Kɛɛ Yunusa k'i wuli ka Talisi siya mina, fɔsa a yi mataa mɔ Tii Ala la ka bɔ a ɲakɔlɔ. A ka se Jopa so kɔnɔ ka kulunba dɔ talan je, min tɛɛ taala Talisi. A ka kulun sala ka don a kɔnɔ, ko a yi taa ai fɛ Talisi, fɔsa a yi mataa mɔ Tii Ala la ka bɔ a ɲakɔlɔ.

[4] Wo kɛ, mɔ Tii Ala ka fɔɲɛ ba lana kɔɔji kɔkan. Kɔɔji jamannin tɛɛ bubale fɔɔ kulun tɛɛ tiɲa boloma.

[5] Kulunbɔlibalu ka siyan bubale. Ado ai kelenkelenna bɛ tɛɛ ai tiilu madiyala ai lakisi ko lɔ, ani ka aiya donilu lafili kɔɔji lɔ, fɔsa kulun tɛɛ feya kɔɔji kɔkan. Wo k'a talan Yunusa tɛɛ vɛ jii kulun kɔlɔla lɔ. A do lanin tɛɛ sunɔɔ lɔ kosɛvɛ.

[6] Kulun ɲamɔɔ ka na a ma k'a fɔ a yɛ, a vɛɛ: «Mindɛ kɛnin i lanin sunɔɔ lɔ? I wuli, i i tii madiya! Tumadɔ wo le kɛtɔ henala mɔ la, fɔsa mɔ kana halaki.»

[7] Ado kulunbɔlibalu k'a fɔ i ɲɔɔ yɛ, ai vɛɛ: «Ài m'i kalabila kɛ k'a lɔn gbalo min sabu yi mɔɔ min ne.» Ai ka kalabila kɛ mingɛ, kala ka Yunusa mina.

[8] Wo lɔ, ai ka Yunusa maɲininga, ai vɛɛ: «A fɔ mɔ yɛ. Gbalo min sabu yi jene le? Ile do, i yi baale suu mindɛ kɛla? I bɔnin min ne? Jamana mindɛ mɔɔ i le? Siboloma mindɛ mɔɔ le i le le?»

[9] Yunusa k'ai javi, a vɛɛ: «Hebulu le ǹ ne. Ǹ'i mɔ Tii Ala le batola, sangbolo Tii min na kɔɔji ni duukolo danna.»

[10] Ai ka siyan bubale wo lɔ, kamasɔlɔn Yunusa tɛɛ v'a fɔ ai yɛ ko a tɛɛ bɔlila le ka bɔ mɔ Tii Ala ɲakɔlɔ. Ai do vɛɛ a yɛ wo lɔ: «I na wo kɛla mindɛ lɔ?»

[11] Kɔɔji ka to jamanna ka timin a kunfɔlɔ ta la. Wo lɔ, ai vɛɛ Yunusa yɛ: «M'i mindɛ k'i la fɔsa kɔɔji lɔ yi suma?»

[12] Yunusa vɛɛ: «Ài yi m̀ mina ka ǹ lafili kɔɔji lɔ. Wo vɛ kɛla, kɔɔji kɛtɔ sumala, kamasɔlɔn ǹ k'a lɔn ne k'a fɔ ko fɔɲɛ ba min wulinin ǹe le ya ko lɔ.»

[13] Wo bɛ n'a kɛ, kulunbɔlibalu k'ai lɔja ai fanga bɛ la, fɔsa ai tɛɛ gbele masɔlɔn. Kɛɛ ai ma se, kamasɔlɔn kɔɔji ka to jamanna ka timin a kunfɔlɔ ta la.

[14] Wo lɔ, ai ka mɔ Tii Ala madiya, ai vɛɛ: «Ɛɛ, mɔ Tii Ala. I jon. I kà mɔ halaki kɛ́ min faa ko lɔ. A vɛ kɛla hakɛtabali le, i kà a hakɛ bɔ mɔ lɔ. Kamasɔlɔn ile mɔ Tii Ala na min bɛ kɛla ka bɛn i sawo le ma.»

[15] Wo lɔ, ai ka Yunusa mina ka a lafili kɔɔji lɔ, ado kɔɔji lɔ ka sumaya toe.

[16] Kulunbɔlibalu ka wo ye mingɛ, ai ka siyan mɔ Tii Ala ɲa kosɛvɛ. Wo kɔ, ai ka kolofen dɔ faa ka salaka bɔ mɔ Tii Ala yɛ ka dakan ta a yɛ.