[1] San fila timinnin kɔ, Misilan masakɛ ka siwo, ka a jɛlɛ lɔnin ye Nili kɔɔ kawun na.
[2] A ka to ko lasaala, ka nisi wolowulan ye bɔla kɔɔ kɔlɔ, minu tɔlɔnin tɛɛ k'ai keinya kosɛvɛ, ai vɛ kaa dɔnna kɔɔ kawun na.
[3] Wo ye a bolo, nisi wolowulan gbɛlɛ ka bɔ kɔɔ kɔlɔ, minu balanin tɛɛ k'ai kɛwonya. Wolu do ka t'i lɔ nisi kunfɔlɔlu tɔɔfɛ kɔɔ kawun na.
[4] Wo kɛ, nisi balaninnu ka nisi tɔlɔnin wolowulan wolu bɛ dɔn. Wo kɛ, masakɛ vɛ kununna.
[5] A ka sunɔɔ kɔtunun ka siwo gbɛlɛ kɛ. A do ka sɛnɛfen tizan wolowulan ye gban kelen na, ai den bɛ kumayanin k'a keinya.
[6] Masakɛ ka to ko lasaala, ka tizan wolowulan gbɛlɛ fɛlɛntɔla ye, minu lafɔlɔnin tɛɛ k'a kɛ iwo telema fɔɲɛ vɛ sena bin ma.
[7] Wo kɛ, tizan lafɔlɔnin wolu ka tizan kuma wolowulan wolu bɛ dɔn. Wo kɛ, masakɛ ka kunun k'a ye ko siwo le tɛɛ.
[8] Wo kɛnɛbɔ sɔɔmadala, masakɛ tɛɛ niimakumun nɔ. Wo le k'a kɛ, a ka Misilan basitii ni lɔnnilalu bɛ kili ka aa siwo wolu ɲajiya ai la, kɛɛ ai dɔ pai ma se siwo wolu kɔlɔ fɔla a yɛ.
[9] Wo kɛ, Misilan masakɛ ya minnifen ladan kuntiiba k'a fɔ a yɛ, a vɛɛ: «Ǹ hangili vɛ bila ǹa kolɔtiɲa lɔ bi.
[10] Ile masakɛ ka mɔnɛ iya bɔidennu ma waate min nɔ, i ka ǹe ni iya bulugbasi kuntiiba bila kaso la lakanali kuntiiba ya bon na.
[11] Ǹu mɔɔ fila ka siwo su kelen nɔ, maa siwo bɛ ni a suu, siwo wolu bɛ ni ai ta kɔlɔ.
[12] Wo k'a talan, Hebuluka kavelen dɔ tɛɛ mɔ fɛ kaso la, min tɛɛ lakanali kuntiiba ya bɔiden ne. Ǹu mɔɔ fila ka maa siwolu ɲajiya a la ngɛ, a ka wolu kɔlɔ fɔ mɔ yɛ, siwo wolu bɛ ni ai ta kɔlɔ.
[13] Ko bɛ do ka kɛ iwo a n'a fɔla mɔ yɛ teme. Ǹe do la ka seikɔ ǹ lɔya kɔlɔ lɔ, kɛɛ bulugbasi kuntiiba wo ka dɛn jili la.»
[14] Wo kɛ, Misilan masakɛ ka sama bila Jusufu ma, ko a yi na. Ai do k'ai lateleja ka Jusufu labɔ kaso la. A wɔlinin a kun ni a bomosi bɛ lila, ani ka a kannafaanilu mafalin, a ka t'i lɔ masakɛ kɛɛna.
[15] Masakɛ do vɛɛ Jusufu yɛ: «Ǹ na siwo le kɛla, kɛɛ mɔɔ ma sɔlɔn ba min y'a kɔlɔ fɔ ǹ yɛ. Ǹ n'a mɛnna ko i senin siwo kɔlɔ fɔla.»
[16] Jusufu ka masakɛ javi, a vɛɛ: «Wo see tɛ ǹe jɛlɛkanu yɛ, kɛɛ Ala le kɛtɔ javili dɔ dila, min yi bɛn i ma.»
[17] Wo fɔ Jusufu bolo, masakɛ vɛɛ a yɛ: «Ǹ na siwola ka ǹ jɛlɛ lɔnin ye Nili kɔɔ kawun na.
[18] Ǹ ka to ko lasaala, nisi wolowulan ka bɔ kɔɔ kɔlɔ, ai tɔlɔnin tɛɛ k'ai keinya kosɛvɛ, ai vɛ kaa dɔnna kɔɔ kawun na.
[19] Wo kɛ, nisi wolowulan gbɛlɛ ka na dɔ wolu kɔ, minu balanin tɛɛ k'ai kɛwonya, k'ai kɛ kenkelen. Ǹ tɛɛ ma nisi kɛwonyanin ye ba Misilan fan suu suu lɔ ka se nisi wolu lɔ.
