[1] Dunuɲa damina lɔ, mɔɔ bɛ tɛɛ kan kelen ne fɔla, k'ai dɛn kan kelen na.
[2] Ai do ka bɔ telebɔ fannɔ ka taa gbɛkɛnɛ ba dɔ ye Sinali duu lɔ, k'ai sii je.
[3] Wo kɛ, ai k'a fɔ i ɲɔɔ yɛ, ai vɛɛ: «Ài m'i biliki gbasi k'ai ɲɛnin kobɛn.» Ai tɛɛ biliki kɛla kawa le ɲɔɔ le, ka mana fin kɛ bɔɔ ɲɔɔ le ka biliki wotɛdon wo le.
[4] Ai do vɛɛ kɔtunun: «Ài wuli, ài m'i so labɔ mɔ jɛlɛ yɛ, ani ka sangaso lɔ min kunnama yi se sangbolo ma. Mɔ yi mɔ mangutu labɔ, min y'a kɛ, mɔ kana taa jɛzɛn duukolo fan bɛ lɔ.»
[5] Wo kɛ, mɔ Tii Ala ka jii so ni sangaso lasaako lɔ, mɔɔnivinnu tɛɛ minu lɔla.
[6] A do vɛɛ: «A ye, ai bɛ yi jama kelen ne le, ai bɛ do yi kan kelen ne fɔla. Ai yi baale min kɛla yi ne, aiya baale kunfɔlɔ le ve le. Ni a ka to ai taa ma, ai vɛ ko ko si jatesiila, foi tɛnala ai lakolila wo ma.
[7] Ài m'i jii vɛ, m'i taa ai kan ɲaami, min y'a kɛ, ai kana i ɲɔɔ kumakan ɲaye butu.»
[8] Mɔ Tii Ala do k'ai labɔ woja ten ne, k'ai lajɛzɛn duukolo fan bɛ lɔ. Wo le ka aiya so labɔko lɔsa.
[9] Woja tɔɔ ka la ten ne ko Babilɔn (wo kɔlɔ le ko «Ɲaami»), kamasɔlɔn mɔ Tii Ala ka dunuɲamɔɔlu bɛ kumakan ɲaami wo le ja, ka ban k'ai lajɛzɛn duukolo fan bɛ lɔ.
[10] Sɛmu bɔzɔnnu ya taliku le ne. Sɛmu si danma senin san kɛmɛ (100) lɔ, san fila tufanaji timin kɔ, a ka Alipakisadi sɔlɔn.
[11] Alipakisadi sɔlɔn kɔ, Sɛmu ka san kɛmɛ loolu (500) kɛ. A do ka denkɛ ni denmoso gbɛlɛlu sɔlɔn.
[12] Alipakisadi si danma senin san bisawa ni loolu (35) lɔ, a ka Sɛla sɔlɔn.
[13] Sɛla sɔlɔn kɔ, Alipakisadi ka san kɛmɛ naani ni san sawa (403) kɛ. A do ka denkɛ ni denmoso gbɛlɛlu sɔlɔn.
[14] Sɛla si danma senin san bisawa (30) lɔ, a ka Ebɛli sɔlɔn.
[15] Ebɛli sɔlɔn kɔ, Sɛla ka san kɛmɛ naani ni san sawa (403) kɛ. A do ka denkɛ ni denmoso gbɛlɛlu sɔlɔn.
[16] Ebɛli si danma senin san bisawa ni naani (34) lɔ, a ka Pɛlɛgi sɔlɔn.
[17] Pɛlɛgi sɔlɔn kɔ, Ebɛli ka san kɛmɛ naani ni san bisawa (430) kɛ. A do ka denkɛ ni denmoso gbɛlɛlu sɔlɔn.
[18] Pɛlɛgi si danma senin san bisawa (30) lɔ, a ka Lewu sɔlɔn.
[19] Lewu sɔlɔn kɔ, Pɛlɛgi ka san kɛmɛ fila ni san kɔnɔ (209) kɛ. A do ka denkɛ ni denmoso gbɛlɛlu sɔlɔn.
[20] Lewu si danma senin san bisawa ni fila (32) lɔ, a ka Selugi sɔlɔn.
[21] Selugi sɔlɔn kɔ, Lewu ka san kɛmɛ fila ni san wolowulan (207) kɛ. A do ka denkɛ ni denmoso gbɛlɛlu sɔlɔn.
[22] Selugi si danma senin san bisawa (30) lɔ, a ka Naholi sɔlɔn.
[23] Naholi sɔlɔn kɔ, Selugi ka san kɛmɛ fila (200) kɛ. A do ka denkɛ ni denmoso gbɛlɛlu sɔlɔn.
[24] Naholi si danma senin san muan ni kɔnɔ (29) lɔ, a ka Tela sɔlɔn.
[25] Tela sɔlɔn kɔ, Naholi ka san kɛmɛ ni san tan ni kɔnɔ (119) kɛ. A do ka denkɛ ni denmoso gbɛlɛlu sɔlɔn.
[26] Tela si danma senin san biwolowulan (70) lɔ, a ka Ibulama ni Naholi ni Halan sɔlɔn.
[27] Tela bɔzɔnnu ya taliku le min ne. Tela ka Ibulama ni Naholi ni Halan sɔlɔn. Halan ka Luti sɔlɔn.
[28] Halan ka sa, ka a fa Tela kɛnɛ to a fɛso Uli, Babilɔn jamana lɔ.
[29] Ibulama ni Naholi ka mosolu fulu. Ibulama moso tɔɔ le tɛɛ ko Salayi. Naholi moso tɔɔ tɛɛ ko Milika, Halan denmoso. Milika ni a badenmoso Isika fa le tɛɛ Halan ne.
[30] Wo k'a talan, Salayi tɛɛ moso malɔnin ne le. A tɛɛ ma den sɔlɔn ba.
[31] Tela ka bɔ Uli, Babilɔn jamana lɔ, min y'a kɛ, a yi t'i sii Kanaan duu lɔ. Tela ka taa a den Ibulama le, ani a mamani Luti, Halan denkɛ, ani a bilanmosoni Salayi, Ibulama moso. Kɛɛ ai se mingɛnin Halan so kɔnɔ, ai k'ai majii je.
[32] Tela si danmajiya ka kɛ san kɛmɛ fila san loolu (205) le le. A do ka sa Halan so kɔnɔ.