[1] Wo kɛ, Jusufu k'i fili a fa fuleni lɔ ka a sumu a taman nɔ, a vɛ kasila.
[2] Jusufu ka jamali di aa dɔtɔlɔlu ma, ko ai y'a fa fuleni lɔbɛn, min y'a kɛ, a kana tolin. Ai do ka taa Janguba fuleni lɔbɛn,
[3] ka tele binaani (40) kɛ wo baale la, kamasɔlɔn fuleni lɔbɛn baale yi waate wo jate le tala. Misilankalu do ka tele biwolowulan (70) kɛ Janguba saankasila.
[4] Aa saankasi waate dafanin, Jusufu k'a fɔ masakɛ lankannu yɛ, a vɛɛ: «Ni ǹa ko diyanin ka kɛ ài yɛ, ài yi diɲa, ài yi taa ǹ kumakan lase masakɛ ma, ài vɛɛ:
[5] ‹Ǹ fa ǹ na ǹ lasɛla, a vɛɛ: «Ǹ'i sa bolo le ma. Ǹ na kawawoo kabulu min lɔbɛnna ǹ jɛlɛ yɛ Kanaan duu lɔ, i ka kan ka ǹ sudoon je le.» Wo lɔ saa, i yi diɲa, ǹ'i taa ǹ fa sudoon woja. Wo vɛ banna, ǹ kɔseitɔ.› »
[6] Masakɛ do ka javi di, a vɛɛ: «Taa i fa sudoon, iwo i n'i sɛla a yɛ teme.»
[7] Wo kɛnin, Jusufu ka taama lawuli ka taa a fa sudoonya lɔ. Masakɛ kankɔlɔsiilu bɛ ka taa a fɛ, ani masakɛ ya bonna ɲamɔɔlu bɛ, aini Misilanka ɲamɔɔlu bɛ,
[8] ka la Jusufu ya demaya bɛ kan, ani a badenmakɛlu, aini a fa ya demayalu bɛ. Ai ka aiya denni le lu to ai kɔ dein Gosɛn duu kɔnɔ, ani aiya saa ni bani ni nisilu.
[9] Kɛlɛkɛwotololu ni sootiilu fana ka talan Jusufu malɔ lɔ. Ai bɛ lakafonnin ka kɛ jamakulu ba dɛgbɛ le le.
[10] Ai se mingɛnin dingila dɔ lɔ, ai y'a fɔla min ma ko Atadi malogbasiya, min yi Julidɛn kɔɔ telebɔ fannɔ, ai bɛ ka saankasi ba kɛ je josomakasa boloma. Jusufu do ka a fa saankasi kɛ tele wolowulan kɔlɔ.
[11] Kanaanka duulennu na ai ye mingɛla saankasi la Atadi malogbasiya lɔ, ai do vɛɛ: «Misilankalu yi saankasi ba le la yi ne!» Wo le k'a kɛ, woja tɔɔ ka la ko Abeli-Misilan (wo kɔlɔ le ko «Misilankalu ya saankasiya»). Woja yi Julidɛn kɔɔ telebɔ fan ne lɔ.
[12] Janguba denkɛlu ka ko bɛ kɛ iwo a na ai jamalila teme.
[13] Ai ka taa ai fa fuleni le Kanaan duu lɔ, ka a sudoon kawawoo kabulu lɔ Makipela, Mamele telebɔ fannɔ, Ibulahima tɛɛ vɛ kawawoo ni sɛnɛduu min san Hɛtika kɛ́ Efelon ma ka a kɛ aa kabuluso le.
[14] Jusufu wɔlinin a fa sudoonna, ale ni a badenmalu ani saankasikɛba tɔ bɛ ka seikɔ Misilan.
[15] Jusufu kɔlɔnu k'a ye ngɛ ko ai fa tɛ je butu, ai k'a fɔ i ɲɔɔ yɛ, ai vɛɛ: «Mɔ na koyon min bɛ kɛla Jusufu la, tumadɔ a yi wo ladalola a josokun nɔ hali bi. Ni a k'a fɔ ko a yi wo julu salala mɔ lɔ do?»
[16] Wo fɔ, ai ka sama bila Jusufu ma, ai vɛɛ: «I fa tɛɛ a nii la waate min nɔ, a ka jamali min ne di, ko:
[17] ‹A fɔ Jusufu yɛ ko: I kɔlɔnu na koyon ba le kɛla i la, ka i hakɛ ta, kɛɛ i jon, i yi aiya kolɔtiɲa lɔkoto.› Wo lɔ saa, i jaani le, i yi maa kolɔtiɲa lɔkoto, ǹu minu yi Ala ya bɔiden ne, i fa tɛɛ Ala min batola.» Kuma wo mɛn Jusufu bolo, a vɛ kasila.
[18] Wo kɛ, Jusufu kɔlɔnu jɛlɛkanu ka na k'i kɛ duu ma a sen kɔlɔ, ai v'a fɔla, ai vɛɛ: «A ye, mɔ vɛ kɛ iya jɔnnu le.»
[19] Jusufu k'a fɔ ai yɛ, a vɛɛ: «Ài kà siyan. Ǹ tɛnala ǹ jɛlɛ bilala Ala nɔ lɔ.
[20] Ài na kojuu le jatesiila ǹ kanma, kɛɛ Ala v'a jɛlɛma koɲuma le, min y'a kɛ, mɔɔ siyama yi kisi bi, iwo a kɛnin teme yi ne.
[21] Wo lɔ saa, ài kà siyan. Ǹ kɛtɔ àilu ni àiya dennilu bɛ lasonna.» Jusufu ka kuma ai fɛ diyaɲɛ boloma, k'ai josolajii.
[22] Wo le k'a kɛ, Jusufu ni a fa ya demayalu ka to Misilan. Jusufu si danmajiya ka kɛ san kɛmɛ ni tan (110) ne le.
[23] A ka a tolominalu ye, minu tɛɛ a den Efilaimu ni a den Manase ta mamanilu le. Manase denkɛ Makili, wo ta dennu fana ka sɔlɔn Jusufu sen kan.
[24] Jusufu k'a fɔ a badenmalu yɛ, a vɛɛ: «Ǹ'i sa bolo le ma, kɛɛ Ala natɔ aa henandeya lasena ài ma, k'ài labɔ duu min nɔ, ka taa ài le duu wo lɔ, a n'i kalinna Ibulahima, Isiyaka ni Janguba yɛ ka bɛn duu min ya ko ma.»
[25] Wo kɛ, Jusufu ka Janguba denkɛlu lasɛ, a vɛɛ: «Ài yi sɛ ǹ yɛ, k'a fɔ ko Ala vɛ aa henandeya lasena ài ma waate min nɔ, wo vɛ kɛla, ài kɛtɔ ǹ kololu labɔla jannɔ ka taa ai le ài bolo.»
[26] Jusufu si danmajiya ka kɛ san kɛmɛ ni tan (110) ne le. Wo dafanin, a ka sa. Misilankalu ka a fuleni lɔbɛn, min y'a kɛ, a kana tolin, ka ban k'a la sukesu kɔnɔ Misilan jamana lɔ.