[20] Telemanin, nisi balaninnu ka nisi tɔlɔnin wolowulan wolu dɔn.
[21] Ai wɔli kɔ ai dɔnna, mɔɔ tɛɛ tɛ se a lɔnna ko ai na fen ne dɔnna, kamasɔlɔn ai ma bɔ ai suu kɔlɔ la. Wo kɛ, ǹ ka kunun.
[22] Ǹ ka sunɔɔ kɔtunun ka siwo gbɛlɛ kɛ, ka sɛnɛfen tizan wolowulan ye gban kelen na, minu den bɛ kumayanin k'ai keinya.
[23] Kɛɛ tizan wolowulan gbɛlɛ ka fɛlɛn dɔ wolu kɔ, ai den lajanin tɛɛ, k'ai lafɔlɔ iwo telema fɔɲɛ vɛ sena bin ma.
[24] Telemanin, tizan lafɔlɔnin wolu ka tizan kein wolowulan wolu bɛ dɔn. Ǹ ka wo bɛ ɲafɔ ǹa basitiilu yɛ, kɛɛ ai dɔ pai ma se siwo wolu kɔlɔ fɔla ǹ yɛ.»
[25] Wo fɔ masakɛ bolo, Jusufu do vɛɛ a yɛ: «Iya siwo fila bɛ yi kɔlɔ kelen ne le. Ala kɛtɔ min kɛla, a vɛ wo le jiya i la.
[26] Nisi kein wolowulan wolu yi san wolowulan ne le. Tizan kein wolowulan wolu fana yi san wolowulan ne le. Ai bɛ yi kɔlɔ kelen ne le.
[27] Nisi balanin wolowulan, minu bɔnin kɔɔ kɔlɔ dɔ wolu kɔ, wolu yi san wolowulan kɔɔn fitina le le. Tizan fofo wolowulan wolu, fɔɲɛ na minu lafɔlɔla, wolu fana yi san wolowulan kɔɔn fitina le le.
[28] Ǹa masakɛ, a kɛtɔle iwo ǹ n'a fɔla i yɛ teme. Ala kɛtɔ min kɛla, a na wo le jiyala i la.
[29] Sɛnɛfen sawatitɔle san wolowulan natɔ min nɔ Misilan jamana fan bɛ lɔ.
[30] Kɛɛ san wolu vɛ timinna, Misilan jamana kɛtɔ san wolowulan kɛla kɔɔn nɔ, fɔɔ ka mɔɔlu laɲina sɛnɛfen sawati san timinnin wolu lɔ. Kɔɔn kɛtɔ jamana lɔbanna,
[31] fɔɔ ka mɔɔlu hangili bɔ sɛnɛfen sawati san timinnin wolu lɔ, kamasɔlɔn kɔɔn gbeleyatɔle bubale.
[32] Ǹa masakɛ, i v'a yena i na siwo wo kɛla siiyama fila le, wo n'a jiya yi la k'a fɔ ko Ala vɛ ko wo latɛɛ butu. A do kɛtɔ aa kolatɛɛnin wo lataamana jona jona.
[33] «Wo lɔ saa ǹa masakɛ, i yi diɲa, i yi mɔɔ hangilima dɔ ɲinin, min yi se kolu ɲabɔla kobɛn, i yi wo tii lasii Misilan jamana kunna.
[34] Wo vɛ kɛla, i yi baalekuntii dɔlu lasii jamana kunna, minu kɛtɔ sɛnɛfen looluna lɔsii makilila Misilan fan bɛ lɔ sɛnɛfen sawati san wolowulan kɔlɔ.
[35] Ai ka kan ka balo bɛ ladɛn sɛnɛfen sawati san natɔlu kɔlɔ, k'a ladalo solu kɔnɔ masakɛ ya seetiiya lɔ, ka bɛn jama ya baloko ma.
[36] Balo wolu ladalonin ka kan ka to jamana yɛ, ka bɛn san wolowulan kɔɔn natɔ ya ko ma, minu dontɔ Misilan jamana fan bɛ lɔ, alako jamana kana taa halaki kɔɔn bolo.»
[37] Jusufu na min fɔla, wo ka diya masakɛ ni a kankɔlɔsiilu bɛ yɛ.
[38] Masakɛ do vɛɛ a kankɔlɔsiilu yɛ: «M'i se mɔɔ mindɛ sɔlɔnna, Ala ya niifɔɲɛ yi min kan iwo kɛ́ min?»
[39] Wo fɔ masakɛ bolo, a do vɛɛ Jusufu yɛ: «Ni Ala vɛ ile lalɔnni ko min bɛ la, a lagbɛyine k'a fɔ ko i ɲɔɔzii hangilima ni lɔnnila tɛ je.
[40] Ile siitɔ ǹa masabon kunna, ǹa mɔɔlu bɛ kɛtɔ duuma fan tala i yɛ, iwo i y'ai jamalila teme. Ǹa masayasiifen kelenpesa le kɛtɔ ǹ lafisayala i le.»
