[1] Waate wo lɔ, Ibulama moso Salayi tɛɛ ma den sɔlɔn ba a yɛ bene. Misilanka singbili dɔ tɛɛ Salayi bolo jɔnya la, min tɔɔ tɛɛ ko Hajala.
[2] Lon dɔ, Salayi k'a fɔ Ibulama yɛ, a vɛɛ: «Komi mɔ Tii Ala vɛ ǹ lalɔ ka bɔ densɔlɔn ma, wo ma, ǹ'a fɛ i yi ǹa jɔnmoso Hajala masi. Tumadɔ ǹ'i sene kɛla dentii le ka bɛn ale ma.» Ibulama do ka diɲa Salayi ya kuma wo ma.
[3] Wo le k'a kɛ, Ibulama moso Salayi ka aa Misilanka jɔnmoso Hajala di a ma fulu boloma. Hajala ta waate Ibulama bolo, wo na bɛnna a san tan ne ma Kanaan duu lɔ.
[4] Ibulama k'i la Hajala fɛ, wo do ka kɔnɔ ta. A k'a ye ngɛ ko a kɔnɔma le, a ka jɔ damina aa jɔnba ma.
[5] Salayi k'a fɔ Ibulama yɛ, a vɛɛ: «Ǹ'i tɔlɔya min nɔ yi ni, ile le nɔ yi! Ǹ na ǹa jɔnmoso dila i ma, kɛɛ a v'a ye ngɛ ko a kɔnɔma le, a vɛ jɔ damina m̀ ma. Mɔ Tii Ala yi wo kiti tɛɛ ǹe ni ile wotɛ!»
[6] Ibulama ka Salayi javi, a vɛɛ: «Iya jɔnmoso yi ile le fanga kɔlɔ. Ko ko v'i diyala, i yi wo kɛ a la.» Wo kɛ, Salayi ka Hajala mina a ɲa juu ma, haan fɔɔ Hajala ka bɔli a ma.
[7] Hajala ka to falakɔɔ dɔ dafɛ fuwa lɔ, Suli siya la, mɔ Tii Ala ya mɛlɛka ka a kunkɔlɔbɛn je.
[8] Mɛlɛka k'a fɔ a yɛ, a vɛɛ: «Ile Hajala, Salayi ya jɔnmoso, i bɔtɔ min? I taatɔ min?» Hajala k'a javi, a vɛɛ: «Ǹ'i bɔlila ǹa jɔnba Salayi le ma.»
[9] Mɔ Tii Ala ya mɛlɛka k'a fɔ a yɛ, a vɛɛ: «I kɔsei iya jɔnba fɛlɔ, i i fanmajii a yɛ.»
[10] Mɔ Tii Ala ya mɛlɛka vɛɛ kɔtunun: «Ǹ kɛtɔ i bɔzɔnnu siyayala bɛlɛbɛlɛ kɛ, fɔɔ ai dan tɛnala sena lɔnna ka bɛn ai wala jate ma!»
[11] Mɔ Tii Ala ya mɛlɛka k'a fɔ a yɛ kɔtunun, a vɛɛ: «A ye! I kɔnɔma le. I kɛtɔ denkɛ sɔlɔnna, i yi wo tɔɔla ko Sumayila (wo kɔlɔ le ko «Ala a mɛnna»), kamasɔlɔn i Tii Ala vɛ iya makasilikan mɛn.
[12] I denkɛ kɛtɔle iwo sofaliniwala. A kɛtɔ a bolo lawuli le la mɔɔ bɛ kanma, mɔɔ bɛ fana kɛtɔ ai bolo lawulila a kanma, a do siitɔ a ta fan jɛ k'a mataa a badenmalu bɛ la.»
[13] Wo le k'a kɛ, Hajala k'a fɔ mɔ Tii Ala ma ko: «Ile Ala min yi ǹ yena», kamasɔlɔn a k'a fɔ, a vɛɛ: «Min ɲa yi ǹ na, ǹ ɲa vɛ la wo kan.»
[14] Ka bɛn wo ma, ai k'a fɔ kɔlɔn wo ma ko Lahayi-Loyi (wo kɔlɔ le ko: «Niimayatii le yi ǹ yena»). Kɔlɔn wo yi Kadɛsi ni Beledi le wotɛ.
[15] Wo timinnin kɔ, Hajala ka denkɛ sɔlɔn Ibulama yɛ. Ibulama ka a denkɛ tɔɔla ko Sumayila.
[16] Sumayila sɔlɔn Hajala bolo, wo na bɛnna Ibulama sɔlɔn san bisein ni wɔɔlɔ (86) le ma.