[41] Masakɛ do k'a fɔ Jusufu yɛ kɔtunun: «I y'a ye, m̀'i lasii Misilan jamana fan bɛ kunna yi ne.»
[42] Wo fɔ masakɛ bolo, a ka aa koina bɔ a bolokɔni la, aa masaya tɔɔmase yi min kan, ka koina wo don Jusufu bolokɔni la. A do ka a masili faani gbɛ ɲɛnɛmalu le, ani ka sanu jɔlɔkɔ bila a kanna.
[43] Wo kɛ, a ka Jusufu lajɛlɛ kɛlɛkɛwotolo dɔ kɔnɔ, a latuunna deinin tɛɛ min bɔlila. A tɛɛ vɛ kɛla taala tɛɛ o tɛɛ lɔ, a lakanabalu tɛɛ ai kan labɔla a ɲa, ai vɛɛ: «Ài yi bɔ siya la! Ài yi bɔ siya la!» Masakɛ ka Jusufu lasii Misilan jamana fan bɛ kunna ten ne.
[44] Masakɛ k'a fɔ Jusufu yɛ, a vɛɛ: «Ǹe le masa le, kɛɛ Misilan jamana fan bɛ lɔ, ni i ma diɲa a ma, mɔɔ foi kà a bolo niwotɛ a sen kɔlɔta.»
[45] Masakɛ ka Jusufu tɔɔla ko Zafina-Paneya (wo kɔlɔ le ko «Gbono ɲafɔba»). A do ka Asenati di a ma fulu boloma, Potifɛla denmoso. Potifɛla tɛɛ salakalaseba le le On so kɔnɔ. Jusufu ka a fanga la Misilan jamana kɔkan ten ne.
[46] Jusufu si danma ka kɛ san bisawa (30) le ngɛ, a ka baale damina masakɛ yɛ. Jusufu do ka bɔ masakɛ kɛɛna ka taa Misilan jamana lɔtaama.
[47] Sɛnɛfen sawati san wolowulan wolu kɔlɔ, sɛnɛfen ka ɲia bɛlɛbɛlɛ kɛ.
[48] Jusufu ka to balo wo bɛ ladɛnna Misilan jamana kɔnɔ haan fɔɔ san wolowulan, a vɛ balo wolu ladalola solu kɔnɔ, ai tɛɛ minu ladɛnna ka bɔ je laminin sɛnɛlu lɔ.
[49] Jusufu ka sɛnɛfen kɛsɛ jilika jaan ladɛn fɔɔ a k'i nɔningɛ a kɔndɛko ma, kamasɔlɔn a walanin tɛɛ iwo kɔɔji kawunna kiɲɛ, min dan tɛ se lɔnna.
[50] Kɔɔn waate ka se, k'a talan denkɛ fila tɛɛ vɛ sɔlɔn Jusufu yɛ. Ai ba le tɛɛ Asenati le, Potifɛla denmoso, min tɛɛ salakalaseba le On so kɔnɔ.
[51] Jusufu k'a fɔ, a vɛɛ: «Ala vɛ ǹ laɲina ǹa tɔlɔya ni ǹ fa ya demaya bɛ kɔ.» Wo le k'a kɛ, a ka a denkɛ kunfɔlɔ tɔɔla ko Manase (wo kɔlɔ le ko «Ǹa ɲinako»).
[52] Jusufu denkɛ filana sɔlɔnnin, a k'a fɔ, a vɛɛ: «Ǹ na tɔlɔya masɔlɔnna jamana min nɔ, Ala vɛ ǹ jili woja.» Wo le k'a kɛ, a ka den wo tɔɔla ko Efilaimu (wo kɔlɔ le ko «Ka jili jili»).
[53] Sɛnɛfen sawati san wolowulan wo dafanin Misilan jamana lɔ,
[54] san wolowulan kɔɔn fitina ka damina iwo Jusufu n'a fɔla teme. Kɔɔn ka don jamana tɔlu bɛ kɔnɔ, kɛɛ balo tɛɛ sɔlɔnna Misilan fan bɛ lɔ.
[55] Kɔɔn ka gba damina ngɛ Misilankalu la, ai k'ai dalakasi Misilan masakɛ yɛ baloko lɔ. Masakɛ do vɛɛ ai yɛ: «Ài yi taa Jusufu fɛlɔ. A vɛ min min si fɔla ài yɛ, ài yi wo kɛ.»
[56] Kɔɔn ba fitina senin jamana fan bɛ lɔ, Jusufu ka bolonnu bɛ da laka, ka balo fele damina Misilankalu ma, kamasɔlɔn kɔɔn tɛɛ vɛ gbeleya Misilan fan bɛ lɔ.
[57] Mɔɔlu tɛɛ taala Misilan ka bɔ jamana tɔlu bɛ lɔ, min y'a kɛ, ai yi balo san Jusufu ma, kamasɔlɔn kɔɔn tɛɛ vɛ gbeleya duukolo fan bɛ lɔ.